ГЛАВНОЕ МЕНЮ
СТАРИННЫЕ КНИГИ
ИССЛЕДОВАНИЯ
АНАЛИТИКА
КОНВОЛЮТ
СКАЗАНИЕ О ВI (12) СНАХ. ИЖЕ ПРОЯВЛЕНИ БУДУТ НА ПОСЛЕДНЕЕ ВРЕМЯ.

 

Градъ Аринескъ, а в немъ царь Шахаищъ. И виде царь Шахаищъ, ВI (12) снов. И бысть о нихъ вельми печаленъ. И не бѣ хто бы ему разсудилъ сны те, и обретоша мужа хитра и горазна книгамъ имянемъ Мамера.
И сказа царь шахаищъ сны своя Мамеру како ихъ видел, и слыша Мамеръ книжникъ цареву речь. И отвеща книжникъ Мамеръ. Великий царю тебе нѣсть хитрие в мире сем. Ни тебе суть единому ни сынови назло. Ни граду твоему Аринѣску. Скажи ми великий царю А (1) сон свой.

Рече царь книжнику Мамеру А (1) сон свой. Видехъ есми столпъ златъ стоящъ от земли и до небеси;
И рече Мамеръ царю клда будет злое то время последнее. От востока и до запада по всей земли. И по всемъ градомъ будетъ зла много. И мятежи в человецехъ. И не будетъ правды, ни мысли на сердце держати, и не начнутъ Божия Заповеди хранити. Тогда будет друг другу врагъ, восттанет князь на князя. Сильный меншие бя не обрящутъ. Тогда ни кто же добра творя. Только языкомъ глаголетъ а на сердце зло мыслитъ, а добра ни мало. Учителя закону учатъ, а сами по закону не творят. И тогда будетъ глад, всякого обилия не будет. Дни летнии преступят в зиму, а зима прйдет на весну, а среди лета зима начнет стояти. Хотяще люди сеяти всякие семена и соблазнятся люди о том времени. И того времяни незнати начнут и много сеявше мало пожнут. Земля начнет мзды просити, аще на ней гноя не будет, и она плода не даст неправды ради нашея. Тогда уже престанут друг друга любити. И тогда дети начнут не чтити ни отца ни матери, ни ближняго роду своего, сынъ отца прочь отойдетъ нужу приимет яко чюждыя сотворитъ. Чада себе от блудницы приживутъ, и к тому не помянуть ни отца ни матери. В то время князи и владыки и бояре и прочая все булут торговцы. А како купивше тако и продати. А далекий путь скоро тает, а ветхий судъ обычай пременять и ины обычаи пременят. И в то время неначнет солнце сияти по первому своему сияти, а не луна пуститъ света своего и померкнет, и звезды начнут падати, тогда будут знамения различныя на небеси. Тогда явися звезда хвостата на небеси. Тогда громи и шуми сильни будут, земля начнет трястися а грады имутъ падати. Месяц и лета скоротаются. Потомъ и мир погибнетъ.

Паки рече Мамеръ великий царю повеждь ми кко еси видел В (2) сон свой.
И рече царь видехъ от небеси и до земли сыро брюхо вися.
И рече Мамерь, великий царю. Егда приидетъ злое то последнее время, и тогда во всем мире ветхий суд престанет, роди и племена от Божия службы уклонятся. И никто же промехъ собою не сотворитъ скупости ради хлебныя, отлучатся от другов своихъ, и от племяни своего. А к чюжимъ людемъ прилучится житны ради любовь имуть имети. А своего роду богатъ забудет;

Рече Мамеръ, великий царю повеждь ми какое еси видел Г (3) сон свои;
И рече видехъ Г (3) котлы на единой котлине висящи. Во едином масло, а в другомъ сало, а в среднемъ вода кипит. И масло кропяше в сало, а сало в масло, а средний о себе кипяще, а ни от единаго в него некрапяше ни от масла ни от сала.
И рече Мамеръ великий царю, когда приидетъ последнее то время. Седят два соседа оба богаты а среди ихъ убогий седитъ. И учнетъ богатый богатаго звати, а убогий седя меж ними, а ни един его не позавет, и тогда вси человецы начнутъ жити неправдаю. И почнутъ во всем мире владети над мужми своими жены. Когда оженится человек тогда скоро забудет своего роду, своего забудет отца своего и матерь. А женино племя начнет любити. Не возходит бо тогда жена по мужи своемъ, но мужъ по жене восходитъ. Тогда идет жена по чюжемъ муже. И забудет отца своего и матерь, и мужа своего перваго избудетъ, и детей своихъ первыхъ избудетъ же. Только чужаго мужа любити начнетъ. И и тогда в тысящи женахъ не обрящется что бы едино чисто житие изживши с мужем своим.

И рече Мамеръ великий царю повеждь ми како еси виделъ Д (4) сон свои.
Т глагола царь видехъ стару кобылу со жребятемъ траву ядущу. А орли с ними вкупе хожаше а жребя ржаше;
И рече Мамеръ великий царю когда будет последнее то время вдаст матерь дщерь свою на блудъ и учьнетъ у дверей стерети нестыдящися тогда нечнетъ и сноха нестыдитеся свекрови своей, а чюжаго мужа начнет имети родомъ и чтити. А хто начнет вопрошати то есть чей мужъ, и она речетъ муж ми есть. А сестра сестру поучати начнетъ на блудъ. И тогда и обрящется ни в кихъ девицахъ чистоты, которой девице чистей замужъ поитти. Вси бо безкоромни будутъ. Не стыдящися посягнетъ девица З (7) лет замужъ а и та уже тогда не чиста будет;

Рече Мамеръ, великий царю повеждь ми како еси виделъ, Е (5) свои сон;
И глагола царь, видехъ щеницу лежащу на месте, а щенята к ней на нея брящутъ.
И рече Мамеръ, великий царю. Егда приидетъ последнее то и горькое время, и начнут отцы детей своихъ на добро научити и на разумъ. А дети не слушати начнутъ неслушати и учнутъ укоряти отца своего. Стар еси и не смысленъ. И тогда отцы зазоромх умолкнут;

Рече Мамеръ, великий царю. Повеждь ми како еси виделъ S (6) сон свои.
И глаголаша царь видехъ множество иереи в кале греховне грязуща до горла, вопиюще и не могуще вылести;
И рече Мамеръ великий царю. Егда приидет последнее то время, тогда иереи всех закону учнутъ учити, а сами по закону не творят ни учения разумеют. Имения ради губяща душа своя во огнь вечный идутъ:

Рече Мамеръ, великий царю повеждь ми како еси видел З (7) сон свои;
И глагола царь, видехъ конь красен о двою главахъ ядущи траву, едина ему на переди, а другая на зади только ястъ а из себя не пущаетъ;
И рече Мамеръ, великий царю. Егда приидет последнее то время, князи и владыки не милостиви тогда будут и грабители. Бога не боящеся и судити имутъ не по правде. Виноватаго оправдающе мзды ради, а праваго виновата осудятъ. Ни Бога боящеся, ни человека срамъляющеся. Ни смерти себе поминающе своего ради ненасытнаго грабления, и пойдут во дно аду;

Рече Мамеръ, великий царю. Повеждь ми как еси видель И (8) сон свой.
И глагола царь, видехъ по всей вселенней, разсыпано бяше драгое камение, и жемчугь и бисер, и все различное злато и серебро. И пришедъ огнь всё пожже;
И рече Мамеръ, великий царю, егда приидет последнее то время, тогда вси человецы купцы будут богатъ и убогъ и начнут лестию себе кунъ добывати. И ни Богу угодят ни своей души, ни убогим милостыни подадут. Радуются о собранном богатстве неправдою граблением и мздоиманием. А имением то погребут в землю. И пришедъ тати и порабят, и будет им плачь и горе где аки бесконечныя муки;

Рече Мамеръ великий царю повеждь ми како еси видел Ѳ (9) сон свой;
И глагола царь, видехъ ремесленники многи приносяще дела своя хотяще комуждо купити злаотм и сребром, и медию или порты и пришедъ начнут просити своего и не обрете ничто же в них.
И рече Мамеръ великий царю, егда будет последнее то время, и начнут мнози запиратися чюжаго имения злата и серебра или кунъ, и всякого имения полоденого в них. А ины росты начнут грабити, бездушием своим хотя куны добывати. А друзии работы избыти, а душу свою влекуще во дно аду;

Рече Мамеръ, великий царю, повеждь ми како еси видел I (10) сон свой.
И глаголаше царь десять же сошедша с высоты небесныя. По земли ходяще злообразни суще;
И рече Мамеръ великий царю когда будет последнее то время, вси будут тогда волхвы и начнут ходити яко обешены прелщающе вси людие. И вси лжами и лестию бесовскою величающеся, и своя душа вдаша во огнь вечный, а иных во след себе влекуще;

Рече Мамеръ великий царю повеждь ми како еси видел АI (11) сон свой;
И глагола царь, видехъ три девицы красные в ЕI (15) лет верстою венцы носяще на главах своих, а в руках своих цвети дубравни носяще, рекше яко се есть воля Господня и держание их.
И рече Мамеръ, великий царю, егда приидет последнее то время будут вси людие лживи. И скупи и не милостиви. Праваго слова не обрести будет ни в коем же. Токмо словом глаголет а языком льстит, а на сердце все мыслят злое. Не будет бо в них ни смирения ни покорения ни милости, и вси человецы будут мздоимцы. Таково время то будет. Видяша дети своя умирающа не жадеют, а брат брату будет враг, а жена видящи мужа своего умирающа и не пожалеет по нем. И убиет брат брата. Востанет отец на сына, а сын на отца, а мати на дщерь свою, а дщерь на мати свою. И востанет сосед на соседа, кум на кума, свекры на невестку свою, а невестка на свекровь свою, тогда будет кровосмешение велие. Мнози восстанут брани по земли и кровопролития. Тогда начнут быти моры часты и глад.
Тогда владыки и иереи будут винопийца не брегущи стада Христова ни церковна пения не исправляюще. Соблазнятся мнози тогда. А убогий муж хотя мудростию глаголет и людие его не послушают. А богатый муж хотя просто слово глаголет, то вси людие слушают его и мудра его творят;

Рече Мамеръ великий царю повеждь ми како еси видел ВI (12) сон свой;
И рече царь много людей видехъ очи тесны власы востры ногти долги. Суровы их речи суть дияволу служаще;
И рече мамеръ великий царю когда приидет последнее то время, и тогда вси людие начнут убогих грабити по насилию. И мнози мятежи будут. И тогда возглаголют вси людие почто не изомрохом в добрыя дни. А не видели бы злыъ сих дней а кто добро творит зде той душу свою спасет. И во огнь вечный не внидет.
Лутчи есть всего подаяние к нищим брашно и питие и варение. А на своего брата и на другавражды не держати. А имения своего не хранити на земли несть от него пользы. Но скрывайте себе сокровища на небесех, да приимете вечная благая от Господа Бога.

И потом поклонися Мамеръ царю и рече, господине царю шахайщу рад есми Азъ и впредб снов толкование сказати тебе что будет в последняя времяна. Но великий царю молю тя, ныне не буди тяжек на люди, и отиде от него книжник Мамеръ.

Хвала Богу. Аминь.