| |
ОКРУЖНОЕ
ПОСЛАНИЕ О ЕРЕТИЧЕСКИХ КНИГАХ.
Возлюбленным
чадом Единыя, Соборныя, апостольския, древле православно кафолическия
Церкве; всем и повсюду пребывающим, хранящим и соблюдающим Священныя
догматы, правя веры, и предания Святых Апостол, и Святых и Богоносных
отец пастырей и учителей вселенских: Благодать , и милость, и миръ,
от Бога Отца, и Господа нашего Иисуса Христа, и Пресвятаго съпокланяемаго
Духа да будет со всеми вами. Аминь.
Всяко тщание и подвизание,
должни есмы имети возлюбленнии, еже последовати учению Божественных
Писаний, и хранити Священныя каноны и предания Святых Апостол, и
Святых отец, иже на Седми Вселенских и девяти поместных Соборах,
в различная времена собравшихся, на истребление богомерзких ересей.
И на утвержение правых велений. О них же Божественный Апостол взывает
глаголя: помните наставники ваша иже глаголаша вам Слово Божие,
их же взирающее на скончание жительства, подражайте веру их; и в
научения странна и различна не прилагайтеся;
Внимающе сему, должны
есмы блюстися всяких ересей и раздоров, явленных же и не явленных;
держати же и хранити догматы веры и предания церковная, цела же
и не превратна, по реченному; Не прелагай предел вечных, яже положиша
отцы Твои. Прикладающих же что, или отъемлющих, или инако претворяющих,
аще и сам будет крайнейши учитель кто; ни како же слушати, но удалятися
таковаго, яко же Божественнии Апостоли научают; Или не явно есть
преступление таковых, еже Святыми Богоносными отцы писанное Духом
Святым предание и чины во времена, подобныя положеныя развращати,
своя же некая мнящее быти, паче Духа Святаго лучшая учения вносити,
како не во отступницех Божиих вменяется таковии; И не рече аще противная
возвестят, или превратят все, но аще и мало нечто благовествуют
паче еже благовестихом, аще и худое что подвигнут, анафема да будет;
Сего ради прилежно, испытаем писания, и предания отец, и сих возревнуем;
и яко же обретохом Церковь Христова сшествия, сице ту сохраним,
сице и предадим, а не отлучаем себе от отец наших, иная прочитающе
а иная разумевающе;
Сия убо во уме обносящее
подобает нам средним царьским путем шествовати неуклоняющеся ни
надесно ни нашуе; от всяких злохулений отвращатися, удалятижеся
кривосказателнаго учения и лжеименнаго разума; Мнози лжеучители,
и лжепророцы изыдоша в миръ: Иже положиша на Небеси уста своя, и
язык их преходит по земли; от них же овии убо явлене ратующее древняя
Святых отец законоположения и уставы: овии же древлецерковным преданием
последующе, но неправо мудрствующе; иже от десна украдаеми, и аки
по ревности древле церковнаго благочестия, истѣе же рещи,
по своему лжеумствованию составляют богопротивнаго мудрования свитки,
и лжесловесных учений тетради и дающе им под именем святых благовидная
названия развращают правое учение Святыя Церкве, и ядом своего мудрования
напаяют сердца незлобивых, и влекут в смерть. Яко вся изчисляти
несть настояща от времене, обаче в кратце некая воспомянути необходимо
нуждно и зело благопотребно есть;
Обносимы убо суть тетради
некия лжесоставленныя, есть точию Священному Писанию не согласныя,
и здравому разуму противныя, но и богохульнаго мудрования пренаполненныя,
яже здѣ на среду да преложатся;
А: Первое место занимает тетрадь под названием сицевым, Апокалипсис
семитолковой
В: Тетрадь под заглавием, книга Евстафия
Богослова.
Г: Тетрадь содержащая ложное толкование
Амфилохиево, вторыя песни Моисеовы.
Д: Тетрадь, под названием, слово от
старчества, инока Захарии, ко ученику своему Стефану.
Е: Тетрадь, лжесоставленное толкование
десяти перст и десяти роговъ звѣря.
S: Тетрадь, о бражникѣ.
З: Тетрадь, о винномъ сотворении.
И: Тетрадь, о картофлѣ: мнимо
от пандока, и других книг.
Ф: Тетрадь, содержащая странное мудрование,
о духовном антихристе.
I: Тетрадь лжепророческия; в них же
назначается время и день кончины мира, и Втораго Пришествия Христова;
яже вся суть ложная и баснословная сочинения; в них же проповедуется,
пресечение Христом преданнаго священства, скончание новоблагодатнаго
закона, царьствование последняго антихриста: который, аки бы возседает
на престолѣхъ олтарей господствующей ныне в России церквѣ.
Яже аки бы иному богу верует и покланяется; исповедуя под именем
Иисуса, не Христа Спасителя, но противника Его антихриста.
Таковая безместная и
нелепая мудрования, посеяна быша злонамеренно, для пресечения священства,
от помрачивших совесть безпоповцев; и неприметно вкрадаются во христоименитыя
люди, дышущыя простотою и незлобием и не могущия различити истину
от лжи.
Оберегая стадо Христовых словесных овец, от душепагубнаго учения,
и во отвращение таковых нелепых мудрований и всескверных плевел,
посеянных посредѣ чистыя пшеницы благоверия, предлагаем послание
сие, и молим все христоименитое достояние, вкупе с богомудрым Максимом
Греком глаголюще; Не всяким ветром, учения обноситися, но со многим
опасством, и трезвенным разумом искушати духи, сиречь, яже от неких
писуемыя книги, аще во истину от Бога суть; По Божественному Апостолу
и Евангелисту Иоанну сиречь; аще согласны суть по всему с писанным
Святым Духом пророческим, и Апостольским, и Евангельским Священным
и правым словесем, и не блазненым богословским догматом возсиявших
по них всюду вселенныя богодухновенных святителей и учителей.
Аще же не по всему согласуют ниже бо шествуют с богодухновенными
писании, яже от неких писуемыя книги; отринути и гнушатися их подобает,
аки хульных и скверных и Бога нас отлучющих.
Да внимаем себе Господа ради и не без искуса веруем всякому духу
учения, но да искушаем прилежно писания; аще по всему согласуют
Апостольским и пророческим преданием и учением. Аще бо по нечесому
разликуют, да не примем я, но да отвержем от себе, аки лукаваго
бѣса плевел сеянных посредѣ чистыя пшеницы благоверия,
на прельщение и погибель душам нашим.
Последуя учению преподобнаго
мужа, возвратимся на вышепреложенная сочинения и разсмотрим безпристрастным
оком лежащая в них ложная мудрования, начнем же сице.
А: Апокалепсис седмитолковой, в нем же надписуется; аки бы напечатан
повелением благочестиваго государя царя Иоанна Васильевича, всея
Руси; и аки бы имать УА (401) главу, а не КВ (22), яко же во Апокалипсии
Святаго Иоанна Богослова содержится. И аки бы Иоанн Богослов толкует
словенскою рѣчию.
В сей богомерзкой тетрадке, толико зловредных мудрований написано,
яко не точию глаголати, но и помыслити ужасно. Тамо (и во инехъ
ложных сочинениях) четвероконечный Крест злословится образом сквернаго
богопротивника антихриста! Идолом. Мерзостию запустения. Кумиром
стоящим на месте Святѣ, и прочая нелепая порицания, на оный
возпущаются.
Имя Иисусъ, приписуется имени самого последняго антихриста. Евхаристия
совершаемая под именем о нем, и четвероконечным крестом: нарицается
змеиным блеванием, и агньцем антихристовым.
Конечнее же проповедуется, истребление Священной хиротонии на всей
вселенней. Таковое богоборное учение, священному писанию и церковному
учению есть несогласно, крестохульно, еретическо душепагубно, и
отнюдъ ложно! Ложно, яко надписуется: аки бы напечатан повелением
государя царя Иоанна Василиевича но печатнаго издания неточию книги,
но ниже единаго листа таковаго содержания нигде не бяше, и отнюдъ
несть,.
Ложно аки обьявляет УА (401) главу. Но по содержанию везде у любителей
онаго в малой тетрадке обносится к сему же и во Апокалипсии Святаго
Иоанна Богослова не УА (401), но КВ (22) главы положены суть: откуду
же ТОФ (379) глав положишася;
Ложно, яко баснословит: аки бы Иоанн Богослов толкует словенскою
рѣчию, но Иоанн Евангелист во Асии Христа проповеда, тамо
же Евангелие и Апокалипсис по Откровению Божию написана суть; в
словенехъ же не бяше, и словенскою речию не толковаше. Словеномъ
бо Первозванный Андрей Благовести спасенную проповедь; но и той
четвероконечнаго креста не хуляше. Очесом зри в житии его; Отнюду
же и ясно зрится: яко псевдоименитый седмитолковой Апокалипсис сей,
составлен не от Иоанна Богослова, но от некоего вседерзостнаго баснотвора:
и есть лжесоплетенная выдумка, от безпоповцев на погибель душам
христианским выпущенная; с целию, еже бы им удобнее привлекати простодушных,
в пропасть своего заблуждения.
В: Тетрадь, под заглавием книга Евстафия Богослова; истѣе же
рещи, площаднаго суеслова, в ней же проповедуется; яко антихрист
убиет три цари великия, веру и любовь и надежду; а Седмь Таинств
церковных покорит проклятый под себе.
И таковое мудрование есть еретическо и богопротивно; аще бо дати
сему мнению место, то по сему, три богословския добродетели вера
любовь и надежда; и седмь Таинств церковных имеют происхождение
свое (Оле мрачнаго заблуждения!) от звѣря морскаго, его же
Даниил видѣ десят роговъ имуща, от него же и антихрист произыти
имать. И сего ради будут антихристу ближния и сродныя, яко от того
же корене произрастоша, и тем же отродком и погибоша! И что будет
безместнее суетнаго и безумнаго непщевания сего.
Г: Тетрадь, содержащая ложное толкование Амфилохиево, вторыя песни
Моисеова есть несогласная Священному Писанию, а посему и не приемлется
Православною Церковию.
Д: Тетрадь, под названием слово от старчества. В нем же аки бы инок
Захария беседова ко ученику своему Стефану, о антихристе, и возвести
ему; яко священнический и иноческий чин до конца истребится, и прочая
ложная соплетения тамо зрятся, яже не что иное суть, точию баснословия,
слуху благоразумных отвратительная;
Е: Тетрадь, лжесоставленное толкование, десяти перстъ ног тела, показаннаго
Навуходоносору, и десяти рогов четвертаго звѣря виденнаго
Даниилом; наводимое о царех богохранимаго государства русскаго:
есть с книгою Святаго пророка Даниила, и толкованием Святых отец
несогласно, не правды же и ложнаго предсказания наполненное; в нем
же ничтоже истинно, но вся суть суетна и ложна. Десять бо перстъ,
и десять роговъ, знаменует разделение римской монархии на десять
частей; а не десять царей державы русския, един другому последующих;
S: Тетрадь, о бражникѣ, подложно подписуемая, аки бы из бесед
Евангельских; в ней же баснословится, како бражникъ бражничалъ на
земли, и по смерти у врат Святаго рая стоя, порицаше Святаго Давида
царя, и Соломона, въ купе же Апостола Петра, и Иоанна Богослова;
и тако вниде в рай; Сочинена вероятно, от некоего кощунника, и служащая
поводом претыкания к растленной жизни;
З: Тетрадь
о винном сотворении; аки бы бѣсъ научи человека, хмельное
питие варити, и человек той за то у царя честь выслужил, ложно надписуемая,
аки бы из стоглавника царя Иоанна Василиевича, но в Стоглаве сего
несть. Паче же таковое мудрование, блаженный Киръ Зиновий мних ученик
преподобнаго Максима Грека, в МЕ (45)-мъ слове книги своея, отревает
глаголя; Хмель несть от бѣса, яко бѣсъ творити не может
ничесоже, едино мечты творити может. Хмель же Божия тварь, рекшаго:
да прорастит земля былие травное; проявлено же убо, яко тогда и
хмель прорасте Божиим Повелением о немъ; Ниже; аще же мнихом с хмелем
не питии, и сие несть закон. Ниже многа осуждения достойно мне.
За еже умыслити соблюдати не являема мнихом ума притворити им непитие.
И сего ради к таковому уставу произвестися; отсюду убо явствуется:
яко аще хмель не от бѣса есть, то и питие оно не бѣсъ
научи варити, но человецы сами изъобретоша.
Сия же глаголем; ложныя басни отревающе, а не пиянству двери отверзающее,
вемы бо Апостола вопиюща; Брашно и питие, не поставит нас пред Богом.
И паки: Не упивайтеся вином, в нем же есть блуд; и премудраго Соломона
глаголюща; Невинно вино и проклято есть пиянство. Его же всяк христианин
удалятися должен есть и бегати; Пияницы бо Царствия Божия не наслѣдят.
И: Тетрадь, о бульбѣ или о картофлѣ: аки бы изъ пандока,
и других книг, и крыющейся тайно голубицы, подложныя выписки; на
употребляющих оный тяжкое запрещение наводящия, и таковой епитимии
подлагающия, ея же ни в Кормчей, ни в Номоканоне несть. И сие мудрование
еретическо есть, понеже богосозданное зелие, на пищу человеком дарованное,
и по естеству употребляемое, глаголет быти нечисто, и ложно ссылается
на книги, в коих и следа о сем несть; всяка же лжа от диавола есть,
той бо есть отец лжи, и во истинне не стоит.
Ф: Тетрадь, о духновенном антихристе, богопротивное сочинение; благочестивому
слуху невместимое, хулы же в нем обносимыя, нелѣть есть и
писанию предати;
I: Тетрадь,
лжепророческим духом составленная, назначающая время и день кончины
мiра, и Втораго и Страшнаго Пришествия Христова; есть воистину богоборнаго
учения наполненная, яко вопреки пречистых словес Самаго Христа Бога,
от продерзателей произведенная.
Сия убо вышереченная, и другия те подобныя сочинения, от наглых
невежд составленныя, суть ложныя и церкви чюждыя: яже предложившее,
и ложное учение во онех содержащееся объявившее, которое отвергаем
и отметаем. И в направление здраваго разсуждения, предлагаем зде
в кратце всем последователем древлецековнаго благочестия.
ПЕРВОЕ;
Святая правславнокафолическая
Церковь, и священтсво вкупе с приношением Безкровныя Жертвы, пребудет
до скончания века, и до дне суднаго по не ложному обетованию Господню,
яко же глагола Сам пречистыми Своими усты; На сем камени (с праваго
исповедания Петрова) созижду Церковь Мою, и врата адова не удолеют
Ей.
Колицы ратоваша Церковь, и ратоваше и погибоша, тая же выше Небес
взыде. Таково бо имать величество Церкви. Ратуема, побеждает. Навѣтуема,
одолевает. Досаждаема, светлейши устрояется, приемлет язвы, но не
низпадает от язв. Волнуется, но не погружается. Обуревается, но
потопления не подъемлет. Борима есть, но непобеждается. Пореваема,
но не содолеваема. И чесо ради попусти брань; яко да покажет светлейшу
победу. Церковь бо Небеси паче укоренилася есть удобнейшу победу
Церковь бо Небеси паче укоренилася есть удобнейше есть солнцу угаснути,
нежели Церкви безвести быти.
Кто есть проповедуя, и сия рече; Основавый Ту; небо и земля мимо
идет, Словеса же Моя не мимо идут; На сие и блаженный Феофилакт
в Благовестнике пишет; понеже бо мятежи и рати, и изменению рече
быти стихиям и вещем, да не пщуют нецыи, яко егда Христианство разорится,
ни рече; не прейдет бо род сей христианский; небо и земля изменится,
Словеса же Моя Евангелие Мое не разорится, но пребывает, аще и вся
двигнутся, но о Мне вера не оскудеет. Являет же зде, яко Церковь
честнейшу имать всех тварей. Ибо аще и тварь изменится, верных же
Церкви и словеса Ея, и Евангелие, никогда же. Понеже Церковь Словом
Божиим утвержена.
Слово Божие на небесе и земли крепчайше, яко Сам Христос Рек, небо
и земля прейдет, а Словеса Моя не прейдут. И яко же Христос никогда
не умирает, тако и священство Его по чину Мельхиседекову, до века
непрестает; Аще же священство пребудет вечно, убо и Безкровное Жертвоприношение
пребудет вечно. Ибо сие вкупе бывает, и ни едино без другаго не
может быти.
К сему же. Веждь убо без всякаго сумнения, яко в Церкви Божией не
две точию суть Тайнѣ, но всесовершенно седмь. Ими бо вси освящаемся,
и Спасение содержим, неведый же и не брегий о них сей погибает.
Того ради, всякому человеку подобно есть знати истинную, а не смысленную
Церковь, но единую Небеснаго Жениха чистую и нескверную Невесту.
Ибо кто не познает Ея, како в Ней и при Ней в таковом велицем обуревании
пребудет. А кто при Ней не прибудет, и в ней не обрящется, той вечнаго
онаго блаженнаго по времене нынем сем житии живота наследити не
может; Зане кроме Церкви Божия, ни где же нет Спасение. Яко же бо
при потопе все елицы с Ноем в ковчезе не бяху и стопоша тако и в
день судный, вся иже ныне в Церкви Святей не будут, тии во озеро
оное огненное ввержени будут.
ВТОРОЕ.
Господствующая ныне
в России церковь, равно и греческая; погрешает точию в догматех
церковнаго Предания; верует же не во инаго бога, но во Единаго с
нами; Творца небу и земли видимым же всем и невидимым: Глаголю же
святую Троицу Единосущную и Нераздельную; Отца Безначальная, Сына
Собезначальна, и Духа Святаго Сопрестольна. Исповедует и плотское
смотрение Христово во искупление рода человеческаго, содеянное.
Почитаем и честныя Праздники Владычни, вкупе с нами (по древнему
календарю) не привидением, но дѣтельне.
Рождество Христово, Сретение, Богоявление, Распятие, Погребение,
Тридневное Воскресение, и на Небеса преславное Вознесение, и прочая.
Такожде и Пречистыя Богоматере, и Святыхъ Угодников Божиихъ.
Покланяется святым иконам древняго изображения, с надписанием Имене
Христова; Исусъ Христосъ.
Лобызает честный гвоздь, и хитон Христов, святыя и чудотворныя иконы,
и Святыхъ Угодников Божиихъ мощи. И сими всеми, явственно доказуется;
яко во Единаго и того же верует Бога, Единаго и того же с нами исповедует
Христа. И таковаго ради верования ея; Крещение совершаемое от нея
в три погружения, во Имя Отца и Сына и Святаго Духа: и хиротония:
на основании Священных Правил и Святоотеческих событий, приемлется
без повторения.
Вины же нашего разделения и непоследования пастырем тоя Церкви,
суть важныя и благословныя; понеже убо попущением Божиимъ чрез Никона
бывшаго патриарха, древле церковная Предания изменишася. И в последствии
Собром (с присудствием греческих патриархов) ҂АХѮЗ (1667)-го
года, ужаснейшая клятва и анафема, на содержашая древняя святоцерковная
Предания произнесеся; и строгое преследование и гонение воздвижеся
с мучением. И по сих, от пастырей поборающих по новоизложенным догматом
и преданиям, бранныя книги издашася. В них же Святейшее и поклоняемое
Имя Христа Спасителя нашего Исус, злохульно поречено; аки бы не
знаменует Спасителя и Исцелителя душъ наших, но некоего инаго Исуса
равноухаго: К сему же (о ле дерзости) именоваша чюдовищным и нечего
не значющим.
Христово преданное двоперстное сложение на изображение крестнаго
замения, такожде поречено: арианством, македонианством, несторианством.
Но и в трехъ перстном сложении своем, учение имеет само с собою
несогласно: в скрижали бо, в пращицѣ, и в предисловии Псалтырей;
повелевается в трехъ перстах исповедовати оба Таинства, Таинство
Троицы, вкупе и смотрение: два же последния перста, имети праздны:
Во инех же книгах: в трехъ перстах, Таинство Троицы; в последних
же двух, Таинство Смотрения. Тайну Святаго Крещения совершает в
три погружения, согласно Евангелию православным образом, обаче без
всякия нужды за равносильное приемлет и поливательное. Не примелющи
же, облагает зело неправедными порицаниями и гажениями.
К сим же и иная суть изменения и пременения, отъятия, и приложения,
яже зде изчисляти неудобно есть. Изволяй же да чтетъ ыо ответех
иеродиакона Александра, такожде в ответе Поморских ответов в тридесят
осми статьях. И в сочинении Никодима инока, в шести статьях, и тридесяти
показаниях. Тамо бо вины нашего разделения с господствующею в России
Церковью подробно описаны, и законными доказательствами засвидетельствованы.
Сих ради совесть наша не попущает нас быти в подчинении пастырем
тоя Церкви; иже к крайнему сожалению здравомыслящих, не обращают
должнаго внимания, на исправление своих полемических книг, и не
уничтожают означенных жестокословных порицаний; порицаний отвратительных
благочестивому слуху не вместимых, и христианским пастырем отнюдъ
не свойственных.
Аще же некогда Благодатию Божиею озарившеся; отложат вышеупомянутая
порицания и Соборне оставят своя новодогматствования; а святую старожитность
возлюбят, и примут, и порученным себе хранити ю повелят. И начнут
последовати всем древлецерковным Преданиям; неизменно, и устроится
Церковь в таковой точности догматов и Преданий, яко же бяше от лет
Равноапостальнаго князя Владимира, и до лет Никона бывшаго патриарха;
тогда валъ того предела в ровеник обратится, и единым к другим прехождение
учинят сердца. И мы без всякаго увещания человеческаго, пойдем ко
общению Ея.
А донеже пребывают соблазны и преткновения возмущающия совесть нашу;
то мы не можем, вопреки учению древле православныя Церкви, и вопреки
убеждения своея совести, последовати новоизложенным догматом и Преданиям.
И сего ради нѣсмы раскольницы и раздорницы, но чада Единыя
Святыя Соборныя Апостольския древлеправославно кафолическия Церкве.
Объявивше убо свое исповедание, и священное желание засвидетельствуем
пред Всевидящим Богом; яко же удаляемся от порицающих древлецерковныя
Предания: тако не общаемся и хулам безпоповским, в выше предложенных
тетрадках обносящимся, на которыя чиним ныне опровержение.
И молим живущаго в вышних, Единаго Безначальнаго Царя Славы: да
послужит сие образцем ученым пастырем господствующей ныне в России
Церкви, яко да и тии обратят должное внимание о выше предложенных
же стокословных порицаниях, от предместников их сочиненных, и в
свете изданных.
Мы же всякаго злохуления отвращаемся и мудрствуем сице.
...
ПЯТОЕ;
Безпоповцы не исповедующии
приношения Безкровныя Жертвы, налицы вселенныя; ужасное ругательство
наводят на Евхаристию ныне совершаемую в Греческой и Российской
Церкви; равно не совершаемую и в нашей древле православной Церкви.
Но таковым продерзателем затыкают уста восточнии учители; Священнейший
Иоанн Китрожьский, Преподобный Матфей Правильник, и всечестный Севаст
Арменополь; Иже о римских опресноках пишуще, и причащатися о нем
не повелевают; но благословне и за простыя не вменяют, призывания
ради Господня, и Святаго Иякова брата Божия Священных припеваний
над ними совершаемых;
Аще же убо о опресноках Римския Церкве таково есть заключение толкователей
Священных Правил, и от Святыя Церкви неиспределено. Убо мудрование
безпоповское о Евхаристии греческия и Российския Церкве, зловредно
есть. Ругатьство же наводимое ими на Таинство совершаемая по древле
церковному Преданию, в нашей православно кафоличестей Церкви, зело
богохульно и душепагубно есть.
Сих ради вин завещаваем православным христианом зловреднаго и душегубнаго
учения безпопвскаго не слушати; и вся сочинения их вышепоименоавнная,
и иная направленная на истребление Церковных Таинств, и в поругание
Святыни; не согласная Священному Писанию, и церковному учению; повелеваем
огнесожжению предати, яко плевел сеянных от врага, на прелесть душам
христианскаго рода. Яко же гласят Священыя Правила: и преподобный
Максим Грек совещавает.
ШЕСТОЕ;
К сему завещаваем и
молим, вкупе с верховным Апостолом Павлом; творити молитвы, моления,
прошения, благодарения, за вся человек. Изрядне еже, о здравии и
о Спасении, и о Царьстей победе, иже от высочайшая и Вседержащия
Божия десницы поставленнаго, самодержавнейшаго, Богохранимаго, великаго
государя нашего, царя и великаго князя, Александра Николаевича,
и всего августейшаго дома его. И о всей палате, и о воехъ его. О
нем же и на Святой Проскомидии, Божественныя Литургии; в числе великих
седми, пятая приносится просфира: и приноситься будет, яко же о
нем, тако и о будущих преемницех престола и скипетра его, в род
и род и до века.
Яко да Господь Богъ соблюдет его здрава, мирна, и долгоденствующа:
да подаст ему победу на враги: да оградит державу его миром; и да
покорит под нозѣ его всякаго врага и супостата; и да вложит
в сердце его благая и полезная о Святей Церкви: яко да имамя в тишине
их тихое и безмолвное житие поживем, во всяком благочестии и честности.
СЕДМОЕ;
Паки вторицею завещаваем
и молим; кривосказательных учений бегати, и лжесоставленныя сочинения
несогласная сказания и толкованию Святых Отец, не приимати отнюдъ,
но отметати я, и единомудрствовати вкупе со Святою Церковию, единогласно,
и единомысленно; яко же Святии Отцы предаша и научиша.
ОСМОЕ;
И о пришествии Святых
Пророк Илии и Еноха веровати, яко же учит Святая Церковь; яко пред
кончиною мира сего послани будут от Бога, ко изобличению прелести
антихристовы, во своей сии плоти; чювьственно, видимо, самообразно;
и плотьскими смертными человеки видену будут; и проповедят благоверие
роду человеческому; сотворят же чюдеса и знамения и ни что же ни
от кого же постраждут даже до конца своего сии прорицания. Потом
же исполнят мучение свое, и от антихриста убиени бывше скончаются;
и уже не токмо яко пророцы, но и яко мученицы, венчаются победными
венцы от Венцедателя Бога.
ДЕВЯТОЕ;
Такожде и антихрист
подобает со Святою Церковию единомудрствовати: аще и мнози суть
антихристи, по Святому Иоанну Богослову; и обаче свое образне и
особне антихрист глаголется, иже в конец века приидет; чювьственно,
видимо, и самообразно: его же есть пришествие по действу сатанину,
попущением Божиимъ. Родити же ся имать от племене еврейска, от колена
Данова седмаго сына Иякова ветхозаветнаго патриарха; от нечестивыя
жены, мнимыя девицы, всескверныя же всяко; Родится убо от блуда
яко же рѣхомъ, и воскормится в тайне и напраснѣ возставится,
и сопротивится и царьствует; Воздвигнет же велие гонение и мучение,
всем в вере Христове пребывающим.
Царьствовати же имать, три лѣта и полъ; яко же учит Священное
Писание, и Богоноснии Отцы сказуют; его же Господь Наш Исусъ Христосъ
убиет Духом уст Своих, и упразднит явлением Пришествия Своего. Ятъ
бо будет вкупе со своим лжепророком, и жива въвержена будета оба
во езеро огненное горящее жупелом; яко же глаголет наперстник Христовъ
и Евангелистъ Иоаннъ во Откровении своемъ, и Святый Андрей Кесарийский
изъявляет.
ДЕСЯТОЕ;
О дни же и часе кончины
мира, и Втораго Пришествия Господа Бога и Спаса нашего Исуса Христа,
никто же вѣсть, ни ангели небеснии, токмо Самъ Той Единъ.
Тем же никому же от земнородных, о сем ведати невозможно есть, и
испытословити отнюдъ не подобает, по реченному вышших тебе не ищи,
и крепчайших тебе не испытуй; и прочая.
В заключение же послания,
обьявляем всем православным христианом, яко помогающу Богови, составлен
будет устав, или краткое изложение Догматов и Преданий древле православнаго
и кафолическаго исповедания; Единыя, Святыя, Соборныя, и Апостольския
Церкве. Который и преподан будет в руководство и окормление всем
православным священным же и мирским; Во еже правѣ и известно
ведати о Догматех веры; и о Преданиях; о Седми Таинствах Церковных,
и о инех нуждных, и благословных винах;
На конец паки завещаваем и молим, иже древлецерковная Предания любызающих:
хранити вся Заповеди Божия, и Предания Церковная неизменно, Свято,
и нерушимо: и удалятися всяких ересей, и раздоров, и иностранных
обычаев.
Имети же между себе, согласие и единомыслие во всем: и мир и любовь,
яже есть соузъ совершенства и еже себе не угодно, и нѣмъ творити;
Богъ же мира, и Отец щедротам, Бог всякия утехи; собираяй расточенныя
и вселяяй единомысленная в дом Свой; Да соберет расточенныя овцы
во ограду пажити Своея, и да подаст единодушие и единомыслие всем
православным христианом, Благодатию и Человеколюбием Своим; яко
да будет едино стадо и Един Пастырь.
Аминь.
Сие окружное послание
написася в царьствующем граде Москве, в лѣто ҂ЗТЕ (7305)-е,
месяца февраля в 24 день.
|
|