| |
СКАЗАНИЕ О ДВЕНАДЦАТИ СНАХ. ИЖЕ ПРОЯВЛЕНИ БУДУТ НА ПОСЛЕДНЕЕ ВРЕМЯ.
Град Аринеск,
а в нем царь Шахаищ. И виде царь Шахаищ, 12 снов. И бысть о них
вельми печален. И не бѣ хто бы ему разсудил сны те, и обретоша
мужа хитра и горазна книгам имянем Мамера.
И сказа царь шахаищ сны своя Мамеру како их видел, и слыша Мамер
книжник цареву речь. И отвеща книжник Мамер. Великий царю тебе нѣсть
хитрие в мире сем. Ни тебе суть единому ни сынови назло. Ни граду
твоему Аринеску. Скажи ми великий царю 1-й сон свой.
Рече царь книжнику
Мамеру 1-й сон свой. Видех есми столп злат стоящ от земли и до небеси;
И рече Мамер царю когда будет злое то время последнее. От востока
и до запада по всей земли. И по всем градом будет зла много. И мятежи
в человецех. И не будет правды, ни мысли на сердце держати, и не
начнут Божия Заповеди хранити. Тогда будет друг другу враг, восттанет
князь на князя. Сильный меньшие бя не обрящут. Тогда ни кто же добра
творя. Только языком глаголет а на сердце зло мыслит, а добра ни
мало. Учителя закону учат, а сами по закону не творят. И тогда будет
глад, всякого обилия не будет. Дни летнии преступят в зиму, а зима
прейдет на весну, а среди лета зима начнет стояти. Хотяще люди сеяти
всякие семена и соблазнятся люди о том времени. И того времяни незнати
начнут и много сеявше мало пожнут. Земля начнет мзды просити, аще
на ней гноя не будет, и она плода не даст неправды ради нашея. Тогда
уже престанут друг друга любити. И тогда дети начнут не чтити ни
отца ни матери, ни ближняго роду своего, сын отца прочь отойдет
нужу приимет яко чюждыя сотворит. Чада себе от блудницы приживут,
и к тому не помянуть ни отца ни матери. В то время князи и владыки
и бояре и прочая все булут торговцы. А како купивше тако и продати.
А далекий путь скоро тает, а ветхий суд обычай пременять и ины обычаи
пременят. И в то время неначнет солнце сияти по первому своему сияти,
а не луна пустит света своего и померкнет, и звезды начнут падати,
тогда будут знамения различныя на небеси. Тогда явися звезда хвостата
на небеси. Тогда громи и шуми сильни будут, земля начнет трястися
а грады имут падати. Месяц и лета скоротаются. Потом и мир погибнет.
Паки рече Мамер
великий царю повеждь ми кко еси видел 2-й сон свой.
И рече царь видех от небеси и до земли сыро брюхо вися.
И рече Мамер, великий царю. Егда приидет злое то последнее время,
и тогда во всем мире ветхий суд престанет, роди и племена от Божия
службы уклонятся. И никто же промех собою не сотворит скупости ради
хлебныя, отлучатся от другов своих, и от племяни своего. А к чужим
людем прилучится житны ради любовь имуть имети. А своего роду богат
забудет;
Рече Мамер,
великий царю повеждь ми какое еси видел 3-й сон свой;
И рече видех 3 котла на единой котлине висящи. Во едином масло,
а в другом сало, а в среднем вода кипит. И масло кропяше в сало,
а сало в масло, а средний о себе кипяще, а ни от единаго в него
некрапяше ни от масла ни от сала.
И рече Мамер великий царю, когда приидет последнее то время. Седят
два соседа оба богаты а среди их убогий сидит. И учнет богатый богатаго
звати, а убогий сидя меж ними, а ни един его не позавет, и тогда
вси человецы начнут жити неправдою. И почнут во всем мире владети
над мужми своими жены. Когда оженится человек тогда скоро забудет
своего роду, забудет отца своего и матерь. А женино племя начнет
любити. Не возходит бо тогда жена по мужи своем, но муж по жене
восходит. Тогда идет жена по чюжем муже. И забудет отца своего и
матерь, и мужа своего перваго избудет, и детей своих первых избудет
же. Только чужаго мужа любити начнет. И тогда в тысящи женах не
обрящется что бы едино чисто житие изживши с мужем своим.
И рече Мамер
великий царю повеждь ми како еси видел 4-й сон свой.
И глагола царь видех стару кобылу со жребятем траву ядущу. А орли
с ними вкупе хожаше, а жребя ржаше;
И рече Мамер великий царю, когда будет последнее то время вдаст
матерь дщерь свою на блуд и учнет у дверей стерети нестыдящися тогда
начнет и сноха нестыдитеся свекрови своей, а чужаго мужа начнет
имети родом и чтити. А кто начнет вопрошати, то есть чей муж, и
она речет муж ми есть. А сестра сестру поучати начнет на блуд. И
тогда и обрящется ни в ких девицах чистоты, которой девице чистей
замуж пойти. Вси бо безкоромни будут. Не стыдящися посягнет девица
7-ми лет замуж, а и та уже тогда не чиста будет;
Рече Мамер,
великий царю повеждь ми како еси видел, 5-й свой сон;
И глагола царь, видех щеницу лежащу на месте, а щенята к ней на
нея брящут.
И рече Мамер, великий царю. Егда приидет последнее то и горькое
время, и начнут отцы детей своих на добро научити и на разум. А
дети не слушати начнут и учнут укоряти отца своего. Стар еси и не
смыслен. И тогда отцы зазором их умолкнут;
Рече Мамер,
великий царю. Повеждь ми како еси видел 6-й сон свои.
И глаголаша царь видех множество иереи в кале греховне грязуща
до горла, вопиюще и не могуще вылести;
И рече Мамер великий царю. Егда приидет последнее то время, тогда
иереи всех закону учнут учити, а сами по закону не творят ни учения
разумеют. Имения ради губяща душа своя во огнь вечный идут:
Рече Мамер,
великий царю повеждь ми како еси видел 7-й сон свой;
И глагола царь, видех конь красен о двою главах ядущи траву, едина
ему на переди, а другая на зади только яст, а из себя не пущает;
И рече Мамер, великий царю. Егда приидет последнее то время, князи
и владыки не милостиви тогда будут и грабители. Бога не боящеся
и судити имут не по правде. Виноватаго оправдающе мзды ради, а правого
виновата осудят. Ни Бога боящеся, ни человека срамляющеся. Ни смерти
себе поминающе своего ради ненасытнаго грабления, и пойдут во дно
аду;
Рече Мамер,
великий царю. Повеждь ми как еси видель 8-й сон свой.
И глагола царь, видех по всей вселенней, разсыпано бяше драгое камение,
и жемчуг и бисер, и все различное злато и серебро. И пришед огнь
всё пожже;
И рече Мамер, великий царю, егда приидет последнее то время, тогда
вси человецы купцы будут богаты и убоги и начнут лестию себе кун
добывати. И ни Богу угодят, ни своей души, ни убогим милостыни подадут.
Радуются о собранном богатстве неправдою граблением и мздоиманием.
А имением то погребут в землю. И пришед тати и пограбят, и будет
им плачь и горе где аки бесконечныя муки;
Рече Мамер
великий царю повеждь ми како еси видел Ѳ (9) сон свой;
И глагола царь, видех ремесленники многи приносяще дела своя хотяще
комуждо купити златом и серебром, и медью или порты и пришед начнут
просити своего и не обрете ничто же в них.
И рече Мамер великий царю, егда будет последнее то время, и начнут
мнози запиратися чужаго имения злата и серебра или кун, и всякого
имения положеного в них. А ины росты начнут грабити, бездушием своим
хотя куны добывати. А друзии работы избыти, а душу свою влекуще
во дно аду;
Рече Мамер,
великий царю, повеждь ми како еси видел 10-й сон свой.
И глаголаше царь десять же сошедша с высоты небесныя. По земли ходяще
злообразни суще;
И рече Мамер великий царю когда будет последнее то время, вси будут
тогда волхвы и начнут ходити яко бешены прельщающе вси людие. И
вси лжами и лестию бесовскою величающеся, и своя душа вдаша во огнь
вечный, а иных во след себе влекуще;
Рече Мамер великий
царю повеждь ми како еси видел 11-й сон свой;
И глагола царь, видех три девицы красные в 15 лет верстою, венцы
носяще на главах своих, а в руках своих цвети дубравни носяще, рекше
яко се есть воля Господня и держание их.
И рече Мамер, великий царю, егда приидет последнее то время будут
вси людие лживи. И скупи и не милостиви. Праваго слова не обрести
будет ни в коем же. Токмо словом глаголет, а языком льстит, а на
сердце все мыслят злое. Не будет бо в них ни смирения, ни покорения,
ни милости, и вси человецы будут мздоимцы. Таково время то будет.
Видяша дети своя умирающа не жалеют, а брат брату будет враг, а
жена видящи мужа своего умирающа и не пожалеет по нем. И убиет брат
брата. Восстанет отец на сына, а сын на отца, а мати на дщерь свою,
а дщерь на мати свою. И востанет сосед на соседа, кум на кума, свекры
на невестку свою, а невестка на свекровь свою, тогда будет кровосмешение
велие. Мнози восстанут брани по земли и кровопролития. Тогда начнут
быти моры часты и глад.
Тогда владыки и иереи будут винопийца не брегущи стада Христова
ни церковна пения не исправляюще. Соблазнятся мнози тогда. А убогий
муж хотя мудростию глаголет и людие его не послушают. А богатый
муж хотя просто слово глаголет, то вси людие слушают его и мудра
его творят;
Рече Мамер великий
царю повеждь ми како еси видел 12-й сон свой;
И рече царь много людей видех очи тесны власы востры ногти долги.
Суровы их речи суть дияволу служаще;
И рече Мамер великий царю, когда приидет последнее то время, и тогда
вси людие начнут убогих грабити по насилию. И мнози мятежи будут.
И тогда возглаголют вси людие почто не изомрохом в добрыя дни. А
не видели бы злы сих дней, а кто добро творит зде. той душу свою
спасет. И во огнь вечный не внидет.
Лутчи есть всего подаяние к нищим брашно и питие и варение. А на
своего брата и на друга вражды не держати. А имения своего не хранити,
на земли несть от него пользы. Но скрывайте себе сокровища на небесех,
да приимете вечная благая от Господа Бога.
И потом поклонися
Мамер царю и рече, господине царю шахайщу рад есми Аз и впредь снов
толкование сказати тебе, что будет в последняя времяна. Но великий
царю молю тя, ныне не буди тяжек на люди, и отиде от него книжник
Мамер.
Хвала Богу.
Аминь. |
|