"ЗЛАТЫЙ БИСЕР"

Выдержки из сочинения старообрядца Поморского согласия - Михаила Ивановича Вышатина "Златый бисер". С примерами страниц. Книга из библиотеки Елпифидора Васильевича Барсова.

+

…Онъ же супостатъ нашъ видѣвъ родъ человѣчествий возведенъ въ первое достойнство растерзаяся утробою, завистию снѣдаемъ, наусти жестокосердечных жидовъ, да побиваютъ Апостоловъ и въсѣхъ вѣрующихъ Христови. Но ни что же успѣ, побѣдиша бо его страдании своими. Итако вражия оружия оскудѣша въ конецъ. Невѣдый же скверный что сотворити, мысляше, и обрѣте человековь еретиковъ, о Святыхъ Догматахъ вѣры Святыя не право разумѣющихъ, и нача ими всѣхъ человековъ прельщати, и прельщениемъ еретическимъ, всехъ прельщенныхъ во адъ отпущати.
Милосердый же Господь нашъ Исусъ Христосъ вѣрнымъ своимъ дарова Божественное Свое Писание, да тѣмъ убѣгше еретическия рѣки…

…Самъ Христосъ Спаситель нашъ, поучает ны глаголя. Испытайте Писания, яко вы въ нихъ мните животъ вѣчный имѣти. Божественный Апостолъ Иоанн Богословъ глаголетъ. Возлюблении не всякому духу вѣруйте, но искушайте духи, аще от Бога суть.
Подобнѣ же и избранный сосудъ Христовъ великий Павелъ поучаетъ ны глаголя. Вся искушайте. Добрая содержите.
Божественный Златоуст разсуждая та словеса апостольская сице глаголет. Вся искушайте ложная и истинная да искушениемъ разсуждайте, и оныхъ отгрѣбайтеся, и сихъ держитеся. Всяко бо Божественное Писание Богодухновенно и полезно ко учению ко исправлению, обличению к наказанию еже въ правду да совершенъ будетъ Божий человекъ на всяко дѣло Благоуготованъ.

+

…Обычай бо есть всѣмъ въ купе зломудреннымъ еретикомъ привсѣяти своихъ писаний и нѣкия догматы благовѣрныхъ. Да симъ образомъ достовѣрна являются и благориятны бываютъ, от православныхъ списуемая ими хульная. Да внимаемъ себѣ прилѣжно Господа ради и не безъ искуса вѣруемъ всякому духу учения но да искушаемъ прилѣжно писания. Аще по всему согласуютъ Апостольскимъ и пророческимъ преданиямъ и учениемъ. Аще бо почесому разликуютъ, или сами к себѣ несогласуютъ. Да не приимемъ я. Но да отвержемъ от себѣ аки лукаваго бѣса плевелъ, сѣянныхъ посредѣ чистыя пшеницы боговерия ю. На прельщение и погибель душамъ нашимъ. И индѣ о догматѣхъ здравыхъ и растлѣнныхъ вѣдати. Нынѣ же мнози не испытуютъ Божественная Писания яко же подобаетъ, но испытующихъ Писание безчестятъ и поносятъ, глаголя. Расколщиски. Раскольническая книги читаютъ.
Ихъ же безумие Василий Великий обличаетъ глаголя. Неоставляюще насъ испытовати и разумѣвати Воли Божия от Божественныхъ Писаний, но невѣдѣние прилагати.
Им же возбраняет и Святый Никита Ираклийский епископъ глаголя. Ни лѣпо бо безоразовати наказания, но безчествующи, наказания тии велятъ всѣмъ ненаказаннымъ быти яко же и сами. Еще же обычно противнымъ ложъ со истиною поставляти въкупе якоже бо с медомъ отраву творятъ да удобь приятен будетъ приемлющимъ смертный ядъ.
Тако и еретицы писаниемъ Святыхъ, и иногдаж и житиемъ добродетельнымъ и силогисмами своими покрываютъ ереси своя. Да приятно бо будетъ учение ихъ еретическое, от невѣдущихъ Писания. И того ради Священии Отцы повелѣваютъ всяко писание и учение искушати. Но яко аще полезная явятся от всѣхъ да утверждаются. Инако же аще и ангелъ благовѣститъ анафема да есть рече Апостоль.
Но по Залатоустову, и по Святому Никону. То еже не вѣдети намъ Божественная Писание, впадемъ въ сѣти диаволию, и погибелипредани бываемъ. Но не еже увѣдети токмо подобаетъ, но и соблюсти и сотворити слышанное от празднакго бо слышания никая же польза. И еретицы бо, и бѣси слышатъ, но развращенно. О чемъ и Самъ Христосъ Спаситель нашъ предъвозвѣсти глаголя. Тако соблазнятся мнози, и другъ друга предадятъ и возненавидитъ друг друга и мнози лжепророцы востанутъ и прелстятъ многия…

+

…Вѣдая вся сия Господъ, яко таковое будетъ въ послѣдняя дни смятение повелѣваетъ, яко ижу суть християне, хотящии въ правду во Християнствѣй вѣрѣ утвердитися, ни въ чесому же иному да бѣжатъ, точию к Писанию. Аще бо на ино что возряти будутъ соблазнятся и погибнутъ, неразумѣюще кая бы была Истинная Христова Церковь. До здѣ словеса Святаго Златоуста…

...Святый Исидоръ глаголетъ. Аще кто хощетъ всегда с Господемъ быти, на всякъ день молится и чтетъ, да егда молимся с Господемъ бесѣдуемъ, а егда чтемъ, Господь к намъ бесѣдуетъ.
Что же польза от прочитания Божественнаго Писания, яко всякому человеку подобно есть знати Истинную, а не смышленую церковь но Единаго Небеснаго Жениха чистую и нескверную Невесту. Ибо кто не познаетъ Ея како в Ней и при Ней въ таковѣмъ велицемъ обуревании пребудемъ…

+

…Посланъ гладъ на землю, не гладъ хлѣба, ни жажда воды, но гладъ неслышания Слова Божия, иже да лечайше тяжчайший, паче тѣлеснаго, им же от истиннаго познания удаляемся, о немъ же Христосъ Господь рече. Внидутъ волцы тяжьцы въ васъ, нещядяще стада, искончася единъ, воста другий, на бѣдныхъ иноковъ вину полагая, яко развращаютъ. Сихъ бо волковъ Самъ Господь блюстися повелѣваетъ. Блюдитѣ рече да не кто васъ прельститъ…

+

…Аще кто приходитъ к вамъ, и учения Истиннаго не приноситъ, не приемлите его въ домъ, и радоватися ему не глаголте, глаголя бо ему радоватися сообщается дѣломъ его злымъ. О како нынѣ мнози презираютъ сие наказание Апостольское…

…А кто на земли здѣ возносится паче всѣхъ, блюдися его, сей есть духъ антихристовъ. А яже не вѣдя учитъ безума дмяся, и не держитъ Христа главы из нея же все тѣло, и самъ чинится вмѣсто Христа главою Церкви Христовы, то есть антихристъ...

+

…Что же полза от прочитания Божественнаго Писания. Яко да познает и увѣдает добрѣ яко всякому человеку подобно есть знати Истинную, а не смышленую церковь, но Единаго Небеснаго Жениха чистую и нескверную Невѣсту. Ибо кто не познает Ея, како в Ней и при ней в таковѣмъ обуревании пребудет, а кто при Ней не пребудет, в Ней не обрящется, той и вѣчнаго оного и блаженнаго по времѣнном сем житии живота наслѣдити не может.

+

ВОПРОС:
…У еретиков такожде якоже и у православных християн служба совершается. Такожде Святое Писание и книги прочитаеми бывают. Такожде церковное строение и духовная чины, и уставы, и образы имеют, такожде поучаются Заповедем Господним, пост держат, и милостыню творят. Такожде и действо соблюдают, и крещение у них бывает, и причастие тела и крови Христовых приемлют, и паче мнятся православных християн во благочестии проходити. И сие чесо ради тако творят.
ОТВЕТ:
Того ради, яко лицемерии сущу, яко прелестницы, яко хищницы Христова стада. Того ради подобныя православным чины имеют, яко да сим наипаче християн прелстят, не научившихся твердо от Писания о многокозненной прелести их. Мы же слышим Самого Господа от таковых еретиков блюстися поучающия. Внимайте, от ложных пророк, иже приходят к вам одеждами овчими, внутрь же суть волцы и хищницы.
Толкование. Коварни суть, лицемерни, и еретицы, того ради глаголет блюдитеся от них. Блага бо словеса предлагают, и житие являют чисто. Внутрь же суть сердца их яко удица сокровенна. Одежда же овчая кротость, ею женецыи яко образ являющее ласкают и прельщают многия.

ВОПРОС:
У еретиков приносимыя слжубы, во отступленческих церквах их, истинна ли суть.
ОТВЕТ:
Поистинне ничто же у них нѣсть истинно, но все убо еже еретицы творят, от смысления своего, како могут совершаться Действа Божия на игралищах своих, аще и Христа проповедают и веру свою похваляют но вся сия льстиво и лживо творят. Аще и церкви своя, и клирики церковныя, и Писания Божественная прочитают; и мнятся еже тем же крещением крещатися. Тако же и Тайны Божественныя еже есть Пречистое Тело и Честную Кровь Христову имеют, но инако и нечестиво.
От сих же прелести сохрани нас пострадавый за нас Христе Боже наш и даруй нам во Православней Церкве; сирѣчь; во православном Святых отец предании, до скончания века пребыти.
Аминь.

2019.08.25