АПОКАЛИПСИС ИОАННА БОГОСЛОВА И ЕВАНГЕЛИСТА.
(с толкованиями архиепископа Андрея Кесарийскаго.)

Слово А (1)-е. Глава А (1)

А (1) Апокалипсис Иисуса Христа юже дастъ ему Богъ показати рабомъ своимъ. Им же подобаше быти в соборе сказа.
Апокалипси убо есть сокровенных тайнъ откровение. Егда ся озарится умъ. Или от сония яже суть от Бога. Или по чистотѣ от Божия просвещения. Дати же сию рѣчь Христу. Человеческое здѣ о Немъ слово сотворяетъ. Понеже во Евангелии словесы высоки. И Боголѣпны паче всѣхъ глас. Здѣ же служащим ангеломъъ, и сего нарицающимъ раба Христова. Божества велика ту яви. Тому бо работна суть всяческая. Им же быти являетъ вскоре.

В (2) Пославъ ангеломъ своимъ, рабу своему Иоанну иже свѣдѣтельствова Слово Божие и свѣдѣтельство Иисуса Христово елико видѣ.
Христосъ рече яко Владыка своему рабу ангеломъ си нарекова. Исповѣдавъ обое свѣдѣтельство. Им же вины имъ свѣдѣтельствовати, и проповѣдати. Обращения ради слышащимъ яже суть утаяются человеком яже хотять быти. Пророчески бо видѣ есть обое. Сии бо суть яже преставляют и настояща времени и будущаго.

Г (3) Блаженъ чтый и слышай словеса пророчествия книги сия. И соблюдающеи написанная, время бо близъ.
Блажени чтуще и дѣанми, и слышаща близъ настоящее время есть. Им же блажениемъ улучити достоитъ. Время бо прилежати дѣле. Яко же рече Господь. Дѣлайте дондеже день есть.

Д (4) Иоаннъ седмимъ Церквамъ сущимъ во асии. Благодать вамъ и миръ от Сущаго иже бѣ и грядущаго. От седми Духъ иже суть пред престоломъ Его.
Седмочисленымъ числомъ тайну всѣмъ Церквамъ сказаетъ. Еже есть подобно недѣлнымъ днемъ жития сего. Тѣм же седмь ангелъ и З (7) Церквей сказаетъ и воспоминаетъ. Имъ же рече Благодать вамъ и миръ от Триипостаснаго Божества. Сказаетъ убо Отца еже есть Сущий. Якоже рече к Моисеови Азъ есмъ Сый. А еже глаголетъ и иже бѣ слово и еже бѣ у Бога искони. Грядущаго же Параклита менитъ иже присно крестить приходитъ крещениемъ на церковная чада. З (7) же Духъ да З (7) ангелъ разумевати приемши строение церковное. Якоже Святый Апостолъ рече. Свѣдѣтельствуя пред Богомъ избранными ангелы, и другое яко же есть от Сущаго иже бѣ и грядущаго. Понеже одержит в себѣ начатокъ, и среду и конець. З (7) же Духовъ дѣтели Святаго и Животворящаго Духа. А прочая о Христове воплощении.

Е (5) Иже от Иисуса Христа иже есть Свѣдѣтель вѣрнымъ Первенецъ из мертвыхъ князъ и царей земныхъ любящему ны и от грѣхъ наших разрѣщему ны Кровию Своею. И сотвориль есть намъ Царствие. Иерей Богу Отцу своему. Тому Слава и Дръжава во вѣкы. Аминь.
Той бо есть свѣдѣтельствованный при Понтийстем Пилате вѣренъ во всехъ словесех Своихъ. Первенец из мертвых. Яко животъ и воскресение. Той бо Сый и Самъ начатокь и конець. К тому яко же умершу первое и воскресение не узрятъ смерти, но во вѣкы имут жити. Князь же яко и Царь царьствующимъ Господь господствующимъ. Равномогий отцу Единосущен. А инако яко Князь. Тѣмъ иже суть царствовали над земными похотьми возлюбльшему ны. И разрѣщему ны. От скверных грѣхов омывшу. Пролитиемъ Животворящия Крови и Воды. И сотворшу ны Царское иерѣйство вмѣсто бесловесных жертвъ. Жертву живу словесную службу Отцу приносящи.

S (6) Се грядеть Господь со облаки и узритъ Его всяко око и иже прободоша. И плач и вопль сотворять о Немъ вся колѣна земская. Аминь.
Заколеный здѣ яко Агнецъ во отчей Славѣ. Судитель на облацехъ приидетъ. Или на бесплотныхъ разумѣваемых ангельских силахъ. Или на таковыхъ якоже видевъ. Иже в Фаворьстей горѣ ученик покрыша. Всяко же око узритъ Его иже прободоша, и вся колѣна земная. И иже неяша вѣры ему, а има словеньски и жидовски утвержаютъ слово се.

З (7) Азъ Есмь Алфа и Омега начатокъ и конець глаголеть Господь Самъ, и бывая и грядый Вседръжитель.
Христа здѣ сказаетъ Бога и Держащаго всяческая. Безначална же и кончины не имущаго. Яко со Отцемъ сый присно, и сего ради воздастъ комуждо по дѣломъ его.

И (8) Азъ Иоанн братъ вашъ и обѣшникъ в печали и во Царствии Небеснемъ. И в терпѣнии Иисуса Христове быхомъ во острове нарицаемомъ Патомѣ, за Слово Божие, и за свѣдѣтельство Иисусово.
Яко братъ вашъ, рече сый обещникъ вамъ в печалехъ Христа ради. Подобно увѣрение от васъ имамъ.За свѣдѣтельство бо Иисусово осужденъ жити в Патомѣ. Повѣдаемъ вамъ. Яже видѣхомъ в немъ тайны, заточенъ бо сый в Патомѣ. Иоаннъ Богословъ приятъ апокалипси недѣля бѣ.

Глава В (2) Видение в нем же видѣ Иисуса посредѣ З (7) свѣтильник.

Ф (9) Быхъ Духомъ в дни недельный, и слышах за собою глас велий, яко трубу глаголющу, еже видиши напиши в книги. И посли седми Церквам. Во Ефес, и во Измирну, и в Пергамъ, и въ Фиафиръ, и в Сардию, и в Филадельфию, и в Лаодокию.
Духомъ Святым одержимъ. И духовно ухо сотворь в день недельный. И воскресением почтемъ. Слышах Глас велегласенъ. Яко трубнѣ за собою веле гласие, и во всю бо Землю изыде Глас Ея. Являющи Божие безначалие. Иже ми заповѣда видѣния. Седмим церквам. Послати за реченное число недѣлное, преж доходящее будущаго вѣка. Болшей прочих Богомъ сотворено великий Иринѣи сказаетъ.

I (10) И ту обратихся видети глас. Иже глаголаше за мною. И обратихься видѣх З (7) свѣтилник златых горяща. Посредѣ седми свѣтилникъ, подобенъ Сыну Человечу, оболчен в подиръ. И препоясанъ присесцу поясомъ златымъ.
Сказает же ся глаголя. Яко не бѣ простъ глас. Обратих же ся не слышати но и видѣти писа глас тойже бо есть духовный слухъ еже и зракъ. И посредѣ же свѣтилникъ Христа подобна человеку понеже есть Богъ. И яко простъ Человекъ оболченъ в подиръ. Яко и Архиерѣй вышнимъ силамъ по чину мельхиседекову. Поясомъ же златымъ опоясанъ но не в чресла. Яко и прочии человецы одержания ради похотнаго, к симъ бо не приступаетъ Божия Плоть но в перси при сесцу. Дабы ся удержалъ Человеколюбиемъ праведный Божий гнѣвъ. И оба завѣта сирѣчь Господня сосца. Да ся явитъ препоясающе истинна им же питаются вѣрнии. Злат же поясъ честныя ради и чистоты.

АI (11) Глава же Его и власы бѣлы яко ярина бѣла и яко снѣгъ и очи Его яко пламень огненъ.
Аще убо есть ино в нас ради. Но древнии паче же превѣченъ. Сему суть приклад на бѣлыи власы. Очи же Его яко пламень огненъ Святыя убо просвѣщающа. А скверныя опаляще.

ВI (12) Нозѣ ему подобни мѣди халколивановѣ яко в пещи разженѣ.
Нозѣ разумѣваемъ, плотное смотрение на нею же ходяще. Наше спасение содѣя. Нозѣ же и церковная основания. Или Святии Апостоли напастьми ражженѣ мѣде же разумѣвати человече. А ливанъ Божественное Естество или проповѣдания мѣдным гласом, а языческое обращение ливанова воня.

ГI (13) Глас же Его яко глас вод многъ.
И общь глас Самогоже и Духа. Его же источницы воды живы потекоша из чрева вѣрныхъ и по всей Земли велегласно возшумѣша.

ДI (14) Держай же в руцѣ своей десней звездъ З (7). И изо уст Его мечъ обоюдуостръ изоостренъ исходяй. И лице Его аки солньце сияетъ в силѣ своей.
И звезд З (7) церковныя ангелы рече. Мечь же обоюдуостръ на нечестивыя отвѣт рече, еже есть отсѣчения, паче всякого меча обоюдуостра. Светѣние еже есть не се видимое но мысленое. Солнце бо сый праведное своею силою и властию просвѣщает не яко солньце видимое.

ЕI (15) Егда видѣх и падохъ пред ногама Его яко мертвъ, и положи десницу Свою на мнѣ и глаголя не бойся, Азъ Первый и последний, и живый и быхъ яко мертвъ, и се живъ есмь и во вѣкы вѣкомъ Аминь.
В тоже видеши апостолъ внеже и Даниилъ. Иисусъ Навинъ. За немощь человеческаго роду укрѣпи Христе, рекъ ему не бойся. Не умертвити бо тебе приидохъ. Васъ же ради Безначаленъ Сый и Бесконеченъ мертвъ бывъ.

SI (16) И имамъ ключа смерти и аду.
Ключа менитъ умертвити си и оживити.

ЗI (17) Напиши убо яже видѣ. И яже суть и им же подобает быти посихъ. И тайну седмь звѣздъ якоже видѣ на десницы Моей и З (7) свѣтилникъ златых, и З (7) звѣздъ ангелъ седми церквей. Суть седмь светильникъ. Седмь церквей есть.
Имущая рече в себѣ и дръжащая слово животное, злати же за чисть и безскверную вѣру. При коемждо бо и ангелъ хранитель стоитъ. Понеже бо есть Христос Свѣтъ Истинный. Сего ради свѣтилницы суть и може нарицают. И обогощают свѣтом Его яко нощъ жития сего, просвѣщающа. Яко и свѣщницы церковнии. Яко свѣтила тайная, по сих семди звѣздъ.

Глава Г (3). Написание къ Ефеския церкви ангелу.
Ангеломъ к церкви глаголет. Яко же се кто учитель ко учимому, обычай бо имуть учитель на ся взимати ученичи прегрѣшения или исправления. Хотя убодобити себе учимаго.

ИI (18) Ангелу Ефеския церкви напиши глаголящя тако глаголеть. Держай З (7) звѣзд в десницы Своей ходяй посредѣ З (7)-ми свѣтилникъ златых вѣмъ дѣла твоя первая и труд твой и терпѣние твое. Не поможеши носити злых, и искусил еси глаголющаяся быти апостолы.
О двоемъ церкви приемля и едино же ей зазираетъ. Еже и на средѣ положи исправления. Положи обоюду мысль и труд и терпѣние вѣры ради. И еже злыя чюжая творити похвалны яко всякому духу вѣры ради неймеши, искуси лживая апостолы.

ФI (19) К сим же и дѣла скверных николаитенъ возненавидѣна суть. И обрѣте я лжа, и терпѣние имаши и понеслъ еси за имя Мое и трудися, но имамъ на тя яко любовь твою первую остави помяни убо откуду бо спаде, и покаися и первая дѣла сотвори.
Суть же николаи тя не от Николы иже бѣ от З (7)-ми дияконъ нареченных от апостолъ. Иже ся развращъ злѣ учаше. Зазират же яко по искренимъ, любвѣ не имуть теплы.

К (20) Аще ли же ни грядути скоро и двигну свѣтилникъ твой от мѣста своего. Аще не покаешися но се имаши. И яко ненавидиши дѣлъ николаитескъ их же Азъ ненавижу.
Церковное движение есть, Божия Благодать и обнажение им же помнозѣ молви есть. От злых духовъ и человѣкъ лукавых. Иже имъ служатъ. Етери же движение менятъ преставление Ефескаго града стола в царь град. А дѣлъ николайтескъ что рад ненавиди Богъ. Иже бо испытает ересь ихъ тот увѣсть.

КА (21) Имеяй ухо слышати да слышит, что Духъ глаголет к Церквам побѣждающему дам ему ясти от древа животнаго. Еже есть посредѣ рая Божия.
Плотное ухо всякъ человекъ имать духовное же токмо духовны. Еже ся приложит Исаии побѣжающему же ны брань дѣмонскую, обѣщав дати снѣсти от животнаго древа. Сиречѣ причаститися в будущем вѣце добре приклад бо. Древом сказает живот вѣчный. Иже есть Христа яко же рече Соломон о прочей премудрости древо животное. И сам бо Иоанн вѣща о Христѣ Той есть Богъ и живот вѣчный. Ему же Слава во вѣки. Аминь!

Слово второе.
Глава Д (4) Нарекование Измирския церкви ангелу.

КВ (22) Ангелу сущу во Измирней церкви, напиши тако глаголеть Первый и Послѣдний иже бысть мертвъ и ожыве.
Первый яко Бог. Последний же яко в последни времена бывъ яко мертвъ тридневною смертию. Отверзе намъ живот вѣчный и бесмертный.

КГ (23) Вѣмъ твоя дѣла, и скорбь и нищету. Но богат еси!
Печаль и нищета о плотьских юже терпиши Мене ради. Бьемъ невѣрными и лишаемъ своего имения. Богатъ же еси духовными имѣя сокровище сокровенно в сердечнемъ селѣ!

КД (24) Власфимия от глаголющих быти июдея себѣ и не суть но сонмище сатанино!
Не суть бо еже глаголютъ нестъ бо июдея еже не яве но иже в тайне. Июдей бо исповѣдание сказается.

КЕ (25) Ничтоже не бойся, яже хощеши прияти. Себо иматъ диаволъ всажати от васъ в темницу да искуситеся. Имате скорбъ десят дней. Буди вѣренъ до смерти, и дам ти животъ вѣчный.
Не бойся рече напастныя печали. Рече еже бываетъ от невѣрных ранами и десяти бо есть день. А не болѣ. Тѣм же и нерадити о смерти. Яко в мало время приносит вѣнца побѣдныя

КS (26) Имеяй ухо слышати да слышитъ. Что Духъ глаголеть церквамъ. Побеждаяй не имать вредитися от смерти вторыя.
Иже рече духовно слышитъ и побѣдитъ диаволя знания. Аще первую плотьскую смерть прииметъ. И не будетъ вреженъ второю смертию геоньскою.

Глава Е (5) Сказание Пергамасийския церкви ангелу.

КЗ (27) Ангелу Пергамасийския церкви напиши тако глаголет имѣяй мечь обоюдуостръ изоощрен и вѣм гдѣ живеш, Идѣ же престолъ сотонинъ.
Идольский град бѣ той к нему же сии рече суть. И сущая вѣрныя в нем терпѣ ины приемля мечь же обоюдуостръ. Или Евангельская словеса речет еже сердца пресѣкаетъ и отлучаетъ от невѣрных. Или отвѣтъ на нечестивыя отсеченыи.

КИ (28) И держиши Имя Мое и не отвержешися Вѣры Моея. И в Моя дни Антипасъ мученикъ Мой вѣрный иже убиенъ бысть вами, идѣже сотона живетъ!
Антипа сей именемъ мужь бѣ терпѣливь ввергаме его же мучение и не поминаетъ Евангелистъ к покаянию заблуджьшимъ.

КФ (29) Но имам на тя мало яко имаши держащая то учение валаамово. Иже учаше валака положити соблазнъ пред сыны израилевы ясти жертву идолскую и любы творити. Яко имаше ты держащая учение никалаитское, тако же его же Азъ ненавижу.
Двое зло имѣя град той множаише бяху в нихъ еллина нарицаеми, вѣрнии осквернении николаитяне со пшеницею всѣяли плевелы злѣ и тѣм же и валаама помяну рекъ. Иже учаше валака разумѣваемаго диавола видимъми.

Л (30) Покайся аще ли же ни прииду ти скоро. И брань сотворю с ними мечемъ устъ Моихъ.
Со прощением человеколюбие. Не с тобою бо рече, но стѣми сотворю брань иже болятъ не исцѣлно.

ЛА (31) И имѣяй ухо слышати да слышит что глаголет Духъ церквам. Побѣждающему дамъ ему ясти от маны сокровенныя. И дамъ ему камень бѣлъ драгъ. И на камени имя ново написано. Его же никто же невѣсть токмо приемляй.
Манна сокровенная есть Хлѣбъ Животный сошеды с Небесъ нас ради и снѣден бывъ примѣнно же Благая. Яже хотят быти и манна же нарицается, яко с Небеси сошедша. Отнюду же и вышний Иерусалимъ. Приидет же камень бѣлъ иже побѣдит сирѣчь имя ново, его же не видят на семъ свѣте. Его же бо рече око не види ни ухо не слыша, и ум не разумѣ будущих благъ и ино имя Святии приемлютъ.

Глава S (6) Написание Фиартийския церкви ангелу.

ЛВ (32) И ангелу Фиартийския церкви напиши. И тако глаголет Сынъ Божий. Имѣяй очи свои яко пламень огненъ. И нозѣ Его подобни мѣди халколивановъ.
Речено есть опламенною очию. Како освещаетъ праведныя, а грѣшныя опаляет нозѣ же иливанную мѣдь сказаетъ Христово благоухание во спасаемых разумѣваемо яко крижмы. А не размѣсно смѣшение Божества и Человечества той бо есть разженъ Святымъ Духомъ. Мысльми человеческими не обумѣино.

ЛГ (33) Вѣм твоя дела. И любовь и вѣру и службу и терпѣние и дѣла твоя послѣдняя больша первых. Но имам на тя яко оставляеши жену Езавель глаголющую себѣ пророчицу. И учитъ и льстит моя рабы, любы творити и снѣсти жертвы идолския.
Аще бо вѣры ради и службы требующих говение ваше и терпѣние приемль. Но вправду зазираю вас рече. Яко николаитьскую ересь премѣнну и нареченную Иезавел зловѣриа ради студодѣяния остависте свою волю да и рабом моим соблазны творити. И обращаетъ я на идолския жертвы. Их же ся суть добре отрекли. Ей же и недостоит воля творити нивидет ея за несть пророчица творит неприязненым духомъ дѣема.

ЛД (34) И дах ей лѣта да покается. И не хощет покаяти от любодѣяния свое.
Злая ересть рече время покаяния приимши и не хощетъ приити покаятися.

ЛЕ (35) Се полагаю на одрѣ любодѣющаго с нею в скорбь велию. Аще не покается от дѣл своих. И чада их умрут смертию.
Третие и болѣзнью и в смерть вложит я яжеся с нею сквернятся от Бога любы дѣющии аще не обратятся к нему покаяниемъ.

ЛS (36) И разумѣют вся Церкви яко Азъ есмь Богъ, испытаяй сердца и утробы, и дам единому комуждо подѣлом их вам же глаголю и прочиим сущим в Фиантире. Иже неймут учения сего. Иже неции неразумѣша глубины сатанин от них, яко глаголют и не возложу на вы тяготы иноя токмо може имате и держите дондеже прииду.
Вѣм убо сия ко прелщенным еретиком и лстащим иным. Аки к простѣишим рече понеже к злым словотворцем. Простынею не можете воздержатися яко глубинъ сатанинъ невѣдуще, не ищут о вас иноя словесныя брани. Но храните учения еже приясте дондеже прииду.

ЛЗ (37) И соблюдающему и побеждающему до конца дѣла моя, до конца дамъ ему власть на языцехъ. И упасет я жезлом желѣзным яко сосуды скуделнича сокрушит я. Яко же и Азъ приях от Отца Моего и дам ему звѣзду утренюю.
Творящему рече дѣла моя дам ему область над Е (5)-ю или I (10)-ю градохъ, якоже во Евангелии рече, или сего ради на невѣрных сказует судъ. Имъ же прелщении яко жѣлезною палицею пасоми искушени будут вѣрными. А еже яко же и Азъ прияхъ от Отца Моего человечески глаголет за плотское приятие.

ЛИ (38) И дам ему Звѣзду утренюю имѣяи ухо слышать да слышит что глаголетъ Духъ Церквамъ.
И звѣзду же менитъ юже и Петръ глаголет. Яко восияет Денница в сердцехъ вашихъ. Нарицает же ся Денница Креститель Иоанн Ифезвитянинъ Илия с нима же Денница честь имѣти имутъ, иже побеждаютъ диавола. Разумѣвати же и день иже хощетъ быти. И прогнати жития тму свѣта сего. Приидетъ бо пред праведным солнцем просвѣщая Святых. Егоже Свѣтом и мы просвѣщены будемъ. Волею Отца со Святым Духомъ и ныне и присно и во вѣком. Аминь.

СЛОВО Г (3)-е. Глава З (7)
Послание Сардийския Церкви ангелу.

ЛФ (39) Аггелу Сардийския Церкви напиши тако глаголет Имѣяй З (7) Духъ Божий З (7) звѣздъ. Вѣмъ твоя дѣла, яко имя имаши яко живъ еси и мѣртвъ.
Седмь звѣздъ Божии яко же ангелъ рехомъ преж З (7) иже Духъ или самыя сия дѣтели Святаго Духа. Сирѣчъ даръ якоже Исаия глаголетъ. К церкви иже глаголетъ яко толико мя лѣтъ имаши животныя вѣры, а мѣртва еси злыми дѣлы.

М (40) Буди бдя и утвержая прочая. Им же бо умрети и необрѣтохъ бо дѣлъ твоихъ скончаных пред Господемъ Богомъ.
Сонъ рече лѣности отряси. И уды, иже хотятъ умертвити. Невѣрствиемъ укрѣпи. Не начатокъ бо добрых дѣлателя востанливаго.

МА (41) Поминай убо тако приятъ и слышай соблюдай, и покайся.
Предание еже рече от ангелъ приятъ соблюди и от лѣности покайся.

МВ (42) Аще убо не бдиши. Прийду яко тать не имаши чюти в кий годъ, прииду на тя.
Сирѣчь когождо смерть или общее скончание неразумно всѣмъ готовым убо от труда покой, а не готовымъ тать душевную наводитъ послѣднюю смерть.

МГ (43) Но имаши мало именъ в Сардии иже не оскверниша ризъ своих. И ходити имутъ со Мною в белах ризах яко достойни суть.
Се добро имаши иже суть нѣцыи етери. Плотских ризъ гнусивыми дѣлы неосквернили. Иже со Мною в бытии свѣтлы имуть носити я, яко соблюдающе чисту и свѣтлу нетлѣнну одежду свою.

МД (44) Побѣждаяй сей облечется в ризы бѣлы не имамъ отмыти имени его от книги животныхъ, исповѣмъ имя его пред Отцемъ Моимъ и пред ангелы Его. Имѣяй ухо слышати да слышитъ, что Духъ глаголетъ к Церквамъ.
Прежде реченнымъ рече. Побѣждая побѣжениемъ своих добродѣтелей, и ризами просвѣтится яко солнце. И имя его в животных книгахъ будетъ пред Отцемъ Моимъ, и Святыми Силами яко добрии мученицы Господни.

Глава И (8) Написание Филаделфийския Церкви ангелу.

МЕ (45) И ангелу Филаделфийския Церкви напиши тако глаголеть Святый Истинный имѣяй ключъ Давидовъ. Отверзая и никтож затворитъ и затворяяй и никтож отверзетъ.
Ключъ Давидовъ область его нарицает по человечеству и паки по Псаломскимъ книгамъ от Святаго Духа. Первы иже по человечеству приемлета В (2) имать Безначалному Божеству, сирѣчь умертвити и оживити.

МS (46) Вѣмъ твоя дела се дахъ пред тобою двери отверсты и никто же может затворити их. Яко малу имаши силу. И соблюде Мое Слово неотвержешися Имени Моего.
От написанныхъ мнии есть град сей. Велииже вѣрою, тѣм же и рече к нему. Вѣмъ твоя дѣла, сиречъ приемлю. Яко же и к Моисеови рече вѣм тя паче всѣхъ. И двери пред тобою учительнаго проповѣдания отверзохъ не могущаяся затворити напастьми. Воля бо Мнѣ не довлѣет. Я не прошу боле силы.

МЗ (47) Се даю от сонма сотонина, глаголющих себе быти июдея и не суть. Но лжутъ и се сотворю я, да приидутъ и поклонятся пред ногама твоима. И разумѣютъ яко Азъ возлюбих тя.
Имѣти рече имаши мзду исповѣдания Моего Именѣ июдейское обращение и покаяние. Иже ся падут пред ногама твоима просяще просвѣщения Моего.

МИ (48) Яко соблюдено слово терпѣния Моего и Азъ тя соблюду от годины хотящая приити на всю вселенную, и искусити живущая на земли. Гряду скоро, держи иже имаши, да никто же не приимет венца твоего.
Годину менитъ прийдущую нечестивыхъ римских царь. Христианское приклонение. Или еже хощет быти на конець вѣка, на вѣрныя от антихриста. Избавити от напасти подобящаяся ей обѣщавает. Добре же рече прииду скоро. По скорби бо дней тѣхъ. Абие Господь приидет. Тѣмъ же велит дръжати сокровище вѣрное неукрадено, да никто же да не погубитъ терпѣннаго венца.

МФ (49) Побѣждающаго сотворю столпа в Церкви Бога Моего. И вонъ не иматъ взыти к тому.
Достоинъ бо иже победитъ противныя силы, столпъ и утвержение станет наистинне недвижимо поступление в ней имы по Апостолу.

Н (50) Напишу на немъ Имя Мое Имя Бога Моего. И имя града Бога Моего. Иерусалиму сходящаго с Небесъ от Бога Моего и Имя новое Мое.
На сердцы бо рече таковаго напишу. Разумъ Божия Спасения поймеши вышняго Иерусалима. Да узритъ красоту сущую в немъ духовныма очима. Новое Имя Ему сказаемо Святымъ, яже рече Бога Моего человеческия от Отцы рече яко плоть нас ради непремѣненъ. Бывъ свыше Иерусалимъ исходящ рече. От ангелъ бо нарече Божии разумъ. И до нас же дошед. Смѣщимся вкупе со Христомъ Главою нашею. Имѣя ухо слышати да слышитъ. Что глаголетъ Духъ Церквамъ.

Слово Д (4)
Глава Ф (9) Нарекование ея Лаодикийския Церкви ангелу.

НА (51) И ангелу Лаодикийския Церкви. Напиши тако глаголеть Аминь. Свѣдѣтель вѣрный, и истинный Властель созданию Божию.
Истина же Христова вѣрным скзается. Паче же яко самъ Иусийския есть истинна. Властель же сий рече Царство. Яко всѣми дѣлы обладый.

НВ (52) Вѣмъ твоя дѣла яко ни студенъ е си не теплъ. Ни да студенъ бывъ ни теплъ тако. Яко обуморенъ еси ни теплъ.
А теплаго христианина глаголеть живущаго в правой вѣре. А объуморена толико крещена суща. А поганьски живущи.

НГ (53) Избавити тя имамъ от устъ Моих. Зане глаголеши яко богатъ есмъ и обогатихся. И ничто же не требую. И не вѣси яко ты еси окаянъ и милъ. И нищетенъ и слѣпъ и нагъ.
Яко се рече обумореное блевотину творитъ такой азъ. Яко скаредно брашно изблюю тя из устъ моих. Зане плевелъ. И богатество сѣмя Божияго Словеси подабляеши и своего духовнаго не чюеши убожества. И слѣпоты мысленною твоею очию наготы от благихъ дѣлъ.

НД (54) Свѣтъ ти даютъ купити злато от мѣнѣ разженно огнемъ. Да обогатишися и в ризы бѣлы да облечешися. И да не явится нагота срамоты твоея. И куруломъ помажеши очи твои и даи зриши.
Аще мыслиши рече обогатится от Мене богатящаго. Стяжи волею твоею и сердцемъ. Хотящимъ злато разжено. Сиречѣ учительное слово просвѣщаемо напастнымъ огнемъ. Им же имѣти имаеши в сердцы своемъ сокровище неоскудное. И одежешися свѣтлою одежею угождениемъ ея от греха одеждеши. Икурилъ же есть бальство отеческое им же прозривъ хранишися от зла.

НЕ (55) Азъ яже аще люблю обадаю и кажу. Ревнуй убо и покаися. О чюдо человеколюбное. Коликою благостию обличаетъ нас на исправление. Се стою при дверехъ ихъ и толку. Аще и кто услышитъ глас Мой. И отверзетъ двери. И вниду к нему. И вечеряю с нимъ и той со Мною.
О чюдолюбное коликою благостынею обличает на исправление. Не нудно речемое пришествие в двери сердечныя, толку. И иже кто отверзетъ. О спасении же веселю. Пищу убо и вечерю сии имамъ питаяися тѣмъ. И можети ся питѣют. Гладъ же менитъ еже не услышати Словесе Божия. И тъмы лестныя избыти.

НS (56) Побѣждающему дамъ ему сѣсти со мною на Престолѣ моемъ яко же Азъ победих. И сѣдох со Отцемъ Моимъ. На престолѣ Его. Имѣяй уши слышати да слышитъ. Что Духъ глаголетъ к Церквам.
Престоломъ Царствие сказаетъ и покой будущаго вѣка. Рече бо иже врага побѣдитъ. Прославленъ будетъ со Мною и воцарится. А еже есть яко и Азъ побѣдих человечески глаголетъ за приятие непобѣдимою бо добрыхъ дѣтели Царство стяжит Божественно. Еже имѣя преже вѣкъ. Но человечество аще ли же кто разумѣетъ. Еже рече ко Апостолом сядете на ВI (12) престолу. Судяще обѣма на десяте колѣнома Израилевома. Нѣсть кромѣ разума. Буди же и намъ побѣжьдшим прославити с Ним. В будущей вѣкъ милостию Его. Яко тому подобает слава. Отцу и Сыну и Святому Духу и нынѣ и присно и во вѣки.

Глава I (10) О видѣнии дверехъ на Небесехъ. И о престолехъ старецъ.

НЗ (57) По сихъ видехъ и се двери отверсты на Небеси и глас первы иже слышахъ яко трубный со мною глаголющъ. Глаголя взыди сѣ мой покажу ти, ему ж подобаетъ быти посихъ.
Отверзение дверное сокровенным таинъ духовных сказаетъ явление, и труба открывающаго велегласие. А еже рече взыди сѣмо, сирѣчь от земных отииду отступити и на Небеси быти умомъ и слышати.

НИ (58) Абие же быхъ в дусѣ. И се Престолъ стоящь на Небесѣхъ и на Престолѣ седящь и сѣдяи бѣ подобенъ видѣнию камене сардеови, аспиду. И бѣ дуга окрестъ престола, тако же якоже видѣние измарагдово.
Глас же услышавы и духомъ рече оградитъ умъ престолъ внадрехъ имже сказается иже есть на Святый и Божий покой. На тѣхъ бо почиваетъ. Понеже здѣ сказаетъ Отца видѣннаго яко вси предании. Видѣниемъ Сыновни. Но и честнемъ камени прикладетъ. И дуга же различны и оувѣтъ благоугодный ангельских силъ являетъ.

НФ (59) И окрестъ Престола Его, престоли КД (24) И на престолѣхъ от КД (24), старецъ сѣдащь, оболчены в бѣлы ризы, и на главахъ ихъ вѣнцы златы.
Сии КД (24) старцы яко нѣцыи глаголют, Авеля и прочая в Ветсемъ Законѣ. Приимашая страсти, паче же подобнѣ разумѣти. ВI (12) патриарха Ияковля сыны. И ВI (12) Апостолы. Им же обѣща сѣсти на ВI (12) престолу, бѣлыя же ризы свѣтлаго жития. И не преступающая радости приклад. А венцы побѣждений, им же побѣдиша злыя дѣмоны укрѣпльшеся.

Ѯ (60) И от Престола Его исходаше молниа и громи и гласи.
Молния свѣтлость являетъ достойныхъ. Громи же страхъ Божия пришествия. А гласи слухъ слышащихъ духовныма очима и ушима.

ѮА (61) Седмъ свѣщъ огнемъ горящь пред престоломъ, яже суть З(7)-ри Дуси Божии. И пред престоломъ море яко сткляно подобно хрусталю.
Духъ сии З (7) ангелъ разумѣти есть престолъ же прочих или дѣтели Святаго Духа сиречъ дары. Яже Исаия глаголеть. Море же стекляно множество Святыхъ силъ. И чистоту и свѣтлость будущаго живота и образ немутный. И хрусталная подобия Небеснаго естества мнимое. Мыслити же есть еда и симъ образом есть постланно мѣсто то.

ѮВ (62) Посредѣ престола и окрестъ престола Д (4) животныя исполнь очесъ со преди и со задѣ.
Престолъ сказается Божия Царствия покой. Внем же и окрестъ серафима видимо много очесная иже приемлютъ свѣтъ Божия разума. Спреди и созади четыре животная четырми лицы четыре составыми же содержится Божия тварь. Или четыре угождения ими же человекомъ угождаетъ или Д (4) Евангелия.

ѮГ (63) Животное Д (4). А (1)-е животное подобно лву. В (2)-е животное подобно тельцу. Г (3)-е животное имый лице человеку. Д (4)-е животное подобно орлу летящу.
Животными силами еже и смотрение Христово сказается. Лвомъ яко царемъ. Тельцем же яко иерѣомъ. Паче же и заколением человекомъ же яко вочеловѣчившимся нас ради. Орломъ же яко подающе Духъ Святый. Еже слетѣ на ны свыше.

ѮД (64) Животная Д (4) единого когождо ихъ имъ по S (6) крылъ. Окрестъ и внутрь уду исполнь суть очесъ.
Сиречь велики и де очесии. Сего ради двема крылома покрываютъ лица, а двема нозѣ. А среднима лѣтятъ да от вышнихъ и глубльшихъ своего разумѣния видятъ говѣния. Им же среднии како Богоначалнымъ просвѣщениемъ Божиим мѣрилом простираются.

ѮЕ (65) Покоя не имуща день и нощь и глаголюще Святъ Святъ Святъ Господь Саваоф Вседержитель. Бѣя и сый и грядый.
Святую Троицу сказаетъ.

ѮS (66) Егда даша животнии Славу и Честъ и Хвалу Сѣдящему на престоле и Живущему во вѣкы вѣкомъ. Падоша КД (24) старцы пред престоломъ и поклонишася Живущему во вѣкы вѣкомъ. Аминь.
Сими сказается разумѣние на старцы. Причастницы бо суще пѣние Небесныхъ силъ. Исповѣдающе от Бога приятие начюемыя врагы побѣдную силу.

ѮЗ (67) Положиша венца своя пред престоломъ глаголюще достоинъ еси Господи Боже нашъ, прияти Славу и Честь и Хвалу. Яко Ты еси создалъ всяческая. И волею Твоею создани быша.
Ты рече владыко побѣдныя венца подастъ намъ. И Тебѣ от всякия твари достоитъ Хвалу приимати. И тебѣ Слава во вѣкы. Аминь.

Слово Е (5) Глава АI (11) О книгахъ запечатлѣныхъ седмию печати, в руцѣ Божии. Ихже никто же неможетъ от строения всего мира разгнути.

ѮИ (68) И видѣхъ в десницы седящаго на престолѣ книгы написаны. Внутрь юду и внѣ юду сопредѣ и созади запечатлѣнны З (7)-ю печати утвержение книжное.
Книги премудрость Божиею памятию разумѣваемъ в них же вси написани бывают по Святому Духу. И судебъ Божиихъ глубину внутрь юду неприкровения духовный разумъ глаголетъ. А еже внѣ юду удобныя разумы менитъ. З (7) же печатей совершенное утверждение книжное всѣмъ неразумия или смотрения испытающаго глубины Божия Духа. Их же разрешити никто же не можетъ ни коя же тварь.

ѮФ (69) И видѣхъ ангелъ крѣпок проповѣдающи гласомъ великимъ кто есть достоинъ разгнути книгы. И разрѣшити печати их и никто же не можаше ни на Небеси ни на земли ни под бездною разгнути книгы и ни разрѣшити их.
Сирѣчъ ни ангели писани тии. И ни сошедшеи с плоти своея. Ни человецы во плоти суще не могутъ разумѣти таинъ Божиихъ. Развѣ Агнеца Божия. Иже прореченыхъ о немъ древле своимъ пришествиемъ разреши.

О (70) И плахуся мнози яко не обрѣте никто же достоинъ разнути ни почести книги ни зрѣти ихъ.
И плакаху же ся сирѣчь ангельскых чести. Чинове вне разумъ пришедши.

ОА (71) И единъ от старецъ глаголе ми не плачитеся. Се побѣдитель сый от колѣна Июдова. Корень Давидовъ разгнути книги и З (7) печати их.
Аще бо и ангеломъ рече неразумныи книги суть кѣ Сыну Божию вочеловечьшуся разумны суть. Корень же Давидовъ от корени бо Давидова человечества ради. А Творецъ Божества ради.

Глава ВI (12) О Агнецы имущемъ З (7) рогъ и како разгнути.

ОВ (72) И видехъ иже посредѣ престола и Д (4)-х животных, и по средѣ старецъ Агнец стоящь яко заколенъ имущь роговъ З (7) и очесъ З (7) еже есть седмъ Духъ Божиихъ посланных во всю землю.
З (7) очес и З (7) рогъ Агнец сказаеть Христовъ Духъ. З (7) яже Исаия и Захария пророкы послѣднии. Яже яко заколен сказается. По заколени и животъ его им же глаголетъ страстныя приклады.

ОГ (73) И прииде и приятъ от десницы сѣдящаго на престолѣ, и егда приятъ книгы, Д (4) животныя и КД (24) старецъ падоша предо Агнецемъ имуще когождо гусли и фияли златы полны темияна. Яже суть молитвы Святыхъ.
Гусли являетъ красногласное пѣние а кадило благоуханную жертву вѣрныхъ приносимыхъ житиемъ честнымъ Якоже апостол рече Христово благоухание есть. Фиялъ же помышление сказается из них же добрыхъ дѣлъ благоухание, и молитва чиста исходитъ.

ОД (74) И поют пѣснь нову глаголюще достоинъ еси прияти книгы и отверьсти печати ихъ яко заколенъ бысть искупи ны Господеви Своею Кровию от всякого колѣна и языка и люди и племена. И сотворилъ еси Богу нашему Царя Иерѣя, и воцарится на Земли!
Симъ являетъ старца иже по Ветсемъ и в Новемъ Законе Богу угодиша, и хвалу воздаютъ Агнецу Божию, заколенному за весь миръ. Искупльшему ны. Новую же пѣснъ, юже навыкохомъ пѣти Святымъ Духомъ. И просвѣшьщеся от всякого колѣна и языка, Ветхаго писмени из бывше. На земли же воцарися сирѣчь на новей по Воскресении. Юже Господь обеща кроткимъ.

ОЕ (75) И видѣхъ и слышахъ глас ангельский и многъ окрестъ престолъ и животных и старецъ и бѣ число их тмы тмами и тысяща тысящами глаголюще великим гласомъ, достоин есть Агнець заколеный прияти силу и богатество и премудрость и крѣпость, и Честь и Славу и Благословение. И всяко создание еже есть на Небеси и на Земли и под землею и на мори и сущая в нихъ вся. И слышахъ паки глаголюща, сѣдящаго на престоле. Агнецу Благословение и Честь и Слава и Держава во вѣкы вѣкомъ Аминь!
И всѣми умными и чювѣственными и живыми и простосущими славится Богъ яко всѣхъ Творец. Единочадый и Сущный Его Сынъ яко обновление человеку. Сего ради сотвореней твари даящей прияти область Небесную и Земную, яко же человеки пишетъся.

ОS (76) И четыре животныя глаголаху Аминь. И старцы падоша и поклонишася.
Симъ сказаетъ едино стадо Небесныхъ и Земныхъ Духомъ Божиимъ свѣдшимъ растоящая. И разорьшим оплотное прегрешение. Се бо яко слышахомъ съ Д (4)-ми животными сущими над прочими ангельскими чиньми. И спасающаго от рода человечскаго Святии достойни суть спасения Божия и проповѣдания Его, и мы достойни будемъ. Тѣмже и самѣмъ Христомъ Богомъ нашим и Миродавцемъ. Ему же Слава и Держава во вѣки. Аминь!

Глава ГI (13) Отрешение первыя печати. Апостольское наслѣдие являетъ.

ОЗ (77) И видѣхъ егда отверзе Агнець едину от седми печатей. И слышахомъ единого от Д (4) животных глаголюща, яко глас грома, гряди и виждь.
И здѣ является учение сущих на Небесѣхъ от первыхъ чиновъ. На вторыя ни исходя, тѣм же от единого лица Д (4) животно сирѣчь. От лва первы глас бывши, услыша повелѣвающи прияти. Первое бо животно е левъ.

ОИ (78) И се конь сѣръ и сѣдяше на немъ имяше лукъ. И данъ ему быша венець. И изыде побеждая и побѣдитъ.
Сѣрый конь апостолы менитъ а лук даную имъ силу. Ею же побѣду сотвориша, тѣм же и пишетъ. Изыдет побѣжая и да побѣдит. А (1)-я бо побѣда языческое обращение.

Глава ДI (14) Отрешение В (2)-я печати. Сказание вѣрныхъ на невѣрныя.

ОФ (79) И егда отверзе вторую печать и слышахъ второе животное глаголющи, гряди и виждь!
Второе животное телець менитъ.

П (80) Изыде конь рыжъ и сѣдящему на немъ дано бысть взяти мир от земля да убиетъ другъ друга. И дано бысть ему оружие велие.
Конь рыжъ по Апостолехъ мученикомъ кровипролитие. И взятие миру еже братъ брата предаяше и отець чада.

Глава ЕI (15) Отрешение Г (3)-я печати сказание отпадение невѣровавшимъ во Христа крѣпко.

ПА (81) Егда отверзе Г (3) печать и слышахъ Г (3)-е животное глаголюще, гряди виждь.
Третие животно человека менитъ, человеческое отпадение являетъ сего ради мучение разрѣшеное поползение властною волею.

ПВ (82) И се конь воронъ и седя на нем держаше мѣрило в руцѣ своей. И слышахъ яко глас посредѣ животных Д (4) глаголющь хиникси пшеница пѣнязю и три хуниксиси ячмен пѣнязю и елей и вина не вреде.
Сѣтование отпадшихъ от вѣры Христовы глаголеть. И явление тмы в ню же имать ити. Мѣрило же в немъ же правдивая и неправдивая дѣла мѣрится. Хуникси же есть полспуди пшеницу же пострадавши же законно. Мзда. А ячмень же обещавшимъся, и скотьское гонящимся глаголетъ. Смыслено послѣди, покаявшимся от елѣи же вино яже милостиво ицѣления от нихъ взяти.

Слово S (6)-е Глава SI (16) отрешение Д (4)-я печати являюще наводимыя казни и раны на отрицающих Иисуса Христа нетерпѣниемъ.

ПГ (83) Егда отверзе Д (4)-ю печать слышах Д (4)-е животное глаголюще, гряди и виждь.
Четвертое животное сказаетъ орле высоко летание. И скоро наядь свыше на ня приходя от Божия гнѣва на мѣсте вѣрныхъ а на муку невѣрныхъ, аще ся не обратятъ.

ПД (84) И видехъ се конь блѣд и иже сѣдящи на немъ. И имя ему смерть. И адъ и идяше во слѣдъ его. И дана бысть ему область на Д (4)-и части земли убити оружиемъ, и гладомъ, и смертию, и звѣрми земными.
Предложением чину иси предръжатъ. Яко же рече сказают учители. Яко гладъ и моръ и мучение бывшее при Максимияне людем вѣрнымъ менить.

Глава ЗI (17) Отрешение Е (5)-я печати сказание Святыхъ душъ вопль к Богу, дабы была кончина.

ПЕ (85) И егда отверзе Е (5)-ю печать и видехъ пред олтаремъ душа человекъ, избиенных за Христа и за Слово Святое, и за свѣдетеьство Иисуса Христово, еже имѣяху. И возопиши глаголюще гласомъ великимъ глаголюше доколе Господи Святый Истинный судии не мстиши крови нашея на живущих на земли!
И се окончавшихся пророцехъ древнихъ первѣе июдеи святыхъ можетъ прилежати. Яже мучиша до Христа. Аще ли же кто и будущихъ проречение се прииметъ по церковных учителей. Яже избиша Христа ради. Подобное яже окончинѣ суда молятъ да скорѣе приимуть свою честь.

ПS (86) И даны быша комуждо их ризы бѣлы, и речено имъ бысть. Дапочиютъ еще премало. Дондеже скончаются клеврети их, и братия и хотяща избиени быти яко же и тии.
Сими являются Святии кончины просяще всего мира. тѣм же и терпѣти до кончины братия своея. Велими суть да не без нихъ совершени будутъ по апостолу. Бѣлыя же ризы цветущая ихъ угоженьми свѣтлость являютъ. О ней же утѣшающеся. Живутъ аще и неука суть прияли обѣтование.

Глава ИI (18) Отрешение S (6)-я печати сказая наводимыя раны на кончину.

ПЗ (87) И видехъ егда отверзе S (6)-ю печать и бысть трусъ велий, и солньце омрачено бысть яко вретище власяно. И месяць бысть яко кровъ и звѣзды небесныя падоша на земли яко смоковница отметающе пупы своя. Яко от вѣтра велика движима!
Будущую страсть при Антихристе менитъ. В ней же прочее и многую скорбъ быти, и муку от антихриста. Яко же не вѣмъ бывшая николиже да быша человецы чтуще не опали. Трус же и вещная прелагания. Мнози же в книгах обрѣтаемъ. Еже бо есть еще единою, потрясу указаетъ движимое преложение. А еже омрачное темное кровавое неосвещение являетъ. На них же будетъ Божий гнѣвъ нежели звѣдамъ спасти, иже ся мнятъ быти свѣтилницы на земли. Падати начнутъ не трепяще бывающих яко же рече Господь прекращенымъ быти, аще возможно праведнымъ. За сокровенную трубу тѣмъ же и смоковницу прилагаетъ отметающу неправедныя плоды от напастнаго отпадения и диаволя вѣтра уже не созрѣвше. И не услажшася Благодатию.

ПИ (88) Небо отлучися яко списокъ свиваемо.
Иже ся небо яко свитокъ свиваетъ. Невидяй сия втораго пришествия Христова сказаетъ, а не скроботно бо свитокъ развѣвается есть и еврейский обычай. На свитцехъ своя книгы написати. Его же ради апостолъ глаголетъ, и свитокъ менитъ, или печати Небесныя Силы от нападение грѣшных менитъ и приемлютъ, яко свитку свивающуся!

ПФ (89) И всяка гора и отокы от мѣстъ своих двигнутся. Цари земстии и велможа, и тысящницы крѣпцы, и богатии, и всякъ рабъ, и всякъ свободный скрышася в пещерахъ, и в камени горьстемъ. И глаголютъ горамъ и камению, падайтеся на нас и покройте насъ от лица сѣдящаго на престолѣ. И от гнѣва Агньча яко прииде день великий гнѣва его, и кто можетъ стати противу.
Господь нашъ апостоломъ вопрошающимъ, о разорении Церкве Иерусалимския и о кончине. Яко не можаху приимати. Первѣе рече будущая, еже и вѣмъ бывшее. Приевъ спасияне, итите христоубийцамъ июдеомъ, яко же сказаетъ, Иосифъ на кончине же всего мира паче егда антихристъ приидетъ. Егда же ли жития сего силнии, или церковнаго чина несуще горы нарицаются. И вѣрныхъ Церкви отоцѣ по Исаи смѣсть своихъ побегнутъ. И мѣсто с мѣста измѣняющеся антихриста ради. Цари же земстии иже ею владуют сирѣчь. А ни что же на Небеси неимуще со всѣми велможами, и богати нами сущими низу и рабы и свобоными от Христовы работы горамъ и каменемъ и вертепы покрысти молятъ. Неже искушения Божия гнѣва прияти. Его же даны избавитъ Человеколюбецъ Богъ, Ему же Слава во вѣкы вѣкомъ. Аминь.

Слово З (7)-е
Глава ФI (19) о тысящах исцелѣвшихъ от ранъ Д (4) ангелъ.

Ч (90) И по семъ видехъ Д (4) аггелы стояща на Д (4)-х углехъ земля и держаща Д (4) вѣтры земля. Да не дышетъ вѣтръ на землю ни на море ни на всяко древо.
Аще етерь о июдейскомъ племени глаголютъ но паче о пришествии антихистовѣ. А еже стояти на Д (4)-х углехъ земля ангеломъ являетъ яко же совершатися службы даныя им от Бога. Их же мы не вѣмы. А еже держати вѣтры являетъ разрѣшение чина тварнаго неубѣжание зла сказаетъ. Вѣтры бо вся сущая на земли прозябаютъ, и по морю плаваютъ на нашу службу.

ЧА (91) И видѣхъ инъ ангелъ восходящь от земля и бѣ имыи печать Бога Живаго. И возопи гласомъ великимъ къ Д (4) ангеломъ. Им же дано бысть вредити земля и море глаголя.
Сирѣчь Крестъ Христовъ имже запечатлѣетъ праведникы. Да не погибнутъ со грѣшники за сокровенное угождение Святыхъ. И ангелы невидимо дръзаютъ да силу приемше.

ЧВ (92) Не вредите ни земли ни моря ни древа, дондеже запечатлѣемъ рабы Бога нашего на лицѣхъ ихъ.
Стражахъ бо с нами и Творецъ яко нас ради бывши кажемомъ намъ. Причащающимся ранахъ нашихъ. Яко же и славимомъ Святымъ веселится с ними. Сего ради вѣмъ, яко угодницы требуютъ ангельския помощи преже напастнаго нападения, данымъ нам печатемъ духовнымъ, и толми являющим своею силою. Елма ему угодно дѣло подаемое прочимъ сущимъ без мощи силою своею.

ЧГ (93) И слышахъ число запечатлѣнныхъ ҂Р.М.Д. (144 000) Запечатлѣнны от всякого колѣна сыновъ израилевъ.

ЧД (94)
От колѣна Июдова ВI (12 000) запечатлѣнны,
от колѣна Рувимова ВI (12 000) запечатлѣнны,
от колѣна Симеонова ВI (12 000) запечатлѣнны,
от колѣна Гадова ВI (12 000) запечатлѣнны,
от колѣна Асирова ВI (12 000) запечатлѣнны,
от колѣна Неффалимова ВI (12 000) запечатлѣнны,
от колѣна Манасиина ВI (12 000) запечатлѣнны,
от колѣна Левгийна ВI (12 000) запечатлѣнны,
от колѣна Сахарова ВI (12 000) запечатлѣнны,
от колѣна Заулона ВI (12 000) запечатлѣнны,
от колѣна Иосифова ВI (12 000) запечатлѣнны,
от колѣна Вениаминова ВI (12 000) запечатлѣнны.

Иже тогда от еврей запечатлѣнни вѣянии из бывше римскаго пленения. Числомъ совершаютъ. Или еже есть паче вѣрнии еже и на кончине от июдейского роду спасени будут яко же апостол рече. Егда исполнение языческое будетъ. И весь Израиль спасется. Зазнаменати же и се яко колѣно Даново зане от него антихристъ ражается. Того ради к прочему не причитаются. Но в него мѣсто Левгиино. И еврейское преже не причитаемо. Иосифа же во Ефрѣма мѣсто сына своего положи. Подобно есть число со древнима ВI (12) еврейскима колѣнникома, Святымъ апостоломъ ВI (12), яко же постави в нихъ мѣсто князя по всей Земли яко же пишетъ!
И отмѣннаго же сказания колѣнъ сихъ етеръ преподобити образъ и разумъ. Понеже множицею обрѣтаемъ во Святыхъ книгахъ. От такого приключения родителя имена здѣютъ яко же пишетъ. Илья рождешия рече видѣ Господь смирение мое. Нарече имя роженному Рувимъ. Еже есть видѣния сынъ второму же Симеонъ. Еже есть послушание, сирѣчь послушан мене Господь. Левгии же есть вмѣне мѣсто или само или приемлетъ. Июда исповедание, Исахаръ мзда. Заулонъ есть даръ. Невталимъ еже есть заступление или разумно, или стебло, Гадъ искушение, или напасть, или грады. Иасиръ блажение. Иосифъ приложение, или досаждение отятие. Вениаминь денница солнца и сынъ днии, или сынъ болѣзни. Манасий забвение, Данъ же сказается судъ.

Глава К (20) О народе бесчисленемъ, иже имуть со Христомъ царствовати. От языкъ.

ЧS (96) По сихъ видѣхъ и се народ многъ его же исчести никто же не можетъ. От всякаго языка и колѣна. И людии и племен стоящи пред престолом и пред Агнцемъ оболчены в ризы бѣлы и финицы в рукахъ ихъ. И возопиша гласомъ великимъ глаголюще, спасение Бога нашего сѣдящаго на престоле агньчи.
Сии суть о них же Давид рече изочту я и паче песка морьскаго умножатся. Иже древле за Христа пострадаша, от всякого колѣна и языка, и племене пролитиемъ своей крови Христа ради, ризы же своих дѣлъ убѣлиша. И побѣды образныя вѣтви в рукахъ имуще. Простыхъ и честныхъ сердечныхъ финикъ, и окрестъ Святаго Престола богомужьскаго покоища веселятся. Яко приязнивии раби Подателю, на дѣмоны написающе дерзости.

ЧЗ (97) И вси ангели стояху окрестъ Престола и старцы и четыри животныхъ и падутъ пред престоломъ ницы. И поклонишася Богу нашему сѣдащему на престоле и Агньцу глаголющу Аминь. Благоговение, и Слава, и премудрость, и хвала, и честь, и сила, и крѣпость Бога нашего и ныне и присно и во вѣкы вѣкомъ!
Се единъ есть Ангелъ и Человекъ тогда со человекы начнутъ служити. А еже окрестъ престола стояние животных и старецъ честь великую воздаяху Господу честь приемлютъ.

ЧИ (98) И отвѣщавъ единъ от старецъ глаголя ми си оболченъ в бѣлыя ризы. И то сутъ и откуду приидоша и рѣхъ ему Господи мой Ты вѣси!
Возбужаетъ вопрошаниемъ явлейся ему, дабы испыталъ. Он же не видѣниемъ покорение предлагаетъ от него же научася.

ЧФ (99) И рече си суть грядуще от скорби великия. И испраша ризы своя и убѣлиша в Крови Агньчи. Сего ради си суть предпрестоломъ Божиимъ. И служатъ Ему день и нощь в Церкви Божией сѣдяи на перстоле вселится в ня.
Блажении же временными страдаша страстьми, вѣчный покой приобрѣтаютъ. Его же ради пострадавши за Христа. Тѣмъ с нимъ воцарится выну же служаще Его же Богу есть день и нощь. Здѣ сказаютъ непрестающе ту бо нощь нѣсть но все день, всего мѣсто солнца. Праведнымъ Солньцемъ просвѣщаемъ. Разумѣет же ся нощь того дѣла. Сокровенныя и глубокия разума тайны. А день удобныя Церкви же сего вся тварь обнавляема духъ паче же иже обручение духовное. Цѣлой неугасного храняетъ в них же веселится. И почести обѣща.

Р (100) Не взалчють к тому ни вжажутъ
Достойно бо Хлѣбъ Небесный и тому животну имутъ!

РА (101) Не имат же пасти на них солнце, ни всякъ зной.
Сирѣчь мукы к тому неймут сотворити, время ни мучителну минувшу.

РВ (102) Яко Агнець иже посредѣ престола упасеть я. И наставить я на источникы водныя. И отиметъ Богъ всяку слезу от очию ихъ.
Пасоми тогда Христосъ рече и нападаний волъчныхъ не убоятся. Яко се сленымъ имъ во огнь неугасающий. Но простымъ и яснымъ и разумъ Божий и источникъ неплотский упасет я подсказающи. Прикладом пространное истечение Святаго Духа.

Глава КА (21) Отрешение З (7)-я печати являющи ангельския силы принося к Богу Святыхъ молитвы яко кадило.

РГ (103) И егда отверзе печать З (7)-ю и бысть безмолвие на Небесѣхъ яко полъ годины маловременно являетъ. И видѣхъ З (7) ангелъ иже пред Богомъ стояху и дано бысть имъ З (7) труб.
Часто менитъ З (7)-е число яко симъ вѣцемъ предержащаяся покоище Святых. Тѣм же и здѣ разрѣшение. З (7) печати, разрешение сказает земскаго жития. З (7) же служаше ангелъ на показание невѣрныхъ и нечестивыхъ муку, требующих человековъ раны. А молчание ангельскихъ чинъ и говѣние. О Христове же Вторемъ Пришествии, ангеломъ есть безвѣстно. А еже пол годины мало времение являетъ. Егда язвамъ наводимымъ, и земскимъ скончавающимся, и Христово Царство являетъ.

РД (104) А другий ангелъ прииде имѣя кадилницу злату.
Аще образы земскими, и широтными и инѣми многыми образы Святымъ являются но невидими, и мысленни суть.

РЕ (105) И дани быша ему темияни мнози. И дастъ молитвами Святыхъ всѣхъ. И олтарь святый и сущии предпрестолом.
Олтарь Христосъ на Немъ же вся служебная и Святая Сила стоитъ. И мученичныя Жертвы приносятся. Ему же бѣ образ явления на горѣ Моисеовѣ сей скиниею олтарь. А кадила молитвы Святыхъ и яко благоухания Богу предпрестоломъ же сирѣчь Святыми Силами.

РS (106) Изыде дымъ кадилный молитвами Святыхъ и рукою ангеловою пред Богомъ. И взятъ ангелъ кадилницу, наполни ю от огня Сущаго на олтари, и положи на Землю.
Но несенныя ангеломъ Святыхъ молитвы и страстьми, кадилницу огня исполниша. На землю иссыпати сотвориша. Сего же ангела всякъ иерей образ имать яко ходатай к Богу и от человекъ, и от всѣхъ молитвы вознося. А сего милости износя. И согрѣшающая обращая. Или словомъ или казаниемъ ярѣйшимъ.

РЗ (107) И быша громии блистания, и гласи, и трусии. З (7) ангелъ иже имяху З (7) трубъ уготовившася да вострубятъ.
Вся же преже кончины страшна знамения являю. Яко и на Синайстей горѣ Божия пришествия, прикладни образы бываху. Вся устрашающа. И ко обращению мысленѣйша приводяща. Ангели же симъ служатъ яко былия Христу подобнии. Лютую язву грѣшную исцеляюще. Ея же даны избавитель Христосъ Богъ нашъ. Ему же Слава во вѣкы вѣкомъ. Аминъ

Слово И (8)-е Глава КВ (22) О седми ангелъ от них же первому вострубльшу. Град, и огнь, и кровъ на землю исходитъ.

РИ (108) Первому ангелу вострубльшу. И быша громи и огнь смѣшенъ кровию, и паде на землю. Третия часть земли погорѣ. И третья я часть древа погорѣ. И всяка трава злачная погорѣ.
Град менитъ смѣшенъ со огнемъ и кровию преже кончины сходящъ по праведному суду Божию, от варварскихъ рукъ попаления. Человеческое убийствие. От них же мние Г (3)-я части сущихъ на земли и твари повидимей твари погибнутъ. Не токмо от человѣкъ но и от земных плодовъ. И Блаженный бо Иоиль. Кровь и огнь, и курение дыма, и преж великаго дние рече приити наше утвержает и о сихъ сказание.

Глава КГ (23) О вторемъ ангели. Ему же вострубльшу и яже суть в мори. Душевная пагуба бываетъ.

РФ (109) И второму ангелу вострубль, и яко гора велика жгома огнемъ, и ввержена бысть в море. И бысть третия часть в кровъ моря. И умре третья часть создании в мори, имуща душа. И третья часть людей и кораблей погибе.
Море есть молъвное житие се наричемое. А еже суть в мори Г (3)-я часть скончаются от нихъ Божиимъ судомъ глубокимъ иже о вы запятъ мучитъ. А другых ждетъ на обращение и на показание, яко же етери учители непшеваша. Огнемъ яростнымъ во время свое Г (3)-я часть, отокъ сущихъ погубитъ. Яко же древле прино и песъ твори.

Глава КД (24) О третьемъ ангеле иже речныя воды горкия сотворитъ.

РI (110) И третий ангелъ воструби. И паде с небеси звѣзда велия, горащи яко свѣща и паде на Г (3) части реки и на источницехъ водныхъ. И имя звезды глаголется Аксинфос. И бысть часть Г (3)-я вод яко пелынь. И мнози от человекъ умроша от вод яко горки быша.
Звезду менить диавола с небеси спадаша. О нем же Исаия рече како спаде с Небесѣ Денница, восходящия заутра. Аксинфос же горести пелныя прикладаетъ. И то бо злое и горкое оболчение сотвори. И тѣмъ умроша. Его же даны избавитъ Господь Богъ Милостивый, ему же Слава во вѣкы.

Слово Ф (9)-е. Глава КЕ (25) Четвертый ангелъ, солнечнаго и луннаго круга свѣтъ омрачаемъ.

РАI (111) И четвертый ангелъ воструби. Язвена бысть Г (3)-я часть солньца и Г (3)-я часть лунѣ. И Г (3)-я часть звѣздъ да омеркнетъ. И Г (3)-я часть и день да не свѣтитъ. Г (3)-й части своеяй нощъ тако же.
Подобная суть и сия к симъ реченнымъ Иоилемъ о кончине глаголетъ же о Г (3) части яко и тогда не едину наведетъ Богъ злобу, но на Г (3)-ю часть временную. А оставльшая утешаетъ большею же частию покаяния ради.

РВI (112) И видѣхъ и слышахъ единъ ангелъ парящь посредѣ небеси, и глаголющь гласомъ великимъ. Горе, горе живущимъ на земли от прочихъ глас трубныхъ. И Г (3)-и ангелъ хотяще вострубити.
И симъ милость и человеколюбие Божие ангелъ являетъ. Богоподобно милующи, кажемыя грѣшникы паче же болѣ и ранами на обращение не зрятъ их же и горѣ достоитъ яко на земли живуще, и мыслящи земная и перьстию воняють в мира мѣсто излияннаго нас ради. А еже имуть на Небесехъ житие тѣхъ ждутъ венцы неувядающи.

Глава КS (26) О пятом ангеле, и восходящих от бездны и о разумныхъ прузѣхъ. И о различныхъ отразехъ.

РГI (113) И пятый ангелъ воструби. И видѣ звѣзду с небес падшу на землю. И данъ бысть ей ключь студенца и бездны. И отверзе студенець. И взыде дымъ от студенца, яко дымъ пещи велики горяща, и омерче солнце от дыма студенечнаго. И изыдоша прузи на землю. И дана бысть имъ область. Яко имуть область скорпиеве земстии. И речено имъ бысть да не вредятъ травы земныя ни всякаго злака, ни всякаго древа. Токмо человеки иже неимуть печати Божия на челехъ. И речено имъ бысть дане убиютъ ихъ, но да муку приимуть Е (5) месяць. И мучение их яко мучение скорпиево. Егда сѣкнеть человека.
Звѣзда есть (ангелъ) Божии, егда с Небесѣ дѣмоны ввести осуженныя на муку грѣшныхъ. Яже Христос вочеловечися привяза в бездне. Да прежде кончины своея содѣявше, бесконечную муку приимуть. Дым же есть омрачение предходящи и злых прикладныхъ дѣлъ их. Имъ же ся явльшемъ. Власть симъ мучити человеки дана бысть. А солнечное и аерьское омрачение наслажающихся свѣта сего являютъ душевную слѣпоту. Тая бо сущихъ в болѣзни свѣта вменяются. А еже прузи мыслении, исѣкаютъси человецы. И по подобию скорпийстии являетъ совершение злыхъ дѣлъ. И пакостную души скверную смерть. Яже приемлютъ не знаменавшеися Божиимъ печатемъ на челехъ. Пять месяць менитъ мало время. Аще бо быша не прекратилися дние тии, не бы спаслася всяка плоть по Господню Словеси. Или время нѣкое пятое. За пять чювьствий ими же грехъ входитъ в человѣки, или время нарочно Богомъ единем знаемо.

РДI (114) В ты дни взыщуть человецы смерти и неймуть обрести ея. И вожделѣютъ умрети и бежитъ от них смерть.
Сим прикладна сказается злоба. Обычай бо есть стражущим призывати смерти не могущим терпѣти мучения. А еже просящимъ сея не приходит Божичъ судбахъ виситъ. Им же ся на ползу судитъ. И горестию старостною да невѣстно будетъ грѣхъ человкомъ. Яко от сего страждущих.

РЕI (115) Уподобление пругомъ, подобна конемъ уготовленымъ на бранъ. И на главахъ их вѣнцы яко злату. И лица ихъ яко лица человеча. И имяху власы яко власы женьски. И зубы ихъ яко лвомъ бѣша. И имяху броня яко броня желѣзны.
Дѣмоны глаголетъ уготованыя на нашу брань. На главах же вѣнцы злати на нашу брань побѣждени зряще. Имже мы егда побѣждени будемъ злою побѣдою сластною, венчаются. А власы женстии являют сластныя смерти являются дѣмонския. И на любодѣяние поставляюще. Лвовы же зубы убийство и адъ. А броня жестосердие.

РSI (116) Глас крилъ иже конь много текущихъ на брань, имѣяху опаши подобно скорпиемъ. И жала на опашехъ ихъ область ихъ вредити человеки Е (5) месяць имуще над собою царя ангела бездны. И имя ему Авадонъ. А гречески глас имя имать Губя, горѣ едино отиде еще два горя посихъ.
Глас крылъ мысленныхъ пругъ. Придается глас войстемъ за высоту ихъ. Воюют на ны выше. Яко рече Давидъ опаши ихъ подобни скорпиемъ. Грѣшная совершения являют. Разумевающи душевную смерть. Имъ же пять мѣсечьная мука на человѣки приходит. Или пять чювьствий человекъ глаголетъ. Царя же сихъ диавола разумѣвати надобно. Иже во истинну губитъ послушающихъ его. К нему противу взали быхомъ брань. Сказуютъ намъ два горя иже хощетъ прийти по сихъ.

Глава КЗ (27) О шестом ангеле, и числеемъ двоюстем.

РЗI (117) И шестый ангелъ воструби, и слышахъ глас от Д (4)-ро рогъ и олтаря златаго сущаго пред Богомъ. Глаголюще к шестому ангелу. Имѣяй трубу и разрѣши Д (4) ангелы, связаныя на реце Ефратстей и разрѣшени быша Д (4) ангели уготовании на бранъ и годину и день и месяць и лѣто. Да избиют Г (3)-юю часть человекъ и число конникъ двоицею тмы тмами.
Си суть Д (4) ангели глаголюъ нѣцыи Михаилъ и Гавриила Уриилл и Рафаила. Иже суть привязани ввеселия Божия привидѣния, посланы же будутъ на судный день. З бесчисленными ангелы на осуждение нечестивыхъ. От нихъ же Г (3)-я часть человекъ просмраждена будетъ. Азъ же мню, яко си суть от злыхъ дѣмонъ привязаныхъ при Христове Пришествии. Яже по Божию повелению, от Небеснаго олтаря. Ему же есть образ иже бѣ в ветсей скиниии. И шед ангелъ отрѣшитъ яко да смутят вся языки. Не токмо христианъ но и ины. Да и суще ни вѣрнии явлени будутъ. Яко болшихъ возданий мѣста достойни будутъ. Яко и пшеница зрѣла, а нечестивии зѣло грѣшницы непокаявшеся яко в плевелы во огнь ввержени будуть. Аще ли во Ефрате привязани будутъ. Ничто же дивно, овии бо суть в бездне, овии же во свинияхъ, а друзии же на инѣхъ мѣстехъ. Яко же есть годѣ Богу сего ради и Ефрата менить. Яко от тѣхъ странъ имать изыти антихристъ. По множествѣ же дѣмонстемъ вся Святии отцы глаголютъ яко исполнь ихъ есть весь аеръ.

РИI (118) И тако видѣхъ коня видѣниемъ, и сѣдящая на нихъ имуща броня огнены, и акинфъны и жупелы. И главы конемъ яко главы лвомъ. И из устъ ихъ исхожаше огнь. И дымъ и жупелъ. И от трей язвъ ихъ погибе Г (3)-я часть человекъ. От огня дыма и жупела исходящаго изо устъ ихъ область бо онѣмъ во устѣхъ ихъ бѣ. И опаши ихъ подобии змиемъ имуще главы, и тѣми пакости дѣяху.
Коня непшую менитъ любодѣя и скотския человекы, или сущая дѣмоны. И всадники же владущая сими. Обычай симъ не токмо собою но и злыми человеки. Яко сосуди человкомъ пакости дѣяти. Огнены же брони аерьскихъ духъ знамение вѣчнаго горения. Главы же лвовы убийственное ихъ и звѣриное знамение глаголетъ. А еже от устъ ихъ исходитъ огнь или ядовитыя ихъ напасти от нихъ же восходят грѣхы, и плоды сердечныя попаляютъ. Или отварварьских рукъ бывающая пожжения градомъ и пролития кровемъ по Божию оставлению. О пашихъ же ихъ кончания дѣмоньскихъ сияний, ядовитыхъ грѣхъ, и душевная смерть.

РФI (119) И прочии от человекъ непогибоша язвами, ни покаяшася от дѣлъ своихъ. Да не поклонятся дѣмонови. Или идоломъ златымъ или сребрянымъ или мѣдянымъ, и каменымъ и древянымъ. Иже видѣти не могутъ. Ни слышати ни ходити, и не покаяшася от убийствъ ихъ ни от тадбы ихъ.
И прочии бѣша от человекъ иже пощадѣны быша милостию, и сихъ не пострадаша, и непокаявшеся пребыша. Ни идолъ ся отрѣкоша. ни убийства, ни любодеяния ни татебъ своихъ ни чародѣяния. Под тою виною пойдутъ. И являет же ся отнихъ на весъ миръ навести гнѣвъ. Различна бо рече смерть и лесть блазнитъ непознавшая языки истины. И овии бо ся кланяютъ идоломъ. А друзии в творца мѣсто твари. Аще и паче Бога исповѣдаютъ видети. Отметают же ся дѣлы. Образ Благовѣренъ имуще силы Его отрицающеся, а мамоне служатъ. Яявялющимъ же намъ добрая дѣла велика. Буди милость от Иисуса Христа Бога нашего. Ему же Слава.

Слово I (10)
Глава КИ (28) О ангеле одеяномъ облакомъ и дугою проповедающе о кончине.

РК (120) Видѣхъ инъ ангелъ крѣпокь сходящь с Небеси, оболченъ во облак и дуга на главѣ его. И лице его яко солнце, и нозѣ его яко столпа огнена.
Ангелъ светъ есть облакы же и дуга свѣтъ, ангелъское видѣние являетъ небесным различием, столпа же огнена страх и муки являетъ.

РКА (121) Держа же в руцѣ своей книжица разгбены. И поставити ногу свою десную на мори, ащую на земли. И возопи гласомъ великим яко же левь рыкаетъ. Егда возопи возгласиша З (7) гром.
Книжица сия малыя зело лукавыхъ помышления и дѣла непшую имать. Нози же поставлени на земли и на мори муку являет зло творящимъ на земли и на мори. Глас же страх непостояненъ прещения своего показает. А З (7) гром непшуемъ или З (7) глас от единаго ангела исходящь и раздѣляющься, или инѣх З (7) ангелъ проповѣдающь будущая.

РКВ (122) И егда возгласиша седмии громы, хотѣхъ писати, и слышахъ глас с Небесѣ глаголющь, запечатлѣй яже глаша З (7) громи и посихъ пишеши.
Симъ неявленномъ сказает быти инѣ самѣм искушениемъ вящими сказа намъ. Имже от Небеснаго гласа назнаменати. А совершенаго разума сихъ неизъяснити на послѣдняя лѣта щадима. Заечатлѣнна бо и сокровенна словеса и Даниилъ сказаше.

РКГ (123) И ангелъ иже видѣхъ стоящь на мори и на земли воздвиже руку свою десную на небо и клятся живущим во вѣкы вѣком. Иже созда на Небеси вся и на земли и вся яже на ней и море яко в нем, яко лѣтъ уже не будет.
Будет бо убо понеже и нѣмъчим не имать клятися болши себе. Собою ся кленетъ, ангели же тварь, глаголемая и меншего невѣрьствия ради. Извѣстующе лѣту к тому небыти. Или будущемъ егда лѣта нѣсть но солньцем расчитаем. Но живот вѣчныи число лѣтнее преходя. И лѣта долгота не будетъ.

РКД (124) По дни гласи З (3)-го ангела егда имать вострубити и скончати Слово Божие. Яко же благовѣсти своими рабы пророки.
Прореченная преж пророкы древле кончины в будущи и въ З (3)-и вѣкъ збудется Благовѣщение еже есть сихъ исполнение сирѣчъ за блаженный и святый покой.

Глава КФ (29) Паки книжица от ангела Евангелистъ приятъ.

РКЕ (125) И глас иже слышахъ с Небеси паки бесѣдующь со мною и глаголющь. Иди и прийми книжица разгбеныя в руцѣ ангела стоящаго на мори и на земли.
И здѣ етер ангелъ болша сила, и Евангелисту велящи является книгами разумъ явленнымъ от сюду прияти.

РКS (126) И идохъ ко ангелу глаголя ему даждь ми книжица. И глагола ми прийми и снѣжъ я и горки будутъ во чревѣ твоемъ. И во устехъ твоихъ яко мед сладкий.
Сладкий тобѣ рече будущи разум обаче огорчихъ чрево. Сирѣчъ словесную службу подающей. И милостию Божия гнѣва. По суду и раны приемлющихъ. Разумѣет же ся и инако, яко понеже свѣт сей. Искушениемъ злыхъ дѣяний, не вкуси книжныхъ снѣдений. Яже дѣла зло дѣющихъ в начатце грѣху сладка. Горка же поядении за воздаяние улучится.

РКЗ (127) Прияхъ книжица от руку ангелову и снѣдохъ. И быша во устѣхъ моихъ яко мед сладкий. Егда снѣдохъ горки быша во чревѣ моемъ.
Сладки книги в начатцѣ разума ради. Горки же при кончине мукъ ради грѣшныхъ. Яко же есть и грѣхъ сладокъ вкушениемъ в начатцѣ. Милостиви же суще Святии, срадующимся радуются. С плачущими плачютъ.

РКИ (128) И глагола ми подобаети паки пророчествовати в людехъ, и в племенехъ и языцехъ и царѣхъ мнозѣхъ.
Сии сказаетъ яко неудобо повидѣнии Божия откровения, но видѣниемъ подобаетъ быти Блаженному. Евангелиемъ Своим и Апокалипсиею сею и до кончины прорицати будущая, почитающий, яко у не есть смерти вкусити. На кончину прийти ему подобаетъ возбраняющия антихристовы льсти не приймати.

РКФ (129) И дана мнѣ бысть трость подобна жезлу глаголюще востани, и измѣри Церковъ Божию, и олтарь и кланяющаяся в Ней. И дворъ сущий внутрь Церкве изнеси вонъ, и не измѣри его. Яко данъ бысть языкомъ, и град святый поперутъ М (40) месяцъ и два месяца.
Се ся тростию являетъ яко вся умна сутъ сущая на Небеси яже сутъ в нас бездушна. Яко се и олтаря и престолъ и нѣкая глаголетъ бо ему востани и размѣри. Аще ли же кто речетъ яко ангелъ есть реклъ да разумѣетъ, размѣрение сказаетъ разумъ иже приемлетъ кождо по достоянию. Двор же внутрений, яко глаголютъ нѣции, Ветхий Законъ. А в иннѣшний новый законъ, за множество спасаемыхъ в немъ неизмѣрное. Житие же МВ (42) месяца являетъ мало лѣтъ держати новый законъ до Христова Пришествия. Мы же глаголемъ Храмъ Божий есть Церкви в ней же словесныя службы творимъ. Дворъ же внѣшний невѣрныхъ язык июдейским. Град же новый Иерусалимъ или церкве языцыи со антихристомъ осквернятся полъ Д (4)-та лѣта вѣрныя прогоняюще.

Глава Л (30) О Еносе и Илии хотящею обличити антихриста.

РЛ (130) Дамъ обѣма свѣдѣтелема моима прорицаета в тысящу и С (200) и М (40) днии, и оболчена во вретищи. Си ест два маслицы и два свѣщника пред Богомъ земля стояща.
Си еста Еногъ и Илия и время от Бога приимша на кончине пол Д (4)-го лѣта имата пророчествовати. Вретишною же одежею сѣтование и плачь являетъ о льстимыхъ тогда антихристомъ. Яко же Захария в видѣнии двою маслину и свѣщнику сказаетъ за пищу свѣта разумнаго. Милость богоугодныхъ дѣяний носяще.

РЛА (131) Иже има неправду сотворитъ огнь исходитъ из устъ ею, и поядаетъ враги ея иже хощетъ обидѣти я. Сему подобаетъ убиену быти. И си имѣти власть затворити небо да дождь не падетъ. И во дни прорицания ею, область имѣти имуть на водахъ обращати я в кровъ и поразити землю всякою язвою елико аще восхощета.
Дивна Божия Милость. Како противу язвѣ приносит и бальство. Понеже и всѣми знамении и чюдесы лжими всѣхъ чародѣицъ повинникъ будетъ антихристъ во явлении си дѣло приимъ. И силу истинныхъ его знамений и чюдесъ. Святая сия вооружитъ Богъ. Преложениемъ Истиннаго Свѣта прельщеныя обращающу, словом же учительнымъ и ранами казателными лесца же обличающе. И ни что ж ни от кого приемлюща дондеже свое пророчество скончаютъ.

РЛВ (132) Егда скончаютъ свѣдѣтельство свое, звѣрь восходяи от бездны, сотворитъ с ними брань, и побѣдитъ я и убиетъ я. И трупъ ею оставитъ на стогнахъ града великаго, еже наречется духовно Едемъ Египетъ судомъ его повержетъ идѣ же Господь ею же распятъ бысть.
И потом же его да свѣдѣтельствуетъ рече от льсти избежати звѣри. И звѣрь сей сирѣчь антихриста восходяща. От темныхъ от глубокихъ мѣстъ земныхъ. Идѣ же есть диаволъ осужденъ и убиеть я по Божию оставлению. И не погребенѣ оставитъ телеси ею во Иерусалиме. Идѣже Господь ею пострада ту бо начнетъ и царствовати по побѣде Давидове. Ему же Господь бысть по плоти сынъ Иисус Христосъ, Истинный Бог наш. Да симъ себе сотворитъ Христа быти, яко совершая пророческое слово, и воздвигну скинию Давиду падшуюся и раскопаную созижду. Иже жидове блазнащеся во огнь пришествие мнятъ.

РЛГ (133) И зрятъ от люди коленъ от языкъ, и племенъ трупу ею три дни и пол, трупу ея не оставятъ положити во гробе три дни и пол дни. И живущии на земли возрадуются о нею и возвеселятся и дары пощиютъ другъ другу. И елико оба сия пророка мучиста живущая на земли.
Иже будутъ рече научени лжими чюдесы антихристовы. Имѣй держашая зрящее то имя в сердцахъ своихъ написавше от июдея же и языкъ, погрѣсти убо Святая телеси ею не дадут. О избытии же ранъ. Яже обращения ради ношаста, возвеселятся. И непомысляще яко его же Господь любитъ того же и кажетъ Того бо есть милости и во вѣкы.
Аминь.

Слово АI (11). Глава ЛА (31) Како убиенъ будетъ Илия и Енохъ антихристомъ. И воскреснета паки.

РЛД (134) По трехъ дней же и пол дни, Духъ животенъ от Бога внидетъ в ня, и станутъ на ногу своею от Бога. И страхъ велий нападетъ на зрящая ею. И услышати глас велий с Небесе глаголющъ има и взыдите сѣмо и взыдутъ на Небо на облацехъ.
Равно числу лѣтомъ пророчествия ею Г (3) дни мертва быща. Рече и воскреснета и на Небо на облацехъ по образу Господню взыдета и страхъ и ужасъ видящимъ бывающая.

РЛЕ (135) Видѣшая врази ею и в той часъ бысть трусъ велий. I (10)-я часть града падетъ и погибнеть трусомъ именъ человеческихъ ҂З (7000).
И можетъ же то явѣ тогда быти. Разумно же движимыхъ преложение, и утвержение сказаетъ. I (10)-я часть града падетъ нечестивымъ падениемъ. ҂З (7000) погибе в его жития. З (7) временъ прикладаетъ иже в геонѣ В (2)-ю смерть примутъ.

РЛS (136) И прочии пристрашни быша и даша славу небесному. Горе второе отиде и се горе третье е грядетъ скоро.
Достойний рече и Бога прославлятъ подвою же рече горе. Г (3)-е придет со многою язвою.

Глава ЛВ (32) О трубѣ и о поющихъ Бога Святыхъ на будущемъ вѣце.

РЛЗ (137) И седмый ангелъ воструби. И быша гласи велицы на Небесехъ глаголюще. Бысть царство всего мира Господа нашего Иисуса Христа и воцарится во вѣкы векомъ Аминь. И К (20) и Д (4) старцы сѣдящи пред Богомъ на престолехъ своихъ и падоша ницы и поклонишася Богу глаголюще хвалим Тя Господи Боже нашъ Всерѣжителю сый. И бывая и грядый. Яко приятъ еси силу Твою великую. И воцарися и языцы иже Тя прогневаша, и прииде на ня гнѣвъ Твой.
И здѣ паки Святии и ангели, и живше ангельски и хвалу воздаютъ Богу рече, яко человекъ сподобися. А не вѣрнымъ языкомъ о сем разгнѣвлшимся яко бысть ново и ту же прият терпѣвъ же на концы судъ сотвори.

РЛИ (138) И время языкомъ судъ прияти я. И та дая мзду рабом своимъ пророкомъ и Святымъ боящимся имени Твоего, малымъ и великимъ растлѣти просмражшего землю.
Время рече мертвымъ воскресение вонже комуждо свой начатокъ данъ будетъ. Пророки же и Святыми всѣми боящимися Бога Г (3) чины разумѣвати, иже остѣ плодятся и 60-ю и 30 малыя же и великия или меншая саниты. Или болшая или меньшая яко уничижены грѣшники великия же праведникы к ним глаголетъ.

Глава ЛГ (33) О церковныхъ прогонениихъ. Первѣйшихъ. И пакы при антихристе.

РЛФ (139) И отверзе Церкви Божия на Небесѣхъ. И явися корабль завѣта Божия в Церкви Его. И быша блистания, и гласи, и громи. И труси. И град велий.
Отверзениемъ небу, и видѣниемъ корабля уготованная благая Святымъ открыются тогда. Егда на беззаконныя и на нечестивыя гласи страшни и молния. И громи приидутъ яко и градъ геоньския мукы, трусомъ сущимъ прелагая.

РМ (140) И знамение велие явися на Небеси се жена оболчена в солньце, и луна под ногама ея и на главѣ ея вѣнецъ от звѣздъ ВI (12).
Святую церковъ менитъ оболченну в солньце праведное. И луна ветхий законъ под ногама имуще и на главѣ ВI (12) венец апостолску учение имуще.

РМА (141) Во чреве имуще и вопиетъ болящи и стражущий родити.
Болящи страждущи раждающи, претваряющи крещеиемъ плотския духовныя.

РМВ(142) Явися ино знамение на Небеси и се змѣй червенъ великъ имѣя и главъ З (7) и рогъ I (10), и на главахъ его З (7) венецъ.
Небо айеръ менитъ змия же диавола. И черьвность же убийство его, и кровопийство, и чермность ангельския усия. Аще и от ангелъсте спалъ. Главъ же его З (7) злыя бо мысли и силы противныя добрымъ дѣломъ или З (7) духъ яже во Евангелии рече Господь или З (7) злобъ яже Соломонъ рече. Рози же являетъ противление. I (10) заповѣдей в Ветсемъ Законе. Или раздѣление царствиемъ, и самому красоту приносящи З (7) венецъ за неже дѣмоньскими дѣтельми побѣждаетъ От туду венца приемлютъ.

РМГ (143) И хоботы есть влекий Г (3)-ю часть звѣздъ небесныхъ, и вложи я в землю.
Или преднее его спадетъ с небеси менитъ. И пособѣ отступники ангелы. Явѣ завистию и гордынею сверже я и потомъ егда сокрушена бысть глава его хоботомъ подвижа, неутверженыя совлече с небесыя мысли. Иже ся нарицаютъ звѣзды. Хрусталныя свѣтлости дѣля.

РМД (144) И змѣй стояще пред женою хотящею родити. Да егда родит, чадо ея снѣсть.
Диавола менитъ противу церкви стоящаго. Обновляемыя крещениемъ во вся дни хотящая снѣсти. Паче же Церкви яко Главу ея сущи. И яже сущихъ вѣрныхъ своя творящи. Тѣмъ же яко и Савлу глаше что Мя гониши.

РМЕ (145) И роди сына мужеска полу иже иматъ упасти жезломъ желѣзнымъ вся языкы.
Выну крещениемъ Церкви Христа ражаетъ иже иматъ упасти вся языки вѣрою. Мужеский же пол церковный санъ. Людие суть держащиися крѣпко от похоти.

РМS (146) И восхищено бысть чадо ея к Богу и престолу Его.
Восхищени бо бываютъ святии от мукъ. Да ихъ не поглотитъ напасть яже есть больше силы. Восхищени же будутъ во стретѣтение Господне на аерѣ, и пред престоломъ Его со ангельскими силами станутъ.

РМЗ (147) И жена бѣжа в пустыню, идѣже мѣсто уготованно тамо от Бога да ту питают ю ҂А (1000) дний и СОИ (278)
Пустыни же есть отпущение злобы, и истлѣния. В няже ся вложьшеся Святии и приимуть избраннии от жития сего избѣгнутъ. Не брегуще ни о чем же. Или в пустыню горкую бежат скрытися от лица антихристова пол Д(4) лѣта. Яко же первомученицы дѣяху. Ихже молитвами да нас избавитъ Христосъ Богъ нашъ. Ему же Слава во вѣкы вѣкомъ. Аминь.

Слово ВI(12)
Глава ЛД(34) О брани бывшей межу Святыми ангелы и злыми силами. И падении змиеве.

РМИ (148) И бысть брань на Небеси, Михаилъ и ангели его брань сотвориша со змиемъ. И змий брася и ангели его невозмогоша и мѣсто не обрѣтеся им на Небеси.
Яко брань сотворилъ диаволъ со ангелы Божиими. И побѣжденъ будетъ. Может же и се быти, подобно первому дияволю отпадению. Гордыня ради и зависти, от ангельскаго чина. Или егда Господнимъ Крестомъ разрушенъ бысть. Яко же речет Господь, нынѣ князь мира сего осужденъ бысть. Его же гордыня Святии ангели и с своимъ Архистратигомъ не терпяще достойно свергоша от своего жилища. Первие яко же рече Езекий херувимъ изверже и от среды сирѣчь ангельскихъ чиновъ. Зане обретоша в немъ неправды. И Святии же Отцы глаголют, яко по сотворении видимаго мира сего ради спаде.

РМФ(149) И положенъ бысть великий змий. И змий древний и сотона нарицаемый диаволъ, льстяи всю вселенную. И вложенъ бысть в землю и ангели его с нимъ ввержени быша.
Подобно не можетъ бо Небо носити земныя мысли, яко же свѣту тма непричастна бысть. Нарицает же ся обѣма именама сима овѣмъ яко клеветникъ оклеветал человекы Богу, а Бога человекомъ. Яко и Адаму завистника нарече. А другимъ яко противника противяся Богу и рабомъ Его.

РН (150) И бысть глас велий на Небеси глаголя, нынѣ бысть спасение и сила и царьство Бога нашего, и область Христа Его. Яко низложенъ бысть клеветникъ. Братия нашея клеветая и о нас пред Богомъ нашимъ день и нощь.
Противление и клевета на человеки диавола нарече еже и есть. Веселятъ же ся ангели о совершении его, кое убо причастие вѣрнымъ с невѣрными.

РНА (151) И тии побѣдиша за Кровь Агньчую. И за Слово мучения ихъ. И не возлюбиша душа своея до смерти. И сего ради веселятся Небеса и живущии на нихъ. Горе земли и морю яко сниде диавол к намъ, имѣяй ярость великую яко время мало имать.
И клеветаеми имъ рече человецы яко же ово ко всѣмъ человекомъ послушающимъ его обаче побиша побѣдиша и Христовами муки веселятъ же ся вышняя силы о спадении его и скорбятъ о прилежащихъ земнемъ. Горе же неймущимъ жития на Небесѣхъ но на земли, и мнози бо от сущихъ на земли побѣжают врага и побѣдятъ. Аще паки нынѣ наподвижающая ярится занеся приближаетъ мука ему.

Глава ЛЕ (35) Како не почиваетъ змѣй гоня Церковъ.

РНВ(152) И тогда видѣ змѣй яко низложенъ бысть на землю гоняще жену, яже роди мужескъ полъ. И данъ бысть женѣ обѣ крылѣ орла великаго. Да паритъ в пустыню в мѣсто свое. Идѣже препитана быша то время, и времена и пол времен от лица змиина.
Егда рече диаволь Христѣ приражашесъ отпаде и на Святыя Апостолы вооружся и постыдисѣ и смертию живот обрѣтшея узрѣвь я. И яви змия поземли воюющася. Землю ясти осуженъ быхъ, сирѣчь земския мысли. Тогда начатъ Церковъ гонити. Пакы рождешую и раждающую мужескъ полъ. Божия люди не ослабивыя. Двѣ же есть крылѣ два завѣта Ветхий и Новы и дан бысть и с има парящи в пустыни. Сирѣчь слабыя и всякия похоти питаясь. Паче же егда антихристъ приидет иже имать держати толико время. И вняже сего бѣгающе в пустыню. В горахъ и в вертепехъ начнут крытися.

РНГ (153) И низложи змий изо устъ своихъ воду яко рѣку да ю в рецѣ потопить. И поможе земля женѣ. И отверзе земля уста своя, и пожретъ реку ю же низложи змий изо устъ своихъ.
Написати яже имать Церкви пострадати от слуг антихриста Изо устъ его сирѣчь от повелѣний его реку глаголет. Нечтивыя мужи, или дѣмоны злыя. Или различныхъ напастей множество на ню исходящь, дабы ю погубил. Земля же ей поможи или долготою путь и трудным безводием и сухотою лукавых удержать, стремления.

РНД (154) Разгневася змѣй на жену. И иде сотворить брань с сѣменемъ ея и соблюдающимъ заповѣди Божия, и со имущим свѣдѣтельство Иисусово.
Болшая церковная учителя и презрящая земная, прешедшая в пустынныя страсти аще и сихъ грешит антихристъ. На ополчающаяся всемъ мире во Христѣ изведетъ брань рече. Мнози же сих за не воистину Христа возлюбятъ и побѣдяъ ихъ.

Глава ЛS (36) О звѣре имущемъ I (10) рог и главъ З (7). От нихъ едину яко заколену рече.

РНЕ (155) И стахъ на песцѣ морьстемъ и видѣхъ из моря звѣръ исходящь. Имущь роговъ I (10). А главъ З (7). И на розѣхъ его I (10) венецъ. И на главахъ его имена хулна.
Море есть молвное житие неправедныхъ в мире семъ. Звѣрь же есть антихристъ. Рози же со главами и вѣнцы единение еже имать кодия волу антихристъ являетъ. I (10) рогъ I (10) царь иже к нему обратятся, имена же хулная, З (7) же главъ его сирѣчь слуг его.

РКS (156) И звѣрь восходящь видѣхъ. И бѣ подобенъ и рысицы, и ноги ему яко медведъ. И уста ему яко лвова.
Рысицу Еллиньское царство менитъ. Медвѣдъ же Перское. Левъ Вавилонское. Ими же обладаетъ антихристъ пришед яко римский царь сихъ дрѣжаву разрушитъ. Егда скудѣлныя персты ногъ узрѣвъ возвеличится. Ими же на I (10) части является яко немощно удобъ сотворено царство разделитъ.

РНЗ (157) И дастъ ему змий силу свою, и престолъ свой и область свою великую.
И дати имать сатана на всю силу свою антихристу. И лживыми привидѣний и чюдесы на пагубу неутверженымъ.

РНИ (158) И едину от главъ своихъ яко заколену в смерть и язва смерти его исцели.
Главу менить яко заколену, или етера от князя его умертвена. И привидѣниемъ лестнымъ воскресима. Или римскую пагубу раздѣлениемъ заколену во едину державу исцелити мниму, по образу Августа Кесаря.

РНФ (159) И чюдися вся земля во слѣд звѣри. И поклонишася тому змию, яко дастъ область звѣрю глаголаше кто подобен тебѣ звѣрю. И кто можетъ сотворити брань с ними.
За привидѣния антихристова и диаволу поклонятся омрачении. Имъ же мертвыя воскрешая и знамения творя явится имъ.

РѮ (160) Дана быша ему уста глаголюще вельми хулы. И дана бысть ему область сотворить месяц М (40) и В (2). И отверзе уста своя в хуление к Богу. Хулити Имя Его и скиния Его живуща на Небеси. И дано быть ему сотворити брань со Святыми и победити я.
По ослаблению Божию пол Д (4) лѣта сотвори антихристъ губя вся и прельщая бывающими от него злыми чюдесы. И привидѣний. И скиния же есть во плоти Словеси Божия вселения. Покои же есть на святыхъ на нюже начнетъ хуловати.

РѮА (161) И дана бысть ему область на всякомъ колѣне и на людехъ. И на языцехъ и племенехъ, и поклонятся ему вси живущей на земли. Горе, горе, им же суть не написана имена в книгахъ животныхъ Агнеца заколенаго от сложения всего мира.
Сими бо языки и людми насилиемъ область имать. Тѣмъ же паче им же имена не написана суть в книги животныя.

РѮВ (162) Иже имать ухо слышати да слышитъ, иже во пленение идутъ. Аще кто оружиемъ убиетъ, подобаетъ бо ему убиену быти. Здѣ есть терпѣние и вѣра Святыхъ.
Достоинъ бо рече кождо дѣлъ своихъ начатокъ приемлетъ. Иже бо зло творятъ искренимъ. И удобъ пленени будутъ антихристомъ. Не приязненыхъ оружиемъ душегубную смерть приимуть. Имуще же вѣру и терпѣние, книгамъ животнымъ да сподобятся. Им же и насъ сподобит причаститися Боже нашъ. Ему же Слава во вѣки. Аминь.

Слово ГI (13)
Глава ЛЗ (37) О звѣре имущем В (2) рога.

РѮГ (163) И видѣхъ инѣ звѣрь восходящь от земля и имяше два рога подобна агньчу и глаголаше ко змию.
Звѣрь сый лживый пророкъ есть из земля убо исходящь сирѣчь из земнаго сквернаго жития. Имѣяй же два рога подобна агньцу. Глад каже за сокровенный волкъ в кожи овчии. Убийственное покрывающи за образ благовѣрныя вѣры, в начатце его. Яко змий же глаголеть злоначалнаго врага диавола дѣла содѣлаетъ иже бесѣдуетъ.

РѮД (164) И власть перваго звѣри всю творяще пред нимъ и творяше земли и вся живушая на ней. И поклонитися звѣри первому. Ему же целена бысть язва смертная и сотворитъ чюдеса велия. Да и огнь сотворитъ сходити с небеси на землю пред человекы.
Вся рече здѣ привидѣние отступнаго лжи антихриста предътече на прельщение человеческое. Да быша яко бога имѣли антихриста. Яко от таковыхъ чюдесъ свидѣние приемлюще. По образу Крестителя Иоанна, не дивно же видѣти огнь с небеси спадающъ, понеже и во Иове пишетъ тако.

РѮЕ (165) Льститъ живущая на земли. Знамения же дана быть ему пред человѣки творити.
Лстить же рече чѣловекы иже иму на земли скверное житие. А иже имутъ на небесехъ житие. Не прельститъ ихъ привидѣниемъ утвержены крѣпко. Прохлажениемъ пришествия его.

РѮS (166) Глаголя живущимъ на земли сотврите тѣло звѣреви, иже имать язву оруженную и живъ бысть. И дано бысть ему дати духъ звѣрѣному тѣлу. Да проглаголетъ тѣло звѣриное и сотворитъ, да иже не поклонится тѣлу звѣриному, убиенъ будетъ и сотворитъ вся малыя и великия, богатыя и убогыя, свободныя и работныя. Да дастъ имъ начертание ихъ на десней руцѣ, и на челехъ, и да никто же ихъ не возможетъ купити или продати токмо иже имать начертание, на челѣ своемъ имя звѣрино число имени его.
Имя звѣрино, в число имени его пишется множицею привидѣниемъ возглаголеть, и образы и телесы дѣмоньскими и трупы мертвыхъ яко Симанъ Волхвъ показа римляномъ мертва лежаща. Аще и Петръ обличаетъ како мертвии востанутъ, тако и тогда заступникъ антихристовъ ничто же кромѣ дѣмонъ издѣваетъ. И сотворитъ во образъ зверинъ. И покажет глаголющи. Дабы прельстилъ люди. Осудит же избивати иже есть ему не поклонитъ. И начертание же пагубнаго имени отступника. На вся наложити потщится на десницахъ же да добрыхъ дѣлъ отсечетъ. Дѣтели а начале давольстий тмѣ, и начнутъ прельщеныя являтися имъ, но не приимуть знаменавшеся Божиею Печатию лица своя, и число звѣрино пространити начнутъ в купляхъ, и в продани ихъ. Да иже сего приимутъ от потребныя и нужда смерть приемлютъ.

Глава ЛИ (38) О имени звѣрине.

РѮЗ (167) Здѣ мудрость есть иже имать умъ да почитаетъ число звѣрино. И число бо человѣческо и число бо его Х. Ѯ. и S.
Истоние число имени его яко и прочая писания о немъ являютъ, времени искушения тогда. Аще бо бы явѣ разумѣти тако во время. Иже бы разумѣлъ и узрилъ обличилъ бы, но не изволи Божия Благодать во Святыхъ книгахъ написану быти пагубному имени, искушением же многа имена можетъ кто создати и обрѣсти число имуща по греческому языку, и по иному, яко се имать пентитакъ. Пендиктъ. Злу наставний истовне пакостникъ древле клеветникъ и агнец неправеденъ. От сихъ бо имян противныхъ лесть его наречется свою славу в студѣ полагая.

Глава ЛФ (39) О ҂Р҂М҂Д стоящихъ со Агнецемь на горѣ Синайстей.

РѮИ (168) И видѣхъ же се Агнець стояше на горѣ Синайстей и с Ним ҂Р ҂М и ҂Д (144 000) имущи Имя Его, и Имя Отца Его написано на челехъ своихъ.
Агнець есть воистину Христосъ на ветсей горѣ Сионьстей стоя. Но на новей же есть Живаго Бога град си же тысуща или много полжение апостольскаго сѣмени являет сущая Благодати в коемждо. Или еже суть Новаго Завѣта чистоту сохранили свою. По внутренему же и внѣшнему человеку, обрѣтеся тѣм же инѣй суть кромѣ реченныхъ имянъ первѣе. Обою на I (10) колѣну Иевлеву. Ими же чистоты плотьския не прирече сих же всехъ целая свѣтомъ Божия Лица назнаменуются. Им же пагубным ангеломъ страшни являются.

РѮФ (169) Слышахъ глас с Небеси, и яко гласъ вод мног, яко грома великаго глас иже слышахъ яко гудец гудущъ иже в гусли своя, и поющь пѣснь нову пред престоломъ и пред Д (4)-ми животными. И двемадесятъ и Д (4) старцы.
Глас водъ мног и грома и гудущих исхождение Святыхъ пения являетъ. Гласное ихъ устроение соглашение пѣснь одрѣжащая вся человечская на онѣхъ Небесехъ первенец Церкви изборъ яко се во единомъ согласии станутъ пѣниемъ Святыхъ шумятъ. Иже умершвением плотьскихъ похотей исправиша се яко же рече. Никто же инѣ не можаше навыкнути развѣ тѣхъ понеже мѣрою жития и воля протягнется. Яко же и человеческимъ слугамъ любови владычна тайна явление бываетъ.

РО (170) И никто же не можаше навыкнути бѣ ни токмо ҂Р.҂М. ҂Д. (144 000) искуплени от земля си суть иже со женами не оскверниша себе. Унотою бо суть сии иже хожаше во слѣд Агньца, а може колиждо ходитъ. Сии искуплени быша от человекъ. Начатокъ Богу и Агньцу. И во устехъ ихъ не обретѣся лесть яко безпороку суть.
С нимъ сия суща служаше по нареченныхъ К (20) и Д (4) старцехъ прочихъ болша. Плотския же чистоты ради. И языческаго и ручнаго непорока. Иже по Пришествии Христовѣ стяжутъ, угожениемъ свѣтлостию. Ею же новей пѣсни научаются. Яже есть многымъ, не токмо всемъ житии но и в будущемъ вѣцѣ неразумно. Аще бо совершении разумъ приидетъ, тогда престающу иже есть от части и по ангелу но обаче по житию семи Святыхъ Божиихъ тайнъ будетъ явление. Многы бо суть обители у Отца. И звѣзда лутчи есть звѣзды славою. Тако многа разделения мучения от нихъ же дабы ны избавилъ Господь Богъ нашъ, и дабы причелъ спасаемыхъ Своею Благодатию. Яко тому есть Слава, Отцу и Сыну и Святому Духу и нынѣ и присно.

Слово ДI (14) Глава М (40) О ангеле проповѣдающемъ приближение будущаго суда.

РОА (171) И видѣхъ инѣ ангелъ парящь посредѣ небеси держащи Евангелие вѣчное. Благовѣститие сѣдащимъ на земли на всяко племя, языкъ и колѣна, и людий. Глаголя гласомъ великымъ. Убойтеся Бога и дадите Ему Славу. Яко приидет часъ суда Его и поклонитеся Сотворшему Небо и Землю, и море и источникы водныя.
Сирѣчь межу небомъ и землею лежатъ, да от земля воздвигъ человекъ вознесетъ на Небеса и совокупитъ я со Христомъ славою нашею. И Евангелие же вѣчное есть. Еже от вѣка наречено Бога боятися и не ужасатися антихриста. Не могуща душа с тѣломъ погубити но з дерзостию противитися ему. Яко в малое время держащу приближающуся суду и житейску возданию.

Глава МА (41) О ангеле вторемъ проповѣдающемъ падение вавилоньское.

РОВ (172) И инъ ангелъ во слѣдъ иде глаголя. Паде Вавилонъ великий от вина и ярости любодѣяния своего, наполни вся языкы.
Вавилонъ менитъ семъ именъ всего мира смешение, и житейское смущение. Вино же и ярость любодеяние не токмо от идольскихъ служебъ, удивльшеся в умѣ неистовѣ от всякого грѣха пияньствена. Им же и вся злобы здѣявша. Псаломскому словеси потреблени будуть, падает же ся Вавилонъ явльшуся вышнему Иеросалиму.

Глава МВ (42) О ангеле третьемъ утвержающемъ люди Господня не приимати антихриста.

РОГ (173) Инъ ангелъ вослѣд его иде глаголя гласом великимъ иже поклоняется звѣрю и телеси его, и приемлеть начертание на челѣ своемъ или на руцѣ своей, и той имать пити ярости Божия вина. Чвана не растворена в чаши гнѣва своего, и будетъ мученъ огнемъ и жупеломъ предо Ангелы Святыми и пред Агньцемъ.
Ащеся рече кто озвѣршемуся антихристу повинится, и нечестивое житие его держит или словомъ или дѣломъ бога нарицают себе и сказают на руцѣ и на челѣ дае мое начертание, и тѣ причастятся с нимъ. Испити имут чашу мучительну нерастворену же с милостию Божиею. Чвану же от различныхъ мукъ. Вино же ярости нарицается мука хожениемъ нечестиваго. Вина иже упаяетъ пиющая, имже бо кто согрѣшаетъ, тѣмъ мученъ будет.

РОД (174) И дымъ мучения ихъ во вѣкы вѣкомъ исходитъ.
Дымъ от огня исходящь менить мучащаго вверженыя во вѣки вѣкомъ да навыкнеть яко бесконца есть миру мука грѣшныхъ. Яко же и праедныхъ покой.

РОЕ (175) И неймут покой день и нощь покланяющеся звѣрю и телеси его и иже приемлетъ начертание имен его.
День же и нощь менит не яко же чтем по солнечному числу будущаго вѣка устрой на обличение его времени. День же есть Святыхъ вѣчный животъ разумеваю. А нощь нечестивыхъ смерть юже приимутъ творящей диавольская дѣла. А Христа хуляще, антихристова имя яко честно написающе на своихъ сердцехъ.

РОS (176) Здѣ есть терпѣние вятыхъ яко соблюдающей заповѣдь Божию и Вѣру Иисуса Христова возрадуются.
Грѣшницы же рече вѣчную муку приимутъ а Святии бѣды здѣ вскоре мало претерпѣше и заповедь Божию сохраняше. И Христову вѣру соблюдаше возрадуются.

РОЗ (177) И слышахъ с Небеси глас глаголющи напиши блажении мертвии умирающе отселе о Господе. Ей глаголет Духъ да почиютъ от трудов своихъ, дѣла бо ихъ ходят вослѣд с ними.
Глас же на Небеси глаголющь не вся блажит мертвыя но умершая о Господѣ. Иже суть мертвии от сего свѣта, мертвость Иисусову на тѣле своем носят. И со Христомъ стражуще тѣмъ выносят воистинну от сего тѣла восхождение от труда на покой. И дѣла же во слѣд идуща венца и славу являют болшим числом преспѣвающа страсти, недосотйни бо скть страсти нынѣшная времени, и хотящей славе явитися в нас. Ему же Слава во вѣкы вѣкомъ.
Аминь.

Слово ЕI (15)
Глава МГ (43) Яко седяй на облаце серпомъ скончает прозябающия земля.

РОИ (178) И видѣхъ се облакъ свѣтелъ и на облацѣ сѣдящъ подобенъ Сыну Человеческому. Имущи на главѣ своей венець златъ и в руцѣ его серпъ остръ.
Облакъ менитъ сущей иже Христа взятъ от очию Апостоломъ. Или етеру ангелъску силу чистоты дѣля и лѣности якоже рече Давидъ в сѣдя на Херувиме и лѣте. Сѣдящаго же на немъ Христа менитъ. А венець царьское знамение, видимым же и невидимъ силамъ. Злат же зане есть честнѣе внас той серпъ явление есть конечное. И самъ бо ся жатву мира сего нарицаетъ.

РОФ (179) Инъ ангелъ изыде из Церкви велиим гласомъ вопия и сѣдящему на облацѣ посли серпъ свой, и положи и яко прииде часъ пожати яко исше трава земская. И положи сѣдяй на облацѣхъ серпъ свой на земли. И пожне на бысть земля.
Ангельский глас сказаетъ молитву всѣхъ Небесныхъ силъ желающи чести праведныхъ а грѣшныхъ отсѣсечение беззакония, видѣти егда предстанут движимая и мимоходящая. А еже поспѣ жатва, являетъ постигшее конечное время. И егда созрѣвъ яко пшеница зрѣла. Вѣрныхъ сѣмя небесныхъ жилище. И житница нетлѣнныхъ достойно будетъ. Ово Л (30) и Ѯ (60) а инъ Р (100) тяжай плод воздая.

Глава МД (44) О друземъ ангели обьемлющемъ горкий виноград.

РП (180) И инъ ангелъ изыде из Церкви сущая на Небеси имый сепъ остръ.
Аще и Духъ нарицается велика свѣта ангелъ. Кончину хотяще сотворити гршнымъ.

РПА (181) И инъ ангелъ изыде от олтаря имый область на огни и возгласи кличемъ великимъ ко имущему серпъ остръ глаголя, посли серпъ Твой острый и обьемли гроздие винограда земскаго яко созрѣвше гроздови его.
И от сего разумѣваемъ яко ангельския силы имут власть повелѣвати твари и овии огневи, инии же водамъ, а друзи и иному и ниже се мучителное огнемъ являетъ кличнымъ гласомъ вопия обьимати грозды. Ими же исполняюще чашу гнѣва Господня. Юже приймут муки нечестивии законопреступницы являются.

РПВ (182) И положи ангелъ серпъ свой на землю и обьимавь виноград земный. И вложи в точило великия ярости гнѣва Божия.
Точилъ Божий есть диаволу и ангеломъ его уготованное мѣсто страстное и велико же за множество мученыхъ в немъ. Широкъ бо пагубны путь и пространенъ.

РПГ (183) Попрано бысть точило внѣ града. И изыде кровъ ис точила до уздъ конемъ о стадий тысуща и Х (600).
Внѣ град убо праведныхъ точило ископано будетъ. Ни како же не приближается жребий семъ же злѣ грѣшныхъ. Не вкупно же сихъ житие будетъ, яко же и казнь бѣскровъ же гроздова есть вино. Вина же нарастворенания гнѣва Божия исполнь чашу. Юже приимутъ недостойнии муку. До узды же сирѣчь оревитыхъ конь доходяще. За не суть сласти обуздали. Тысущу же грѣха совершение глаголеть. А (1)-е совершение числу Х (600)-въ Х (600) яко бо лѣто Ноево грехъ потопленъ бысть. Зане оскверниша тварь сотвореную въ S (6) дний.

Глава МЕ (45) О седми ангелъ, наводящихъ на человѣкы язвы преже кончины. И о стъкляномъ мори внем же Святыя видѣ.

РПД (184) И видѣхъ ино знамение на Небеси, велико и чюдно. З (7) ангелъ имуще З (7) язвъ послѣднихъ, яко тѣми скончается ярость Божия.
Здѣ З (7)-е число приемлетъ неправды бывающия въ З(7) дней вѣка сего. З (7) язвъ, З (7)-ю ангелъска отставляти по ихъ же будущее Святыхъ житие, стеклянымъ моремъ сказаетъ.

РПЕ(185) И видѣхъ яко море стекляно смѣшено со огнемъ и побѣжающая от звѣръ и от телеси его, и от начертания его, и о числѣ имени его, стоящая на море стекляномъ имущи гусли Божия.
Стекляное море менит чистоту жития праведныхъ смѣшено еже со огнемъ якоже рече Апостолъ яко когождо дѣло. Яко же огнемъ искуситися. Или яко праведнымъ и чистымъ всѣмъ даяти. А грѣшнымъ опаление, или огнемъ Божий разумъ, И Святаго Духа Благостию являютъ. Гусли же являя удобное уморвение, и сладкий животъ во единогласии духовнемъ.

РПS (186) Пояхъ пѣснь Моисеову раба Божия, и пѣснь Агньчу глаголюще велия и дивна дѣла твоя Господи Боже Вседръжителю. И праведни и истинни путие Твои. Царю языкомъ кто не имать убоятися Господи, и прославити Имене Твоего. Яко единъ праведенъ еси. Яко вси языцы прийдуть и поклонятся пред Тобою. Яко оправдания Твоя явишася.
От Моисеовы пѣсни закономъ Благодати оправдавшеся. Пѣние Богу воздающа разумеваемъ. От Агнеца пѣснь по Христове пришествии подобно жившая. Непрестанну хвалу о бывшихъ добродѣтелехъ о благодатныхъ от Него народе нашемъ. Всякъ языкъ в свой разумъ Святыми Апостолы призва.

РПЗ (187) И по сихъ видѣхъ отверзеся Церкви скиния и свидѣния на Небси. И изыде из Церкви З (7) ангелъ иже имяху З (7) язвъ оболчены въ камень чистъ и свѣтелъ. Препоясани в перси поясы златымъ.
Скинию менитъ ея же образ показа Бог Моисеови творити в пустыни. Оболченыя же в камень за чистоту и приближение ко угольному камени Христу. Препоясани же златомъ в перси, иже злащани ей честь служебне исполнь.

РПИ (188) И единъ от Д (4) животныхъ дастъ З (7)-ми ангелъ З (7) фиалъ златых исполнь ярости Бога Живаго во вѣки вѣкомъ Аминь.
Якоже во Езекиили пишеть, от первыхъ присно ли я В (2) и разумъ приходят на Небесехъ по приятию по великому Дионисию.

РПФ (189) И наполнишася Церкви дыма от Славы Божия и от Силы Его.
Страшно и ужасно ярость Божия сказается. Ея же исполняется Церкви и на достойныя ея приходитъ во время судное.

РЧ (190) И никтоже смѣяше внити в Церковь дондеже скончаются З (7) язвъ ангельскихъ. И слышахъ глас велий с Небеси, глаголющь къ З (7)-ми ангелъ идѣте излити З (7) язвъ, фиалъ ярости Божия на землю.
Сего разумѣваемъ, яко прежде грѣшникомъ муки даны будутъ, потом же паки и Святый покой. Которую же язву яжеся обрящуть на кончине, сподобляя. Кто не согрѣшитъ Истинны Человеколюбець бо Богъ сый, дабы умалилъ муки сия на семъ житии. И на достойныя наведетъ Енохомъ и Илиею их же избыти помолимся Господу Богу нашему. Ему же Слава во вѣкы. Аминь.

Слово SI (16)
Глава МS (46) Како первой чаши излиянней гнойна отступнице бысть.

РЧА (191) И иде первый ангелъ. И излия фиаль свою на землю. Бысть гной золъ на отступницехъ и лютъ, имущихъ начератние звѣрино и кланяющихся телеси его.
Фиаль здѣ яко и чаша страстная нарицается ею же рече егда излиетъ ангелъ гной будет лютъ в сердцехъ, седѣется. Трепещущихъ сердцу ни како же исцеления не будетъ от отсутпникомъ прельстившаго антихриста. Будут же явѣ на телесѣхъ ихъ сия язвы во обличение гнойныя ихъ душа.

Глава МЗ (47) Вторая язва, имущихъ в мори.

РЧВ (192) И вторый ангелъ излия фиаль свою в море и бысть кровъ яко мертвеца. И всяка душа жива умретъ яже есть в мори.
Се дивно есть Божий силе. Во обличение антихристу, и льстимымъ имъ. Святыма пророкома Илиею и Енохомъ, претворити в кровъ море яже суть в немъ. Из мори ти, яко же А (1)-е во Егупте сотвори. Дася быша вѣрнии утвердили, а невѣрнии убоялися. Илие его да гогъ и магогъ востанета на всю землю, и многа пролития крови будуть по всей земли и по морю, и всѣм воеводамъ сѣкущимся.

Глава МИ (48) Како Г (3)-я чаша рѣкы в кровъ претворяются.

РЧГ(193) И третий ангелъ излия фиаль свою на реки и источники водныя. И быша кровъ. И слышахъ ангела водскаго глаголюща, Праведен еси Сый и Бываяй и Преподобен, яко си судилъ еси. Яко кровъ Святыхъ и пророкъ излияша, и кровъ имъ дастъ пити достойни суть.
От сего являются и над стихиями суще ангели, яко же и преж рѣхомъ. От них же единъ есть над водами рече и Бога хвалити одостойнемъ наведене судѣ на преступникы. Яко руны окровавльши кровми Святыхъ пророкъ. Кровъв дастъ имъ пити. Пророки же менитъ или за твердое иже стояние к вѣре в то время. И пророчествия достойныя. Будущи яже избиютъ приятели антихристови или обличающа, иже начнутъ отметатися пророческия проповѣди, и и причаститися убийстве ихъ.

РЧД (194) И слышахъ другаго от олтаря глаголюща, ей Господи Боже Вседрѣжителю истинны и прави суди Твои.
Овогда олтаря Христа сказаетъ. Яко хлѣбом и словесными службами, на немъ приносимому Отцу. Овогда же ангельския силы яко вознасяща наша молитвы духовными службами. Глас же от праведныхъ рече. Понеже рече радуются и веселятся мысленныя силы от обращающихся и кающихся. Пекут же ся от отпадающихъ праваго пути на ны же ны обращь дабы нас наставилъ Христос Богъ нашъ. Ему же Слава во вѣкы. Аминь.

Слово ЗI (17)
Глава МФ (49) Како Д (4)-е зноемъ изваряются человецы.

РЧЕ (195) И четвертый ангелъ излия фиаль свою на солньце. И дано бысть ему опалити человеки огнемъ. Иззнойшася человеки зноемъ велиемъ. И хулиша Имя Христово. И иже имать область на язвахъ сихъ, и непокаяшася, дати Ему Славу, от дѣлъ своихъ.
Может же и се видимо быти тогда. Да варомъ сего солньца озноени будутъ человецы. Человеколюбцу Богу на покаяние обращающу. Яко и во глубину золъ падша не на обращение, но на хулу ся подвизаютъ. Или зноемъ сирѣчь напастьми. Да наведениемъ напастей матерь грѣху возненавидятъ, но безумницы всегда же бы грѣхы своя познати на Бога языкъ свой поострятъ. Яко и нынѣ есть видѣти многажды.

Глава Н (50) Како Е (5)-ю чашею звѣрино царство омрачается.

РЧS (196) И пятый ангелъ излия фиаль свою на престоле звѣрине. И бысть царьство его омрачено. И жваху языки своя от болѣзней своихъ и хулиша Бога Небеснаго. От болѣзней своихъ и от голья, и непокаяшася от дѣлъ своихъ.
Иже есть излияти не престолъ звѣринъ фиалъ сказаетъ, сирѣчь на царьство антихристово и омрачити е, яко неймуще свѣта праведнаго солньца. А еже языки жуютъ, велику страсть являетъ. Ею же обыяти будутъ прельщениемъ. Богогневными ранами мучими будуть. Да быша разумѣли яко милостивъ есть. Его же онѣ яко Бога славят и от льсти отступили. Они же ни от сих на покаяние но на хулу ся обратятъ. Злѣй же дѣмони человечески телесы. Яко сосуды Святыми мучениками хулити начнут, но обаче те пущихъ и не избудутъ.

Глава НА (51) Како S (6)-ю путь чрез Ефрантъ отверзается царемъ сущимъ от востокъ солньца

РЧЗ (197) И шестый ангелъ излия фиаль свою на реку великую Ефрантъ И иссяче вода ея да уготовится путь ту царем сущимъ от востокъ солнечных.
Или гога или магога от западныхъ странъ преѣхавше Ефратьсую реку менит оскудѣвша воды от ведра повелѣниемъ Божиим. Или антихриста от восточных странъ перьская земля идѣже есть даново колѣно, от корени еврейскаго со инѣми цари и велможами к западу Ефратъ преѣхат или телесную или душевную смерть на человеки наводящи. И на овы вѣрою и терпениемъ, а другия страхомъ и наготою и слабостию.

РЧИ (198) И видѣхъ изо устъ змиевъ и изо устъ звѣринъ, и изо устъ лжаго пророка духи тринечестивыхъ аки жабы исходяща.
И от сего являетъ диавола сущая аки змия, антихриста же аки звѣръ, а лжаго пророка яко иного другаго из нихъ же рече, подобно жабам дуси исхожаху. За ядовитую ихъ нечистоту и скверну. И на мокрыя сласти желание злыхъ силъ. Яко нечествая и лживая знамения покажут человекомъ.

РЧФ (199) Суть бо дуси дѣмонстии творяще знамения яко исходят на Царя, и всея вселенныя собратися на брань. Деяния тому великаго Бога Вседержителя.
Дѣемая рече дѣмоны лжая знамения воздвигнут послушавшая ихъ на брань Великаго и Святаго Божия деяния еже есть судити живымъ и мертвымъ. И тогда противльшеся Христу восплачются не в пользу А (1)-го ради прельщения бьющеся.

С (200) Се гряду яко тать. Блаженъ бдяй, и блюдый ризы своя да не нагой ходит и узрят срамоту его. Избирая на мѣсто собираемое еврейски Армагдѣон.
Еже есть бдѣти и хранити ризы сказаетъ не спати от добрыхъ дѣлъ тако бо суть Святыхъ ризы. И ихъ же кто лишенъ будетъ. Не веля нагу ходяше стыдитися. Армагдѣон же есть сѣчище, еже сказается разсѣкаемая. Ту бо языцы собирающеся и сѣкутъ диавола воеводу имуще. Иже радуются о человеческой крови. От него же дабы ны избавил Христосъ Богъ нашъ. Ему же Слава во вѣкы вѣкомъ. Аминь.

Слово ИI (18)
Глава НВ (52) Како З (7)-ю градъ и трусъ на человекы бываетъ.

СА (201) И седмый ангелъ излия фиаль свою на аеръ. И изыде глас велий из Церкви, и от престола Господня. И быша блистания и громи и глас. И бысть трусъ великъ тако же ни коле не бысть от нелиже человецы быша на земли. Толикъ трусъ великъ бысть.
Ангельский глас с Небеси бысть рече, сирѣчь Божия Заповѣди совершиша. И молния же и громи и гласи. Пристрашное будущее Христово Пришествие являетъ. Яко же древле Божие сошествие на Синайскую гору. Трусъ же сущихъ претворение. Яко же пророкъ рече, яко и еще единою потрясу не токмо землею но и небомъ.

СВ (202) И бысть град великъ и вѣ три части, и гради язычестии и падоша мнози.
Иерусалимъ мнитъ в нем же сядутъ Г (3) племена крестьяне, июдеи, самаряне иже свою зло являтъ время обрѣтше. Или правовѣрнии, июдей же суть вѣры не прияли егда же напастное разгорѣние обличится. Тогда на трое ся раздѣлятъ. Своемъ кождо чину приступая. Гради же разорени язычно являетъ, или языческаго жития преставле има пришествиемъ Божия пришествия.

СГ (203) И Вавилонъ великий помяновенъ бысть пред Богомъ. Дати ему чаша вина, ярости гнѣва Своего.
Вавилона сего мнить, смѣшения много человеческаго множества иже ся есть своими напастьми увеличино от бѣднаго богатьства. Испитием же чаши Господня гнѣва. В память пришед яко от забвения терпѣниемъ.

СД (204) Всякъ отокъ бѣжа и гора не обрѣтеся.
Отоки церкви мнить а горы сущая поклонники в нихъ. Бежати же начнуть в то время, яко же рече тогда от востокъ побегнут на западъ. И от запада на восток будетъ бо скорбь велика.

СЕ (205) И град великий яко талантъский снидет с небеси на человеки. И хулиша человецы Бога от язвы градныя, велия есть язва его зѣло.
Град с небеси сходящъ Божий гнѣвъ разумехомъ. Талантъ же совершение за совершеннымъ грѣхъ тяжкий ему же образ есть талантъ. А еже не на покаяния но на хулу обращахуся жестоты сердца ихъ являетъ. Тѣмъ же яко и фараонъ будет паче же и сего жесточайша.

Глава НГ (53) О единомъ от З (7)-х ангелъ показующемъ Евангелисту любодѣиваго града потребление от З (7) глав и I (10) рог.

СS (206) И прииде единъ от З (7) ангелъ имущихъ З (7) фиалъ, и глаголя со мною. Глаголя ми прииди да покажу ти сосуд любодѣица сея великия сѣдящая на водах многах. С нею же любодѣяша цари земстии и упишася живущии на земли от вина любодеяния ея. И веде мя в пусто мѣсто духомъ. И видехъ жену сѣдящу на звѣри червлени. Исполнь имян хулных иже имяше глав З (7) и рогъ I (10)
Сию любодѣицу друзий римский град мнят яко на сем стоящъ рог. Женьским бо именем всякъ град греческий нарицается. З (7) глав звѣрь иже ею носитъ, З (7) царь нечестивыхъ от Дементия на до Диоклетияна. Иже церкви гониша или греческий Царьград мнити.

СЗ (207) Жена юже видѣ град великий есть. Иже имать царьствие над языки великими.
Мы же глаголемъ о прочихъ наставляеми се всеземское царстиве яко воединомъ телеси державъ царство градомъ мнит. Пустыню же запустѣние града мнит хотящей быти тогда. А звѣрь дияволя убийство и кроворадование его менить. Ими же на Бога хулы возлагают. Суровый бо и свѣрѣпы убийственный образ, звѣрь же и червленая широта являет.

СИ (208) И жена бѣ оболчена в перфиру червлену позлащена златом и камениемъ драгимъ и бисером.
В червлены в порфиру оболчена есть яко приклад владычества иже имать всѣми. Тѣмъ же и камениемъ драгим и бисером украсилась есть.

СФ (209) И имущи чашу злату в руцѣ своей полну мерзости и сквернъ любодеяния ея.
Чашу убо сластное питие злыхъ деяний менить а златомъ честное мерзости же мирския. Божия начатки имже грѣхолюбное множество напаяет, якосладко питие приплачащи.

СI (210) И на челе ея имя написано тайна. Вавилонъ великий мати любодѣицам и земскимъ мерзостемъ.
Написано на чѣле ея являетъ безстуда грѣховное совершение и срдечное смущение. Мати же есть си душевнаго любодѣяния учитель. А владомымъ градомъ мерзящая Богу беззакония являющи.

Глава НД (54) Како ангелъ видѣную тайну сказаетъ.

САI (211) И видѣхъ жену пьяну кровми Святыхъ и кровию мученикъ Иисусовъ. И дивихся видѣнию тому дивомъ велиимъ и рече ми ангелъ. Почто ся дивиши. Азъ ти реку тайну жены сея и звѣри носящаго ю, и имуща З (7) главъ и рог I (10).
От дѣлъ множицею имена градомъ неречена суть. Яко се ветхий Вавилонъ любодѣица нарицается, Иерусалимъ нарицается. Тако же се лицѣ любодѣица быстьти старый Рим, Вавилонъ в Петрове епистолии. Всяко кождо град видя и Евангелие и убийстве кромѣ веселитъ. От них же единъ град видя Евангелистъ. Окровавльшеся кровми Святыхъ и дивляшеся, и от ангелъ научашеся еже имать пострадати на кончину. Или перьский Вавилонъ в нем же многы быша мукы. Или стары Римъ, или новый. Или весь миръ. Всюду бо суть грѣси бесчислении, или различны. Святыхъ крови пролияни быша. Оводѣ болѣ а инъде менши яко и до конца вѣка будутъ.

СВI (212) Звѣрь иже видѣнъ и нѣсть и имать быти. Взыдет от бездны и в пагубу итить.
Звѣрь дияволъ есть присно ища кого поглотити. Сей убиенъ есть Крестомъ Христовымымъ паки на кончину оживет. Льстя знамении и чюдесы антихристомъ. Сего ради бѣ и можаше преже Креста нѣсть же сего в муцѣ Христовѣ и спадша изо области своея. Ю же имяше на языцехъ идольскими служении, прийдет же на кончину исходя от бездны сирѣчь грѣховныя глубины жития сего. От туду бо антихристъ приидеся. Сотону ведый на пагубу человеку. И идый на муку вечную.

СГI (213) И удивятся живущи на земли имже не написана суть имена в книгахъ животныхъ от сложения всего мира. Видяше звѣрь яко бѣ и нѣсть и предста.
Удивятся бо рече пришествию звѣрину за лестная чюдеси же не будутъ написани в славе животныхъ книгъ. И не причастившуся твердию Господа. И прореченныхъ не помышляюще, како древнюю силу приятъ.

СДI (214) Здѣ умъ иже имать мудрость.
Духовными сущим же сказаемыхъ духовно потреба есть рече, разумѣвати глаголемая.

СЕI (215) Седмъ главъ, З (7) рогъ есть идѣже жена сѣдитъ на нихъ, и З (7) царь есть.
Роды мнить сущая З (7) мѣстъ владычествиемъ и силою жития сего. И прочихъ больши суще бывша. На них же во своя времена, когождо царство утвердися. Главъ же З (7) изменений, З (7) по родомъ идѣже когождо начнетъ царствовати первѣе. Яко се Нилъ во Асирии, Арвакъ в Мидѣхъ, Новходоносоръ в Вавилонѣ, Киръ в Персѣхъ, Александръ во Грецехъ, Ромиил в римлянехъ, Костантинъ во Цариграде.

СSI (216) Пять ихъ пало есть единъ есть, а другий неуже есть пришелъ. И егда приидетъ, мало ему есть пребыти.
Блаженный Ипполитъ сказаетъ, яко З (7) вѣкъ мнить от них же Е (5) мимо шло а S (6) и бѣ егда сия видѣ апостолъ. Седмому же пришедшу има есть пребыти. Или царствия яже есть преже рѣхом. Е (5) бо ихъ мимо шло. S (6)-е еже бѣ. З (7)-е еже не убо бѣяше пришло.

СЗI (217) Звѣрь иже бѣ. Вѣрь иже бѣ, и той И (8)-й есть в пагубу идетъ.
Звѣрь антихристъ есть рече осмый же яко по седми царствию востанетъ на земли. От З (7)-ми же яко от единого иже воздвижется. Яко римский ся царь творя на разрушение, и запустѣние послушающихъ его приидет. И по семъ в пагубу геоньскую приидетъ.

СИI (218) И десять рогъ яже видѣ, I (10) царь есть яже царства не уже прияли суть, но область яко цари един часъ приемлютъ со звѣремъ.
Сию I (10) рогъ Даниилъ видѣ сирѣчь царя пред антихристомъ идуща. От нихъ же три искоренитъ а прочая покоритъ под ся. Проклятый единъ часъ малое время мнит или от лѣтъ, Г (3), месяцы мнитъ, егда антихристу покорятъ, яко старѣйшу.

СФI (219) Сии едину волю имутъ и силу, и область свою звѣрю даетъ. Сии со Агнецемъ брань сотворятъ. И Агнецъ побѣдитъ я. Яко Господь Богъ есть и Царь царемъ, и сущии с Нимъ избрании вѣрнии.
Подобно рече никто же можетъ двема господинома работати, тѣм же совокупляютъ злымъ совокуплениемъ, вдаются антихристу. И отмѣтаются Христа. Но подобит я заколены нас ради Агнецъ Божий. И нѣсть бо от тя то от Него царство и господьство. Имже бѣ от человекъ да избранныя своя причастникы сотворитъ во своемъ царствии.

СК (220) И глагола ми водя и яже еси видѣлъ. Идѣже любодѣица сѣдитъ любодией народи суть, племена и языцы. И I (10) рогъ яже видѣвъ и звѣрь, сию любодѣицу языки возненавидети имутъ, запустѣвшу и сотворяютъ и нагу. И плоти ея снѣдятъ. И ту сожгутъ огнемъ. Бог бо далъ есть в сердца сотворити волю Его. И сотворитъ едину волю. И дати царство ихъ звѣри. Дондеже скончаются словеса Божия. И жена ю же видѣ град есть велий иже имать царьство над цари земными.
Ангелу явеси я сказавшу. Лихо есть глаголати о сихъ I (10) рогъ I (10) царь мнитъ творящая волю врага мѣстника. Антихриста противящася Христу. А град великий иже начнет тогда в та времена власть имѣти над цари земскими. Или многъ человеческий град, сирѣчь миръ. Сей злюбодѣявше и сластнымъ похотемъ послужиша, запустит и яко звѣрь кровопийца от крови бо и плоти человечески насытится радуяся. Приснокровенъ сый сердечное попаление свое веселие и пищу сотворит. От него же напасти Человеколюбецъ Богъ нащъ дабы ны избавилъ и Причастилъ Небесней и вышней митрополии. Яко таму подобаетъ всяка Слава и Дръжава и покланяние Отцу и Сыну и Святому Духу и ныне и присно о во вѣкы вѣкомъ. Аминь.

Слово ФI (19)
Глава НЕ (55) О друземъ ангеле, падение вавилоньское сказующемъ. И Небесный глас заповѣдающемъ бежание из града. И отметание красныхъ яже первие.

СКА (221) И по сихъ видѣхъ инъ ангелъ сходящъ с Небеси имущъ облать велию. И земля просвѣтитъ от Славы его.
И от сего свѣтлость и чистоту Святыхъ сихъ являетъ многымъ числомъ преспѣющу звѣздную свѣтлую пресвѣтлость.

СКВ (222) И возопи гласомъ великимъ глаголя паде Вавилонъ великий. И бысть жилище дѣмономъ, и хранилище всякому духу нечистому и невидиму. Яко от ярости вина любодѣяния ея напои вся языки.
Обычай бо есть звѣрем же и злымъ дѣмоном по пустыняхъ ходити. Божию смотрению человекъ от напастей свобожену понеже человекъ ненавидятъ. А еже ли напои причастила бо есть своей злобѣ прочая грады. Ими же обладаетъ врагъ, истинней правды не творяща, цари земнии с ею.

СКГ (223) И цари земстии с нею любодѣяша, и купцы земстии от льсти свѣрѣпияся обогатися.
Лихаго ради и неправеднаго богатьства ея. Не простирающе требующимъ но купцемъ ползу творяше.

СКД (224) И слышахъ имъ глас с Небеси глаголющь, изыдите из нея людие мои. Да не причаститеся грѣсѣхъ ея до смерти. И помяну Богъ неправды ея.
Иже к Лотови речено бысть в Содомехъ. И спасая спаси душу свою. Исаия учитъ изыдѣте от среды ихъ, и отлучитеся. И нечистотѣ не прикасайтеся. И здѣ тако же рече достойно бо есть бѣгати от техъ, иже Бога гнѣвятъ.

СКЕ (225) Воздадите ей, яко та воздастъ вамъ, и сугубите ей сугубо по дѣломъ ея. И чашею ею же черпа вамъ черплите ей сугубо елико прославится. И рассвѣрѣпи толико дадят ей муку и рыдание.
Воздадите, сирѣчъ на муку, иже есть сотворила Святымъ, или неповиннымъ, яко виннымъ. Или обидѣнымъ. Сугубо же рече, чашу воздадите ей. Или на семъ свѣте или на ономъ. Или души и телеси, от неже сож общаяя дѣла бываютъ на нею же и мука будет.

СКS (226) Яко бо в сердцы своемъ глаголетъ, яко сѣжу во царствии вдова нѣсмъ и рыдания не имамъ видѣти к тому.
Обычай бо есть в добрѣ живущимъ глаголати не имам ся подвижати во вѣкы. Аще не будет страха Божия на нихъ еже и Осия глаголетъ

СКЗ (227) Сего ради во единъ денъ приидутъ язвы ей смерть и паче, и глад, и огнемъ возжена будетъ. Яко крѣпокъ Господь Богъ осуждению.
Или внезапу иногда вся муки си приидутъ нановъ время мало. Или во единъ день. Якоже есть миловати Богу угажающая ему. Тако и мучити непокающаяся грѣхъ своихъ.

СКИ (228) И возрыдаютъ и восплачются ей цари земстии и сотворшей с нею любы и разсвѣрѣпивши. Егда узрятъ дымъ ражжения ея издалеча ея стояще за страхъ мучения ея. Глаголюще горе, горе граду велий Вавилонъ град великий и крѣпкий и яко во единъ час приидетъ суд.
Царя менитъ и здѣ быти князя мнимы. Яко же рече Давидъ, яко се цари е земстии и собрашася. А любодѣяние еже от заповѣди Божия любы в ней дѣяша. Плакати же ся начнутъ зряще жжения и запрещения, и запустѣния бывшаго во единъ час внезапу.

СКФ (229) И купцы земстии возрыдаютъ и восплачются о ней. Яко бремени ихъ никто же купуетъ к тому бремени злата, и сребрена и камени драгаго, и бисера, и висса, и перфиры, и сурика, и червления.
Иже всилѣ в пищи тлѣютъ, излиха есть всѣхъ купля имѣние.

СЛ (230) И всякого древа, и всякого сосуда от камени драга имѣдяна и жѣлезна. И мрамора, и корица, и амона. И фимияна, и мира, и ливана, и вина. И елея. И сѣмени и пшеница и скота и овецъ.
От сего бы разумѣти намъ яко в суе тружаемся лихаго ищуще.

СЛА (231) Конь родѣнъ и телесенъ.
И различенъ вещии. Роденъ же сказается латыньскы колесница.

СЛВ (232) И душа человекъ и овоща похоти душа твоея отиде от тебе. И вся тучная и свѣтлости погибе от тебе. И к тому не имаши обрѣсти ихъ.
И душа человечески не имаши рече купити к тому работящи и свободны. И неприимеши свѣтлыхъ, и тучныхъ первыя сласти.

СЛГ (233) Купцы симъ обогащеся издалеча станутъ за страхъ мучения ея. Рыдающе и плачющеся и глаголюще, горе горе граде велий Вавилонъ оболченый в виссон, в перфиру и в черленъ, и позлащение, златомъ, и камениемъ драгимъ и бисеромъ. Яко во единъ часъ погибе толико богатьство.
На лице изводитъ Вавилона сего страсти за плачь сущий. О немъ написая велию напасть ю же приимутъ хвалящися первѣе. О царствии и о чести.

СЛД (234) И всякъ кормъчий и всякъ плаваяй в кораблехъ и вѣстели, и всякъ елико в мори дѣлаютъ, издалеча сташа и вопияху. Видяше дымъ ражжения его, глаголюще, кто подобен граду великому, и положиша перъсть на на главахъ своихъ. И возопиша плачющися глаголюще и рыдающе, горе , горе град великий. В нем же обогатишася вся имущей корабля, в мори от части его. Яко единемъ часомъ запустѣ.
Аще и житие се нарицается море, море многоволнено плавающимъ сковзѣ жития сего. Яко рыбы одержимыми волнами. Подобно сей град, при мори суща видимъ. И приемлюще от плавающихъ потребу в немъ, и потребу плачъ будетъ симъ запустѣние его видящимъ. то же прийметъ и сего мира смѣшнаго Вавилонъ на кончину, егда начнут зрящи плакатися неутѣшно. И сласти сего жития неволею отлучающеся, и пострекаеми совѣстию от дѣлъ своихъ, и о грѣсѣхъ.

СЛЕ(235) Веселися о семъ Небо и Земля, и святии Апостоли и пророцы яко судитъ Богъ суд нашъ от Него.
Небесехъ или ангели менитъ, или Святыя имущая на Небесехъ житие. С ними же Апостоломъ и пророкомъ веселитеся велитъ. Яко отмщения видѣша страстей своихъ яже прияша в немъ. Не яко же суть злу ради, но яко желание имуще отсѣчение грѣху.

СЛS (236) И взятъ единъ ангелъ крѣпокъ камень великъ яко жерновъ, и ввержеи в море глаголя тако и стремлениемъ вверженъ будетъ Вавилонъ великий град. И не имать обрѣстися к тому. Глас гудець, и мусикий, и писки, и трубы, и не имать в тебѣ слышанъ быти к тому. И всякъ козникъ всякоя козни не имать обрѣстися к тому в тобѣ. И шумъ жертвенъ не имать слышанъ быти в тебѣ. И свѣтъ свѣтилника не имать в тебѣ явленъ быти пакы. И глас жениха и невесты не имать слышанъ быти к тому в тебѣ. Яко купцы твои и бѣяху велможа земныя яко прокажении. Твоими прелщени быша вси языцы. И в немъ обрѣтеся кровь пророческая и всѣхъ Святыхъ избиенныхъ по земли.
Яко же рече жерновъ погряжет в море устремлениемъ, тако и Вавилонъ сей, внезаапу будетъ потребленъ. Да и слѣд его не обрящется к тому. Се бо являетъ гудецъ, и мусикия, и прочихъ оскудѣние вину же рече, яко вся языкы чарми прелсти, и кровемъ пророческам и прочихъ Святыхъ приятие бысть. Глаголетъ же и старый Вавилонъ, или всего мира царьство, яко во единомъ телесѣ. И сперва державше до ныня. Зане в различная времена. Да того времени пролияша крови многи пророческия и апостольския, и мученическия.

Глава НS (56) О пѣнии Святыхъ и о трегубной Аллилуии иже пояху и о потреблении вавилонсте.

СЛЗ (237) И по сихъ слышахъ глас велий на Небеси народа глаголюща Аллилуйя на спасение и Слава и Сила Бога нашего. Яко истиннии прави суди Его. Яко судил еси граду иже просмради землю любодѣяниемъ своим и мсти крови рабъ своихъ от руки его. И второе рѣша Аллилуйя и дымъ восхожаше в вѣки вѣка. И падоша К (20) и Д (4) старцы, и Д (4) животна поклонишася Богу сѣдящему на Престоле и глаголюще Аминь. Аллилуйя.
Аллилуйя Божию пѣснь сказаетъ. Аминь же есть или воистинну буди еже обще ангельския силы и человецы Богу воздают. Г (3) краты за Триупостасное Отца и Сына и Святаго Духа едино Божество. Яко же крови от руку Вавилона мстие. И жителя его мукою его помилова. И отсечение сотворь грѣху. А еже во вѣкы вѣкомъ дымъ его восходитъ сказаетъ, или еже выну не забывати муки нашедшихъ на ня или еже почасти страсть приятъ легчае. Но обаче вѣчно будущий.

СЛИ (238) И глас изыде от Престола Господня глаголя пойте Богу нашему вси раби Его. И боящиися Его малии и велиции.
Престолъ Божий есть херувимъ и серафимъ. От нихъ же велятъ хвалити не токмо великимъ но и малымъ. Во исправление кождо по своей силе. Мню же яко младенцы иннешния, тогда велицы воскресше Бога восхвалятъ и прославятъ.

СЛФ (239) И слышахъ глас народа многа и яко глас вод многъ. И яко глас громъ крѣпокъ глаголющь Аллилуйя, Яко воцарися Господь Богъ Вседержитель радуемся и веселимся и дадимъ Славу Ему яко приидоша бракъ Агнецъ.
Велегласное пѣние всѣхъ ангельскихъ и бесчисленнныхъ силъ и всѣхъ Святыхъ, и праведныхъ Славу являетъ воцарижеся Христосъ человечествомъ на техъ, ими же яко Творецъ владѣяше или властию яко Царя. И судия стояще брани же Церковное Небу приношение Ему же сподобницы Святии Апостоли быша.

Глава НЗ (57) О образѣхъ тайныхъ, и о Вечерѣ Агнечи.

СМ (240) И жена его уготовала есть себѣ. И даны бысть ей да облечется в висонъ свѣтелъ, и чистъ. Виссонъ бо оправдания Святых суть.
Во оправдания Святыхъ всѣхъ церкви глаголетъ облещися в разумъ тонокъ и высокъ.

СМА (241) И гласъ ми напиши Блажени звании на Вечерю брака Агньча, и глагола ми словеса Истинна Божия суть.
Вечеря Христова есть спасеныхъ праздникъ веселие. Всѣми добрыми совершеное еже блажени улучатъ и Святымъ Женихомъ в вѣчный покой внидутъ. Нѣсть бо лож обѣщавый и многу же добру сущу будущаго вѣка над всяцемъ умомъ сущимъ. Много именно и сего приятие бываетъ Овогда дара ради, овогда же яко лоно Авраамле иногда же яко чертогии бракы.

СМВ (242) И падохъ пред ногама Его поклонихся Ему и глагола ми, виждь клевретъ есмь Азъ и братия твоея имущихъ свѣдѣтельство Иисусово Богу поклонися, свѣдѣтельство Иисуса Христово есть Духъ пророчествия.
Не кланяимся рече Божий ангелъ занети глаголю хотящая быти исповѣдание бо си рече свѣдѣтельство яже о Христѣ то есть дѣлатель всякому Духу. Пророческу свѣдѣтельствует же не кланятися клеврету, но Дръжителю всяческымъ. От сихъ же разумѣваемъ смирение Святыхъ ангелъ. Како непривлачатъ на ся Божии Славы. Яко же гордии дѣмони носию господеви приносятъ. Буди же намъ смирениемъ другъ друга преспѣюще. Господне совершится Слово. Научитеся от Мене, яко кротокъ есмъ и смиренъ срдцемъ и обрящете покой душам вашимъ. Яко тому есть слава и держава во вѣкы. Аминь.

Слово К (20)
Глава НИ (58) Како на кони видѣ Христа со ангельскими силами Евангелистъ со страхомъ.

СМГ (243) И видѣхъ Небо отверъ и се конь сѣръ и сѣдяй на немъ нарицаемый Вѣренъ и Истиненъ. И в правду судитъ и брани не творитъ. Очи же Ему есть яко пламень огненъ. И на главѣ Ему вѣнцы мнози.
Отверъсто Небо являетъ видѣнаго Судия Пришествие. Сѣры же конь свѣтлость Святыхъ глаголетъ. На нихъ же Христосъ почивая судитъ языкомъ. Очима же сирѣчь зрачною силою раздѣляя пламень огненъ праведнымъ убо просвѣщение, а грѣшнымъ опаление. Венцы же мнози царствие сказаетъ, Небесныхъ сил и земныхъ человекъ или всѣхъ смотрение нашихъ грѣшныхъ терпѣниемъ побѣду, яко же рече единъ санъ той побѣдиши, егда ти начнутъ судити.

СМД (244) Имый Имя написано, Его же никто же невѣсть, токмо Той.
Невидимо имя и неразумно божество сказаетъ. Смотрений бо много имяненъ сый, яко Благодать, яко Творец, яко Солнце, яко Свѣтъ, яко Животъ, яко Правда, яко Невидимый, яко Бесмертенъ. И иными подобными нарицается.

СМЕ (245) И оболченъ в ризы червлены кровию. Нарицается имя Его Слово Божие.
Си за словеси Честнаго Плоть очервление Кровми Его Честными. По сихъ же извѣщаетъ. Како без имененъ и всѣми невидимъ, Слово здѣ нарицается. Или показаети ю Сыновня на Небесныя силы упостасию. Из Нестрастнаго Отца рождься, яко же слово от ума исходить или им же всѣхъ сущихъ имена на собѣ носитъ. Или им же есть исповѣдатель есть Отчая Премудрости и Силы и Власти.

СМS (246) И воиньства Небесная идяху вослѣдъ Его на конѣхъ броннѣхъ и оболчены в виссонъ бѣлъ и чистъ.
Сими Небеснии чинове являются тонкимъ видѣниемъ и высокым разумомъ, и свѣтлостию и угожениемъ. И неотступнымъ и Святымъ от Бога примешениемъ.

СМЗ (247) Изо устъ Его изыде оружие остро. Да тѣм избиетъ языки. Той упасетъ я жезломъ желѣзнымъ. И Той перетъ точило вина ярости гнѣва Божия Вседрѣжителева.
Оружие сказаетъ наводимыя мукина нечестивыя грѣшныя. По Правде Суду и по Повѣлению Божию исходяще изо устъ Божиихъ. Им же не сокрушенымъ жезломъ вѣчныхъ мукъ упасеныхъ будутъ. Его же Святии не вкусят. Яко же не оставитъ же зла грѣшныхъ на жребии праведныхъ. Точило же яко Отецъ не судитъ никому же, но Тому суд дастъ, яко человеку. Иже имѣ родство и сперва яко Сынъ неотступно безвремени.

СМИ (248) И имать на ризѣ и на стегнѣ своемъ имя написано Царь Царемъ и Господь господемъ.
Си являетъ имя Божия вочеловечения. А не разделения яко же плотию Богъ сый и пострада. И человекъ сый и Царь царемъ и Господъ господемъ воцарившемуся над страстьми и в будущемъ вѣце с нимъ хотящимъ царствовати.

Глава НФ (59) О антихристѣ, и о вмѣтаемыхъ с нимъ в геону.

СМФ (249) И видѣхъ единъ ангелъ стоящъ на солньце. И возопи гласомъ велиимъ глаголя, ко всѣмъ птицамъ парящимъ посредѣ Небеси.
И ангела возопившаго сказаетъ ангелы призывающи на веселие о муцѣ грѣшныхъ и о оскудѣнии грѣху. И посредѣ же Небеси сидай человекомъ. Иже суть равнии ангеломъ. Достойно восхожение будетъ из низу. Им же Святии восхищаютъся во усрѣтение Господне на аеръ.

СН (250) Приидѣте зберитеся на Вечерю Великую Божию да снѣсте плоти Царь, и плоти крѣпкыхъ, и плоти коньскихъ и сѣдящихъ на нихъ, и плоти всѣхъ свободныхъ, рабъ малых же и великихъ.
Вечерю волю Божию сказаетъ, да вси человецы Спасени будутъ и в разумъ Истинный приидутъ. Отчюю волю Свое Брашно Христе нарече. Снѣдение же плоти являетъ посмражение плотьскихъ всѣхъ, коня же менить яко не конемъ воскреснущимъ или судимымъ, но скверно живущимъ на семъ свѣте. Всадникы же бывшая поклонники же а и малыя. Свободныя убо сказаетъ согрѣшающая паче же своею властию, рабы же и малыя согрешающая мнѣе, или волею или недоспѣниемъ, или немощию.

СНА (251) И видехъ звѣръ и царя земны и воя ихъ собраны сотвори брань с сѣдящимъ на кони с вои Его.
И звѣръ диявола мнить и грѣшники воююща с нимъ за много различныи грѣхъ. А сѣдящаго на кони Христа глаголеть и воя Его человеку суща равны ангеломъ. О Господи нарече за едину волю угождение к Богу.

СНВ (252) И ятъ бысть звѣрь, и с нимъ лжий пророцы сотворивый знамения пред нимъ. Ими же прельсти приемшия начертание звѣрино и поклоняющаяся телеси его.
Аще Спасу Христу с послушающими Его цари и князи противистася антихристъ есть и лжий пророкъ сотворивый лесная чюдеса но обаче ята быста Божиимъ гнѣвомъ.

СНГ (253) Жива ввержена быста оба во езеро огненое горящее жупеломъ
Может же то быти яко не умрета, но изменита ся в мгновении ока, яко же и Павелъ апостолъ глаголетъ. И воскреснета, не на суд, но на осужение. Аще же ли кто не мнит сице зане апостолъ рече, его же убиетъ Господь Духомъ устъ Своихъ. Инии учители глаголеть, яко обрящутся етери живи и по антихристове убиении, еже Блаженный Данилъ рече. Сия убо в телеси неистлѣма ввержена будета оба в геону огненую еже имать будет смерть. Убиение Христовымъ повѣлениемъ.

СНД (254) И прочии убиени будуть оружиемъ сѣдящаго на кони изшедшим изо устъ Его. И вся птица насытишася от плоти ихъ.
Двема смертьма сущема, единой телесней, а друзей душевней сущи со антихристомъ убиени будутъ Божиимъ гнѣвомъ, сирѣчь повелѣниемъ Его. Потом же вторая смерть приидетъ на ня. Сирѣчь вѣчная мука. А еже насытитися птицамъ плоти ихъ, яко же предрехомъ ли яко же Богъ Исаю рече, бысть ми до избытка. Тако же и Святымъ до избытка и до сытости и мерзости всякоя плотьское движение.

Глава Ѯ (60) Како сатана привязанъ бысть от Христа Пришествия до кончины от ҂А (1000) лѣт.

СНЕ (255) И видѣхъ ангелъ с Небеси сходящъ, имущь ключ бездны и желѣзно уже велие в руцѣ его и ятъ змия и змию древнюю, еже есть дияволъ и сатана, и связай на ҂А (1000) лѣтъ и в бездну затвори и запечатлѣ о немъ. Да не прельститъ к тому языкъ дондеже скончается ҂А (1000) лѣтъ. И по сихъ подобаетъ ему отрешену быти в мало лѣтъ.
Здѣ дияволе разрѣшение мнить бывшее Христовою мукою егда оного привяза в бездне, а ны избави яве же есть разрушением идольскихъ молитвъ и служебъ. И познаниемъ воля Божия по всему миру. Ангелъ же мнитъ се сотворша да и покажутъ, яко служебныхъ силъ хуже есть, силою бездобъся гордит на вся. Уже мнитъ противу нашему разумѣнию всю его дѣтельсва за ему на ҂А (1000) лѣтъ. Не мнимъ яко числомъ разумѣвати тако. Но многа лѣта яко же рече Давидъ. Слово еже завеща в тысящи род, или явление свершеному числу ҂А (1000) лѣтъ от Христова Воплощения до антихристова пришествия. Богу Единому то есть вѣсто, иже вѣсть до коленам есть полезнѣе жити. Потом же пришед льстец, смутит всю вселенную нося в себѣ злую дѣтель. От него же дѣлъ дабы избавилъ ны, милостивый Богъ нашъ. Ему же Слава во вѣкы. Амиинь.

Слово КА (21)
Глава ѮА (61) О уготованыхъ престолехъ сохраньшимъ Христово вѣдание совершенно.

СНS (256) И видѣхъ престолы и сѣдящая на нихъ, и суд данъ бысть имъ. И душа растесаныхъ за свѣдѣтельство Иисусово, и за Слово Божие. Иже не поклонишася звѣри и телеси его, и не прияша начертания его на челѣхъ своихъ и на руцѣ своей. И жиша и воцаришася со Христомъ ҂А(1000) лѣтъ.
Учительнии бо столи Святымъ апостоломъ и здѣ суть уже дани ими же языка просвѣщаютъ, дани же будутъ по Божию обещанию, и в будущии во осуждение отринувшимъ. И Евангельскую проповѣдь, яко же рече Давидъ тамо сядутъ на престолѣ на судѣ. И прочим же Святымъ мученикомъ. Мученымъ ради Христа, не приимшимъ дияволя начертания, сирѣчь отступления, данъ бысть властный суд. Им же Божию силу являюще, судятъ дѣмономъ. И до селе всяку язву цѣлятъ, яко же видимъ цари же вѣрными сими и князи чтомы со Христомъ славу приемлюще до скончания сущаго вѣка.

Глава ѮВ (62) Что есть А (1) воскресение что есть В (2)-я смерть.

СНЗ (257) И прочии мертвецы неживи быша дондеже кончается ҂А (1000) лѣтъ, се воскресение А (1)-е Блаженъ иже имать часть воскресения первыхъ. На сихъ смерть В (2)-я не имать области, но будетъ иерей Богу и Христу и воцарится с нимъ ҂А (1000) лѣтъ.
Мертвеца мнитъ иже не воскреснуша со Христомъ Крещениемъ, и умерше поганьскою грѣховною смертию не имать жити с Нимъ дондеже кончина приидетъ. Смерть бо имъ начатокъ будущия муки бываетъ. А Блажении же имуть часть в воскресении первемъ, сирѣчь умертвивше мысли злыя и мертвая дѣла. Не иматъ бо на сихъ власти имѣти вторая смерть. Еже есть бесконечная мука. И будутъ иерѣй Богу и воцарится с Нимъ. Яко же видимъ ҂А (1000) лѣтъ, дондеже отрешенъ будет сатана, и прельститъ языки. Тогда совершеное цартсво приимутъ. Двѣ же еста смерти и В (2) же воскресения, А (1)-я телесная яже бысть от преступления, а В (2)-я вѣчная мука от непослушания, А (1) еже воскресение еже есть от мертвыхъ дѣлъ ожити Крещениемъ а В (2) -е еже ожити от истлѣна в нетлѣние телесемъ претворитися.

Глава ѮГ (63) О гозѣ и магозе.

СНИ (258) И егда скончатеся ҂А (1000) лѣтъ, разрѣшенъ будетъ сатана от темница своея. И изыдет прельстити языки сущихъ в четырехъ углехъ земля. Гога и Магога на брань собрати я. Им же числом ихъ яко песокъ морьский.
Тысящу лѣтъ мнимъ не самое число но множество. И плоднаго совершения лѣта ею. И Евангельския проповеди якоже и от сего по совершеней вѣре сын пагубенъ и человекъ неправеденъ приидетъ. Да суть вси приимутъ невѣровавшей истинне. И отрешен же от своея темница прелститъ вся языки. Гога и Магога подвигнет на брань на пагубу всей вселенней яко же Иезекииль глаголетъ, от дни древняго уготовается и на послѣдняя времена приидетъ, сказаетъ же ся Гогъ зборъ по еврейску языку, а магогъ гордыни. Яко имяны сими ли побѣду ихъ ли гордыню являетъ.

СНФ (259) И взыдутъ на широту земля и обыдутъ стан святыхъ. И градъ святый и возлюбленный. И снидет огнь от Бога с Небеси и поястъ я и дияволъ льстяи. И вверженъ будетъ во езеро огненое, и жупелное, идѣже звѣрь и лжий пророкъ. И мучение будетъ день и нощь и во вѣкы вѣкомъ. Аминь.
Исшедше рече из своихъ мѣстъ дияволомъ движими и дѣмономъ водимы распространьшеся по всей Земли и станъ Святыхъ обыдетъ. Сирѣчь Церкви яже есть утвержение на на четырехъ углехъ вселенныя хотящею разрушити. Но не токмо единъ ангелъ Божий о ней ополчится но и мнози. К сему же и Святый град возлюленны. Из него же Божий законъ Святымъ Апостолы во вселенную изыде. И приимутъ антихристъ в церкви, сядет или в древнем жидовствем, обновляя и творя ся яко богъ его же они чаютъ или во истовей церкви на ся божию честь привлачат, но не по мнозѣ. Или невидимый огнь с небеси сшед, или Христово Славное Пришествие изъбьетъ я Духомъ устъ Его. И диявола воеводу ихъ со антихристомъ и лжимъ пророкомъ предастъ я во огненое езеро и на вѣчную муку от нея же дабы ны избавилъ Милостивый Богъ нашь. Ему же слава во вѣли вѣкомъ. Аминь.

Слово КВ (22)
Глава ѮД (64) О сѣдящемъ на престоле и общемъ воскресении и о судѣ.

СѮ (260) И видехъ престолъ великъ и бѣлъ. И сѣдящаго на немъ. Ему же от лица Его бѣжа земля и небо. И мѣсто не обрѣтеся има.
Престоломъ бѣлымъ является Божий покой. Иже сотворитъ во свѣтлыхъ угодехъ Святыхъ. На сихъ сѣдяй. Бѣжание же сказаетъ небеси и земля сихъ мимошествие сказаетъ. Не яко погибнетъ тварь. Но обновление приимутъ. И мѣсто не обрѣтеся сирѣчъ обѣщаютъ. Глаголетъ бо Апостолъ, яко и сама тварь свободится от работы истлѣния. И Давидъ рече послеши Духъ свои и созиждутся. И обновиши лице земли. Исаия же рече будет небо ново и земля нова.

СѮА (261) И видѣхъ мертвеца великыя и малыя стояща пред престоломъ. И книги разгнушася, яже суть животныя. И судъ прияше мертвии от написания в книгахъ по дѣломъ ихъ.
Мертвеца рече и вся человѣки умершая телесемъ, или умершвеныя грѣхы великыя же и малыя. Или сущая тѣломъ такой или мние паче и мертвыя дѣла дѣлавшая. Или великыя праведныя. А малыя грѣшныя за душевную сладость. Книги же разгибаемыя являютъ коегождо дѣла. Едины же книгы животныя рече в нихъ же суть имена Святыхъ написана.

СѮВ (262) И дастъ море мертвеца своя. И смерть и адъ. И даша мертвеца своя и судъ прияша кождо по дѣломъ своимъ.
Коегождо дѣло рече ими же раздѣляетъ. Тѣми и ставлено будетъ, смерть же и адъ ни животней вещи еста ни душевней. Адъ же есть мѣсто неявленно намъ. Сирѣчь не сказанно не видимо еже приемлетъ душа отходящихъ от сюдѣ. Мертвыя же душа суть еже мертвыя дѣла носятъ. Праведныхъ же душа в Руцѣ Божии. И не коснется ихъ мука она.

СѮГ (263) И смерть и адъ положена бысть во езеро огненое, и иже ся не обрѣте в книгахъ животныхъ написанъ вверженъ будетъ во езеро огненое.
Смерть и адъ мнитъ злыя силы винныя смертному грѣху. Или написано есть послѣдний врагъ предстанетъ смерть. Писано бо есть смерти Богъ нѣсть сотворилъ. Сего ради к тому не будетъ смерти ни истлѣния. Но царствовати без истлѣния и без смерти. А иже вся не написани в книгахъ животныхъ, и ввержени будутъ во езеро огненое не дивися. Ибо яко же суть многы обители уво Отца Спасаемыхъ. Тако и ту различная мѣста мучения. Ова а горѣйша, а другая легчайша.

Глава ѮЕ (65) О новѣ Небеси и о земли. И о вышнемъ Иерусалиме.

СѮД (264) И видѣхъ Небо ново и Землю нову. Первое небо и земля прейде, и моря не будетъ к тому.
И здѣ сказаетъ не на пагубу но на болшее обновление. Яко же рече Апостолъ, и сама тварь свободится от работы истлѣния в свободу и в славу чад Божиихъ. И Давидъ рече яко ризу свѣеши ихъ и измѣнятся. И обѣтщавшее бо обновляет. Но онъ старости отвержение, а еже моря не будет к тому, кая бо потреба моря будет неплавающимъ человекомъ по нему. К сему же много волненаго жития море еси прелагаетъ. Исаия бо глаголетъ и бездна пустѣютъ. И вся реки твоя изсуши.

СѮЕ (265) И град видѣхъ Святый Иерусалимъ сходящъ с Небеси от Бога приготованъ, яко невѣсту украшену мужу своему.
И от сего являетъ новое имя на свѣтлое преложение знамения град же сий Соборъ Святыхъ нарицается. О нихъ же есть писано, Камение Свято является на земли. И крайугольный Христа имый. Град же яко самая Царица Творца жилища. Невеста же яко прилѣпляющися Господи украшена же внутрь уду. Яко славу и красоту в различии имуще.

СѮS (266) И слышахъ глас велий с Небеси глаголющъ ми се и скиния Божия, со человеки веселится с ними и тѣ людие будутъ. И Самъ Богъ будетъ имъ, и отиметъ всяку слезу от очию ихъ.
Скиния же есть воистину, ея же образ видѣвъ Моисей в горѣ. И сшед сотвори скинию Ветхому Закону, еже бѣ паки образ Церкви Християньски. В сей нерукотворне скинии не будетъ плача ни слезъ. Вѣчныя бо радости Датель, и дастъ всѣмъ Святымъ веселие не престающее.

СѮЗ (267) И смерти не будетъ к тому ни плача ни вопля. Ни болѣзни не будет к тому первая мимо идоша.
И се есть написаное отбѣже болѣзнь и скорбъ и воздыхание. А еже А (1)-я мимо идоша, сказает Святыхъ страсть, а нечестивыхъ гордыни кончину приятъ.

Глава ѮS (66) О нихъ же рече, сѣдящеи на престоле. И о видѣнии.

СѮИ (268) И рече ми седяи на престолѣ. Се новая творю вся. И рече ми напиши яко си слова вѣрна и истинна суть. И рече ми бѣхъ Азъ Начатокъ и Конець.
Вѣрна и истинна яко от самоя Истинны исходяща. И к тому неприкладна но самѣми вещьми знаема начатокъ же и конецъ ихъ. Яко первый Божества ради и послѣдни иже человечества ради. Яко от первыя твари, и бесплотныхъ до послѣднихъ человекъ Свой притязающе промыслъ.

СѮФ (269) Аще жажущему дамъ от воды животныя туне.
Жажущему правды, дати обѣшаваетъ Благодать Животворящаго Духа. Туне же яко недостойны мукы, и нынѣшняго времене к хотящей славѣ явитися в нас, яко нѣсть сего имѣниемъ стяжати, но добрыми дѣлы.

СО (270) Побѣжаяй наслѣдитъ сии буду имъ Отецъ, и той будетъ ми въ сынъ.
Побѣжая дѣмоньскую брань, сынъ Божий наречется и наслажаяся Отча добра.

СОА (271) Страшливым же и невѣрнымъ и сквернымъ убийцамъ, и блуд творящимъ и чары творящимъ, идолотворомъ и всѣмъ лживымъ часть имъ во езере горящемъ и жупеломъ еже есть смерть вторая.
Всѣм инымъ спасения нашего Богъ. На наслѣдие Его добр уставъ кажетъ. Вышняго Иерусалима свѣтлость. И геоньскаго огня тъму и страсть, да желаниемъ вѣчнаго живота или страхомъ бесконечныя мукы. Дондеже время его дѣлаемъ добрая дѣла. Страшливым же на дияволю брань вторыя смерти осуждение обѣща. Буди же на нас Милость Господа нашего. И же не хощетъ смерти грѣшнику но обращения. Яко Тому подобаетъ всяка Слава во вѣлы вѣкомъ. Аминь.

Слово КГ (23)
Глава ѮЗ (67) О ангеле показующемъ град Святыхъ и стѣны его со враты размѣряюще.

СОВ (272) И прииде единъ от З (7) ангелъ имущихъ З (7) фиалъ исполнены З (7) -ю язвъ послѣднихъ, и бесѣдова со мною глаголя. Гряди да покажу ти невѣсту Агнечю жену.
Сихъ являетъ яко не токмо злыя язвы наводятъ ангелы но и добрыя. Яко ныне Святому Евангелисту сказаетъ церковное блажение. Добре же рече невѣсту Агнечю жену. Яко же бо Адаму древле усопшу Богъ от ребра его жену взятъ. Тако и Господь егда яко Агнець заколенъ бысть и на крестѣ своею Волею успе, и своею Кровию обручи Церковъ.

СОГ (273) И веде я духомъ на великую гору высоку и показа ми град великий и Святый Иерусалимъ сходящь с Небеси от Бога имущь Славу Божию.
Иже духомъ вести мнитъ, сирѣчь от земныхъ умомъ на разумъ Небесный и на гору же высокую и жизнь вознесеную высоче Святыхъ являетъ на ней же жена Агньча.

СОД (274) И вышний Иерусалимъ украшенъ есть Богомъ. Свѣтило ея подобно каменю драгому яко камени аспиду хрустальну.
Свѣтилникъ есть Церкви Христосъ. Хрустальнымъ и аспидомъ сказая присноцвѣтную чистоту, и живодарную и инѣми же многоразличными приклады, и много виденую Его Благость являетъ.

СОЕ (275) Имуще стѣну велику, высоку имуще врата ВI (12) и на вратехъ ангела ВI (12) и Имя написана, яже суть Имяна обѣмана. I (10) колѣнома сыновъ израилевъ.
Стена высока есть Христосъ Хранитель Церкви. Врата же ВI (12) Святии Апостоли. Ими же привидѣние и восхожение ко Отцу обрѣтохомъ. Помагаше бо и тѣмъ ВI (12) ангела от старейшинъ же паки приближающимся к Богу. Понеже бо кождо вѣрныхъ, ангелъ ходитъ храня я и паче же во сихъ церковныхъ становницехъ на помощъ евангельския проповѣди. Имена же понеже и на ризе архиереови имена обою на I (10) колѣну написана бяху. Тѣмъ и ныне мысленаго Израиля, имяны сими печаль вѣрныхъ апостольскую мнитъ. Яко же Павелъ имяше о всѣхъ Церквахъ.

СОS (276) От востока врата троя. От сѣвера врата троя. И от юга врата троя. И от запада врата троя.
Четверочастный образъ вратный и трое разверзение от четыре край вселенныя, являетъ Святыя Троица разумъ иже приятъ Животворящимъ Крестомъ крестны ибо есть образъ вратное поставление по видѣнию. ВI (12) волю иже ношаху море сотворенное Соломономъ иже бѣяху образъ Троицы, и Апостолъ тѣмъ и четверицъ, иже есть Святыя Троица проповѣдатели. И послание Д (4)-мъ Евангелистомъ на Д (4) край земля имже мысленое море крестиломъ. Иже оцыщаетъ весьмие от грѣхъ составленое мысленымъ Соломономъ сказается.

СОЗ (277) И стена граду имуще основание ВI (12) и на нихъ имянъ ВI (12) обѣмана I (10) апостоломъ агнечевымъ.
Основания стѣнная суть Святии Апостоли. На них же Христова Церкви основана бысть их же имена написана суть.

СОИ (278) И глаголя со мною имѣяше мѣру трость злату. И да измѣритъ градъ и врата и стѣны его.
Златая трость являетъ честное и чистое мѣрение ангельскихъ силъ мѣрение граду. Ему же есть стѣна Христосъ, а не от человекъ мѣрило мним же здѣ стену Божие Основание, и покровъ разумѣвати в нем же Святии сохраняются.

СОФ (279) И град на четыре углы стоитъ. И долгота его велика же и широта измѣри град тростию на стадии ҂ВI (12000). Долгота и высота его равна есть.
На четыре части град сей есть твердыня ради удержания, глубина и высота и широта, и твердыня являетъ. ҂ВI (12000) являетъ великоту и множество. Рече бо Давидъ паче песка умножатся. Стадии же ҂ВI (12000) число апостольское и паки Ч (90) и В (2) и ДI (14) поприща суть в числѣ семъ. Являет же ҂А (1000) вечнаго живота совершение, П (80) покойное совершение и ДI (14) сугубое сугубьство, сирѣчь покой души и тѣлу двоицею бо седмица ДI (14) будетъ.

СП (280) И рамѣри же стѣну его въ Р (100) и М (40) и Д (4) лакти двоицею на I (10)-но число слагаемо бываетъ. И в мѣру человеческу яже есть ангелельския.
Мѣру стѣнныя глубины Р (100) и М (40) и Д (4) лакти двоицею на I (10)-но число слагаемо се число бываетъ еже сказаетъ Апостольское учение.

СПА (281) И бѣ создание стѣны его. И аспид и град златъ чистъ подобенъ стеклу чисту.
И аспид зѣлное не увядающее житие от Святыхъ сказаетъ злато же за чистоту и свѣтлость жития ихъ сказаетъ.

СПВ (282) И основание стѣны граду всяцем драгимъ камениемъ украшены. Основание первое аспид, В (2)-е сапфиръ, Г (3)-е халкидонъ, Д (4)-е измарагдъ, Е (5)-е сардиксъ, S (6)-е сардий, З (7)-е хрусолитъ, И (8)-е вирилионъ, Ф (9)-е тумпазионъ, I (10)-е хруспасъ, АI (11)-е якинфинъ, ВI (12) аменистъ.
Два на десять основания два на I (10) камени драгая. Яже прилагают видѣниемъ и зракомъ на Святыя Апостолы укращеся в сѣмъ видѣниемъ.

СПГ (283) Оба на I (10) врат ВI (12)-те бисера да едина врата кождо будутъ от единаго бисера.
Христовѣ ученицы ВI (12) врата ими же враты и путь познахомъ. А ВI (12) бисера от Христа единого бисера имущи лщение.

СПД (284) Путь граду златому чисто яко стекло лщашеся.
Прикладомъ истинны бывшаго града благихъ не можетъ ставити над всѣмъ бо суть слухомъ и видѣнми и помышленми. Тѣм же поставление граду яко злато много чистоты ради сказает. Си же вся видѣ Апостолъ яко можаше.

СПЕ (285) И церкви не видѣхъ в немъ. Господъ бо Богъ Вседрежител Церкви ему есть Агнецъ.
Кая бо есть потреба церкви идѣже есть Самъ Богъ Хранитель и Покровъ. О Нем же живем и движемся и есть мы. Той будет Святымъ Церкви и жилище Святыхъ в нихъ и ходя яко же обѣща Агнецъ заколены нас ради и Сынъ Божий и Святый Духъ.

СПS (286) Град не требоваше солньца ни луны да свѣтят в немъ Слава Божия просвѣти и свѣтилникъ Ему Агнецъ.
Идѣже бо есть праведное и мысленое солнце видимаго солнца нѣсть потреба. То бо яко Ему есть Слава и Честь и Свѣтъ.

СПЗ (287) И поидутъ языцы свѣтомъ Его.
О нихъ же рече и поидутъ языцы свѣтомъ Его.

СПИ (288) И цари земстии принесут славу и честь свою вон и врата его не имутъ затворити в день и нощъ бо не будет ту.
О нихъ же рече пойдут языцы в свѣтъ победиша бо плотская сласти на земли и воцарившеся над ними добрымъ дѣянии славу и честь принесут вон. А еже не затворитися вратомъ сказаетъ или твердыню житель его или тут отверстымъ быть вратомъ Святого Божия апостольскаго учения да вси совершению навыкнутъ. День же будет ту а не нощъ та бо нощъ грѣшником будет отлучена.

СПФ (289) Принесут славу и честь языкомъ вон и не имать вон внити всяко скверно и творяй мерзость и лжу но токмо написани и в книгахъ Агнечихъ.
Свѣтлость и славу языкомъ сирѣчь угодьшим Богу во граде святом водворятся, все же скверно и нечисто не внидет тамо нѣсть бо общия со тмою свѣту.

Глава ѮИ (68) О чистей рѣцы явльшейся исходяще от престола.

СЧ (290) И показа ми реку чисту воды животныя. Свѣтлу яко хрусталь исходящи от престола Божия и Агньча посредѣ пути Его.
Реку мнитъ исходящую на семъ житии из Церквѣ. Паки бытное Крещение Святымъ Духомъ дѣемо. Чистоты же творя измывающеся паче снѣга и хрусталя. А из вышняго Иерусалима реку Божию исполнену воды живы. И Животворящий Духъ от Бога исходяи от Отца Агнецемъ посредѣ вышнихъ силъ. Яже престолъ Божий нарицаются пути Святаго Духа ради сирѣчь множество Его иже паче песка по псаломскому слову умножатся. Есть же инако реку глаголемъ Святаго и Животворящаго Духа дары и Благодати. Престолъ же Божий превышняя силы дръжава же Святая наслаждьшия напаяемыя от Него.

СЧА (291) И оба полы реку древо животное творя плоды ВI (12) на месяць кождо воздаяя плод свой.
Река сирѣчь напаяетъ наслаженныя ея Святыя. Древо животно прикладномъ нарицаемъ. И подоблению животнаго древа Христа. ВI (12) плоды творя, сирѣчь присно прозябающая. Не будетъ бо ту грѣха земнаго нудящи живот на древа сметати лѣствие, яко видимъ бо день но совершен будетъ Святыхъ ликъ. Иже здѣ ВI (12) месяць наречеся, заповѣд ВI (12) апостолу яко реку мнитъ Благодати Животворящаго Духа. Древом же животворящимъ Христа. ВI (12) плода Святыхъ Апостолъ проповѣди, и не престающий Божий разумъ.

СЧВ (292) И лѣствие древу во исцеление языкомъ.
Лѣствие древу мнитъ прикровение о Христѣ Божия смотрения разумъ. Яко плод его совершеный разумъ. Иже ся открыетъ в будущий вѣкъ во исцеление же, сирѣчь вооцыщение разумнымъ.

СЧГ (293) И всего анафема не будетъ к тому.
И всякого проклятия не будетъ ту. Яко диаволу воздаема. Зане всякого добра отлучается и не смѣшаетъ.

СЧД (294) И престолъ Божий и Агнецъ будетъ в немъ. И раби Его служатъ Ему, и видят Лице Его и имя на челѣхъ имъ.
Бывающии рече престолъ Божий покойще Ему и узрятъ и лицем в лице, а не притчами но яко Святымъ Апостоломъ явися на Святей горѣ. Имѣти же имутъ в златой печати мѣсто, иже архиереи древле нашаше не токмо на челѣхъ своихъ но и на срдецыхъ своихъ начертание являющи твердую любовъ непреложную.

СЧЕ (295) И ноши не будетъ к тому и не потребуютъ свѣта от свѣтилника. Ни свѣта солнечнаго яко Богъ просвѣщается. И воцарится во вѣкы вѣкомъ. Аминь.
Аще и праведникъ восияетъ яко солньце, яко же рече Господь кая потреба будетъ солнечнаго свѣщнаго свѣта. Иже имуть глагол Славы. Просвѣщение и Царя над собою царююща во вѣки вѣкомъ. Паче с Нимъ воцарится.

СЧS (296) И рече ми словеса вѣрна и истинна.
Вѣрна и истинна яко от Истинны исходяща. Дондеже ангелъское вѣдѣние и видѣныхъ сказание положи прочее яко от Своего Лица спасаетъ.

Глава ѮФ (69) Богъ пророкъ Христос владыка всѣмъ.

СЧЗ (297) И Господь Богъ Святыхъ Пророкъ Христосъ ангела Своего посла показати рабомъ Своимъ, им же есть быти въскорѣ.
Се еже есть бо Пророкомъ Христосъ иже ангела своего посла ко Блаженному Иоану Евангелисту видѣвшу ему видѣние показати рабомъ своимъ хотящая быти. Но смотрения ради плотьскаго. На зачали рече к Сыну Своему дати апокалипси и Богъ бо пророкомъ ангелы Своя показаетъ, яко служебныя духи на явление будущихъ. Не невѣсть бо ничто же но вѣсть и мѣсто и день конечный.

СЧИ (298) И се прииду скоро, Блаженъ соблюдаяй словеса и пророчества книгъ сихъ.
Обычай бо есть пророкомъ, яко от своего лица Божия являти множицею, а еже есть прииду скоро ти или являетъ временную малость, или когда внезапу наглу кончину комуждо бо человеку кончина есть преставление от суда. А начатокъ оного вѣка тѣм же подвизаемся срдецемъ сокрушенымъ растерзавши узы земныхъ вещей. Яже заплетаютъ кождо нас душу недостойне будет узрѣти тихое Лице Милостиваго Бога нашего и внити в Радость Его яко тому подобаетъ всяка Слава во вѣки Аминь.

Слово КД (24) Глава О (70) Слово о достойномъ увѣрении, яже есть видѣлъ апостолъ

СЧФ (299) Азъ Иоаннъ, видѣвъ и слышавь се, егда видѣхъ и слышахъ си падохъ поклонитися на ногу, ангелу показающи ми, сей глагола ми, виждъ не клеврет ли есмь. Азъ и братия твоя пророкъ соблюдающа словеса книгъ сихъ Богу поклонити ми ся.
И се апостольския душа обычай яко же во Евангелии рече, и видѣ и свѣдѣтельствова, и истинно есть свѣдѣтельство его. Такой и здѣ самовидець бывъ нареченнымъ сказаетъ. Видѣния утвердивъ сказа иже ангельское его видѣние и смирение, неприемлюще от клеврета покаяние, но достойное опщение Господеви воздати.

Глава ОА (71) Како есть не повелѣно запечатлѣти но проповѣдати Апокалипси.

Т (300) И глагола ми Господь не запечатлѣй словесъ пророчества книгъ сихъ рече бо близъ.
До здѣ ангелъская словеса главна. Сыне от судѣ приходить лице глаголя, не запечатлѣй словесь пророчества сего. Достойни бо суть книгы да чтуть я вѣрнии и страха ради и мукы грѣшныхъ. И обѣщания покоя Святымъ да обрящутся и добрѣ дѣютъ.

ТА (301) И обидяй да обидитъ ещё. И скверный да сквернится еще. Праведныйй да творитъ правду еще. И Святый да святится еще. И се гряду скоро и мзда Моя со Мною и воздати комуждо по дѣломъ его.
Се яко веля зло дѣяти, си глаголетъ но есть годѣ комуждо да творитъ. Не нужею бо веля показавъ комуждо начинания. Кончину егда же прииду и воздам комуждо по дѣломъ его.

ТВ (302) Азъ Есмь Алфа первыи и последний и начатокъ и кончина.
Начатка бо есть ни что же старѣе, ни Божию Царствию не будетъ кончины. И множицею бо преже рекохомъ первы Божества ради и послѣдний человечества ради.

ТГ (303) Блажени творящеи заповѣди Его и да приидетъ область имъ на древо животно и враты внидутъ во град.
Воистину Блажени такови и область бо имѣти имутъ Святии в жизни вѣчней о дрѣвѣ животнемъ. О Христѣ Бозѣ нашемъ почивающе и насыщася видѣния Его, ни единши же заступающе злей силѣ. Враты же внидуть апостольскими Сирѣч ученики Его в вышний градъ.

Глава ОВ (72) Како церкви иже Духъ, иже в ней есть призываетъ славное Христово просвѣщение о клятве. Иже повинни бываютъ, отметающе книгы сия яко неприятны есть.

ТД (304) Вне и пси и чародѣйцы и любодѣйцы убийцы и льсти служителе, и вси творяще и любяще лжу.
Пси во истинну суть не токмо невѣрнии, но и обращающаяся на своя блевотины по Крещении. Злѣ дѣлателе их же ся апостолъ плакаше. Тѣмъ же с любодѣйцами и убийцами идолослужители от вышняго града изгнати будуть.

ТЕ (305) Азъ Иисус посла же ангела Своего. Засвѣдѣтельствовати вамъ сия Церквамъ.
И здѣ владычню честь посланнымъ ангеломъ являетъ сирѣчь за свидѣтѣльство.

ТS (306) Азъ Есмъ Корень и род Давидовъ.
Корень и род Давидовъ есть Христос, яко Богъ род же яко плотию от него рождься.

ТЗ (307) Звѣзда утреняя свѣтлая.
Яко звѣзда нарицается есть ту утреняя, яко утро вшед к намъ тредневно. По нощи же сего жития утренная обѣщаннаго Воскресения. Святымъ являющимся и день распящь бесконечный.

ТИ (308) И Духъ и невѣста глаголетъ ти прийди.
Церкви сый в ней Духъ восия в средцыхъ нашихъ. Авва Отецъ пришествие Единочадаго Сына Божия призываетъ и велитъ Ему вскорѣ быти.

ТФ (309) И жаждай приидетъ ко Мнѣ. Хотяи да прииметъ воду животную туне.
Жажда бо есть потребно животное пиво. Паче же яко и туне даетъ.

ТI (310) Свѣдѣтельствую Азъ, всякому слышащему словеса пророчества книгъ сихъ. Аще кто приложитъ на ня, да наложи Богъ нань З(7) язвъ написанныхъ в книгахъ сихъ. Аще кто уйметъ, и отаще словесъ сущихъ пророчествия в книгахъ сихъ, аще кто. Да отиметъ Богъ часть его от древа животнаго. И от града Святаго написаннаго в книгахъ сихъ животныхъ.
Страшна клятва прилагающая к Божиимъ книгамъ. Или же умъ имѣеть у нихъ что дръзновение бо можетъ отлучити от Бога. Се бо засвѣдѣтельствуетъ намъ слышащимъ и приложити же ничто же ни уняти. Да то на нас не будетъ. Но книжная обычая яко достойны чести имѣти.

ТАI (311) Глаголетъ свѣдѣтельствующий Именемъ Сихъ прийду скоро. Аминь. Гряди Господи Иисусе Христе Сыне Божий. Благодать Бога нашего Иисуса Христа со всѣми Святыми. Аминь.
Азъ рече глаголя сый скоро к Тебѣ Животу гряду и Ты прийди Господи. Инако от лица Господня речено бысть содѣтельствуя и сии рекъ. Прийду скоро от апостольскаго лица. Прорече же есть гряди Господи Иисусе Христе прежде желанъ бо есть Святымъ Христово Пришествие. Яко воздающе мзду многу сугубие дѣлающимъ. Тѣм же и сия книгы Святыя, Богодухновенне суть на блаженный покой наставляющи. Не бесѣдующая в ня по очищению мыслено учения очию еже даны бы своего свободилъ стяжати Милостивый Господь пострадавый Плотию насъ ради Иисус Христосъ Богъ нашъ. Яко Тому подобаетъ всяка Слава Честь и поклоняние Отцу и Сыну и Святому Духу. Нынѣ и присно и во вѣкы вѣкомъ.
Аминь.