|
|
|
О
ДНИ ВЕЛИКОМ И О СУББОТѣ,
КАКО ОГНЬ С НЕБЕСИ СХОДИТЪ НА ГРОБЪ ГОСПОДЕНЬ В ДЕНЬ СУББОТЫ.
|

|
В
день Великия Субботы, канонъ Воскресения Христова, Пасхи, заутро
пришедъ патриархъ Софроний, и мы грѣшнии с ним же, ко вратомъ
Великия Церкви. И тутъ стоящу много народу пришедшихъ от далнихъ
странъ на поклонение гробу Господню. И патриархъ сяде предцерковию,
тутъ же и мытники сидятъ. И пришедъ турки ко вратомъ Великия Церкви,
и отомкнувъ врата, и патриархъ идетъ в Церковь. По немъ же христиане.
Христиане же суть – сербы, греки, сирияне, вели, русь, дреанити,
вожи.
Емлют поганыя турки со всякаго христианина Д (4) золотыхъ, оугорскихъ
тожь, и в церковь пустятъ, такожъ и мы грѣшнии, по Д (4) золотыхъ
дали с человека. Которому христианину дать нѣчево того и в
церковь не пустятъ, а тѣм людемъ которыя золотыя даютъ писмо
да потому писму и пускаютъ. А с латынян, и со фрязовъ и еретиковъ
емлютъ по I (10) золотыхъ с человека, а золотыя оугорские, развѣ
с чернецовъ мыта не емлютъ.
В той же день субботны приидутъ многи христианъ от многихъ странъ,
а дать что не имущихъ, приходяще же имъ страннымъ и оубогимъ, ко
вратомъ Великия церкви. А во вратѣхъ учинено оконце невелико.
В тожъ оконце, зрящимъ имъ, внутрь церкви ходя, видѣти гробъ
Господень нашего Иисуса Христа, и сшествие Святаго Духа с Небеси
на гробъ Господень.
Вшедшу же патриарху в церковь, и мы грѣшнии с ним же внидоша
ко гробу Господню. Помолихомся престолу Святаго Воскресения Христова,
и приидохомъ гдѣ лежитъ камень, его же отвали ангелъ господень
от гроба Господня. Над ним стоятъ образы, и поклонихомся образомъ,
и целовахом же мы недостойнии, и паки внидохомъ внутрь предѣла,
ко гробу Господню и тутъ узрехомъ гробъ Избавителя нашего и начахомъ
дивится человеколюбию Божию, како ны допусти со грѣхи нашими
дойти до Святаго града Иеросалима, и видѣти и целовати гробъ
Своего человеколюбия. И видехомъ которыя с нами идущихъ, поклонитися
гробу Господню. И паки видехомъ мы к Богу отшедшихъ на пути, занеже
бо на пути многия скорби бываютъ. От беззаконныхъ турокъ и от араплянъ
на море и на сухе.
В той же день Великия Субботы, заутри внидутъ поганыя турки и янчарѣ
в церковь ко гробу Господню, и погасятъ вся кандила гарящая, по
всей церкви и по предѣломъ, и над самим гробомъ Господнимъ.
Ни единаго не оставятъ со огнемъ. У патриарха же и у христианъ обычей
имѣютъ, в домѣхъ своихъ въ Великий Четвертокъ погашаютъ
огнь. И от техъ мѣстъ нѣсть у нихъ огня ни у кого дондеже
огнь снидетъ с Небесе на гробъ Господень. И от того огня взимаютъ
и разносятъ в домы своя, и держа на весь годъ огнь тотъ. А дѣла
не дѣлаютъ никакого, развѣ Богу молятся, до Воскресения
Христова. А церковь малую иже над гробомъ Господнимъ, запечатаютъ
своею печатью, и стражи приставятъ у дверей гробницы. А патриархъ
с христианы идетъ во свою церковь к Воскресению Христову, и тамо
молятся со слезами ждутъ знамения Божия с Небеси.
За два часа до вечера, приидетъ аки солнце, в Великую церковь и
в ней покровенное мѣсто, в большой церкве над гробомъ Господнимъ,
здѣлано от низу церкви пошло широко, а к верху поуже, а верхъ
непокровенъ, подобно быти аки колпакъ на гллавѣ без верхъ.
И станетъ лучь от солнца на крестъ иже внутрь, Великия церкви крестъ
во гробницѣ, над гробомъ Господнимъ и в пределехъ узревшее
патриархъ лучь Божественны Знамения, и вземъ Евангелие и крестъ,
и свѣщу без огня и пойде патриархъ в боковыя двери; сирѣчь
в сторонние, от старыя трапезы, ко гробу Господню, и за нимъ игуменъ
арменский со армены, за ним же идутъ гофти дахабѣжи, и несториане,
и прочия еретики со всѣми попами. И пришедъ патриархъ ко гробу
со христианы, и обыдоша трижды кругомъ престола гробницы молящееся
Богу со слезами. Иноком же и инокинямъ, и всѣмъ православнымъ
христианомъ, плачющимся горцѣ, и вопиюще к Богу глаголющимъ
Господи сподоби насъ видити Благодать Святаго Человеколюбия, и не
остави насъ сирыхъ.
Патриархъ же ходя кругъ гроба Господня, пояше стихѣры днесь
адъ стеня, вопиетъ, нам же всѣмъ плачющимъ, и не могохомъ
воздержатися от слезъ.
Пришедшеджъ патриархъ к дверемъ церковнымъ ко гробницѣ, и
повелѣ туркомъ, предѣлъ над гробомъ Господнимъ отпечатати,
онижъ отпечатавши церковь, патриархъ же отверзе двери гробницы,
и узрѣвъ Благодать Божию, сшедшую с Небеси на гробъ Господень,
во образѣ огненнѣ, и огню ходящи по гробу Господню,
по доске мраморней, всѣми цвѣтами аки молния с небеси,
и паникадиломъ всѣмъ стоящимъ, верху гроба Господня без огня
и видѣвше вси людие, таковое чюдо человеколюбие Божие, многие
слезы испущающе, и радостию великою воозрадовашася.
Патриархъ же Софроний, вниде единъ в пределъ гроба Господня, имѣя
во обоихъ рукахъ свѣщи многия, и приступилъ ко гробу Господню,
в край гроба Господня и изыде огнь из гроба Господня аки молния
на патриаршеския руки, и абие загорѣшася свѣщи в рукахъ
патриаршескихъ пред всѣми людми. Сподобижъ Господь Богъ и
насъ видѣти таковое человеколюбие Свое.
Тут же над гробомъ христианское паникадило загорѣлося, патриархъ
же изыде ис предѣла от гробницы имяше во обоихъ рукахъ свѣщи
горящыя много, и посторонь того предела ста на высокомъ мѣсте,
иже бѣ ему на то учинено. Народ же окрестъ его стояше, и от
руки его взимаху огнь христианѣ, и зажигаютъ по всей церкви
по всѣмъ мѣстомъ свѣщи и поникадила, и понесутъ
тотъ огнь по домомъ своимъ, и держатъ во весь годъ.
Еще же дивно о Святомъ Огни повѣдати, которы изнесе патриархъ
из гроба Господня на свѣщахъ незжетъ онъ в патриаршескихъ
рукахъ рукъ человеческихъ развѣ свѣщи, и какъ христиане
от патриарха свѣщи возмутъ, и онъ у нихъ станетъ как и прочий
огнъ горѣть.
А латыне и вси еретицы ихъ игумены и попы взымаютъ огнь от христианского
кадила зажигаютъ. А патриархъ имъ от своихъ рукъ свѣчь и огня
не даетъ и от нихъ оудаляется и совѣту с ними не творятъ.
И пойде патриархъ со христианы по Святымъ церквамъ и по Святымъ
мѣстамъ со слезами Богу моляся, и потомъ во свою церковь Воскресения
Христова, и паки чтецъ начнетъ паремьи чести, и поряду начнутъ пѣти
Божественную Литоргию в нощи.
Отпустиша же ю во вторы часъ нощи, по Божественнѣй же Литоргии
сѣде патриархъ в церкви со христианы, и вкуси мало хлѣба
и мало вина испи с водою, и намъ же грѣшнымъ вкусившимъ и
испившимъ такожде. И потомъ начаша чести дѣяние апостольское.
Церковь же Великая дѣломъ мудра зѣло. И вся муси его
оутварена, и златомъ подписана, а гробъ Господень покрытъ доска
мраморная ничемъ не подписана.
О вѣре
еретиковъ.
Дивно же видѣхомъ в ту нощъ еретиковъ въ церкви бѣсящихся
и неистовствовавшихъ. Армени бо дѣютъ, един от нихъ ходитъ
пред владыкою назадъ пятами, с кадиломъ и кадитъ его. И ариане
такожде творятъ. Ахабе же ходятъ кругъ гроба Господня, несть у
нихъ четыри бубна велики, ходяжъ и биюще по нимъ и скачюще и пляшущее,
аки скоморохи, кругъ гроба Господня. А иныя назадъ пяты скачюще
же, мы же дивяхомся человеколюбию Божию како терпитъ таковое безчеловечие,
не можетъ бо человекъ на торжищи тако слышати и видѣти.
А кофти во свое пѣние какъ козлы гласуютъ, биютъ ходяще
около предѣла гроба Господня молоткомъ въ бильце, или в
каменъ аки в трещетку, сеже видѣхомъ мы грѣшнии и
почюдихомся, велию человеколюбию Божию како терпитъ намъ грѣшнымъ
и нашему беззаконию. И абие предзарею облечется патриархъ во святительскую
одежду и исполнивъ церковъ воняя благоухания змирною и фимиамом,
и вземъ Честный крест и возгласи велегласно Христосъ Воскресе.
Пѣвцемъ же поющимъ тоже, и пояху вси поряду по обычаю утреннюю
и по всей Великой церкви и по предѣломъ начнутъ пѣти
утреннюю, тажь по времени Божественную Святую Литоргию по отпѣни
же Божественные Святыя Литоргий пойдетъ патриархъ из церкви, тажь
христиане с великою радостию. И празднуютъ людие неделю всю радующееся
и веселящееся духовно а не тѣлесно ни пиянствомъ.
2017-04-12
Размышления
по тексту книги: ВЕЛИКАЯ
СУББОТА
|
|
|
|