ЗНАМЕНИЯ ПРИШЕСТВИЯ АНТИХРИСТОВА И КОНЧИНЫ ВЕКА.

   От писаний Божественных явленна Апостольскому же вопросу: что есть знамение Твоего Пришествия, и кончины века. [Матфей. 24.3]

   Напечатася же повелением Благочестивейшей Самодержавнейшия Великия Государини Нашея Императрицы Елизаветы Петровны всея России: при Наследнике Ея, внуке Петра Перваго, благоверном Государе Великом Князе Петре Феодоровиче: и при супруге его: благоверной Государине Великой Княгине Екатерине Алексеевне: Благословением же Святейшего Правительствующаго Синода, в царствующем великом граде Москве: в лето от сотворения мира 7261, от Рождества же по Плоти Бога Слова 1752, индикта 1. Месяца Септемврия.

Аще хощет любимицы знати кто есть дерзнувый сия написати. Грешний есть. Но Бог грешных влекуще горе. Восхоте тому быти в омофоре. И осел в ризах апостольских бяше: егда Господа своего ношаше.
Обаче молю не на лице зрите. Не кто начерта вы того судите, но что написа. И како вещает. Истиною ли глагол утверждает.
Весте бо яко бысть некое время. В неже и осел, носяще тяжко бремя.
Истину рече: от железа люта. Изнесе своего всадника дерзнута. Темже не кто, но что начнет вещати. Мудрому всяко предлежит внимати.

ЗЛАТОУСТ СВЯТЫЙ

Во нравоучении 11-м, на Павлово послание к Ефесеям. На главу 4:
Ничтоже тако раздражает Бога, якоже Церкви разделятися: аще и безчисленна будем соделавше благая: от иже Тело Его пресецающих, не меньшую
Во нравоучении 27, на Павлово Первое Послание к Коринфином , на главу 13:
Не боюся внешния брани, якоже внутренния рати. Зане и корень егда будет добр всажен в землю, ничтоже постраждет от ветров, аще же той колеблется. Червию внутръ снедающу его, и ни единому же подвижущу, падет: Даже до коле снедаем Церкви Корень якоже червие, яко от земли таковыя рождаются мысли, паче же ниже от земли но от гноя. Гнилость матерь имущия.

ПРЕДИСЛОВИЕ К ЧИТАТЕЛЮ БЛАГОЧЕСТИВОМУ.

От кончины мiра мудрствовати, может быти человеку зело полезно, может же быти и зело вредно, по подобию меча изощренна, иже может быти и полезный человеку в сохранении, может же быти и вредный ко убийству ближняго.
[Читателю благочестивый]
Аще бо кто кончину мира приимъ в помышление, абие восходит на кончину бытия своего и Страшный Суд при кончине. Хотящий быти, муку же вечную злым, и мздовоздаяния благим во уме си воображает: Сицевыя кончины мудрствование воистину зело есть человеком благопотребно и полезно. Тако о кончине размышляше царствующий Пророк Давид, глаголя:
(Пс. 38) Скажи ми Господи кончину мою, и число дней моих кое есть: да разумею, что лишаюся аз:
(Пс. 101) Умаление дней моих возвести ми, не возведи мене в преполовение моих.
И ПАКИ: (Пс. 76) Помыслих дни первым, и лета вечная помянух, и поучахся. Нощию сердцем моим глумляхся, и тужащее дух мой. Егда во веки отринет Господь. И не приложит благоволити паки. Или до конца мать свою отсечет сконча, глаголя от рода в род. Егда забудет ущедрити Бог; или удержит во гневе Своем щедроты Своя.

Сице о кончине помышляти повелевает и нам Дух Святый в книзе Иисуса Сирахова, во главе седмой: Во всех словесех твоих поминай последняя твоя, и во век не согрешиши.

Но аще кто кончину помышляя недоведомыя и от века сокровенныя тайны, при кончине хотящия бытии любопытнее взыскует, и суемудрствованием своим истязует, и не имея ключа разумныя, отверзет, и входит в скинию сокровенных Таин завесою покрыту, и никомуже точию единому Архиерею грядущих благ проходну. Сицево мудрствование о кончине мира весма человеку не полезно, реку же истину, и грешно есть.
Якоже во книгу царскую, рекше граммату, царскою печатию назнаменанну, аще бы кто не имея на то власти дерзнул разгнути и отверстии печати сея, воистину погрешил бы, и оная дерзость была бы не безбедна. Тако и зде разумети подобает, тайны бо Господня сокровенныя, книга есть Царя Небеснаго, седмию печатми запечатана, о ней же Иоанн Святый во Апокалипсис, во главе пятой, сице глаголет:
Видех [рече] в деснице сидящаго на престоле книгу написану внутрьуду, и внеуду запечатаенну седмию печатми, и видех Ангела крепка проповедающа гласом великим: кто есть достоин разгнути книгу, и разрешити печати ея и ни ктоже можаше, ни на небеси, ни на земли, ниже под землею разгнути книгу, ниже зрети ею. И аз плакахся много. Яко нитоже обретеся достоин разгнути, и почести книгу, ниже зрети ею.
(Комментарий: ..."глава пятая"... указана по новой, более поздней разбивке книги на 22 главы. В старой нумерации, данные строки находятся в Слове Е (5)-м, главе АI (11)-й, стихах ѮИ (68)-м, ѮФ (69)-м и О (70)-м)

И един от старец глагола ми, не плачи: се победил есть лев сын от колена Иудова корень Давидов, разгнути книгу, и разрешити седмь печати ея.
Сию книгу апокалипсическую толкует Святый Андрей Кесарийский в слове своем 4-мъ на Апокалипсис главу пятую, сице глаголя:
Книгу [рече] всемудрую Божию память разумеваем. В ней же вси по божественному Давиду вписани бывают. Такожде и божественных судеб бездну. Сея же книги, яже убо внутрь, Духа ради не суть удобь постижима, но недомыслима суть. А якоже вне писмене ради удобоприимателна. Седмь же печатий, или совершенное книги утверждение. И всем незнаемое являти глаголю, или смотрение испытающаго глубины Божественного Духа, якоже смотрения разрешити ниединоже созданное естество может. Книга же и пророчество разумеется, емуже сам Христос во Евангелии исполнитися рече: еяже оставшая в последняя дни исполнятся. А еже глаголет никтоже можаше отверстии книгу, назнаменует, яко ниже Ангели. Ниже человеци в плоти сущии. Ниже из плоти изшедшии Святи известное Божественных судеб постигоша ведение. Разве Агнца Божия разрешившаго утверждение пророчествованных о Нем древле пришествием Своим.
(Комментарий: толкование записано в Слове Е (5)-м, главе АI (11)-й, стихах ѮИ (68)-м, и ѮФ (69)-м)

Сице Андрей Святый Кесарийский, книгу сию недоведомых Тайн Божиих преисполнену видя Иоанн Святый в восторзе, плакашеся неутешне, яко никтоже обретеся достоин разгнути почести и зрети ею.
Но аще бы в нынешняя времена жил на сем свете Иоанн Святый, мню яко множайшыя паче онех изливал бы слезы, зря оную Божественную Книгу, седмию печатми запечатану самым тогда Единем Агнцем Небесным, ныне же и козлищами безсловесными отверзаему и разгибаему. Дерзость воистину ужаса исполнь и удивления.

Иоанн Святый глаголет: Яко никтоже можаше отверстии книгу оную.
Андрей Святый толкует: Ниже Аггели, ниже человецы в плоти сущии, ниже из плоти изшедшии Святии, известное Божественных судеб постигоша ведение.

Ныне же обретаются нецыи в плоти сущии [не вем како их нарещи] иже седмопечатную оную таинственную книгу, любопытным и богопротивным дерзновением разрешают и разчиняют, и якоже внутрьуду писана суть Духа ради, не суть удобопостижима, но недомыслима суть, якоже глаголет Андрей святый: Сии постизают и домыслами суемудреными определяют.
Седмь печатий Андрей Святый глаголет: Совершенное бытии книги утверждение и всем незнаемое, или смотрение испытающаго глубины Божественнаго Духа, якоже смотрения разрешити, ни единожды же созданное естество может.

Сии же выше созданного естества, аки денница выше Небес возлетают, глубины Божественнаго Духа недосязаемыя дерзостно испытуют, и кормильцем скудоумия своего, пророческих и апокалипсических тайн, хотяще изследовати пучину, различная блядословия отрыгают, о пришествии истиннаго антихриста, мнящее и научающее его уже в мире пришедши. Имя же его, и число зверино Х, Ѯ, Ѕ, славенскими писмены различне слагают, исчислением лет, родословием Лукиным, седминами Даниловыми ложное мнение свое утверждают, Церковь Святую на камени православного исповедания Христом утвержденную, и даже до ныне неподвижно стоящу, глаголют бытии вратами адовыми одоленну. Царствующий град Москву Вавилоном, и жителей в нем благочестне обитающих вавилонянами, слугами антихристовыми, сынами погибели именуют, и прочими нестерпимыми досадами, нас не отродных Матере нашея Церкве Святыя сынов уничижают и ругают. И аще бы врази наши поносиша нам, аще бы римляне, или инии противоверцы, претерпели бы быхом: но се творят нам врази наши домашнии, иже бяху недавно с нами равнодушнии, знаемии наши, иже купно наслаждахуся с нами Брашна Негиблющаго, и хождяху в храм Божий единомышлением. О сицевых Давид Святый ревнуя глаголет: (Пс. 15) Да придет же смерть на ня, и да снидут во ад живи: яко лукавство в жилищах их посреде их.

Но Церковь Святая аки мати чадолюбивая, аще и злонравным сыном своим, не смерти ниже погибелнаго во ад снизхождения, но обращения и покаяния о нем усердно желает, и якоже кокошъ птенцы собирает под крил, тако и она терпеливо души ждет обращающихся, с готовыми и распростертыми, на обятие матернее дланми. О Мати болезненна! Мати утробою люте уязвленна Церковь Святая! Многопечалная Рахиль плачущая о чадех своих, и не хотящая утешитися! Не ты ли во утробе своей заченши нас от Семене Слова Божия носила еси; Не ты ли водою и Духом, банею пакибытия нас отродила еси, двема сладчайшими сосцами Ветхаго и Новаго Завета, млеко Божественных учений и догматов православных, источающими, воспитала еси; потомже твердою пищею Тела и Крове Христовы, в мужей совершенных воскормила еси; откуду убо се ныне сыном твоим сицевая, зверей превосходящая ярость, тако оставиша тя жестокосердии, и возненавидеша тя.
(Пс. 101) Воздающее ти злая за благая. И ненависть за возлюбление твое.

Сия ли тебе воздаша за твое многоболезное их рождение, изверги паче а не чада.
Знамение велие явися на небеси. [глаголет Апокалипсис в главе 12 :] Жена облечена в Солнце. И Луна под ногама ея. И на главе ея венец от звезд двоюнадесяте. И во чреве имущи вопиет болящи, и страждущи родити.
(Комментарий: в старой нумерации - Слово АI (11)-е, глава ЛГ (33)-я, стих РМ (140)-й и РМА (141)-й)

Андрей Святый и Мефодий, жену сию разумеют бытии Церковь святую, Солнцем Христом оболчену, Луну под ногама ея, мирскую непшуют быти жизнь, по подобию луны изменяющуюся. На главе ея венец от звезд дванадесяти, Апостолов святых догматы и добродетели толкуют.
Но что еже глаголет Апокалипсис: Яко во чреве имущая возываше болящи и страждущи родити (Глава 12)
Отвещают сии учителие: Яко болит церковь на коемждо раждаемых водою и Духом, донелже вообразится в них Христос: по глаголу Павлову.

А еже отпадающии от Церкви, извергами суть а не чадами Истинно слово, и всякаго приятия достойно. (Быт. гл. 25) Сетоваше древле Ревека яко во утробе ея, два не согласующая сына Иаков и Исав брань между собою творяху, и матернюю утробу, братоборным томлением удручаху. О кольми паче сетует и болезнует любимая мати наша Церковь Святая, не согласных ради сынов своих, от них же неции развращенным Исава нравом последующее, братию свою единоутробную ненавидят и ругают, утробу же Матере своея, Церкви Святыя, любимое свое носило люте терзают, хулами досадами, и козноплетенным блядословием, аки рождения ехиднова, ядом аспидовым неисцелным угрызают, не помнящезаповеди Божия. (Исход. 21).
Иже аще кто злоречит отцу или матери, смертию да умрет.

Сицевых убо молвотворцев, ризы Христовы терзателей, скорпиев вселютейших, утробу матерее своея угрызающих, тяжкия хулы и досады на Церковь Божию изблевающих. О пришествии же антихристов от неразумения своего плевелы разсевающих, и многоми иными укоризнами полку Бога Живаго поношающих, аще и слушати не подобает, ниже отвещати против безумства их. Ибо ниже Христос даде ответа на безумныя и неистовыя глаголы Иродовы. И Дух Святый у приточника [в главе двадесять шестой] глаголет:
Не отвещай безумну по злобе его. Да не подобен ему будеши.

Обаче народа ради, емуже обычно есть, аки водам или древесному листвию, и малым ветра колебатися движением, умыслихом в сей книжице, Господу поспешествующу и слово утверждающу, ясно от писаний Божественных показати.

ЗНАМЕНИЯ ПРИШЕСТВИЯ АНТИХРИСТОВА.

И сие правоверному народу явь известити, яко не прииде в мир истинный антихрист, иже приити имать при кончине мира. И да не соние некое возмнятъ противницы, и посмеются, якоже древле посмеяшася братия Иосифу, Писанием Божественным утверждаются вся зде глаголемая. Сие бо опасно блюдохом, да не на паучине суемудреннаго мнения, ниже на песку соединения не причастном, нраву расколническу сообразном, но на твердом, Писаний Божественных, и праваго Отцев Святых толковании, камени, вся яже зде писана суть, основание имут. К высоте же непостижимых тайн Божиих, восперением своего еси разума, отнюд возлетати не дерзнухом, ведущее яко на сие дело, сама Едина Церковь Божественна имать орлие криле, по свидетельству тайнозрителя, [апокалипсиса во главе 12]
И даны быша жене два крила орла великаго.
(Комментарий: Слово ВI (12)-е, глава ЛЕ (35)-я, стих РНВ(152)-й)

Си есть, двоих Заветов благоразумие, якоже толкуют учители. Сих убо сугубых крил пером по елику мощно бяше, и сия написашася, не инемъ намерениемъ, точию да молва душ благочестивых в простоте и незлобии голубином жительствующих, желаемое от полезнаго зде начертанных чтения воспримет благотишие. Уста же блядословящих, и плевелным учением своим совесть правоверным смущающих заградятся.
Вся же сия да будут в честь и похвалу Господу Богу, праведным судом своим нас наказующему, и сицевая на Церковь свою попущаещему смятения, да в них якоже злато в горниле искусить избранныя своя, и обрящет я достойны себе. Он един повелевает бури, да станет в тишину, Он един укрощает волны ея и запрещает ветром, и морю, и бывает тишина велия. Темже якоже тогда, тако и ныне, кораблю своему Церковному между толикими волнами влающемуся, и треволнением зелным обуреваемому, не даст утопати, но по неизмерным щедротам своим, наставит в пристанище хотения Своего.

ОСНОВАНИЕ ГЛАГОЛЕМЫХ.

Вопрос 1.
Что есть антихрист;
Ответ.
Речение сие антихрист, есть греческое, сложено от анти, и Христос, еже есть противник Христу. Всякаго убо противника, гонителя врага, и супостата Христова, мощно нарещи антихристом. И сицевыми бяху антихристами мнози, наченше от времен Апостольских, даже до ныне: Симон волхв, Нерон, Максимиан, Диоклетиан, Иулиан, Арий, Македоний, Несторий, Савелий, Аполинарий, Махомет, Сии и прочии антихристи бяху: понеже противишася Христу Истинному Богу нашему: ови убо мучением рабов Христовых, за веру Христову, инии же злочестивым учением не исповедующее его быти, Истиннаго Бога. И о тех антихристах глаголет Иоанн Святый Богослов: (1 Ин. 4.)
Мнози лживи пророцы изыдоша в мир: о сем познайте Духа Божия. И духа лесча. Всяк дух, иже исповедует Иисуса Христа во плоти пришедша, от Бога есть: и всях дух, иже не исповедует Иисуса Христа во плоти пришедша. От Бога несть: и сей есть антихристов, его же слышасте яко грядет. И ныне в мире есть уже.
И паки, в томже послании глаголет: Слышасте яко антихрист грядет. И ныне антихристи мнози быша. От нас изыдоша. Но не быша от нас.

Внемли зде читателю, яко егда глаголет Апостол: от нас изыдоша.
Яве извещает о еретицех и отступницех, иже от нас изыдоша путем погибельным, благочестивую оставлше веру, ея же кроме никто же спастися может.
От сих Яве мощно познати, яко мнози бяху, и ныне суть в мире антихристи, или противницы, и супостаты Христовы: Но нам не о тех зде ныне предлежит глаголати: сии бо бяху антихристи, точию аналогически, или уподобительне. Свойственнее же и существеннее не быша антихристы, но точию предтечи антихристовы.

Вопрос 2.
Како разделяется антихрист;
Ответ.
Сугубое может бытии о антихристе разсуждение: первое во обществе. Второе в свойстве. Якоже бо имя Иисус сугубо разсуждается: первое в обществе, яко мнози в Ветхом Завете завет именем тем, Иисус нарицахуся: Иисус Навин. Иисус Сирахов, и прочии. Второе в свойстве, по елику имя то Святое Иисус, свойственно есть Самому Единому Иисусу Спасителю и Богу нашему, якоже рече Ангел: Родит же сына, и наречеши имя Ему Иисус: той бо спасет люди своя от греха их.

И якоже имя Христос, сугубо разсуждается: Первое в обществе; Христос бо греческое речение, помазанника знаменует, и сицевыми христами вси бяху, и суть православнии Царие. Таким бяше Христом, Первый во иудее Царь Саул, его же христом именует сам Царь Давид многажды, якоже в Книгах Первых Царств (гл. 24):
И рече Давид к мужем своим: не буди мне ничтоже от Господа. Аще сотворю глас сей. Господину си Христу Господню. Еже воздвигнути руку мою нань. Яко христос Господень есть сей.

И паки в Книгах Вторых Царств: глаголет Давид ко убившему Царя Саула.
То како не неубоялся еси воздвигнути руки своя на христа Господня. (Цар. гл. 1)
О сицевых христах и Дух Святый во псалме чрез Давида глаголет:
Не прикасайтеся помазанным моим.
В греческом речении писано: Не прикасайтеся христом моим.

И сие есть разсуждение Христа в обществе. Второе разсуждение есть в свойстве, по елику имя сие пресвятое Христос, свойственно есть Самому Единому Христу Спасителю нашему, Помазаннику Божию и Богу: о нем же глаголется:
(Пс. 44.) Помаза Тя Боже Бог твой. Елием радости паче причастник твоих. И паки: Князи собрашася вкупе на Господа и на Христа Его. И паки: Дух Господень на Мне. Егоже ради помаза Мя.

Подобообразно зде глаголати подобает и о антихристе, о немже сугубое может быти разсуждение. Первое во обществе, по елику всякаго противника Христова, антихристом нарицати мощно, якоже рекох в первом вопросе.
И о сицевых антихристах несть нам намерения зде глаголати. Второе разсуждение о свойственном и истинном антихристе: о немже зде хощем глаголати, Богу поспешествующу, и слово утверждающу.
Антихрист убо истинный есть, начальнейший супостат, и враг Христов, и гонитель великий, иже приити имать при кончине мира, его же вси прочии вышепомянутии суть предотечи. И о сем Павел Святый Апостол глаголет, во Втором Послании к Солуняном:
(гл. 2) И открыется человек беззакония, сын погибели, противник, и превозносяйся паче всякаго глаголемаго Бога. Или чтилища, якоже ему сести в Церкви Божией, аки богу, показующу себе яко бог есть.

О сем антихристе ведати и верити подобает, тако не уприиде в мир, но приити имать при кончине мира, прежде Второго Пришествия и Страшного дне Праведного Суда Господня.

Вопрос 3.
Что убо Иоанн Святый глаголет: (1 Иоан 2:18) яко антихрист грядет, и ине в мире есть уже; что же и Павел Великий вещает: (2 Сол. 2.) яко тайна уже беззакония деется.
Ответ.
Тайна беззакония деется уже, и антихристов в мире есть уже, не в своем ему лице, но в своих ему предтечах. Яко же бо Христово Пришествие начало свое имать от создания мира, в патриарсех, пророцех, прежде Христа пришедших, предвозвестивших и предзнаменавших, якоже во Авель неповинен от Каина убиеном, Исааце на жертву вознесеном, Иосиф от братий своих в ров вверженом, и преданом, Моисей от египетския работы Израиля свободившем, и прочиих, яко мощно рещи: от начала мира тайна спасения нашего деется: обаче в своем ему лице, тогда Христос не прииде в мир. Тако и пришествие антихристово, абие от вознесения Христова на Небо, начало свое имать, не в лице антихристов, но в своих ему предтечах, сиесть в еретиках, отступниках, и Церкви Божия гонителях и мучителях, якоже в Симоне волхве, христа себе быти нарекшем, и в Нероне первом Церкви Божия гонителе, Иулиане отступнице, и прочиих безчисленных. Обаче антихрист истинный в своем си свойственном лице, ниже тогда прииде в мир, ниже ныне в мире есть, якоже последи ясно узрим, тайна точию беззаконию деется в своих ему предитечах, якоже глаголет сосуд избранный, Сице толкует Амвросий Святый. Сице Златоуст Святый, в толковании на Второе к Солуняном Святаго Павла послание:
(гл. 2.) Тайна бо уже деется беззакония, Нерона зде глаголет, аки образ антихристов суща, ибо сей хотяше непщеватися бог.

Подобно нечто обретается во Евангелии: идеже Христос глаголет:
(Матф. гл. 17.) Илия убо приидет прежде, и устроит вся. Глаголю же вам: яко Илия уже прииде, и не познаша его: но сотвориша о нем, елика восхотеша. Тако и Сын Человеческий, имать пострадати от них. Тогда разумеша ученицы, яко о Иоанне Крестителе рече им.
Зде Христос Спаситель наш о Илии глаголет: яко приити имать, и яко прииде уже. Но како приити имать, аще уже прииде; Разумей, яко приити имать в своем ему лице, прииде же уже в подобном себе лице, сиесть во Иоанне Крестителе.

Вопрос 4.
Мощно ли от исчисления лет познати истиннаго антихриста;
Ответ.
От исчисления лет никоим образом возможно познати пришествие антихриста, и Страшного Суда Господня: глаголет бо Христос Спасе наш:
(Матф. гл. 24.) О дни же том и часе никтоже весть. Ни ангели Божии, токмо Отец Мой Един. И паки, в деяниих Апостольских глаголет: Несть ваше разумети времена и лета, яже положи Отец Мой во своей власти.
Комментарий: Слово К (20), Глава Ѯ (60) стих СНЕ (255)

Како убо кто может исчисляти лета дне и часа онаго, о немже никто же весть, точию Отец Небесный; и аще кто исчисляя лета, увесть пришествие антихристово, и Христово Второе, како сбудутся истинна словеса Христова, яко о дни оном, и часе никтоже весть;
Бяху нецыи в первенствующей Церкви, иже по первой тысяще лет от страстей Христовых возмнеша настоящь Суд Господень, предваряющу антихристу. се же мнение их утверждашеся на откровении Иоанна Святаго, во Апокалипсисе: идеже тайнозритель глаголет.
(апок. гл. 20.) Видех [рече] Ангела сходяща с Небесе, имуща ключь бездны, и уже велико в руце его, и ят змия, и связа и на тысящу лет, и в бездну вверже его. И заключи его, и запечатал над ним да не лстит ктому языки, дондеже скончается тысяща лет, и по сих подобает ему отрешену быти на мало время. И видех престолы. И седшыя на них, и прочее.

От сего тайнозрения Иоаннова, мнози мудрствоваху, яко от страстей Господних, ят бысть змий и связан на тысящу лет. Тогда бо и сам Христос рече: (Иоан. гл. 12.) Ныне суд есть миру, ныне князь мира сего изгнан будет вон.

Но мимошедшей тысящи лет от страстей Господних, не у прииде суд Господень, ниже антихрист, день Суда Господня предваряющий. Тем же инии инако мудрствоваша, тако оная тысяща лет начатся не от страстей Христовых, но от времени Великаго Константина, перваго Царя христианскаго. И оттоль по их мнению связался сатана: отрешися же по тысящи лет, в начале царствия махометова и оттоманова. Ибо от лета Христова тресотнаго, в неже царствовати Константин, даже до лета Христова тысяща тресотнаго, в неже начат царствовати оттоман первый царь турский, тысяща лет исчисляются. Но ниже тако сбыстся мнение суемудрствующих. Еще бяху и инии мнози в первенствующей Церкви, мнящие яко в седмой тысящи лет от создания мира имать приити антихрист, и Суд Страшный Господень.

Се же мнение их бяше триех ради вин:
Первая вина, якоже бо шестию днию Господь Бог созидаше мир сей видимый, в седмый же день по делах своих препочи, по свидетельству Моисеову: тако по шестих тысящах лет многотрудных дел человеческих, в седмую тысящу лет от создания мира, имаше Господь Бог избранным своим дати упокоение в горних селениих: понеже тысяща лет пред очима Божиима яако един день.
Вторая вина, якоже шесть оныя первоначалныя протопатриархи. Адам, Сиф, Енос, Каинан, Мелелеил, Аред, умроша, седмый же протопатриарх Енох, пренесен бысть жив на Небо. Тако по шести тысящах лет смерти рода человеческаго, последовати имеяше преселение в живот вечный.
Третия вина: якоже по шестих днех поятъ Иисус Петра, Иакова, Иоанна, и возведе их на гору высоку, и показа им Славу Своего Божества. Тако по шести тысящах лет, имаше Иисус пояти избранных своих от юдоли плачевныя на гору Небесную, и показати им совершенно ненасытное Лица Своего зрение.

Сице древле мудрствоваху хотящии любопытным лет исчислением неведомую тайну постигнути. Но како осуетишася помышлении своими мощно всякому видети, понеже седмь тысящь лет от создания мира прейде, и уже двести лет и лишше над седмь тысящь преидоша, чаяние же любопытствующих единым студом и срамотою совершися. Тем же ты кто еси о человече испытуя неиспытанныя судьбы Господни; Христос Истина глаголет. (Матф. гл. 13.) О дни же том и часе никтоже весть ни ангели небеснии, ниже Сын:
Тыже вышше ангелов и вышше Сына Божия любопытством своим возлетети хошеши. Христос Истина глаголет: (Деян. гл. 1.) Несть ваше разумети времена и лета. Яже положи Отец Мой во своей власти.

Ты же власть Божию себе восхищаеши, хотя суемудреным исчислением уведати от века тайну сокровенну. Слыши что Афанасий Святый в Слове Червертом на Арияны, на листу 65, от лица Христова глаголет: По плоти рекох яко о последнем дни ни ангели, ниже Сын весть, вам и всем на пользу. Пользует бо вам и о ангелах и о Сыне, тако слышати, за будущия по сих лестцы; да аще яко и ангели преобразуются демони, и о скончании начнут глаголати, не уверите, яко невежествующым им. Аще же и антихрист претворив себе глаголет: аз есмь христос. И покусится и сам о скончании глаголати. Во еже прелстити слышащия: имуще вы от мене глас, яко ниже Сын весть, ни оному уверите. Иначе же ниже ведети паки, когда конец. или когда конца день пользуете человеком, да не знавше пренебрежницы межднаго времене будут. Ожидающе близ конца дней. Тогда бо токмо о себе прилежати возизвествуют. Сего ради и коегождо конец смерти умолча. Да не изветом знания напыщшеся человецы. Не радети о себе начинают премного время. Обоя убо и всяческаго конец, и коегождо конец укры от нас слово. Ибо во всяческом коегождо конец ест. И в коемждо конец еже всяческое собирается. Да неизвестну ему сущу, и примечаему, на всяк день. Яко зовоми преуспеваем, к предним простирающеся, задняя же забывающе. Кто бо зная убо день конца не преотлагает среднаго времене; Невежествуя же на всяк день готов бывает. Сего бо ради о сих нанесе Спасе глаголя: (Матф. Гл. 24.) Бдите убо яко не весте в кий день Господь ваш приидет, и воньже не мните час, Сын Человече приидет.

До зде Афанасия Святаго безсмертныя памяти достойная словеса. Увещает о сем и фессалоников или селунянов Павел Великий, сице глаголя: (Солунянам. гл. 1-5.) А о летех и временех братие не требе есть вам писати. Сами бо вы известно весте, яко день Господень якоже тать в нощи тако прииде. Егда бо рекут мир и утверждение, тогда внезапно найдет на них всегубительство.
На сия словеса Павлова, чти Златоустаго Святаго, к фессалоником беседу девятую, идеже узриши, како златый языком недуг любопытства врачует.

Вопрос 5.
Что убо разуметися имать о седминах Даниила пророка, о нихже Архангел Гавриил вещает пророку Даниилу в книгах пророчества его, сице глаголя: (Дан. гл. 9.) Седмьдесят седмин сократишася о людех Твоих. И о граде Твоем Святем, дондеже обетшает согрешение. И скончается грех. И знаменаются грехи, и очистятся неправды, и приведется правда вечная, и знаменается видение пророка, и помажется Святый Святых, и увеси и разумееши, от исхода словесе. Яко отвещати, и яко соградити Иерусалим. До Христа старейшины седмин седмь, и седмин шестьдесят и две. И возвратится и соградится широце, и забрала. И истощатся лета, и по седминах шестидесят и двух, потребится помазание и суд, град же и Святое разсыплется со старейшиною грядущим, и потребятся аки в потопе. И до конца рати сокращен. И разблажить завет мнозем седмина едина. Пол же седмины изставит требники и требу, и крилу от потребления и до скончания. И попечения вчинит на погибель. И разблажит завет мнозем седмина една. В пол же седмины отимется треба, и возлияние на Святый Храм. Опустение и до скончания года. Скончание дастся на опустение.
От сих седмин данииловых мнится быти ныне кончина мира, и пришествие антихристово, и Христово на Суд. Седмина бо являет седмь тысящ лет от мироздания прешедших, зане тысяща лет пред очима Божиима, яко ден един.
Ответ.
Не сие ли Христос Спаситель наш глаголет к невеждам, Писания Святаго развращенне толкующым.
(матф. гл. 22.) Прелщается не ведуще Писания, ни силы Божия.
Слышим что и апостолом верховный, во втором своем послании, глаголет:
Сие же прежде бдите, яко всяко пророчество книжное по своему сказанию не бывает: ни бо волею когда бысть человеком пророчество. Но от Святаго Духа просвещаеми глаголаша Святии Божии человецы. Быша же и лживии пророцы в людех. Якоже и в нас будут лживии учители, иже внесут ереси погибели. И мнози поидут во след их нечистот. Имиже путь Истины похулится, и в преумножение лстивых словес вас уловят. Ихже суд искони не коснит, и погибель их не дремлет.

Подобообразно и Павел Великий вещает в Первом Послании: Неции заблудивше уклонившеся в суесловие, хотяще быти законоучителе, не разумеюще ни яже глаголют. Ни яже утверждают.

Се ныне глагол апостольский сбыстся во ушию нашею: не восташа ли ныне лжеучители, имиже путь истины похуляется, иже в преумножении лстивых словес многих уловляют. Не заблудша ли нецыи уклонившеся в суесловие, хотяще быти законоучителе, не разумевше ни яже глаголют, ни яже утверждают. Тайну седмин данииловых все учители церковнии в толкованиях на книгу Даниила Пророка, единеми усты и единым сердцем исповедуют быти о пришествии первом Христовом, а не о втором пришествии.
И ниже единаго обрести мощно противо глаголюща. Коего бо; рцыте ми сопротивницы;
От сих седмин данииловых твердый и крепкий довод восприяша учители церковнии против безбожных иудеов, прящеся с нечестивыми их раввинами, яко прииде уже в мир мессиа, пророки обещанный, иже есть Христос Спаситель наш, ибо исполнишася уже седмьдесят седмин Аггелом Даниилу реченныя, до пришествия Христова перваго, еже есть воплощение и страсть Спасителя нашего. И тако сими седминами безбожие иудейское препирают, яко несть имя мощно противу рожну прати.
Ведати же подобает, яко седмина сугубое имать разумение: Первое, седминою разумеются седмь дние. Якоже в книгах левитских: Идеже седмь седмин, сиесть днии 49 исчисляются от праздника Пасхи даже до праздника пятидесятницы. Второе, седминою разумеются седмь лет, якоже в книгах левитских, седмь седмин исчисляются летами, и по седми седминах лет, сиесть по четыредесятих и девяти летех, последует лето пятьдесятое, еже глаголется лето приятно оставления и очищения, о немже сице глаголет Бог, в книгах левитских:
(гл. 25.) И сочтеши седмь лет покою. Сиесть седмь лет седмижды. И будут седмь лет сих покою. 49 лет, и да разповесте трубным гласом во всей земли вашей, и да остите лето пятьдесятое. И да прославите оставление всем живущим на ней. Лето оставления. И прочая.

Якоже убо в книгах левитских, седмь седмин летами исчисляются, яко всем летом быти, 49, до лета нарочитаго оставления.
Тако и зде седмьдесят седмин Данииловых, летами вси учителие исчисляют, яко в семидесятих седминах всем летом быти четырем стам и девятидесятим.
Яко о сем глаголет Златоуст Святый, в слове третьем на иудеев, лист 94, на обороте: До Христа игумена седмин седмь и седмин шестьдесят две. Зде ми со опасствомъ внимайте, все бо зде есть взыскание. Седмиц седмь и седмиц шестьдесят две. Четыриста осмьдесят и три лета, седмицы бо здесь не дней глаголются. Ниже месяцов. Но седмицы лет.
Третиаго о седминах разумения кроме сих двух сиречь кроме седмин, или лет, или дней, несть обрести мощно в писании, ниже в толкованиих. Но коим либо образом исчислиши седмины Данииловы, днями ли, или летами, яве уразумееши, яко уже прейде время седмин Данииловых до пришествия перваго Христова: Даниил бо предвари Рождество Христово лет за четыреста и шестьдесят, якоже извещает пролог: в седминах же седмидесятих обретается лет четыреста и девятьдесят. Исчисли от пророчества Даниилова до Рождества Христова лет четыреста и шестьдесят. А от Рождества Христова до страстей Его Господних лет тридесят. И тако всех лет будет четыреста девятьдесят, яже в седмидесят седминах Данииловых содержатся. А тако оныя седмины Данииловы исполнишася уже до перваго пришествия Христова: яве мощно познати и от самых оных словесе ангелъьских Даниилу реченных, вышше писаных, яже зде вкратце толкуются.

Первое, глаголет ангелъ к Даниилу: Седмьдесят седмин сократишася о людех твоих.
Зде ведати подобает, яко ангелъ Гавриил явися Даниилу молящемуся о избавлении людей своих от пленения вавилонскаго, о немже зело сетоваше Даниил. Аггел убо утеша его, возвещает ему избавление, не точию от пленения вавилонскаго, но и от пленения диаволскаго, хотящее быти Иисусом Христом. Сего ради глаголет: Седмьдесят седмин сократишася о людех твоих.
Аще убо сия седмьдесят седмин до втораго пришествия Христова разумеются, якоже блядословят противницы: како истину глаголет ангелъ, яко сократишася дние избавления; кое сокращение от дний Данииловых даже до Страшнаго Суда Господня; Кое же утешение ангелъ принесе сетующему Даниилу, о сицевом возвещая ему сокращении не сокращенном; И аще седмины Данииловы даже до нынешних времен продолжишася по разумению молвотворцев, то и пленение вавилонское иудеев даже до ныне пребывает: ибо о избавлении от плена моляшеся Даниил, о немже ангелъ утеша его глаголаше: Седмьдесят седмин сократишася о людех твоих.

Второе, глаголет ангелъ Даниилу: и о граде твоем Святем.
Ибо Даниил моляшеся не точию о избавлении людей своих, от плена вавилонскаго, но и о возтавлении и обновлении Иерусалима разоренаго града. Темже ангелъ утешая печаль его предвозвещает ему обновление Иерусалима, хотящее быти, еже и сбысться, зане во дни пророчества Даниилова царствующу над Персидою и над плененым в Вавилоне людом израильским царю Артаксерксу в лето двадесятое царствия его, Неемия прият власть от Царя, и послание к воеводам воздвигнути стены Иерусалимския. Чти о сем Неемиа, главу 2. Сие же и ангелъ изявляет Даниилу глаголя: И увеси и разумеши от исхода словеси: [сиесть повеления царева:] Яко отвещати, и яко соградити, Иерусалим, и прочая.
О сем же Златоуст Святый глаголет на вышереченном месте в слове 3: (на иудеев лист 94 и 95) Таже уча нас откуду числити подобает (сиесть седмины) показует. Яко не от дне возвращения, но откуду; от исхождения словес. Еже отвещати. И еже создати Иерусалим. Не при Кире же создаея. Но при Артаксерксе долгоруком. По схождении бо возвратися Камбис. Таже волеви. И по онех Дарий Гистаспов Таже ксеркс Дариев, и потом Артабан, таже по Артабан артаксерх долгорукий. Иже царствова над Персидою. И тому царствущу в двадесятое лето царствия его Неемиа возшед град возвиже, и сия ездра известно нам победа. Аще убо отсюду четыреста и осмьдесят и три лета исчислим, всячески приидем на раскопание сие. Сего ради рече, яко созиждется широк и остенен: егда бо рече воздвигнется, и свой восприимет образ. От онаго седмьдесят сочисли. и узриши растление сие не ктому конец имущее: сице Златоустый.

Третие глаголет ангелъ Даниилу: Дондеже обетшает согрешение, и скончается грех. И знаменаются греси, и очистятся неправды, и приведется правда вечная, и знаменается видение пророк, и помажется Святый Святых.
Словеса суть ангелъьская к Даниилу: от нихже всяк ясно уразумети может Благовестие ангелъьско бытии о пришествии Христове первом, чрез благодать, а не втором чрез Страшный Суд: тогда бо скончася грехи, в крови Христовой потоплене, тогда очистишася неправды Крещением Святым, тогда приведеся Правда Вечная и оправдание наше, тогда исполнишася видения пророков о воплощении и пришествии Сына Божия, тогда помазася Святый святых, по речению псаломску: Возлюбил еси правду, и возненавидел еси беззаконие. Сего ради помаза Тя Боже Бог Твой, елеем радости паче причастник твоих.

Четвертое глаголет ангелъ Даниилу: До Христа старейшины седмин седмь и седмин шестьдесят и две.
Что ныне яснее сих словес ангелъьских; исчили седмин седмь, и седмин шестьдесят и две, всего будет седмин шестьдесят и девят: в самую же седьмдесятую седмину Христос пострада. Яве убо есть яко исполнишася уже при страдании Христовом седмьдесят седмин Даниловых, в нихже содержатся лета четыреста и девятьдесят. Даниил бо предвари Рождество Христово за четыреста и шестьдесят лет, яко свидетельствует пролог:
От Рождества же Христова до страстей Его Святых лет тридесят, исчисли лет четыреста и шестьдесят, и паки лет тридесят, всего обрящеши лет четыреста и девятьдесят: Седмин же седмьдесят, исчисляя седмины летами по разумению всех учителей. Откуду Яве мощно видеть, яко от дней в няже ангелъ явися Даниилу, и сию о седминах тайну ему предвозвести: от тех времен до Рождества Христова, исполнися седмин Даниловых шестьдесят и четыри, в седмину же шестьдесят пятую родися Христос Спаситель миру. Последняя пять седмины совершишася страданием Христовым. Всех седмин седмьдесят: лет же солнечных четыреста девятьдесят, от нихже четырмастами и шестьмидесят летами Даниил предвари Рождество Христово, а тридесят лет от Рождества Христова до крещения и страдания Господня совершишася.

Пятое, глаголет ангелъ Даниилу: Потребится помазание и суд, град же и Святое разсыплется с Старейшиною грядущим. И прочая.
Зде предвозвещает ангелъ Даниилу, неповинное Христа Спасителя нашего убиение: Потребится [рече] помазание.
В греческой Библии стоит помазанник Христос. Предвозвещает же и града Иерусалима разорение, еже и сбыстся Титом Веспасионом во отмщение неверствия и мучительства иудейскаго, еже на Христа.

Шестое, глаголет ангелъ Даниилу: В пол же седмины изстави требники требу, и отимется треба, и возлияние на Святый град, и будет омерзение и опустение.
Зде предвозвещает ангелъ, яко в полу седмине последней, сиесть при страстех Господних имеяше престати всяка жертва иудейска, всяка бо жертва в Ветхом Завете бяше образ и преображение сея таинственныя жертвы, еюже Христос Cебе Cамаго принесе Богу Отцу на олтаре Крестном.
Сего ради страшная сия новыя Благодати Жертва, всех ветхих жертв бяше окончение и совершение. Темже убо жертвы и требы древния мимо идоша, наставшей сей Жертве Благодати:
Прейде сень законная Благодати пришедшей:
Сие знаменоваше и завеса церковная на двое раздраная, и слово Христово реченное на Кресте: совершишася. Пространно о сем и Богомудро глаголет сосуд избранный Павел Святый, к евреям:
(гл 9.) Христос [рече] пришед Архиерей Грядущий Благ, большею и совершеннейшею скиниею нерукотворною. [сиречь не сея твари.] ни кровию козлею, ни телчею, но Своею Кровию внуде единою во Святая, вечное искупление обретый. Аще бо козлия и телчая, и пепел юнчий, кропящий, оскверненыя освещает к плотней чистоте: кольми паче кровь Христова, яже Духом Святым себе принесе непорочна Богу. Очистить совесть нашу от мертвых дел.
(гл 10.) И паки: Невозможно бо есть крови юнчей и козлей отпущати грехи. [Темже входя в мир глаголет:] Жертвы и приношения не восхотел еси, тело же совершил ми еси. Всесожжений и о гресех не благоволил еси: тогда рех: се иду, сотвори волю Твою Боже.

Седмое предвозвещает ангелъ Даниилу, омерзение и опустение еже сбыстся при разорении Иерусалима, и Церкви Святая Святых. Кто бо не видит коль великое иудеоми запустение наста от времен Христовых; Первое, яко не имеют церкве чрез тысящу и седмь сот лет. Второе, яко не имеют пророков. Третье, яко не имеют своего царя и царствия. Четвертое, яко во всем мире скитаются от всех уничижаеми и попираеми. Се же их опустение будет пребывати до скончания году, якоже ангелъ Даниилу глаголет, и Исаия пророк со инеми предвозвести: сиесть до скончания мира.
Сие о седминах разумение несть мое, но учителей церковных, наипаче же златоточнаго вселенныя учителя Иоанна Златоустаго: в Маргарите в слове третьем на иудеи, на листу 95-м выше, и нижше. Чтите молвотворцы, и разумейте: яко седмьдесят седмин исполнишася уже первым пришествием Христовым, и разорением всеконечным града Иерусалима, якоже богомудро вещает златый языком в слове предреченном. Но веем что вы глаголете. Седмины Даниловы хощете окончати пришествием антихристовым. Тогда пади яко по исполнении оных седмин глаголет ангелъ Даниилу, хотящую бытии мерзость запустения стоящую на месте Святее, еже вы мните бытии антихриста, поминающее словеса Христова.
(матф. Гл. 24) Егда узрите мерзость запустения реченую Даниилом пророком, стоявшую на месте Святе. Иже чтет да разумеет.

Но не тако есть, якоже вы вознепщевасте. Мерзость бо запустения зде не разумеется антихрист. Разве прообразителне, и аллегорически: по истине же разумеется кумир, егоже внесоша, и поставиша в Церкви Святая Святых разориши град Иерусалим, и Церковь ону Соломонову растливши. Идол же оный бяше началнейшаго их бога еллинскаго диавола, емуже победы восписоваху наипаче римляне. Неции глаголют: яко изображение бяше Тита Веспасиана, град и храм Божии пленившаго: неции непщуют бытии кумир Адриана кесаря римскаго: Сия убо есть мерзость запустения стоящая тогда на месте Святее, а не истинный антихрист, разве оным кумиром прообразительне явленный.
Слышим что о сем Златоуст Святый глаголет в слове 3-м на иудеи, лист 95 на обороте.
Жертвы отъятием и требы, другое будет нечто большее зло, которое же сие; На святилиши мерзость запустения. Святилище, храм нарича, мерзость же запустения, кумир: егоже постави иже град низложивый, внутрь во храме, и даже до скончания, рече. Опустение, сего ради рече Христос. По Антиосе Епифане, пришед еже по плоти и провозглашая хотящее бытии распление, и показуя, яко о сем Даниил пророчествова. Рече: егда увидите мерзость запустения. Еже рече Даниил пророк, стоящу на месте Святее. Чтый да разумеет. Понеже ко всяк иудоа, и и всяко воображение человеческое, у иудей мерзость нарицашеся, гадателне обявляя кумира онаго, купно и когда от кого пленение будет, провозгласи. А яко о римлянах сия речена быша, и Иосип, якоже в предних показохом, рече, до зде слово Златоустаго.

Видите убо мятежницы, что есть мерзость запустения стоящая не месте Святе, яко не антихрист есть, разве прообразителный, истинный же бяше кумир по глаголу Златоустову. Вся же сия уже сбышася при запустении града Иерусалима: темже сбышася уже и седмины Даниловы. Но вы жестоковыйнии и не обрезании сердцем и ушесы, якоже Церкви Божии не покаряетеся, тако ниже Пресветлому Ея Светилнику Златоусту Святому внимаете, он ясно научает, яко первым пришествием Христовым, и опустением всеконечным града Иерусалима, скончашася седмины Даниловы. Вы же в прении седмины Даниловы продолжаете даже до явления антихристова, и втораго пришествия Христова. И кто от христианских учителей сице научает; разве едини безбожнии иудее. Егда бо мы христиане препираем их, исполнением седмин Даниловых о пришествии Мессии пророки обещаннаго, они глаголют, яко не у исполнишася седмины Даниловы, ниже прииде в мир Мессия чаемый, но тогда исполнятся, егда он придет.
Зрите убо молвотворцы коего духа вы есте; несте ли сообщницы безбожию иудейскому, безумным и развратителным седмин Даниловых толкованием, оных погибельному учению последующее; Со слезами зде вопию Павлова словеса: о несмыслении галате, кто вы прелстил есть не покоритеся истине, имже пред очима Иисус Христос предписан бысть;
Аще же рече, яко седмина являет седмь тысящь лет от мироздания. Тысяща бо лет пред очима Божиима аки день един. То како не стыдитеся, ниже боитеся лжива творити Златоустаго Святаго; который в единой седмине не седмь тысящь лет, но седмь лет исчисляет, якоже выше показася, ниже от создания мира оныя седмины исчисляет, но от исхода повеления Артаксерксова, якоже о воздвижении падшаго Иерусалима, якоже глаголет ангелъ Даниилу:
И увеси и разумееши от исхода словеси. Сиесть повеления царева: яко отвещати и соградити Иерусалим.

Аще убо воистину глаголете, и правая судите сынове человечестии: то седмьдесят седмин являет, седмьдесят тысящь седмерицею. И тако от создания мира, по вашему учению подобает исполнитися летом четырем стом и девятидесятим тысящам до пришествия антихристова.
Аще же речете, яко первая седмина являет седмь тысящь лет, прочыя же седмины шестьдесят и девять являют седмины лет, сиесть всяка седмина седмь лет, то ни тако суетное ваше сбыстся исчисление. Ибо в шестидесят и девяти седминах лет, исчисляются лета четыреста осмьдесят и три, и тако всем летом от создания мира подобает испольнитися до пришествия антихристова, седми тысящам четырем стам осмидесятим и трем. Аще же речете яко первая седмина являет седмь тысящь лет, прочыя же седмины шестьдесят и девять являют седмины дней, сиесть всяка седмина седмь дней, то ниже тако истинствуете, ибо в седминах шестидесятих и девяти дней, обретаются дней четыреста осмьдесят и три, всего близ полутора лета, и тако сия седмь тысящь и полтора лета, от создания мира древле уже преидоша, антихрист же вами чаемый не прииде в мир.

Зрите, како осуетистеся помышлении вишими, и омрачися неразумное ваше сердце, глаголющееся мудрыми бытии обюродесте.
Подобное суемудрствие случися видети на тетрадках некоего сопротивника, идеже от различных образов седмины лет исчисляет, ово от семидесяти и седми родов Христовых, якоже чтется от Луки Святаго. Ово от седми хлебов Евангельских, ово от седми кошниц, и прочая. Таже от писмени яже в венце Христове: ѠОН, И от титлы Иисусовы яже на Кресте: IНЦI. Дерзне же окаянный и имени Иисусову, о немже всяко колено прекланяется, буесловием своим коснутися, глаголя: яко сие Пречистое Имя Иисус Христос, являет 210 лет над тысящу исполнившихся. И прочыя глаголы нелепыя отрыгне сердце его лукаво.
Но якоже Иисус ответа не даде на безумныя глаголы иродовы: тако ниже сие буесловие ответа достойно, вся бо она лжеучения суть, аки паучина мухи точию уловляюща, зане не на Писаниих Божественных, ниже на толковании Отцев Святых светил церковных утверждаются, но от кичения разума любопытнаго и суемудраго, аки блато от гнилаго источника происходят.
Истинно слово и всякаго приятия достойно Златоустаго святаго в предисловии на послания Павлова, глаголющаго сице:
Откуду безчисленная прозябоша злая. От неразумия писаний. Отсюду многа ересей прозябе пагуба. Отсюду нерадива жития, отсюду неснискателны трудове. Якоже бо света лишении сего не просто шествуюти. Тако не взирающее к лучи Божетсвенных Писаний многа понуждаются, и часто согрешают, аки во тме всетлеющей шествующии.

Воззрим убо мужие братия к лучи Писаний Божественных, да не во тме неведения и суемудрия нашего шествующее падем в яму погибельную.
Се светозарна луча от уст Христовых исходит.
(Марк гл. 13.) О дни же том и часе никтоже весть. Ни ангели Небеснии, ниже Сын, токмо Отец Мой Един. И паки.
(Деяния Ап. Гл. 1.) Несть ваше разумети времена и лета. Яже полодии Отец мой во Своей власти.
К сим немерцающым словесе Христовых лучами шествуем, направляюще ноги наша на путь мира, и глаголющее со паломником: Светильник ногама моима закон твой, и свет стезям моим.
Неизследимыя же судбы господни сокровеннаго дне не испытуеми любопытным дерзновением.
Не терпит бо тайна испытания.
По глаголу Дамаскинову. Мышца Господня кому открыся; Самым точию удивлением Павел Святый тайны Господня постизает;
От глубинно [рече] богатства и премудрости. И разума Божия! Яко неиспытани судове Его, и неизследовани путие Его. Кто бо разуме Ум Господень; и кто советник ему бысть;
Сообразно и паломник глаголет: исповемся тебе Господи, яко страшно удивился еси. Чудна дела Твоя. И паки: удивися разум Твой от мене. Утвердися, не возмогу к Нему. И паки: возвеличишася дела Твоя Господи, зело углубишася помышления Твоя. Муж безумен не познает, и неразумив не разумеет сих.

Кончину паче жития нашего, а не кончину мира в прилежное восприемлем разсуждение. Воззрим паче в лета в няже толика соделахом злая, и исчисляим коль много прейде лет яже работающе страстем, миру, и диаволу, люте погубихом, коль мало лет, месцей, дней, и часов, в няже Богу работахом, сие исчисление есть душеполезное, и человека благочестиваго достойное.
А еже постизати непостижимое, исчисляти неопределенное, и в бездну судеб Господних взирати любопытне, весма неполезно и не безгрешно. Якоже бо очеса бранове нощных к Солнцу обращаемая ничтоже успевают, паче же помрачаются: Тако и очеса ума человеческаго к зрению таин Божественных от любопытства обращаемая исчезают, и самым светом неприступным Божества померцают, праведную дерзновения мзду восприемлюще. Обаче да не в конец врачевания своего лишен будет любопытства недуг: хощу зде некая от Писаний Божественных о пришествии антихристова явити знамения, о нихже и Апостоли вопрошаху Иисуса.
(Мф. гл. 24.) Рцы нам, когда сия будут; и что есть знамение Твоего пришествия. И кончины века;

Обычно бо есть сокровенную вещь от знамения познавати, якоже сокровенный огнь от дыма, тугу на сердце человеческом, от стенания, от слез, и воздыхания, и прочая.

Знамение предваряющее пришествие антихристово есть сугубо.

Первое: Разорение и кончина монаршества или самовладения римскаго.
Второе: Проповедание Евангелия всей твари.

Знамения совокупная многа суть.

ПЕРВОЕ: Илии и Еноха пришествие в том же времени, егда явится антихрист, и тех пророков убиет.
ВТОРОЕ: Яко антихрист от жидов будет восприят, вместо Истиннаго Мессии, и сам жидовином будет от колена Данова, от жены сквернодейцы.
ТРЕТИЕ: Яко антихрист чудеса ложная творити имать, и огнь с небесе снизходити сотворит.
ЧЕТВЕРТОЕ: Яко антихрист не имать исповедати Христа, и исповедающих люто мучити имать, себе же вместо Христа и Бога Истиннаго величати восхощет.
ПЯТОЕ: Яко антихрист сядет на месте Святее в церкви Иерусалимской, и начнет себе изявляти аки бога, и превозноситися выше всякаго бога.
ШЕСТОЕ: Яко поклонником своим даст начертание на десней руце их, и на челе их.
СЕДМОЕ: Яко имя его бужет изображено числом Х, Ѯ, Ѕ.
ОСМОЕ: Яко время царствования антихристова будет, точию полчетверти лета. (3,5 года)

Зде о бранех антихристовых, и что есть гог и магог; и что есть падение Вавилона; и о убиении антихриста.
Знамения последствующая, пришествие антихристово есть Страшный Суд, и кончина мира сего.
О сих всех знамении, ясно от Писаний Божественных узриши читателю благочестивый, яко не прииде в мир истинный антихрист.

ГЛАВА ПЕРВАЯ. О первом знамении пришествие антихристово предваряющем, еже есть разорение и кончина монаршества римскаго.

Фессалонитстии жителя, или солуняне видяше лютая времена, в няже живаху тогда, еще сущым в мире апостолом, возмнеша уже близ настояты последняя антихристова времена. Сих тако испщующих, сосуд избранный Павел Святый увещавает не скоро подвизатися умом: Пишет же к ним сугубо послание, и во втором послании к солуняном, во главе сторой, сице глаголет:
Молим же вы братие, о пришествии Господа нашего Иисуса Христа. И нашем собрании о нем. Не скоро подвизатися вам от ума, ни ужасатися. Ниже Духом. Ниже словом. Ни посланием аки от нас посланным. Яко уже настоит день Христов. Да никто же вас прелстит ни по единому же образу: яко аще не приидет отступление прежде, и открыется человек беззакония. Сын погибели:

Зде подвиг не мало имеют изследователие Павловых словес учителие церковнии в том. Что разуметися имать в сих словесех апостольских:
Да никтоже вас прелстит, яко аще не придет отступление прежде, и открыется человек беззакония. Сын погибели.
Что есть отступление, о нем же глаголет апостол: яко приити имать прежде, неже открыется человек беззакония, и сын погибели, сиесть антихрист.
Мнози мняху Павла Святаго глаголюща о отступлении еретиков от Веры Святыя Православныя, сиесть Ария, Нестория, Македония, и прочих. Наипаче же в отступлении римлян от нашея православныя веры. Но сему мнению истинствовати несть мощно, того ради, яко отступление от веры православныя наста еще во времена апостольския, и о тех отступниках глаголет Иоанн Святый: От нас изыдоша, но не быша от нас.

Аще убо о отступлении от веры глаголет Павел Святый, нужда есть рещи, яко еще во времена апостольская антихрист истинный [о немже зде глаголем:] прииде в мир. Тожде реши подобает и о отступлении римлян от греков, еже начало свое приято в лето Христово осмьсотное, егда Леон Третий папа римский презрев монархов греческих, на востоце царствующих, новаго на западе монарха Карола постави, и в Риме ветхом его на престол римский возведе, и венча.
Яко о том пишет Бароний в Хронологии своей, лета осмьсотнаго. Не многу посеем времени минувшу, в лето осмьсот девятое, паки римляне отступление ко отступлению приложиша, егда Символ или исповедание православныя веры Соборами Вселенскими утвержденное разориша и растлиша приложением, еже и от Сына Духа Святаго исходяща. Чти о сем Барония на лето Христово осмьсот девятое, Зонара, Бельскаго, Никифора Каллиста, и прочих. Аще убо по оному отступлении римлян от греков, абие прииде в мир истинный антихрист, како оттоле даже до ныне жити может человек сый естеством; Яве убо есть, яко Павел Святый иное некое разумеет быти отступление антихриста предваряющее.
Златоустый Святый Павловых Богоразумный изяснитель, чрез отступление антихриста предваряющее, апостолом Павлом глаголанное, разумеет бытии всенародное отступление от власти римския, или разорение и кончину властительства римскаго. Сице бо глаголет Златый языком в беседе четвертой, на послание Павла Святаго второе к солуняном.
(глава 2) Власть римская, егда возмется от грады, тогда антихрист придет, и в лепоту, дондеже бо сея власти будет страх. Никтоже покорится антихристу, егда же убо разорится, нападет набезначалство. И человеческую и Божию поищеть похитити власть, якоже бо. Яже прежде сего разоришася царствия. Сиреч мидское от вавилонскаго, вавилонское от перскаго. Персское от македонскаго, македонское от римскаго: тако и сие от антихриста, а он от Христа и ктому не содержит.

До зде Златоуст Святый, с ним же и Кирилл Святый во оглашении пятом надесять, Феофилакт, Амвросий, и прочии единомудрствуют.
Вопросит некто: Чесо ради Павел не рече Яве о разорении власти римския;
Отвещавает Златоуст Святый в вышереченной беседе сице глаголя:
Елмаже о римстей власти сие глаголет в лепоту назнаменова. И дотоле рече прикровенно, ниже бо хотяше излишния вражды приимати и неполезныя беды. Аще бо рекл бы яко мало послеже разорится римская власть, уже абие того и закопали быша аки губителя и верных всех на се живущих и воинствующих. Сего ради не рече тако, ниже яко скоро будет. Аще и сие глаголет: Но что, во еже явитися ему во времена свое рече.
Вся же сия утверждаются от книг Даниила пророка, во главе второй и седмой, и от книг апокалипсических.
В книгах Даниила пророка изявляет Дух святый усты пророческими, четыре началнейшая монаршества, пребывающа даже до скончания мира последователно, друг другу последующее.
Изявляется же сие образом идола.

Егоже
Глава злата,
Первое монаршество ассирийское:
Перси сребряно,
Второе монаршество персское:
Чрево медяно,
Третие монаршество греческое:
Голени железныя,
Четвертое монаршество римское.

Якоже бо голени две суть, тако и царство римское двочастно бысть: на востоце от Константина Великаго начало имущее в новом Риме, сиесть в Константинополи: и на западе в ветхом Риме.
И сокрушенной убо сущей единей голени, сиесть монаршеству римскому на востоце чрез турков. Пребывает ещё другая голень на западе, и пребывати будет даже до пришествия антихристова. Тако глаголет Даниил пророк, во главе второй:
Ты царю видел еси сон. И сие тело едино велие, стоя пред лицем твоим, тело, его же глава от злата жива. Руце и перси (пальцы) и мышце его сребряны. Чрево и стегне (бёдра, верхняя часть ноги до колена) медяны, голени железни. И часть некая скуделна (глиняная, хрупкая). Видел еси дондеже отторжеся камень от горы не руками, и удари тело. В нози железни и скуделни. И истни е до конца. Тогда истреса зело скудель, железо, медь, сребро, и злато, и бысть яко прах от гумна летняя. И взят и премногий ветр. И место не обретеся им. Камень же иже разрази образа, бысть гора велика, наполни всю землю.
Сон сей или видение толкует сам Даниил пророк таможде во главе второй, глаголя: Навуходоносору царю ассирийскому.
Ты еси глава злата о царю. Емуже Бог даде крепость и державу, и поставит я властелина всем, и прочая. И в след тебе восстанет царство другое мние тебе еже есть сребро. Царство же третие, еже есть медь. Еже соодолеет всей земли. И царство четвертое будет креплее аки железо, и прочая: И по сих возставит Бог Небесный царство еже в веки не разсыплется, и прочая: (Дан. Гл 2. 21-45)

Внемлем толкованию Метафрастову в житии Святаго Даниила пророка:
Глава залата ты еси о Царю Навуходоносоре и прежде тебе бывшии цари вавилонстии. Восстанет же по тебе царство другое мнѣе тебе, еже есть сребро. Две же руци и мышца знаменуют два народы Персидский и Мидский, имущия приятии царство вавилонское. По сих будет царство третие еже есть медь. Восстанет бо некто облачен в медь: [будет же то Александр Македонский:] и разрушит онех царствование. Четвертое же царство будет креплее аки железо. Якоже бо железо стончевает и умягчает все, и медь, и сребро, и злато: сице и царство оно утончит и умягчит все. [царство же то будет римское:] две же голени знаменуют две части того царства, восток и запад, еллинов и римлянов. Персты, от части железни, от части же глиняны. Знаменуют, яко послеже разделится то царство на многия части, и ослабеет яко скудель, и само от себе будет сокрушено. А камень на тело падший, Христос есть Сын Божий. От горы без руку отсекшийся, ибо имать родитися от чистыя и неискусобрачныя девицы без мужескаго смешения, той отончив и извеяв вся временная царства возставит царство, еже во веки не разсыплется. Царство же то будет Духовно: сице Метафраст.

Зде безбожие иудейское аки вепрь от дубравы рыкает и возмущает, яко не прииде в мир Мессия чаемый, иже есть Христос Спасе миру. Вину же сего сицеву глаголет быти: камень оный ударивый идола [иже Мессию являет] сокруши и потреби до конца вся, сиесть злато и сребро, медь, железо, и скудель, имиже изобразуются монархии и царствия, ассирийское, перское, греческое, и римское, якоже пророк глаголет. Но видим яко царство римское не у вконец разорися, и железо имже римскую монархию пророк прообразова не у сокрушися. Яве убо есть, яко ниже камень Он вся сия сокрушаюий, от горы отторжется, сиесть Мессия чаемый пророки общаный не у прииде в мир. Но всуе сия блядословия отрыгают иудее, плотстии бо человецы плотская мудрствуют, духовно ничтоже смыслящее: темже и писана по плоти разумеют, а не по духу. Но слышим что Павел Святый глаголет: (Коринф 2 гл 3:6) Писма убивает а Дух животворит.
Сиесть по Духу разумети подобает писания, а не по плоти и просторечию. Сего ради Христос глаголет у Иоанна Святаго: Дух есть иже оживляет, плоть ничтоже пользует.
Пример от псалма: (пс 136) Аще забуду тебе Иерусалиме, забвена буди десница моя, прилипни язык мой гортани моему, аще не помяну тебе.
Сия словеса псаломския, аще по писмени хощем разумети, увидим яко людие израильстии в плену вавилонском тужаху о своей отчизне Иерусалимской. Но сия туга них, на Христа ничтоже пользует. Аще же по Духу, якоже подобает всякому христианскому человеку, она словеса разсудим, увидим яко душа благочестива в теле сем смертном и в мире суетном, аки в плене вавилонском пребывающа, тужит присно и сетует желая внити во свое наследие, в горний оный прекрасный Иерусалим. Темже и вопиет: увы мне яко пришелствие мое продолжися.

Пример от Евангелия: Никтоже вина нова вливает в мехи ветхи.

По писмени аще хощем ведати, что сей есть глагол; увемы, яко древний обычай бяше вино в мехах кожаных носити и хранити и опасно блюсти, да не вино ново в мехи ветхи влияно будет, и крепостию своею расторгнет свое носило. Аще же по Духу якоже подобает, хощем сия словеса Христова ведати, узрим от толкования Отцев святых: яко Христос Спаситель наш зде духовно глаголет о вине новом новыя Благодати Кровию Своею растворенном, еже веселит сердце человеку и душу напаяет в живот вечный. Сицево вина таинственнаго не подобает вливати в меха ветхи, сиесть в ветхаго человка тлющаго в похотех, но подобает прежде ветхаго отринути и извлещи человека чрез и многобожию, еже тогда царствоваше над телом и душею идолопоклонников, и весь мир обдержаше вселютейшею работою диавольскою.
Сие царствие демонское тяжкий воистину ярем бяше на вся языки, его же Христос Спаситель наш пришествием своим упраздни, и аки камень от горы отторженный идола величаваго сотре и сокруши, егда толикое множество народов от лютыя диаволския работы избавив, в свободу Благодати Божия и веры истинныя привлече, якоже глаголет апостол, к римляном:
(Рим. гл. 8.) Тварь свободится от работы истления в свободу славы чад Божиих. И паки: Темже братие несмы рабынина чада, но свободныя. Свободою убо еюже Христос нас свободи. Стойте, и не паки под игом работы держитеся. (Галат. Гл 5.)

Царствие убо Христово якоже реху, несть по плоти временное земное и падению причастное, но по Духу вечное, Небесное, неразоримое, еже есть Церковь Святая, ейже и врата адова не одолеют, о сем царствии Его и аггел предвозвести глаголя:
(Лук. 1:32) И даст Ему Господь Бог престол Давида отца Его. И воцарится в дому Иаковли во веки и царствию Его не будет конца.
От сих яве мощно познати, како камень идола сокруши и потреби; сице потреби: Христос Спаситель наш Истинный Мессия пророки обещанный первым пришествием Своим испраздни и потреби царствия мира сего духовным испражнением и потреблением, сокрушив в них царствующую во идолопоклонстве и многобожии диаволскую власть и силу. Вторым же пришествием Своим, при кончине мира имать испразднити всеконечное всякое мирское владычество, по глаголу Павлову: Таже кончина егда предаст царство Богу и Отцу, егда испразнит всяко началство и всяку власть и силу.
Вопросит некто: убо потреби ли уже камень Он таинственный идола властообразного, или не потреби; аще не употреби, то Мессия не прииде в мир. Аще же потреби, то антихрист древле прииде в мир: он бо прийти имеяше потреблену сущу идолу четверовластвующу сиесть четырем монархиам кончину восприемшым.
Отвещаю, рекох уже яко камень Он иже есть Христос, по внегда отторжеся от горы, сиесть по внегда родися от Пречистыя Девы, потреби онаго идола четверопрестольнаго потреблением духовным по его многобожию. Но не потреби потреблением всеконечным по его временному и земному владычеству. Понеже голень железная онаго идола, сиесть римское владычество доселе пребывает по своему мирскому владении. Потребится же всеконечным потреблением при втором Христовом пришествии предваряющу антихристу.
Во утверждение сего ответа паки тебе представляю свидетелство неложное златоточного источника Иоанна Златоустаго в беседе четвертой на Павлово послание к фессалоником второе, на главу вторую сице глаголюща:
Власть римская егда возмется от среды, тогда антихрист придет. И влепоту дондеже бо сея власти будет страх. Никтоже покорится антихристу, егда же тая разорится, нападет на безначалство, и человеческую и Божию поищет похитити власть. Якоже боя же прежде сего разоришася царствия, сиречь Мидское от Вавилонскаго, Вавилонское от Перскаго, Перское от Македонскаго, Македонское от Римскаго: тако и сие от антихриста, а он от Христа, и ктому не содержит.

Таяжде четыри монаршества откры Дух Святый Даниилу пророку иным видением во образе четырех зверей, якоже сам поведает во главе седмой.
Аз Даниил видех в видении моем нощею. И се четыри зверие велиции исхожаху из моря различь себе. Первый аки лвица имущи криле. Криле же ея аки орли, и зряху дондеже простре криле, и воздвижеся от земли, и на ногу человечу ста, и прочая. И се зверь вторый подобен медведице. И в части единой ста, и три ребра во устех ея, среди зубе ея. И сице глаголаху ей, востани и яждь плоти многи. Во след сего видех, и се зверь четвертый горд и страшен. И крепок излиха. Зубы же его железни и велии и ногти медяны. И прочая: Зряхъ дондеже престоли поставишася, и Ветхий денми седаше, и одежда Его бела аки снег. И прочая: Престол Его пламень огнен. Река огненна течаше пред ним, тысящы тысящь служаху Ему. И прочая: Судише селе, и книги отверзошася, и прочая: дондеже убися зверь и погибе тело его, и прочая: и прочих зверей преставися власть. И прочая: Видеху и се на облацех небесных яко Сын Человечь идый бяше, и до Ветхаго денми дойде, и тому дастся власть и честь, и царство, и вси людие и племена поработают, и прочая: и царство его не разсыплется.

Сие видение Даниила пророка аггел Господень толкует в тойже седмой главе, сице глаголя:
Сии зверие велиции четыри, четыри царства востанут на земли, яже возмутся и преймут царство вышняго, и прочая: Зверь четвертый, царство четвертое есть на земли, еже преспеет вся царства, пояст всю землю, и прочая: и по них востанет царь:
[СИЕСТЬ АНТИХРИСТ]
Иже преспеет злобами вся, иже прежде его, и словеса ко вышнему возглаголет, и Святыя вышнего смирит.
[СИЕСТЬ ИЛИЮ И ЕНОХА УБИЕТ:]
и дастся в руку его до времени, и времени, полвремени.
(СИЕСТЬ ПОЛЧЕТВЕРТА ЛЕТА ЦАРСТВОВАТИ ИМАТЬ АНТИХРИСТ )
и судище сядет.
(СИЕСТЬ СТРАШНЫЙ СУД )
и власть его преставят, яко потребити их, и погубити до конца. Царство же и власть и величество царства иже под всем небесем дастся Святым Вышняго.
До зде видение Даниила пророка, и толкование его от аггела.

Внемли читателю благочестивый силу сего знамения от Писаний Божественных изявленаго, и ясно узриши яко не у прииде в мир антихрист. Подобает бо прежде разорену быти до конца монаршеству римскому: якоже Златоуст Святый глаголет в беседе вышшереченней. Таже открыется человек беззакония, и сын погибели. Якоже глаголет апостол: Аще не приидет отступление прежде.
Аще убо сия тако суть, что безумствуют неции скудоумнии, в Писаниих Божественных неискуснии суще, о пришествии в мир антихристова; испытайте Писаний, и буии некогда умудритеся, от знамения же сего будите уверени о сем, яко не у прииде в мир антихрист, ибо не у в разорение прииде монаршество римское, и аще уже и преклонися к падению, но не весма падеся.

ГЛАВА ВТОРАЯ О втором знамении пришествие антихристово предваряющем, еже есть проповедание Евангелия всей твари.

Христос Спаситель наш у Матфея Святаго во главе двадесять четвертой, [вопрощающым учеником на горе Елеонстей: Что есть знамение твоего пришествия, и кончины века;]
Отвещает и поучает учеников своих сице:
Блюдите да никтоже вас прелстит, мнози бо придут во имя Мое глаголющее: азм есмь Христос. И многи прелстят. Услышати же имате брани, и слышания бранем, зрите не ужасайтеся, подобает бо всему сему бытии.
Но не тогда есть кончина.
Восстанет бо язык на язык, и царство на царство, и будут глади, и пагубы, и труси: вся же сия начало болезнем. Тогда предадят вы в скорби, и убиют вы, и будете ненавидими всеми языки, имени Моего ради. И тогда соблазнятся мнози, и друг друга предадят. И возненавидит друг друга, и мнози лжепророцы восстанут, и прелстят многия. И за умножение беззакония изсякнет любы многих. Претерпевый же до конца, той спасется. И проповестся сие Евангелие Пресвятыя по всей Вселенней. Бо свидетельство всем языком. И тогда придет кончина.

От сих неложных словес Христа Спасителя нашего, ясно зриши читателю благочестивый, яко прежде пришествия антихристова, и кончины века сего, подобает проповедану бытии Евангелию всей твари, по всей вселенней, во свидетельство всем языком. И тогда придет кончина. Сия глаголет и Дамаскин Святый в книзе 4-й: во главе 27.
Требует [рече] первое проповествоватися Евангелию во всех народах [якоже рече Господь:] и тогда придет во обличение противобожных иудей.
Како бо исполнится пророчество Давидово во псалме:
Вси языцы поработают Ему. [сиречь Христу] и паки: дам ти языки достояние твое, и одержание твое концы земли. И паки: Вси языцы елики сотворил еси придут, и поклонятися пред Тобою Господи, и прославят имя Твое.
Аще не всем языком проповестся Евангелие Христово. Глаголется же: Во свидетельство всем языком. Того ради, да не имут языцы вины неверствия своего на Страшном Судищи в неведении суще.
Сия и Иоанну Святому во Апокалипсисе, во главе седмой
(Комментарий: в старой нумерации: Слово З (7)-е, глава ѮI (19)-я, стих ЧГ (93)-й)

изявлена суть, число запечатанных избранных Божиих, от всякого колена сынов израилевых и от всякаго языка и колена, и людей и племен стояща пред престолом и Агнцем.
Понеже убо Евангелие Христово, по всей вселенней не у проповедано бысть всем языком, ибо на востоце и на западе многа и пространно зело царствия обретошася, идеже ни следа, ни памяти проповеди Евангельския обрести мощно. Того ради ясно дается зрети, яко не у прииде кончина века, и не у прииде в мир антихрист.
Речет некто, яко Апостоли уже проповедаша Евангелие Христово во всей вселенней.
Отвещаю первое: Христос Спасе наш предвозвещая учеником своим проповедь Евангелия, по всей вселенней хотящую быти глаголет, яко абие тогда придет кончина. Понеже убо от апостольских времен, наченше от их проповеди, даже до ныне, не у прииде кончина. Яве есть яко Христос предвозвещает, не оную проповедь первую, яже бысть от апостолов, но вторую некую, по нейже абие придет кончина.
Отвещаю второе: вемы от жития Апостолов Святых, яко идеже они проповедаша, ведома и знаема суть места многим: Но свет земли новый нынешними времены изобретен, от Апостолов не бысть познан, ниже знаем бяше от человек, но изобретается мало нечто пред нашими времены.
Словеса Павла Святаго к римляном во главе десятой: Бо всю землю изыде вещание Апостольское.
Отцы Святыи толкуют, яко в тех словесех, прешедшее время разумеется имать вместо предидущаго. Якоже и Давид его же суть сия словеса разумеет. Или: Во всю землю изыде вещание Апостольское, Славою и слухом, а не проповедию.

ГЛАВА ТРЕТИЯ. О знамении совокупном, еже есть Илии и Еноха пришествие, и от антихриста убиение.

Знамения совокупныя нарицаются того ради, яко купно со антихристом имеют быти, от них же первое Илии и Еноха пришествие, и от антихриста убиение.
О сем уверимся от писаний Божественных.
У малахии пророка во главе четвертой, глаголет Господь Вседержитель:
Се Аз посылаю вам Илию Фесвитянина прежде пришествия дне Господня великаго и просвещеннаго, иже устроит сердце Отца к Сыну, и сердце человека ко искреннему.
Тожде глаголет и Иисус Сирахов во главе, 48:
Взявыйся вихром огненным и колесницею коний огненных. Вписан во обличение на времена уставити гнев пред яростию. И обратити сердце Отца на Сына, и устроити колена Ияковля.
И во главе 44, тойже Иисус Сирахов глаголет:
Енох угоди Господи, и преложен бысть дати образ покаяния родом.
У Матфея Святаго во главе седмойнадесят сам Христос Спаситель глаголет:
Илия убо придет прежде и устроит вся.
Во апокалипсисе во главе первойнадесять:
(Комментарий: в старой нумерации - Слово I (10)-е, глава Л (30)-я, стих РЛ (130)-й.)

И дам обоима свидетелема моима. И прорицают дней тысящу двесте, и шестьдесят, оболчена во вретища. Огнь исходи из уст ею, и поясть враги их. И иже хощет обидети их, сему подобает убиену бытии. И сии имут область затворени Небо, да не снидет дождь на землю во дни прорицания ею. И область имут на водах обращати я в кровб, и поразити землю всякою язвою. Елика аще восхощета. И егда скончаета свидетельство свое. Зверь яже исходить от бездны. Сотворит с ними брань. И победит их, и убиет я, и труп ею оставит на стогнах града великаго, иже нарицается духовно. Содом и Египет, идеже и Господь наш распят бысть. И узрят от людей и язык, от колена и племен телеса их, дни три и пол. И трупу ею не оставит положити во гроб, и живущий на земли возрадуются и возвеселятся о них. И по трех дгех и пол, Дух Животен внидет в ня от Бога и станета оба на ногах своих. И страх велич нападе на зряши ею. И услышат глас великий с Небесе глаголющее има: взыдита само. И взыдоща на Небо на облацех. И видеша я врази их, и в час той трусь бысть велий. И десятая часть града паде и погибе трусом, и прочая.

От сих словес апокалиптических сия исчисляются.
Первое, яко Илия и Енох будут облечены во вретища.
Второе, пророчествовати имут дней тысящу двести и шестьдесят.
Третие, возимеют область заключити небо, да не снидет дождь на землю во дни пророчества их, и область имети будут воды обращати в кровь, и всякою язвою поразити землю.
Четвертое, егда скончают пророчество свое по днех тысящи двести и шестидесятих, тогда антихрист вооружиться противо их на брань, и победит и убиет их.
Пятое, телеса их лежати имут не погребена во Иерусалиме дни три и пол.
Шестое, по оных дне воскреснут, и зрящым всем и ужасающымся взыдут на небо.
Седмое, тогда будет трус велий, яко десятой части града падати трусом.

Услышим и Дамаскина Святаго, что о сем глаголет в книзе четвертой, во главе, 27.
Послется, рече, Енох и Илия Фескитянин, и обратят сердца Отца на чада. Сиесть сонмище еврейское на Бога нашего Иисуса Христа и апостольсвкую проповедь. И от него [антихриста] убиются.
Понеже убо те два свидетели, Илия и Енох, не у приидоша в мир, Яве есть яко ниже антихрист прииде в мир. Чти о сем и Дамаскина Святаго книгу четвертую, главу двадесять седмую.

ГЛАВА ЧЕТВЕРТАЯ. О знамении совокупном втором, яко антихрист от жидов вместо итиннаго месесии восприят будет.

Яко антихрист от жидов вместо истиннаго Мессии пророками проповеданного восприят будет. Сам о сем извещает Истина Христос Спаситель наш глаголя ко иудеем во Евангелии Иоанна Святаго, во главе пятой:
Аз приидох во Имя Отца моего, и не приемлете мене, аще инее придет во имя свое, того примете.
Тожде глаголет и Павел святый во втором послании к Солуняном, во главе второй:
Зане Любве Истины не прияша во еже спастися им. И сего ради послет им Бог действо лести. Бо еже веровати им лжи: да суд примут вси неверовавшии Истине, но благоволивге неправде.

Антихрист бо от тех прият будет, иже его со всяким вожделением чают и ожидают. Сицеви же суть иудее, иже мессию чают бытии царя временнаго, Якове будет антихрист.
Языци бо никогоже не чают.
Христиане же чают антихриста, но страхом и трепетом, а не с веселием и желанием.
Якоже убо Христос первее ко иудеям прийде, им же обещано бяше, и от них же приити чаяшеся: Потом же совокупни себе языки: Тако и антихрист ко иудеом убо первее придет, от них же прийти чается. Потом же и языки себе совокупит.
Сице разумеют Отцы Святые: Златоуст, Кирилл Александрийский, в толковании главы пятыя Иоанна Святаго: Григорий Дамаскин в книзе четвертой, во главе 27, идеже глаголет сице:
Иудее убо Сына Божиего, суща Господа нашего Иисуса Христа и Бога не прияша: Лестца же, бога себесамаго глаголюща, примут.
Тии же Отцы Святыи научают, яко антихрист имать бытии жидовин, и обрезанный, иудее бо никогдаже прияли быша в мессию, человека не иудеянина, ниже обрезана.
Неции глаголют его хотяща бытии от колена Данова, о чесом ещё от начала пророчествоваше Иаков Ветхозаветный патриарх, глаголя к сыну своему Дану, в книгах Бытия, во главе четыредесять девятой:
И да будет Дан змия на распутии.
Видиши ли читателю благочестивый, яко ниже сие знамение изявляет антихриста в мир пришедша. Понеже жидове и доселе чают пришествия своего мессии желаемаго, иже будет антихрист.

О рождении антихристова различная суть мнения.

Инии глаголют, яко родитися имать от девицы действом диаволским: якоже Христос Спаситель наш рожден есть от Пречистыя Девы Марии действом Святаго Духа.
Сие мнение ложно есть. Кое бо причастие Свету ко тьме; Кое приобщение велиару со Христом; Кто во облацех уравнится Господеви; уподобится Господеви в сынех Божиих; И мощно ли тако действовати Диаволу, якоже Дух Святый действует; Како может бытии равное действие Создателя и создания;
Инии глаголют, яко родится имать от жены с Диаволом смешение имуща. Но сие мнение не крепко есть: Како бо может Диавол безплотен сый с женою имети истинное естественное смешение; Како же может влияти семя человеческое к рождению, семя не имея семени, безплотен сый;
Обаче может Диавол первее преобразитися в жену, и смешение иметь с человеком, и от него семя вземь, может потом преобразитися в человека, и сообщитися жене, и влияти семя взятое прежде от человека. И сицевым образом демон может родити человека, а не сам от себе своею силою. И аще бы сицевое случилося рождение, тогда рожденный человек был бы истинным человеком, не сыном диаволским по естеству, но сыном онаго, от негоже взятся семя еже к рождению. Якоже аще бы кто орлее яйце подложил гнездящейся на яйцах кокоши, тогда произшедшее из яйца орляго не было бы птенцем кокошим: но орлим.
Инии глаголют, яко антихрист имать бытии истинный естеством Диавол, тело человеческое мечтанием точию, а не естеством имея.
И сие мнение есть ложно, ибо Павел Святый апостол во Втором Послании к солуяном во главе второй антихриста нарицает человеком: Открыется, рече, человек беззакония, сын погибели. Над всеми сими мнениями, сие есть истиннейшее, яко антихрист родится не от законнаго супружества, но от жены блудницы истинный человек, якоже бо Христос родися от Пречистыя Девы, тако Христу противный антихрист родитися имать противообзно от скверныя жены мнимыя девицы.
Сице глаголют Отцы Святи: Святый Ипполит папа римский в Синаксаре в неделю страшного суда: Святый Дамаскин в книзе четвертой, во главе, 27, сице глаголет:
Не сам убо Диавол будет человек по Господню вочеловечению: да не будет, но человек из блуда народится. И подиметь вси действо сатаны. Проведый бо Бог безместное будущаго его произволения. Попустит вселитися в него Диаволу. Народится убо из блуда, яко рех. И воспитается тайно, и внезапно привозстанет, и противовознесется, и воцарствует.
Амвросий в книзе о благословениях Патриархов во главе седмой. Феодорит, Феофилакт: Сии вси единомысленно глаголют его бытии истинна естеством человека, родитися имуща от блудницы, от колена Данова. Утверждаются же на Писании святом, в книгах Бытия, во главе, 44: Да будет Дан змия на распутии.
И у пророка Иеремии в главе 8 пишется: От Дана слышана суть. Ржания коней их.
Тожде утверждается и в главе седмой Апокалипсиса, идеже зрятся от аггела запечатлены дванадесять тысящей от всякаго колена Израилева, колено же даново между ими не именуется. Вина же сему мнится бытии антихриста племя Даново, ниже именования с родом своим достоин между избранными Божиими, о чесом Андрей Святый Кесарийский в слове седмом в толковании на аполипсис главы 7, глаголет сице:
Да знаменаетжеся сие, яко колено Даново, яко из него рождаемому антихристу с прочими не вчинися: но вместо его Левино, яко священническое древле в число не приходящее.
Родитися же имать в Вавилоне граде велицем по разумению Иеронима в толковании на первуюнадесят главу Даниила пророка.

ГЛАВА ПЯТАЯ. О знамении совокупном третьем, еже есть чудеса ложна антихристова.

О чудесах ложных антихристовых, Сам Христос Спаситель наш предвозвещает у Матфея Святаго в главе 24, глаголя:
Дадят знамения велия и чудеса, якоже прелстити, аще возможно, и избранныя.
Дадят, рече множественным числом, того ради, яко не точию антихрист, но и служители его дадят чудеса ложна.
Сообразно глаголет и сосуд избранный Павел Святый, во втором послании, кСолуняном, во главе второй:
Его же пришествие [сиесть антихристово] есть по действу сатанину. Во всякой силе и знамениях, и чудесех ложных, и во всякой лсти и неправде.
Златоуст Святый на сия словеса в беседе четвертой сице глаголет:
Во всякой силе, рече, знамении и чудесех ложных. Сиречь всякую покажет силу ничтоже истинное, но в прелести вся.
Тожде и в апокалипсисе во главе тринадесятой пишется:
И сотворит чудеса велика, да огнь сотворит сходити с небесе на землю пред человеки, и лстит живущыя на земли, ради знамений, яже дана быша ему.
(Комментарий: в старой нумерации - Слово ГI (13)-е, глава ЛЗ (37)-я, стих РѮД (164)-й.)

От сих Писаний Божетсвенных глаголют учителе, яко антихрист великий имати быть чародей и волхв, и Диавол иже в нем от юности пребывати имать. Той чудеса ложна сотворит чрез него, ово мечтаньми и привидением, ово естественным действием, вину сокровенну в себе имущем, и того ради людей удивляющем. Якоже древле в Египте творяху волеви действом сатаниным чудеса ложна.
И якоже мощно естественнее посреде зимы лютыя, возрастити и явити шипок или крин процветающий, еже не ведущему вины сокровенныя мнится бытии чудесно. И прочая сим подобная.
Образ чудотворения антихристова наипаче тричисленный изявляет апокалипсис во главе тринадесятой.
(Комментарий: в старой нумерации - Слово ГI (13)-е, глава ЛЗ (37)-я, стих РѮД (164)-й.)

Первое: яко огнь с небесе снизходити сотворит. О сем чудеси Святый Андрей Кесарийский в толковании на апокалипсис, в слове тринадесятом о лжепророце сице глаголет:
Не чудно же есть в очесех прелщаемых да видать огнь с небесе сходящь. Идеже и в истории Иовли сего низшедша. И скоты его сжегша, по Божию попущению и сатанину действу уведохом.
Второе: яко сотворит образу зверину глаголати. О сем ложном чудеси Святый Андрей Кесарийский в предреченом толковании глаголет:
Повествовано бысть и Аполлонием, и другими. Яко множицею чародеянии провозглаша бесове чрез образы, и изваянныя идолы, и чрез древа и воды. Мню же и чрез мертвая телеса, якоже и Симон волхв показа римляном в пребытии Великаго Петра. Аще и прелесть апостол изобличи. Показав чрез тех ихже воскреси сам, како мертвии востают.
(Комментарий: в старой нумерации - Слово ГI (13)-е, глава ЛЗ (37)-я, стих РѮS (166)-й.)

Третие: яко сотворит себе мертва быти ложно, потом же воскреснет. Сих ради знамений весь мир удивляти имать.
Зри боголюбче, яко ниже от сего знамения антихристово пришествие уверитися может. Кто бо иные сицевыя силы и чудеса деет, яковыя антихристу приписует Апоклипсис; Кто огнь с небесе сходити творит; кто же звериному образу глаголати дает; кто умерщвлен востает действом сатаниным;

ГЛАВА ШЕСТАЯ О знамении четвертом пришествия антихристова, яко антихрист не имать исповедати Христа, и исповедающих люто мучити будет: себе же вместо Христа и Бога истиннаго имать величати.

Антихрист понеже и во имени и во истине противник есть Христов, вся противна Христу творити восхощет.
В первых не будет исповедати Иисуса Христа, и его весь Божественный Закон разорит, и уничтожит, глаголя хулы на вся Христовы Тайны, на Крещение, Миропомазание, Евхаристию, и прочая:
Святый мученик Ипполит в слове о кончине мира глаголет: Яко во времена антихристова жертва безкровная, рекше, Литургия Святая и всяко приношение Бога умилостивляющее престани имать, разорятися же и Церкви Божия, изменьшеся в вертепы разбойничи и хлевины чести не имущия: Престанет же псалмопение, и всякий чин, всякое церковное благолепие угаснет. Вся бо Христова, противник Христов разорити восхощет, и мерзость запустения вся пуста сотворит. Златоуст Святый глаголет на второе Павла Святаго к Фессалоняном послание, на главу 2, в беседе 4:
Егда приидет он ничтоже поведит здраво. Но вся законопрестуная, от знамений точию ложных уверится.
Будет же научати ветхаго закона, обрезание и саббаты хранити. Понеже бо от Иудей в мессию восприяти будет, вся иудейская возмудрствует. И якоже иудее ненавидят и не исповедуют Иисуса Христа Сына Божия, тако и мессия их антихрист сотворит.
О сем яве глаголет Иоанн Святый Богослов, в первом послании, во главе второй:
Кто есть лживый, точию отметаяися яко Иисус несть Христос. Сей есть антихрист, отметаяися Отца и Сына всяк отметаяися Сына, ни Отца имать.
Понеже бо двоим Христом несть мощно быти, како антихрист Иудеом вместо истиннаго Христа себе уверити может, аще не прежде нашего Христа возхулить, глаголя его не быти истиннаго Христа.
Ясно сие и отсюду дается зрети, ибо аще предтечи антихристовы не исповедуют и хулят Иисуса Христа Сына Божия, яковии бяху мучителие, наченше от Нерона, и яковы суть еретицы, Арий, Несторий, Савелий, Македоний, и прочии, в них же тайна беззакония бяше, и ныне деется по глаголу Павлову. Кольми паче антихрист сам началнейший враг Христов, возненавидит Христа. И его хулити и уничижати будет. О чесом извещает Апокалипсис, в главе 13:
И даны быша ему уста глаголюща велика и хульна, и дана бысть ему область творити месяц четыредесят два, и отверзе уста своя в хуление к Богу. Хулити Имя Его, и селение Его, и живущия на Небеси, и дано бысть ему брань творити со Святыми. И победити я.
(Комментарий: в старой нумерации - Слово ВI (12)-е, глава ЛS (36)-я, стих РѮ (160)-й.)

О том же и Даниил пророк в главе 7, глаголет:
И словеса к Вышнему возглаголет, и Святыя Вышнего смирит.
[Сиесть Илию и Еноха и прочих верных Христовых.]
Отвергнув убо истиннаго Христа Спасителя нашего, и лже-христа его вменив быти, себе истиннаго быти Христа начнет проповедати, законом и пророки обещаннаго.
О чесом глаголет Истина Христос Спаситель наш, у Иоанна во главе пятой:
Аще ине приидет во имя свое, того приемлете.
[сиесть в мессию] О сем и Амвросий Святый, на главу Луки двадесят вторую.
От Писаний: [рече] поучати будет себе быти христа истинна.
Тожде глаголет и Феодорит, на 2 послание к Солуняном: глава 2.
Тожде Кирилл в катихиси пятонадесятой.
Над всеми же сими антихрист исповесть себе быти бога, и аки бог почитать быти возхощет. Якоже Апостол глаголет, во втором послании к Солуняном, во главе второй:
Яко ему сести в Церкви Божии аки богу. Показуя себе яко Бог есть, паче же всякаго глаголемаго бога.
О сем и Даниил пророчествова во главе, 11.
И царь возвысится и возвеличится над всего бога. И на Бога бог сглаголет пресилно. И до всех бог отец его не смыслит. Яко паче всех возвеличится.
Вопросит некто: что есть Даниилом пророком реченное во главе 11: яко антихрист покланятися имать богу некоему: МАѠЗЄЙ Како убо превозноситися будет над всякаго бога, сам имея бога;
Ответуют Отцы Святые, МАѠЗЄЙ знаменует мужество, или Бога крепка.
Антихрист убо волшебник сый, имети будет в себе диавола крепка, во всем себе пособствующа, и тому кланятися будет, и вместо бога его чтити, не яве, но тай. Яко же себе будет исповедати бога.

ГЛАВА СЕДМАЯ О знамении пятом, сиесть о престоле антихристовом.

Престол антихристов имать быти во Иерусалиме, в церкви Соломоновой, и престоле Давидовом. Видим то от Писаний Божественных во Апокалипсисе во главе 11. Иоанн Святый глаголет. Яко Илия и Енох брань сотворят со антихристом в Иерусалиме, и тамо от антихриста убиются.
Сие глаголет Апокалипсис глава 11:
И труп ею оставит на стогнах града Великаго. Иже нарицается духовне, Содом и Египет. Идеже и Господь наш распят бысть.
(Комментарий: в старой нумерации - Слово I (10)-е, глава Л (30)-я.)

Вопросиши: почто зде град Святый Иерусалим нарицается содомом;
Ответ: Земный сей Иерусалим можется нарещи содом, того ради, яко в нем беззакония и студоделания умножишася преизлишне. Яко о сем читаем в книгах Исаии Пророка, во главе первой.
Видение еже виде Исаия сын Амосов. Еже виде на Иудею, и на Иерусалим.
По сих же таможде, в тойже главе глаголет:
Слышите Слово Господне князи содомистии, внемлите глаголу Божию людие гоморрстии.
Зде видиши яко пророк Иерусалимлянов нарицает князями Содомскими, и людми Гоморрскими. Может убо Иерусалим нарещися Содомом, и Гоморром, и градом Святым, различным ради вин: Градом святым есть Иерусалим, Пророков ради и Апостолов, иже тамо проповедаша, и страстей ради Христовых, Креста, и погребения. Но может нарещися и Египтом и Содомом неверных ради иудеов, за беззакония их и слепоты. В сем убо духовном Содоме, будет иметь престол свой антихрист. Понеже бо имать быти иудеанин, и от иудей в мессию восприимется, и царем иудейским будет, [якоже вышше рехом]. Яве есть яко во Иерусалим сядет, и престол свой церковь Иерусалимскую обновити потщится. О сем известно глаголет и сосуд избранный Павел Святый, во втором послании к Солуняном, во главе второй:
Яко ему сести в церкви Божией, аки богу.
Зде Церковь Божию Павел глаголет, церковь Иерусалимскую, яже во времена Павлова Церковь Божия нарицашеся.
Отцы Святые Киприан, Кирилл Иерусалимский, Григорий, Ипполит мученик в слове о кончине мира, Златоустый, и прочии: Местом Святым и Церковию Божиею непщують бытии церковь Соломонову. Дамаскин Святый в книге 4, во главе 27.
В храме [рече] не нашем но ветхом иудейстем. Не бо нам, но иудеем придет. Не за Христа, но на Христа. Занеже и антихрист глаголется.
Андрей Святый Архиепископ Кесарии Каппадокийския, в слове десятом толкования своего, на Откровение Иоанна, на главу 11, пишет:
Поставит [рече] престол свой во Иерусалиме: [антихрист] по подобию Давидову, егоже сын. Христос Истинный Бог наш по плоти бысть. Да и в сем себе бытии Христа известит исполняюща пророческое слово голаголющее: Возтавлю скинию Давыдову падшую, и превращенная ея паки созижду. Еже прелщениеми иудее на онаго пришествие восприемлют и сказуют.

Сие и Христос Спаситель наш яви учеником своим прообразителне у Матфея Святаго в главе двадесять четвертой:
Егда [рече] узрите мерзость запустения реченну Даниилом пророком, стоящую на месте Святее, иже чтет да разумеет.
Зде ведати подобает, яко мерзость запустения троякое имать толкование.
Первое, нецыи от учителей, якоже Ипполит, Иероним, и прочии, мерзость запустения непщуют бытии самого антихриста, он бо будет началом запустения, толикия брани и гонения движущь на христианы. Он же и сядет в Церкви Святей Иерусалимстей по глаголу Великаго Павла.
Второе неции от учителей, якоже Феофилакт, Ефрем, Амвросий и прочии мерзость запустения разумеют бытии разорение и запустение града Иерусалима от Веспасиана Кесаря римскаго, о чесом и Христос Спаситель наш предвозвести в Евангелии у марка Святаго в главе 13, глаголющым Апостолам:
Учителю виждь каково камение. И какова здания. Господь же отвеща. Не имать остати зде камень на камени. Иже не разорится. И паки глаголет ко иудеом: се оставляется дом ваш пуст [Матфея 23.]
Сие разорение и запустение описует Иосип Евреянин в книзе о брани иудейстей, и глаголет толикое тогда бытии онаго града запустение, колико прежде никогдаже бысть: погибоша бо тогда гладом и мечем тма тысяща тысящей человек, в пленение же посидоша девятьдесять тысящей, о чесом во псалме 58:
Бог явит мне на вразех моих. Не убий их да не когда забудут закон твой, раждени их силою твоею, низложи их защитниче мой Господи.
Зде пророк Давид в Лице Христовом молит Бога Отца да не в конец погубить иудеов, се же ради сродства своего, еже по плоти, и ради покаяния их: но да разженет их, и гордыню низложит, еже и сбыстся: оттоле бо разсеяшася иудее во всю вселенную, скитающееся беднее по различным царствам своего же царствия и царя и церкви не имущее, о чесом Златоуст Святый в слове 2 на иудеи глаголет:
Господь ныне жертвенник. Господь же ковчег. Господь Сын и Святая Святых. Господь же и Священник. Господь Херувим Славы. Господь Златая Кадилница, Господь Окрини (чаша). Господь Требщная, Господь Огнь иже свыше снесенный.
Тожде и в слове третием на иудеи глаголет:
Аще бо и хотят [иудее] паки восприятии свой град, и на первое возвратитися жительство, и храм зрети воздвизаем, еже никогдаже будет.
Протяженнее о сих глаголет златый языком в словах своих на иудеи, яже краткости ради зде оставляются.
Третие толкование есть Златаустаго Святого, иже мерзость запустения реченую Даниилом пророком, стоящую на месте Святее, глаголет бытии кумир, егоже разорителе града Иерусалимскаго внесоше тогда в Церковь Соломонову. Кумир же он бяше Диавол бога их еллинскаго: Инии глаголют яко воображение бяше кесаря римскаго Адриана: Инии Веспасиана. И в видети тогда мерзость запустения стоящу на месте Святее. О сем выше преднаписася в ответе, вопрос 5:
О томже пишется и в Маргарите в слове 3, на иудеи, лист 95.
Откуду мощно проразумети, яко кумир оный стоящий тогда на месте Святее, бяше проображением антихриста в церкви Соломонове сидети имущаго, и запустение онаго града и церкви Соломоновы чрез Веспасиана, образ бяше запустения мира и Церкви Христовы, имущаго быти чрез антихриста.
Сего ради и Христос Спаситель у Матфея Святаго во главе 24: и у Марка Святаго во главе 13, оба та запустения, и запустение Иерусалима, и запустение мира, во едино совокупляет, глаголющь бо о запустении Иерусалима, внезапну преходит к запустению мира: и сия обоя во Евангелте тако совокупляет, яко едино мнится бытии, якоже образ с своим первообразным есть едино не естественне и числителне, но изобразителне и знаменателне.
Суть неции иже престол антихристов, глаголют бытии Рим Ветхий. Се же утверждают свидетелством Иоанна Святаго, во Апокалипсисе во главе 17:
Идеже жена любодеица на звери седмь глав имущем бяше видена. И нижше: Седмь глав, горы суть седмь. Идеже жена седит на них.
(Комментарий: в старой нумерации - Слово ИI (18)-е, глава НД (54)-я, стих СЕI (215)-й.)

Сиесть столица Антихристова.
Рим убо ветхий, понеже на седми горах обретается седящ, престолом есть антихристовым, по разумению неких. Сего разумения, ниже сами римляне отрицаются. Глаголют же престол бытии антихристов Рим не инешний христианский, но ветхий идолопоклонный, в нем же царствоваху мучителие Нерон, Дометиан, Максимиан, Диоклетиан, и прочии предтечи антихристовы. Онцевый бо Рим женою любодеийцею, кровию мученик Иисусовых напоенною нарицает Апокалипсис в главе 17.
(Комментарий: в старой нумерации - Слово ИI (18)-е, глава НД (54)-я, стих СЕI (215)-й.)

ГЛАВА ОСМАЯ О знамении шестом и седмом, сиесть о имени антихристове, и о начертании его.

Многа имать имена антихрист, нарицают его писания: человеком беззакония, сыном погибели.
Во втором послании к Солуняном, глава 2, нарицают змием. Книга Бытия глава 49, нарицают беззаконным, лжепророком, лжехристом, мерзостию запустения, зверем, сатаною, и прочая. Но вся сия имена суть обща, могут бо прилична быти, не точию истинному антихристу, но и предтечем его.
Паче же и всякого грешника не кающася мощно нарещи человеком беззакония, и сыном погибели. Сего ради не о имени общем но о имени свойственном антихристовом, зде вопрос предлежит.

Каково имя антихристу есть свойственно;
Иоанн Святый в Апокалипсисе во главе 13, о имени антихристове, сице глаголет:
Зде мудрость есть. Тже имать ум да почтет число зверино. Число бо чяловеческо есть. И число его, ХѮЅ.
Зде тайна читателю благочестивый, многими высокими разумы испытана, но доселе недоведома.
Ведати же о сем подобает совершенно, яко имя некое греческое, греческим диалектом изследовано, антихристу будет свойственно: Ибо греческим наречием Апокалипсис писан бысть от Святаго Иоанна Богослова. Сего ради удивляюся юродству неких неуков, и невегласов, котории в славенском нашем наречии хотят изобрести таково имя, еже бы могло согласовати числу зверину, ХѮЅ.
Разумейте же безумнии в людех, и буии некогда умудритеся.
Зрите различная толкования на тайны апокалипсическая, и узрите яко вся учителие греческаго имене ищут согласующаго числу зверину ХѮЅ.
Неции глаголют, яко имя антихриста будет Λ Α Τ Ε Ι Ν Ο Σ. Еже есть римлянин, и сии мнят бытии антихристом папу римскаго.

Λ Л
Α А
Τ Т
Ε Е
Ι І
Ν Н
Ο О
Σ С
Число зверино ХѮЅ

(Далее буду приводить не в табличном виде, как это записано в книге, а в строчном. Потому как все указанные имена имеют итоговую сумму ХѮЅ. Прошу простить меня за такое отступление.)

Инии глаголют имя его бытии: Τ Ε Ι Τ Α Ν еже есть Солнце.
Инии глаголют: Λ Α Μ Π Ε Τ Ι Σ сиесть пресветлый.
Инии глаголют: Ο Ν Ι Κ Η Τ Η Σ сиесть победитель.
Инии глаголют: Κ Α Κ Ο ΣΟ Δ Η Γ Ο Σ сиесть, злой вождь.
Нецыи непщуют имя его быти Μ Α Ο Μ Ε Τ Ι Σ сиесть Магомет, иже есть турский пророк.
Нецыи глаголют: Α Λ Η Θ Η Σ Β Λ Α Β Ε Ρ Ο Σ сиесть истинно вредящий.
Инии глаголют: Α Μ Η Ο ΣΑ Δ Ι Κ Ο Σ сиесть, агнец неправедный.
Неции глаголют: Α Ν Τ Ε Μ Ο Σ сиесть, противник.
Инии глаголют: ΣΑ Ξ Ο Ν Ε Ι Ο Σ сиесть сасъ, или саксончик.
Нецыи глаголют имя его бытии: Β ΕΝ Ε Δ Ι Κ Τ Ο Σ сиесть благословенный.

Негли Благословеннаго Воистину Христа Бога нашего Имя похитити восхощет. Глаголет Святый Андрей Кесарийский.

Зри читателю благочестивый каково различие имен, вся же суть греческа, и во всех исчисляется число зверино, ХѮЅ. Якоже мощно комуждо искусити истину.
Мнози непщуют яко имя ему будет Α Ν Τ Ε Μ Ο Σ. Сиесть противник. Ибо и сие имя антихрист, есть такожде греческое, и знаменует противника Христова. Неции глаголют яко сие число, не имя знаменует но время пришествия и убиения антихристова.
Неции сице толкуют, яко сим числом ХѮЅ, знаменуется троякий грех диаволский, в антихристе совершитися хотящий, ибо шестое число, понеже не досягает седмаго, в немже есть упокоение и блаженство. Есть число создания разумнаго чрез грех испадшаго от упокоения и блаженства. Диавол же троякий грех исполни, или един утрои.
Первое, егда себе грехом вред наведе, и тогда шестеричное число исполни.
Второе, егда перваго человека грехом повреди, и тогда к шести шестьдесят приложи.
Третие, егда чрез антихриста всему миру вредити будет, и тогда к шестидесят и шести, придаст шесть сот.
Инии впреки сему глаголют, яко число шестое есть совершенное: ибо шестию денми Господь созидаше мир сей. Шестьдесятое число совершеннейшее. А шестьсотное еще совершеннейшее.
Откуду явь дается зрети, яко антихрист, толикое себе совершение причитати имать, еликое самому Богу должно есть. Но что о сем много глаголати.
Не терпит тайна испытания.

Вси учителие светила церковнии единогласно невежество со смиренномудрием исповедующие: глаголют себе весма не знати доселе имя антихристово. Не изследими бо суть путие Господни, и не испытании судбы Его.
Понеже убо сия тако суть, почто нецыи невогласи, безмозгие мужики, едино у мудрых игралище и посмеяние суще, высокомудрствуют, паче же безумствуют имя антихристово хотящее изследовати, и тамо хотят долетети желвы (желвь – стенобитное орудие), идеже высокопарные орлы достигнути не возмогоша. Виждь коликим безумством свиния бисеры Писаний Божественных попирают.

О начертании антихристово сия ведати подобает.

Между инеми знамениями, пришествия антихристова, есть и сие еже читаем в Апокалипсисе, в главе 13:
Яко всяк иже аще не поклонится звериному образу убиен будет. Покланяющым же ся даст начертание, на десней руце их, или на челех их. Да никтоже возможет ни купити ни продати. Токмо кто ихъ имать начертание, или имя зверино, или число имени его.
(Комментарий: в старой нумерации - Слово ГI (13)-е, глава ЛЗ (37)-я, РѮS (166)-й.)

О сем начертании блядословят противницы Церкви Святыя глаголющее: начертание антихристово бытии, Тайну миропомазания. Они бо кроме Крещения, таки ни каковых не имут. Сего ради хотящее укорити нас православных, сия на Тайну Миропомазания хулы глаголют. Но всуе, ибо аще Миропомазание Святое, есть начертанием антихристовым, то и Апостоли суть по их зломнению антихристы. Паче же сам Христос, иже сию Тайну с прочими Тайнами во спасение наше устави. Святый Андрей Кесарийский о сем начертании антихристовом в толковании на Апокалипсис, в слове, 13, сице глаголет:
Начертание пагубнаго имене отступнича и прелестнича на всех наложити потщится, на десных убо руках да десных да десных и благих дел отсесечет действо, на челех же, да научит в лести и тме прелщенныя держати.
(Комментарий: в старой нумерации - Слово ГI (13)-е, глава ЛЗ (37)-я, РѮS (166)-й.)

ГЛАВА ДЕВЯТАЯ. О кратком времени царствования антихристова.

Краткое время царствования антихристова, сам Христос Спаситель наш извещает у Матфея Святаго, в главе 24:
И аще не быша прекратилися дние оны, не бы убо спаслася всяка плоть. Избранных же ради прекратятся дние оны.
Даниил Благогласный в главе седмой, глаголет:
И дастся в руку его до времене и времене и полвремене, и судище сядет.
Учителие церковнии Кирилл в катихисисе, 25: Ипполит о кончине века и прочии. Чрез время разумеют едино лето. Чрез времена, два лета. Чрез пол времене, разумеют пол лета, яко всех лет царствования антихристова бытии трем летом и пол.
Тожде читаем и во главе 12, Даниила пророка:
Доколе скончание яже нарече чудеса, и слышах от мужа оболчена в дагряницу. И воздвиже десницу свою на небо, и кляся живущим на небеси, яко во время и во времене, и в пол времене.
Еще же не разумеющу Даниилу глаголанная, рече он муж:
Ходи Данииле, яко заграденна словеса ознаменания до времени скончанаго. От времене же пременену умаления дней тысяща двести девятьдесят.
Зри яко число сих дней составляет полчетверти лета. Тожде читаем во Апокалипсисе во главе 12: идеже жена, то есть Церковь святая, [якоже толкует Великий Мефодий, и Андрей Кесарийский] убежа от змия, сиесть от антихриста, в пустыню, и тамо питана бяше, Дний тысящу двесто шестьдесят.
(Комментарий: в старой нумерации - Слово АI (11)-е, глава ЛГ (33)-я, стих РМЗ (147)-й.)

Сих дней число составляет такоже полчетверти лета. И нижше в тойже главе 12, сице глаголет:
И даны быша жене два криле орла великаго. Да парит в пустыню в место свое. Идеже препитана бяше ту. Времена времен, и пол времене, от лица змеина.

Тожде и во главе 13, читаем во Апокалипсисе:
И даны быша ему [антихристу] уста глаголюща велика и хулна. И дана быть ему область творити месяц четыредесят и два.
(Комментарий: в старой нумерации - Слово ВI (12)-е, глава ЛS (36)-я, стих РѮ (160)-й.)

Число сих месяцей составляет полчетверти лета.
Тожде читаем и во главе 11, Апокалипсиса: И град Святый поперут четыредесят и два месяца.
(Комментарий: в старой нумерации - Слово I (10)-е, глава КФ (29)-я, стих РКФ (129)-й.)

Андрей Святый Кесарийский толкуя сия словеса глаголет: Попиратися же Святому граду. Или новому Иерусалиму. Или Кафолической Церкви месяцей четыредесять и два. От язык мню, яко знаменуют бо пришествии антихриcтову полчетверти лета верным и искусным попираемым бытии и гонимым.
Таможде во Апокалипсисе пишется: И дам обоима свидетелема моима (сиречь Еноху и Илии) и прорицают дней тысящу двести шестьдесят. Число согласует с преждеречеными.
Тожде утверждается от Апокалипсиса во главе 20: Идеже аггел связа сатану на тысящу лет, и по сих подобает ему отрешену бытии на мало время.
(Комментарий: в старой нумерации - Слово К (20)-е, глава Ѯ (60)-я, стих СНЕ (255)-й.)

И паки Апокалипсис во главе 12: Горе живущым на земли и мори, яко сниде Диавол к вам имея ярость велику. Ведый яко время мало имать.
(Комментарий: в старой нумерации - Слово ВI (12)-е, глава ЛД (34)-я, стих РНА (151)-й.)

Видиши ли читателю благочестивый, яко время мало будет и кратко царствования антихристова, и отрешения сатанины пособника антихристова. Сия и Христос Спасе наш предвозвести, глаголя:
Аще не быша прекратилися дние оны, не бы убо спаслася всяка плоть: избранных же ради прекратятся дни оны.
Вину же сего Отцы Святи сию глаголют бытии, яко не подобает антихристу множайшим временем царствовати и проповедати паче Христа, иже три лета и пол лета проповедаше Евангелие во спасение наше.

ГЛАВА ДЕСЯТАЯ О царствии и бранех антихриста.

В первых ведати подобает яко антихрист царствия не будет отчичь и дедичь и наследник, но прелестный и лукавый восхититель. Ясно о сем глаголет Даниил пророк, во глае 11.
И не Даша нань славы царства, и придет со обияием, и соодолеет царству лестми.
Согласует сему и Дамаскин Святый, в книзе, 4, во главе 27: Народится [рече] из блуда, и воспитается тайно, и внезапно привозстанет, и противовознесется и возцарствует.
Второе ведати подбает. Яко антихрист брань творити имать с трема царми, Египетским, Ливийским и Ефиопским, и преодолеет им. Слыши о сем Даниила пророка глаголюща, во главе 7: Зверь четвертый горд и страшен и крепок излиха. И прочая: и рог десят ему, и смотрих в розе ему, и се рог другий мал изыде пред ними: трие же рог рози преднии сторгнушася ему от лица его, и се очи, аки очи человечьи в розе том. И уста глаголюща велика. Зрях дондеже престоли поставишася. И прочая: Се видение Даниила пророка.

ТОЛКОВАНИЕ.

Зверь четвертый горд и страшен, есть четвертая монархия, или единовластительство римское. Рог десять ему, суть десят царие, на нихже разделитися имать при своей кончине владение римское. Рог иный мал возшедший пред ним, есть антихрист, от мала и хула и безславна рода восставший. Трие рози преднии сторгнувшиеся от лица его, суть трие царие антихристом одолени.
Сие толкование не есть человеческо, но аггельско, якоже в тойже 7 главе зрится, идеже аггел сице толкует Даниилу пророку видение:
Зверь четвертый, четвертое есть царство на земли. Еже преспеет вся царства, и прочая. И десять рог ему, десять царей восстанут. И по них восстанет, иже преспеет злобами вся еже прежде его. И три цари смирит, и словеса к вышнему соглаголет, и прочая.
О сих трех царех воспоминается в главе Даниила пророка конца:
И проcтре руку свою на землю. И земля Египетска не будет во спасение. И совладети начнет в сокровенных злата и сребра. И во всем похотнем египетсте и ливитсте, и мирсте, и в тверделе их.
Пространно о сем вещает Ипполит мученик в беседе о кончине мира.

Третие ведати подобает, яко егда антихрист трием царем вышереченным одолеет, Египетскому, Ливийскому, и Ефиопскому, тогда и прочии царие поклонятся ему, и оттоль антихрист начнет бытии монархом, рекше единовластвующим всея вселенныя обладателем, известно о сем глаголет Писание Божественное Апокалипсиса, во главе 17:
Десять рог, яже виде. Десять царей есть. Иже не прияша царства. Но область, яко цари един час примут со зверем. Сии едину волю имуть и силу, и область свою зверю дадут. Сия со Агнцем брань сотворят, и Агнец победет я.
(Комментарий: в старой нумерации - Слово ИI (18)-е, глава НД (54)-я, стих СИI (218)-й и СФI (219)-й.)

О сем монаршестве антихристовом, и Златоуст Святый воспоминает на второе к Фессалоняном послание, на главу вторую, в беседе четвертой, глаголя:
Якоже бо прежде сего разоришася царствия. Сиречь Мидское от Вавилонскаго. Вавилонское от Персскаго. Персское от Македонскаго. Македонское от Римскаго. Тако и сие от антихриста. А он от Христа.
Зде златый языком, антихристово царствование сравнивает с царством Мидским, Вавилонским, Персским, Македонским, Римским: и глаголет быти антихристово царствие последующее Римскому, якоже Римское Греческому, Греческое Персскому, Перское Ассирийскому. Понеже убо она царствия бяху монархиами: Яве есть яко и антихристово царство монархиею будет, и никимже упразднитися имать, точию единем Христом на Суде грядущим.
Согласно глаголет и Кирилл Святый во оглашении 15: яко антихрист обладателем бытии имать монархии Римской. Сей же глагол свой утверждает от техже вышереченных словес во Апокалипсисе, главе 17: И десять рог, яже виде, десять царей есть. Сии едину волю имуть. И силу и область свою зверю дадут.
(Комментарий: в старой нумерации - Слово ИI (18)-е, глава НД (54)-я, стих СИI (218)-й.)

Четвертое ведати подобает, яко антихрист с безчисленным своим воинством всех христиан во всей вселенней гонити имать, и сия есть брань Гога и Магога.
Слыши о сем Иоанна Святаго во Апокалипсисе, во главе 20:
И егда скончается тысяща лет, разрешен будет сатана от темницы своея, и изыдет прелстити языки сущыя на четырех углах земли Гога и Магога собрати их на брань, ихже число яко песок морский. И взыдут на широту земли, и обыдут Святых стран, и град возлюбленный. И снидет огнь от Бога с Небесе и пояст я. И Диавол лестный их ввержен будет в озеро огенно и жупелно, идеже зверь и лживый пророк. И мучении будут день и нощь во веки веков.
(Комментарий: в старой нумерации - Слово КА (21)-е, глава ѮГ (63)-я, стих СНИ (258)-й и СНФ (259)-й)

Сими словесами описуется последнее гонение антихристово еже на христиан, и кончина его погибелная.

Вопросит некто:
Что есть тысяща лет, в ниже связан есть сатана, имже исполнившымся, разрешен бытии имать;
На сей вопрос отвещает Святый Андрей Кесарийский в толковании своем на Апокалипсис главу, 20, в слове двадесятом близ конца, и глаголет; яко определенное число тысяща лет, написася вместо неопределеннаго.
Подобная бо сим обретаются, и на иных Писания Святаго местех, во псалме 104: Слово еже заповеда в тысящы родов.
Зде определенное число тысяща полагается вместо неопределеннаго, то есть, во многая множества родов. И паки во псалме 90: Падет от страны твоея тысяща. И тма одесную тебе.
И зде такожде определенное число написася вместо неопределеннаго. И сам Христос Спаситель наш, у Матфея во главе 13: определенное число полагает вместо неопределеннаго: Семя [рече] падшее на землю благу, принесет плод, во сто, в шестидесят, в тридесять.
Сатана убо связан есть на тысящу лет, то есть, на все время, наченше от Страстей Христовых, даже до времене пришествия антихристова, в неже разрешен будет. Яве сие извещает Христос Спаситель наш, егда исходя на страсть вольную глаголаше: Ныне суд есть миру сему, ныне князь мира сего изгнан будет вон. (Иоанн гл. 12)
Чти толкование иже во Святых Отца нашего Андрея архиепископа кесари Каппадокийския, на Апокалипсис, на главу 20: идеже сице глаголет: И видяху аггела с небеси низходящаго, имуща ключь бездны, и уже велико, и удержа змия, и связа его на тысящу лет. И по сих подобает ему разрешену бытии на малое время. (Апок. 20.)
(Комментарий: в старой нумерации - Слово К (20)-е, глава Ѯ (60)-я, стих СНЕ (255)-й.)

Толкование Святаго Андрея, на главу 20 Апокалипсиса:
Зде низвержение и разрушение диаволе поведает бывшее в страсти блудней, в нейже мнящагося бытии крепка, крепящий его Христос Бог наш связав, нас корысти его, из рук его избави, осудив того в бездну. Сие же показуется от бесов молящих его. Да не будут послании в бездну. И яко связан бысть, знамение идолослужения истребление. И идолских храмов разрушение. И требищных кровий исчезновение, и всемирное Божественная Воли познание. И великий же Иустен глаголет: Яко во пришествии Христово, исперва ведаше Диавол, яко осуждена бысть в бездну, и в геенну огненную. Мощно убо яко мню предреченными и изречению познану бытии от Христа на диавола. Аггела де глаголет сицевому ответу сужаща. Да покажет и служебных сил сего хуждша, и всуе дерзающа на началство всеми владущее. А уже именова к нашему разумению связанную и державную его силу. Тысящу же лет не всякая толикая числом разумевати благоразумно есть, ниже бо о нихже глаголет Давид: слово еже заповеда в тысяща роды, десятищи сто сия числити можем, но многия множеством. Сице убо и зде, или яко многих, или совершеннаго тысяще знаменателное число есть непщуем и образуем. Тысяща убо лет есть время от вочеловечения Господня даже до Пришествия Христова.

До зде толкование иже во Святых Отца нашего Андрея архиепископа кесари Каппадокийския. И нижше в том же слове глаголет:
Якоже бо преднаписася не есть нужда толикая числом разумети тысящная лета, ниже бо реченное в песнех, [в главе 8:] Муж положит в плоде своем тысящу сребреник. И паки: Тысящу Соломону и двести хранящым плод, сие число назнаменова: но и множество в плодоношение есть совершенно.

ГЛАВА ПЕРВА НАДЕСЯТЬ. Что есть Гог и магог;

Якоже о сквернеем имени антихриста различна суть мнения, якоже преднаписася, тако и о сих именах Гог и магог, различная толкования. Услышим что о сем повествует Святый Андрей Кесарийский в вышереченном слове:
Мнят [рече] нецыи Гог и магог суть скифстии языцы. Ихже нарицаем гунны, всякаго земнаго царства и языка многочеловечнейшыя, и в брани храбрственнейшыя, самою же Божественною Рукою во еже обдержати вселенную всю удержаемы и воспящаемы даже до разрешения Диавола. Нецыи же толкуют Гога и Магога с еврейскаго языка, СОБИРАЮЩАГО, или СОБРАНИЕ, Магога же ВОЗНЕСШАГОСЯ, или ВОЗНОШЕНИЕ. Тако яко чрез имена, или собор языки, или гордыня назнаменуется. Ведати же подобает яко Иезекиль пророчествова. Яко сии языцы в последняя времена придут с силою тяжкою на землю иудееву, и падут. И седмь лет в техже оружиих за множество их огню горящу, и палящу. Еже нецыи от толковников истолковаша о падении ассириан с Сенахеримом при Езекии пред многими Леты бывшее пророчества Иезекиилева. Нецыи же истолковаша на пагубу язык нападших на хотящыя паки оградити и обновити Иерусалим по пленении от вавилонян. Первому Киру персскому, и по нем Дарию, епархами ассирийскими сие повелевшу. Нецыи же восприяша на силы Антиоховы чрез Маккавеи побежденныя. А яко паче последним летом сравняется и согласуется сих пришествие, навечно есть.
Первое убо яко нигдеже есть писано. Да бы тогда скифския языки брань подвигнули на Иудеи, но самыя окрест живущым внезапнаго благоденства сим завидящым. Второе же зде еже писано есть о Гоге, яко от дний древних уготовится, и последняя времена придет. Третие же занеже в настоящем откровении пророчествующым будущая, писана суть при кончине века сего Гогу и Магогу приити.

До зде Андрей Святый Кесарийский, Амвросий Святый, и Августин о сих мудрствуют сице:
ПЕРВОЕ, брань Гога и Магога, глаголют бытии, брань и гонение антихриста на Церковь Христову.
ВТОРОЕ, Гога разумеют бытии антихриста, Магога же безчисленныя полки антихристовы. Ибо Иезекииль пророк во главе 38, и в главе 39: многажды Гога именует князем, Магога же нарицает землю, или народ.
ТРЕТИЕ, Магога нарицают скифов, се же того ради, яко Афет имаше сына имененм Магога (якоже пишется в книгах Бытия, во главе 10) иже насели землю, и водворися тамо, идеже ныне обитают скифи. Якоже бо от Ханаана сына Хамова, палестинская земля нарицается Ханаан, и людие тамо живущии, нарицаются, людие хананейстии, или хананее. Тако и от Магога сына Афетова, земля скифская, и людие в ней живущии именуются Магог.
От сих мощно мнением проразумевати, яко Гог или антихрист имать сподвигнути на брань Магога, сиесть премногия и пресилныя скифския народы, и теми гонити Церковь Божию во всей вселенней. Падет же со всеми силами своими на горах израилевых огнем свыше поражен: якоже гадательствует Иезекииль пророк во главе 39. Идеже глаголет: Толико бытии множество воинства гогова, яко оружию их чрез седмь лет жгомым и палимым бытии.

Речет некто: по смерти антихриста, абие кончина быти имать, и Страшный Суд. Якоже о сем выше преднаписахом. Что убо Иезекииль пророк глаголет оружию Гога и Магога пораженных чрез седмь лет жгомым и палимым быти;
Отвещаю, яко сия пророк вещает образом пророческим, хотя изявити безчисленное Гога и Магога воинство, и презельную их пагубу и падение, ниже глаголет яко поистине оружия их седмию леты имут быти палима и жегома. Но предвозвещает хотящее бытии толикое падение антихриста, и воев его, яко мощно оружиям их чрез долгое время огню возгнещаему доволным быти, аще бы того нужда была. Сия вкратце о Гоге и магоге. Прочее же не дерзаю неизследимых судеб Господних бездну испытовати скудоумием си: псаломски вещаюшь, [пс. 91:]
Яко возвеличишася дела Твоя Господи. Зело углубишася помышления Твоя. Муж безумен не познает, и неразумив не разумеет сих.

ГЛАВА ВТОРАЯНАДЕСЯТЬ. О падении Вавилона.

Иоанн Святый во Апокалипсисе в главе 17 описует Вавилон бо образ жены любодеицы:
И видех [рече] жену седящу на звери червленем. Исполна имен хульных, иже имеяше глав седмь, и рогов десять. И жена бе оболчена в порфиру и червленицу, и позлащена златом, и камением драгим и ьисером, имущи чашу злату в руце своей полну мерзости и скверн любодейныя ея. И на челе ея написано имя: Тайна Вавилон великий мати любодеица и мерзостем земским: и видяху жену пиану кровми Святых, и кровми свидетелей Иисусовых. И НИЖШЕ: Зде ум, иже имать мудрость: и седмь глав, горы суть седмь. И десять рог, десять царей есть.
(Комментарий: в старой нумерации - Слово ИI (18)-е, глава НГ (53)-я, стихи с СS (206)-го по СI (210)-й,)

Зде паки различная суть о сем Вавилоне толкования.
Нецыи глаголют Вавилон быти, сборище всех несестивых, или мир, и мира славу, пространство, сладострастие: На седми же горах глаголется сей град утвержден, сиесть, на седми грехах смертных, в немже царствует диавол. Сего града гражданами, суть нечестивии, якоже впреки града Божия Иерусалима гражданами суть избрании Святии.
Нецыи же Вавилоном разумеют бытии злочестие махметово и срацынское, аки поистине жену любодеицу. Вера бо их злочестива, научает всяким мерзостем, и любодеянию. Попущает же всякому толико жен имети, елика препитати кто может.
Нецыи Вавилоном непщуют бытии Константинополь, сей бо есть митрополия махметов, Христа, и Церкви Христовы гонителей. Седит же при водах, на седми холмах отнюдуже и седмихолмие гречески ΕΠΤΑΛΟΦΟΣ нарицается. Сего ради яки бы о нем рекл Иоанну Святому аггел во Апокалипсисе, во главе 17:
Приди да покажу ти суд любодеицы великия седящия на водах многих.
(Комментарий: в старой нумерации - Слово ИI (18)-е, глава НГ (53)-я, стих СS (206)-й.)

Нецыи мнят бытии оный Вавилон древний, иже бяше митрополия халдеев: ибо оттуду антихрист произыди имать, якоже выше речеся. Тамо Неврод первый в мире мучитель, и по нем Навуходоносор, последи же Антиох, предтечи и образы антихристовы царствоваху.
Сия суть о Вавилоне толкования. Но вся та отложше, мною сие бытии истинное толкование, еже глаголет, яко ветхий западный Рим есть Вавилоном. И падение Вавилона, есть падение Рима западнаго, иже разоритися имать при кончине мира сего. Сие толкование есть многих учителей. В первых же утверждается на словесах самого верховнаго апостола Петра, иже в первом своем Послании во главе пятой, Рим Вавилоном нарицает, глаголя: Целует вы Церковь. Яже в Вавилоне соизбранная, и Марко сын мой.
Сия Петрова словеса единогласно учители толкуют о Риме. Андрей Святый Кесарийский в слове 18, толкования своего на главу 17, Апокалипсиса: в зачале 54, сице глаголет:
От многих мест в писании мощно есть навыкнути, яко от деяний и сбытия налагаются имена на грады. Отнюдуже и ветхий Вавилон сице именовать быть: и сядыша блудница радостная, сиречь град блудник радующийся о блуде. Владычица волхвов. Ветхий же Иерусалим, лице ти быть блудниче. И старый же Рим, Вавилон в послании Петрове нарицается.
(Комментарий: в старой нумерации - Слово ИI (18)-е, глава НД (54)-я, стих САI (211)-й.)

И выше мало в зачале 13 тожде глаголет о Вавилоне, блудницею изобразуемом:
Сию [рече] блудницу нецыи восприяша на ветхий Рим. Яко на седми горах лежащий. Седмь же глав носящаго тую зверя. На седмь царей от всех нечестивейших от Дометиана, даже до Диоклетиана Церковь гонящих.
(Комментарий: в старой нумерации - Слово ИI (18)-е, глава НГ (53)-я, стих СS (206)-й.)

И паки в слове девятомнадесять, в стихе двадесят четвертом, глаголет Андрей Святый.
От древних церковных учителей речеся: яко сия пророкована суть на Вавилон, иже у римлян. За еже видении быша десять рози в четвертом звере, сиречь, в римстем начальстве.
Тожде мудрствует Иероним, толкуя четвертуюнадесять главу Исаии пророка, и глаголет:
Падет и сокрушится Вавилон, седяй на седмию горах порфировидна блудница, ея же падение и мучение изявляет Апокалипсис.
И паки в предисловии на книги Дидима о Святом Духе: Егда бех [рече] в Вавилоне, [сиесть в Риме,] и порфироносныя блудницы обретахся житель.
Вины же сицеваго о ветхом Риме толкования, сия суть:

ПЕРВАЯ, яко последняя словеса в главе седмойнадесять, Апокалипсиса, Яве извещают, Рим ветхий бытии Вавилоном.
Жена юже видел еси, град есть великий. Иже имать царство над цари земными.
(Комментарий: в старой нумерации - Слово ИI (18)-е, глава НГ (53)-я, стих СЗ (207)-й.)

Кий бо град имать царство над цари земными, паче ветхаго Рима; иже нарицашеся всея вселенныя владычица по глаголу Луки Святаго Евангелиста, в главе второй.
Изыде повеление от кесаря [римскаго] Августа, написати всю вселенную.

ВТОРАЯ вина, яко Рим седит на седми горах, еже о Вавилоне блудницею изобразуемом вещает Апокалипсис, в тойже главе седмойнадесять.
Зде [рече] ум иже имать мудрость, и седмь глав. Горы суть седмь, идеже жена седит ни них.
(Комментарий: в старой нумерации - Слово ИI (18)-е, глава НД (54)-я, стих СЕI (215)-й.
Седмъ главъ, З(7) рогъ есть идѣже жена сѣдитъ на нихъ, и З(7) царь есть.
В «Острожской Библии» и в синоидальном переводе действительно, стих записан как: ...И седмъ главъ, горы суть седмь, (...семь голов, суть семь гор)...)

ТРЕТИЯ вина, яко Иоанн Святый во откровении своем не глаголет о свойственном и истинном Вавилоне древнем, иже в Египте халдеев столица: но глаголет о таинственном и образителном Вавилоне, якоже титла на челе оныя любодеицы свидетелствует.
Тайна Вавилон великий, мати любодейцам. (Апок. Гл. 17)
(Комментарий: в старой нумерации - Слово ИI (18)-е, глава НГ (53)-я, стих СI (210)-й.
...И на челе ея имя написано тайна. Вавилонъ великий мати любодѣицам и земскимъ мерзостемъ...)

ЧЕТВЕРТАЯ вина, яко Рим и римстии Кесари наченше от времен Апостольских чрез триста лет, не точию в Риме но и во всей вселенней гониша Церковь Божию. Сего ради никому же иному разве Риму прилична суть оная словеса, яже во Апокалипсисе, во главе седмойнадесять:
И видях жену пиану кровми Святых, и кровми свидетелей Иисусовых.
(Комментарий: в старой нумерации - Слово ИI (18)-е, глава НД (54)-я, стих САI (211)-й.)

И паки в главе осмойнадесять, на конце: И в нем кровь пророческа и Святых обретеся и всех избиенных на земли.
(Комментарий: в старой нумерации - Слово Слово ѲI (19)-е, глава НЕ (55)-я, стих СЛS (236)-й.)

ПЯТАЯ вина основателна есть, яко Петр Святый Апостолом верховный, Рим Вавилоном нарицает, якоже преднаписахом.
Зри благочестивый читателю, и посмейся юродству некиих, иже царствующий град Москву Вавилоном нарицают, и мняшеся мудрыми быти, обюродеша.
Некто от учителей в толковании на сие Петрово послание глаголет:
Рим нарицает Вавилоном Петр, ради слияния и смешения многочисленнаго идолопоклонения, егож посреде Церковь тогда мала и первенствующая стаяше. Якоже древле люд израильтсский мал числом, в пленении седашъ. На реках вавилонских плакася лишения своего от Святаго Сиона, не хотяще пети песнь Господню на земли чуждей.
От сих ясно познати мощно, что есть падение Вавилона, еже извещает аггел велиим гласом во Апокалипсисе, во главе 18: Паде паде Вавилон Великий, и бысть жилище бесом.
(Комментарий: в старой нумерации - Слово Слово ѲI (19)-е, глава НЕ (55)-я, стих СКВ (222)-й.)

Сие бо падение Вавилона, ничтоже ино есть, точию разорение Рима, и римския власти погубление при кончине мира, якоже в первой главе рехом. И якоже древний оный Вавилон, халдеев слава падеся, Киром разорен, [Исаии глава третиянадесять, и двадесять первая.] сице и таинственный Вавилон, Рим разсыпатися имать.
Глаголется же дважды Паде, паде ради сугубаго падения, перваго убо, егда ветхое идолопоклонство римское падеся проповедию Евангелия.
(Комментарий: дважды слово «паде» записано в «Острожской Библии» и в синоидальном переводе. В остальных книгах данная строка записана следующим образом: ...И возопи гласомъ великимъ глаголя паде Вавилонъ великий...)

Втораго же, егда при кончине мира разоритися имать римское начальство. Или сугубое падение знаменуется по души и телу, якоже глаголет Амвросий Святый, и Андрей Кесарийский.
Сия о падении Вавилона, и о кончине мира. Погибель же антихристову, и воев его описуеть Апокалипсис, во главе двадесятой.
И взыдоша на широту земли, и окружиша стан Святых и град возлюбленный.
[сиесть Церковь Святую] и сниде огнь с небесе от Бога, и снеде я.
(Комментарий: в старой нумерации - Слово Слово КА (21)-е, глава ѮГ (63)-я, стих СНФ (259)-й.)

Сия словеса толкуя Андрей Святый Кесарийский в слове двадесять первом, глаголет:
Огнь с небесе снидет, или видимый, якоже на два пятьдесятники при Илии, или Христово славное Пришествие избиет Духом уст Своих, и предреченыя языки пояст, и архистратига их диавола озеру огненному предаст со антихристом, и лжепророком, идеже мучими будут во веки веков.
Сию кончину погибельную от Иоаннова откровения предвозвестив Андрей Святый Кесарийский скончавает свое слово 21 сице:
Мы же от Спасителя Христа научившееся. Еже не внити в напасть, протяженнее и прилежнее о сем помолимся, немощь свою познаше. Избавитися пророкованых искуса. И ниже антихристово видети пришествие. Ниже предглаголаных язык движение, ниже беду смертоносную, от спасителныя веры отступити насилствующую. Но свидетельство совести по силе соблюдающее невредимо и неуязвленно. И ко искупившему нас Честною Своею Кровию Христу распаление любве делы благими показующе. Вечных благ восприятия и наслаждения недеимся богатыми Божиими щедротами к сему вжилаеми. Ихже буди нам получити в самом Спасителе и Искупителе нашем Христе. С Ним же Отцу купно Святому Духу Слава, Держава, суть и поклонение. Ныне и присно, и во веки веков, Аминь.

По исчезновении проклятаго антихриста, и по разсыпании воев и сил его мучителских, Гог и Магог нарицаемых: Страшный Суд нецыии продолжают даже до седми лет. Сие же мнение их утверждается на пророчестве Иезекииля пророка, в главе тридесять девятой.
Идеже глаголется толикое множество воинства гогова, яко оружию по смерти их оставшемуся, чрез седмь лет жгому и палиму бытии от верных. О сем что разумети имаши, зри на конце главы 11, в сей книжице.
Инии глаголют, яко по смерти его до Страшного Суда имать быти дней 45: Сие мнение свое утверждают пророчеством Даниловым, в главе 12. Идеже пророк глаголет:
От времене пременену учащения дний, тысяща двести девятьдесять. Блажен терпяй и постигий в дни тысяща триста тридесять пять.
Первое убо число 1290, разумеется число дней царствования антихристова. По убиении же его до Страшнаго Суда остается дней 45. Сочти дней 1290, и паки дней 45, обрящеши последнее число пророческо дней 1335, о них же глаголет пророк: Блажен терпяй и постигай в дни тысяща триста тридесят пять.

Инии глаголют, чко по смерти антихриста, абие последовати имать Страшный Суд. Се же утверждается неложными словесы Христа Бога нашего, иже по скорби при антихристе хотящей бытии, абие сиречь, непосредственно, последовати имать померчение светил небесных, таже Страшный Суд. Сице бо глаголет, у Матфея Святаго, в главе дведесять четвертой:
Абие же скорби дней тех Солнце померкнет, и Луна не даст света своего.

ГЛАВА ТРЕТИЯНАДЕСЯТЬ. О знамениях последующих пришествию антихристову.

До зде писана суть знамения предваряющая пришествие антихристово, и совокупная томужде. Последующая же оному многа суть, и от нихже некая зде являются вкратце.

ПЕРВОЕ ЗНАМЕНИЕ, померчение Солнца и Луны необычное, и паче всех бывших страшнейшее, по глаголу Господню у пророка Иоиля в главе третией:
И дам чудеса на небеси и на земли. Кровь и огнь и пару дымную. Солнце обратитися в тму и Луна в кровь прежде пришествия дне Господня великаго и страшнаго.
И паки Исаия, во главе 13:
Звезды небесныя и кружилия, и вся тварь небесная света не просияют. И померче Солнце возсияющее, и месяц не даст света своего.
И паки Иезекииль, в главе 32:
И покрыю небо егда угаснеши. И помрачу звезды его, Солнце в облацех покрыю. И месяц не просветит света своего, вся светила небесная помрачу на тя. И ПАКИ: Солнце мрачно бысть яко вретище власяно, и Луна бысть яко кровь. И звезды небесные падоша на землю.
О сем и Христос предвозвести глаголя, [у Матфея 24:]
Абие же по скорби дний тех, Солнце померкнет, и Луна не даст света своего, и звезды спадут с небесе.
И влепоту: якоже бо престарения зелнаго, знамение бывает помрачение очес, тако престаревшагося мира, и на кончине последней уже сущаго, знамение имать бытии померчение Солнца и Луны, аки очес мира прекрасных. И якоже умирающу дому владелце, смятение бывает во всем дому его, вси домашнии его плачутся, и отвергшее ризы светлы, черным облачением покрываются: тако и роду человеческому, егоже ради вся создана суть, кончину восприемлющу, весь мир в смятении будет, и светила небесная отложше лучезарное сияние, во мраце темном, аки в черном одеянии имуть явитися.

ВТОРОЕ ЗНАМЕНИЕ. Падение звезд с небесе: Зде Златоуст Святый разумеет истинное звезд падение хотящее бытии. Инии же толкуют о померчении точию звезд, и о падении не от места своего, но от светлости: понеже астролози всяку звезду на тверди небесней нами видимую, глаголют бытии всея земли большую. Инии толкуют сие падение о кометах, блистаниях, молниях, громах, и прочих метеорах, яже не далече от земли родятся на воздусе.

ТРЕТИЕ ЗНАМЕНИЕ. Движение Сил небесных: Якоже глаголет Христос:
Силы небесныя подвигнутися:
Златоуст Святый и Феофилакт Силы небесныя разумеют бытии седмый чин Аггелов, Силами нарицаемый. Того ради, яко крепчайшую паче в нех силу имеют. Двигнутися же имуть ради великаго страха, и ужаса, иже толико имать быти, яко и самым Аггелом крепчайшу паче инех силу имущым ослабевати и трепетом одержимым быти, имже образом сыны трепещуть, видяше отца своего на злонравных рабов ярящемся презелне.

ЧЕТВЕРТОЕ ЗНАМЕНИЕ. Обновление твари, и очищение огнем от скверн человеческих. Якоже бо и сперва бяше водою всемирное очищение от мерзостей греховных, тако при кончине мира имать быти огнем. Ясно сие видим от Писаний Божественных:
Огнь пред Ним предидет, и попалит окрест враги Его. (Пс. 96)
Огнь пред Ним возгорится, и окрест Его буря зелна, призовет Небо свыше, и землю разсудити люди своя. (Пс. 49)
Яко огнь попаляяй дубравы, яко пламень пожигай горы, тако пожнеши я бурею Твоею, и гневом Твоим смятеши я. ( Пс. 82)
Одождить на грешники сети. Огнь и жупел, и дух бурен часть чаши их. Река огненна течаше пред ним. (Пс. 10) (Даниил гл. 7)

В послание Петрово, глава 3:
Придет день Господень, яко тать в нощи, воньже небеса убо с шумом мимо идут. Стихия же сожигаемая разорятися. Земля же, и яже на ней дела сгорят. Сим убо всем разоряемым. Кацем подобает бытии вам во Святых сожитиих и благочестиих: чающым и скорбе быти желающым пришествия Божияго дне. Его же ради небеса жегома разорятися, и стихия опаляема расстаются. Нова же Небесе, и новы Земли по обетованию Его чаем.

[У Матфея, во главе 24.]
Ибо и земля мимо идет. Видех небо новое, и землю новую. Первое бо небо и земля первая преидоша. Дела рук Твоих суть небеса, тя погибнут, Ты же пребываеши.
Будет небо ново и земля нова, и не помянут первых.
Зде же сие ведати подобает, яко образ точию твари сея огнем погибнет, существо же имать пребывати по глаголу Павла святаго, (1-е Послание Коринфянам гл. 7:) Преходит образ мира сего.
Образ, рече, а не существо. Тожде и псалом: Обновиши лице земли.

ПЯТОЕ ЗНАМЕНИЕ. Воскресение мертвых:
Сей член веры есть един от прочих, самою точию верою, а не разумом человеческим, ниже испытанием постизаемый. Темже глубоко о нем не испытую, ниже бездну сию мелким скудоумием измерити дерзаю, едино точию глаголю с Цервковью Восточною:
Чаю вокресения мертвых. Верую Господи, помози моему неверию.
Но понеже вера от источника вод живых, сиесть от Писаний Божественных происходит, почерпем и мы поне капли некия от оныя.

(Комментарий: отсутствует лист)

Аще же воскресения мертвых несть, то ниже Христос воста. Аще же Христос не воста, тще убо проповедание наше. Тща же и вера ваша. Обретаемже ся и лжесвидетели Божии. Яко поглушествовахом на Бога. Яко воскреси Христа, Его же не воскреси. Аще мертви не восстают. То ни Христос воста. Аще же Христос не воста, суетна вера ваша, ещё есте во гресех ваших: убо и умерши о Христе погибоша. И аще точию в животе сем уповающее есмы во Христа, окаяннейши всех человек есмы. Ныне же Христос воста от мертвых, начаток умершим бысть: Понеже бо человеком смерть бысть, и человеком воскресение мертвых. Якоже бо о Адаме вси умирают. Такоже и о Христе вси оживут. Кождо же в своем чину: Начаток Христос: потом же Христу веровавши, в пришествии его. И НИЖШЕ: Но речет некто: како восстанут мертви, коим же телом придут; безумнее, ты еже съеши, не тело будущее съеши, но голо зерно, аще случится пшеницы, или инаго от прочих.Бог же дает ему тело. Якоже восхощеть, и коемуждо семени свое тело. И НИЖШЕ: якоже облекохомся во образ перстнаго человека, тако облечемся и во образ небеснаго.
И НИЖШЕ: вострубит бо, и мертви восстанут нетленни, и мы изменимся. Подобает бо тленному сему облещися в нетление, и мертвенному сему облещися в безсмертие.

Вопросиши первое. Вси ли мертви восстанут на Суд;
Отвещаю: Вси наченше от Адама даже до кончины века, тако глаголют Писания: Иоанн гл. 5.
Вси сущии во гробех услышат глас Сына Божия. Тогда сядет на Престол Славы Своея, и соберутся пред Ним вси языцы.

Речеши: что убо глаголет псаломник, во псалме 1:
Не воскреснут нечестивии на Суд.
И Исаия, в главе 26:
Мертви живота не имут видети, ниже врачеве воскресать.
(Пс. 87) И, егда мертвыми твориши чудеса. Или врачеве воскресать и исповедатся Тебе.
Отвещаю на первое. Сугубое может разуметися воскресение, иное в живот, иное же в смерть вечную. Не воскреснут убо нечестивии на Суд, воскреснем в живот. Воскреснут же воскресением в смерть вечную, лишении живота вечнаго. Сие и Христос глаголет:
Мертвии услышат глас Сына Божия, и изыдут сотворшии благая, в воскрешение живота: а сотворшии злая, в воскрешение суда. (Иоанн гл.5.)
Сие и псаломник такожде извещает: псалом 1.
Не воскреснут нечестивии на суд.
И абие прилагает: Ниже грешницы в совет праведных.
Отвещаю на второе. Мертвии (сиречь, душею и телом) не имут живота видети.
Сиесть вечнаго. Ниже врачеве. Всеми своими хитростьми возмогут их воскресити.
Сообразно отвещаю на третие: Егда мертвыми. [душею и телом] твориши чудеса.

(Комментарий: отсутствует лист)

Отвещаю: Вси умирают, и вси воскреснут, но не равно, ибо оставлшиися в пришествие Господне имут умерети, и воскреснути, самим точию изменением, а не падением и восстанием, якоже глаголет Апостол:
Вси убо не уснем, вси же изменимся. И паки: Подобает тленному сему облещися в нетление, и мертвенному сему облещися в безсмертие.
Златоуст Святый сие толкуя глаголет:
Тленное тело есть и мертвенное. Тем же тело убо пребывает. То бо есть облачащееся. Мертвость же и тление погибает. Безсмертию и нетлению нашедшу нань.
Сия Златоуст с прочими.
Обаче мнози суть учителие, иже вопреки глаголют, яко всем всячески, и пред Судом имущым бытии людем умрети предлежит, понеже бо в Адаме вси согрешиша равно. Всех равно непременное речение Божие смерти осуди. И сами естества уставы поучают, яко несть мощно обновлению быти, аще не прежде предварит истление. Сему и сам Апостол научает подобием семени, им же несть мощно возрасти в класы, аще не прежде истлеют. Сие и в Символе на всякий день глаголем:
Чаю воскресения мертвых.
Но како воскресение, или восстание...

(Комментарий: отсутствует лист)

А не класть ячменя, качество точию и образ инее есть в зерне голом, и в зерне возрастшем, тако и телеса человеческая, тажде существом восстанут, качество точию, и образ инее воспримут, еже бо сеется в тление, восстанет в нетление. Зри Тело Христово, не тожде ли воста от мертвых; зри Лазаря: не тогожде ли Христос воскреси;
Тако преобразит и тело смирения нашего во еже бытии тое сообразно телеси Славы Его.
По глаголу Апостолову.

Речеши: Како перст тела человеческаго ветрами развеяна, или человеками раскопана, и разсыпана, или в плинды испечена, или в селитру, потом же в порох, таже и в огнь, и дым претворена, паки в тело человеческо совокупится; И аще случится телу человеческу снедену бытии от зверей или от птиц, или от рыб, и сим такожде от человек снеденым бытии, како приити имать в сове первобытие;
Отвещаю: Не рех ли ти исперва, яко зде веры требе есть, а не любопытства,
От человек сия не возможна. От Бога же вся возможна. (Матфей гл.19)
Слыши что псаломник глаголет:
(Пс. 142.) Поучихся во всех делех твоих, в творениих руку твоею поучахся

(Комментарий: отсутствует лист)

И паки: беседу десятую на послание Павлово к Коринфом второе, на главу пятую.
И паки: нравоучение к Коринфом первое, на главу шестую.
И паки: беседу 11 на послание Павлово к Римляном на главу 6-ю
И паки: нравоучение 25, на послание Павлово к Римляном, на главу четвертуюнадесять.
И паки: беседу десятую на послание Павлово к Коринфом на главу 4:
И на многих иных местах.

Вопросиши четвертое: Кое о младенцах умирающих разумение;
Отвешаю: Ни стари старыми, ниже младенцы младенцами восстанут, старость бо и младенчество есть естества несовершенство: но вси имуть востати в веце юностном от тридесяти лет бываемом. Якоже бо Бог сотвори человека ни стара, ни млада, но совершенна, тако и обновити имать, сице бо глаголет Апостол к Ефесеем в главе четвертой:
Дондеже достигнем вси в единение веры, и познания Сына Божия, в мужа совершенна. В миру возраста исполнения Христова.
От сюду мощно проразумети, яко ниже хром хромым, ниже слеп слепым, ниже горбат горбатым восстанет, вся бо сия суть естества человеческаго несовершенство, и истлению паче а не обновлению прилична суть.

Речеши: Убо не тожде тело восстанет.
Отвещаю: Тожде существом, качество точию и количество ино имущо.

Речеши: Аще человек совершен имать востати, како старость отсецается, ея же ради человек совершен и честен глаголется; старость бо есть честна, якоже глаголет Писание.
Отвещаю: Старость есть честна в настоящем веце, не ради старости, но ради мудрости, и совета, иже в старых мнится быти, или ради первенства, и иных окрестностей.

Речеши: Что убо глаголет Апостол; кождо в своем чину. (Коринф. 1-е послание гл.15.)
Отвещаю: Не разумеется зде чин младенчества или старости, но чин избрания, или осуждения. Чин дел благих, или лукавых. Слыши како сие толкует Златоуст Святый:
Не бо понеже воскресение слышах еси, непщуй всех равная восприятии: Ащи бо в муце, не вси таяжде постраждут, но многоразличне. Колми паче идеже грешнии и праведнии. Болшее разнство будет.

Речеши: что убо глаголет Апокалипсис, гл. 20:
И видех мертвецы малыя и великия стоящым пред Богом.
(Комментарий: в старой нумерации - Слово КВ (22)-е, глава ѮД (64)-я, стих СѮА (261)-й.)

От сих словес мнится яко младенцы младенцами, и дети детми имут востати.
Отвещаю: Зде являет Апокалипсис, неравенство возраста, или сана, владык и велмож великим, рабов же и худородных малыми нарицающь.
Андрей Святый великими нарицает праведных, малыми грешных, инии же великими нарицают гордых, малыми смиренных.

Вопросиши пятое.
Вси ли восстанут в полу мужеском;
Отвещаю: Никакоже, но мужие в мужеском, жены в женском полу востати имут, якоже бо из начала сотвори Бог мужеск пол, и женск, тако и напоследи обновити имать. Свидетель сея истины сам Христос:
В воскресении [рече] ни женятся, ни посягают: но яко Аггели Божии живут. (Матф. Гл 2.,)
Зде о обоем полу глаголет Христос, женитися бо мужем, а посягати женам прилично.

Речеши. Что убо глаголет Апостол: Достигнем вси мужа совершенна. (Ефес. Гл.4.)
Отвещаю: Мужа зде совершенна разумети, не яко вси мужеска полу будут, но яко вси мужеску силу и крепость имут имети. Златоуст Святый сия толкует о инешнем веце, в немже подобает нам быти, не младенцами умом, мужми совершенными, совершенная смыслящими.

Речеше: Аще в небе вси будут якоже Аггели, ни женящееся, не посягающе, то женска полу тамо не будет, Аггели бо полу не имут.
Отвещаю: Будут яко Аггели не отсечением полу, ниже изменением естества, но отсечением женитвы, и плотскаго смешения безсмертием же и животом духовным и равноаггелным.

Вопросиши шестое:
Воскресших телеса возтребуют ли ядения и пития;
Отвещаю: Никакоже. Ядение бо и питие ныне бывает ради подкрепления ослабеваюшия силы человечкия, тогда же прочее не будет ослабления в телесах воскресших по глаголу Павлову:
Сеется в немощи, восстает в силе. (1-е Послание Коринф. Гл. 15.)

Речеши: Христос по воскресении ядаше пред ученики своими;
Отвещаю: Ядение Христово бяше не нужды ради естества человеческаго по воскресении никакоже ослабеващаго: но уверения ради учеником мнящих Дух видети, да покажет им истинное свое естество человеческое от мертвых восставшее: тожде еже прежде с ними ядаше и пияше.

Вопросиши седмое:
Кая качества имуть бытии телес Святых восставших;
Отвещаю: первое: телеса Святых имут быти безстрастна. Всяко бо страстно бывает истлению причастно, телеса же Святых имут быти истления чужда, по глаголу Павлову, 1 послание Коринф. Гл. 15:
Сеется в тление, востает в нетлении.
И аще бы телеса Святых истлению причастна быша: убо бы немощна быша немогуща опретися тлению. Но Павел Святый глаголет: Яко еже сеется в немощи, восстает в силе.
Отвещаю второе: телеса Святых имут быти тонка, Духови подобна, не яко в Духа изменятся, но яко свойства некая духови прилична возимлют. Якоже глаголет Павел:
Сеется тело душевно, восстает тело духовно.
Сиречь духови подобно в крепости, в скорости, в нетлении, в тонкости, и пронзательстве, якоже тело Христово по воскресении прензе и пройде сквозь камень на гробе знаменаный, и сквозь двери учеником заключенным сущым. Но в осязателстве не будут подобна духови, тело бо Христово по воскресении бяше осязательно, якоже сам глаголет:
Осяжите мя и видите, яко дух плоти и кости не имать, якоже мене видите имуща. (Лука. Гл.24.)
Отвещаю третие: телеса Святых имут быти светила, сам бо Христос глаголет:
Праведницы просветятся яко Солнце в Царствии Отца их. (Матф. Гл. 13)
Тожде и Апостол глаголет:
Сеется не в честь, восстает в славе. (1-е послание Коринф. Гл. 16.)
И паки Филипписиом в гл. 3, глаголет:
Преобразить тело смирения нашего, яко бытии сему сообразну телу славы его.

Вопросиши осмое:
Кая качества имуть бытии телс осужденных;
Отвещаю первое: Нетление: безсмертие. Христос бо глаголет:
Идут сии в муку вечную. В ты дни взыщут человецы смерти и не обрящут ея. И вожделеют умрети, и бежит от них смерть. Подобает мертвенному сему облещися в безсмертие.
Отвещаю второе: Тела осужденных будут страдателна, имут во страдати лютее в пламени неугасимом во веки.

Речеши: Апостол глаголет: Вси изменимся: Аще убо осуждении будут страдателни, то како изменятся; страдателство бо и ныне имут, и тогда имети будут.
Отвещаю: Изменятся и они в нетлении, и в страдательстве, еже ныне есть привременное и преходящее, тогда же будет вечное.

Речеши: Нетление бывает, или от естества, или от Благодати, или о Славы. Но ничто же от сих решися может о телесах осужденных, убо нетления не будут имати.
Отвещаю: В осужденных нетление будет, ни от естества, ни от Благодати, ни от Славы, но от правосудия Божия и отмщения, им же бо не присутствует Бог Благодатию, присутствует гневом и отмщением.
Сия суть Знамения последствующая пришествию антихристову, Страшный же Суд предваряющая, сим бо будущым, абие последует Страшный Суд.

О Страшном Суде сия вкратце воспоминаются.

Первое: Страшный Суд имать быти на удоли Иосафатовой, горе Елеонстей прилежащей, близ Иерусалима. Солнце бо глаголет Бог у пророка Иоиля, глава 3: Соберу вся страны и сведу я на поляну Иосафатову. И разсуждуся с ними ту.
Сие и Аггели проедвозвестиша при вознесении Шосподни. [Деяния гл.1:] Се Иисус вознесыйся от вас на небо. Тако и придет имже образом видесте его идуща на Небо.
Вемы же яко Иисус вознесеся от горы Елеонския, ей же прилежит удоль Иосафатова с пространными полями. Вины сего сия мнятся бытии:
Первая: да идеже Христос милость сотвори, тамо и суд сотворит. Милость бо и суд совокупно (Пс. 100) поет псаломний.
Вторая: да идеже Христос уничижен бяше, тамо и прославлен будет.
Третия: да тамо судит, идеже сам судим бяше.
Четвертая: да сама она места, якоже Вифлеем, Вифания, Иерусалим, Голгофа, и прочая будут на обличение неблагодарствия иудейска.
Пятая: да покажется тожде снизшедый иже и возшедый.

Речеши: Како толикое множество рода человеческа наченше от Адама, даже до кончины века на единой удоли вместитися может;
Отвещаю: Апостол глаголет:
Восхищении будем на облацех. В сретение Господне на воздусе. [1-е Солуняном гл. 4.]
Святи убоя коже в живот сем не прилагахуся к земли, тако и тогда далече земли будут инии выше иных по достоинству, вси же одесную Христа на облацех такожде будущаго. Грешницы же якоже в животе сем прилепишася земли, тако и тогда на земли стояще будут, вси же ошуюю страшного Судии.
Второе: Явитися имать на суде знамение сына человеческаго, сиесть Крест святый. Се же триех ради вин.
Первая: На утешении, Христу распятому кланяющихся, и ему сраспинающихся, в иннешнем веце, и крест свой в терпении мнозе за Христом носящих.
Вторая: На посрамление нечестивых вся впреки ныне творящих, наипаче же на обличение иудеев на Кресте Господа Славы распенших.
Третия: Да Яве будет всем, яко Крестом Себе Христос стяжа власть судейскую.
Третие: Книги отверзутся: сиесть явятся всякаго деяния и совести, яже ныне, аки книги затворены суть, тогда отверзутся, и в явление всем придут, по толкованию Андрея Святаго.
Инии глаголют книгу быти, память Божию незабвенных дел человеческих.
Четвертое: Сам Христос Судиею полномощным будет. Иоанн гл. 5:
Отец не судит никомуже: но суд весь даст Сынови, и область даст Ему и суд твории. Яко Сын человечь есть.

Речеши: Убо разделитлися Сын от Отца и Духа Святаго;
Отвещаю: Никакоже: Троицу бо Святую нераздельну веруем быти. Темже и на суд вси три Лица Божественныя быти веруем и исповедуем, ради нераздельности и единосущества. Се же и от Писаний уверяется.
Даниил, 7, 9, 15: Ветхий денми седе на престоле. Иоанн 16. Дух Святый обличит мир о гресе.

Речеши: Отец не судит никомуже, якоже Сам Христос глаголет:
Отвещаю: Не судит никому же сам собою разделно и внимателным гласом, но Сыном, Ему же весь суд даде.

Речеши: Почто убо единому Сынови суд восписуется, аще все три Лица на суд имут быти;
Отвещаю: Сынови единому суд восписуется ради вочеловечения Его, и вольного за ны страдания, да тожде человека праведно осудит иже от сего неправедно судим бяше. К симже суд восписуется Сыну, ради видимаго Его от всех Божественнаго человечества, и внимателне прорицаемаго гласа: Приидете Благословеннии: идети проклятии:

Речеши: Что глаголют Писания, яко кроме Христа, многи судеи имут быти: Апостолом Христос глаголет:
(Матф. Гл.19.) Сядет и вы на двоюнадесяте престолу судмще. Не весте ли яко Святии мирови хотят судити. И ПАКИ: Не весте ли яко Аггелом судити хощем.
Премудрость Соломонова во главе 3:
Праведницы судят языком. Царица южская, и мажие Ниневитстии востанут и осудят род сей. (Матф. Гл. 12.)
Отвещаю: Апостоли, и нецыи Святии имут судити не самовластителным ниже полномощным судом, но сообщителным, и соизволителным похваляюще праведный суд Христов. Сицевым судом имут праведницы судити, не человеком точию, но и аггелом, сиесть демоном, соизволяюще и похваляюще праведное изречение Христово:
Идите проклятии во огнь вечный, уготованный диаволу и аггелом его.
Сице Златоуст, Феодорит, Феофилакт толкуют вышереченные Писания. А еже глаголется яко
Царица южская, и мужие Ниневитстии востанут, и осудят род иудейский.
Зде судех разумеется не свойственне, осудят бо Ниневитяне иудеов делом, а не словом, ниже истязание они бо в проповеди Иониной покаяшася, сии же в проповеди Христовой ожесточени превыша.
Пятое: Суд Христов, не по подобию судом человеческих имать быти. Многа суть разнствия, от нихже и се есть яко на суде Христове, не вся словесы, но многа мыслию обличаема и истязуема имут быти. Обаче правосудное последнее изречение Христа Судии имать быти словесы всем внимателными:
Прииде Благословеннии, и прочая.
Идите проклятии, и прочая.
И падут сии в муку вечную.
Праведницы же в живот вечный.
И сие есть кончина мира, от Писаний Божественных, по елику мощно явленных. Всех же сих основание вера, любопытства истязания отнюд не терпящи. Слыши что глаголет Златоуст в беседе первой:
Видели еси како Апостол укоряет стязание; идеже бо вера, не требе есть стязания. Идеже ничтоже подобает испытовати, кая потреба стязания. Стязание веры есть разорительно, ибо истязуяй не у обрете, истязуяй уверити не может: Сего ради глаголет: не упражняемся о истязаниях. Зане аще истязуем. Несть се вера, вера бо упокояет помышление. И НИЖШЕ: Да не внимаем убо стязаниям, вернии ибо сего ради нарекохомся, да не сумнительне глаголемым веруем, да ничимже сомнимся: аще убо человечкая быша глаголемая. Подобаше та истязо ати. Ащели же Божия. Почитати точию сия подобает, и веровати им. Ащели же не веруем, ниже яко Бог есть уверуем. Как обо веси яко Бог есть вины о том истязуя. Се первое знамение ведети Бога еже веровати всем яже глаголет, кроме знамений, и указаний. И НИЖШЕ: Верою бо вси древнии похвалени быша, и без сея вся растлишася.

ГЛАВА ЧЕТВЕРТАЯНАДЕСЯТЬ. Окончание книги.

Сия пишущие о кончине мира, кончим и мы сию книжицу словесы верховного апостолов Петра Святаго,
Неухищренным баснем последоваше, сказахом вам силу и пришествие Господа нашего Иисуса Христа. И ПАКИ: Имамы известнейшее пророческое слово, ему же внимающе, яко светилу сияющу в темном месте, добре творите, дондеже день озарит, и денница возсияет в сердцах ваших.
Сему светилу в темном месте неведения человеческаго сияющу, сиесть Писанию пророческому и Евангельскому, имаи по силе скудоумия прилежно внимающее, ухищренныя же басни, и хитросплетенная риторских словес велеречия отвергшее. От самых единех Писаний Божественных, сказахом вам силу и пришествие Господа нашего Иисуса Христа, и кончину мира, в нюже приити имать началнейший супостат Христов, человек греха, и сын погибели, превозносяй себе паче всякаго глаголемаго бога или чтилища по глаголу Павлову. В кое же время определенное приити имать, отнюд не вемы. То едино вемы, яко при кончине мира.

Речет некто: Ныне уже кончина мира есть, иные последнее время, вси бо тако вещают, вси глаголют лета сия в няже видехом злая, последняя быти. Сие же утверждается и от Писаний: Иоанн Святый апостол [1-е послание гл. 2.] глаголет: Дети последняя година есть.
Такоже и Павел апостол, [послание Галатом гл. 4.] вещает: Егда прииде кончина лета, посла Бог Сына Своего Единаронаго.
И паки: [1-е Коринфяном гл. 10.] Сия же вся писана быша, в научение наше, на няже концы век достигоша.
Понеже убо ныне последняя времена, и кончина мира, Яве есть, яко уже прииде в мир истинный антихрист, при кончине мира прийти хотящий.
Отвещаю первое: От лютости нынешних времен, несть мощно поистине познати пришествие истиннаго антихриста: вся бо сия скорби и тесноты, яже ныне видим, якоже суть, глади, огни, брани, кровопролития, наводнения, сухости, безплодствия земли, ненависти между лжебратиею, гонения, междоусобныя брани. Вся сия и сим подобная бяху и прежде. Паче же лютейшая воистину бяху времена, егда первенствующая Церковь толь много излия крови при Нероне, Максимиане, Диоклетиане, Дометиане, Траиане, Иулиане, и прочих гонителех и мучителех. Не воспомяну иконоборныя ереси, колика претерпе зла, Церковь Православная за иконы Святыя. Вся же сия не быша знамением, являющим пришествие антихриста истиннаго, разве точию предтечев антихристовых.
Темже ниже нынешних времен бываемая скорбь, и теснота, может быти истинным и неложным знамением антихристова пришествия. Общая бо всем временем не могут быти знамением определителным единому времени. О сем ясно сам Христос Спаситель глаголет: [Матфей, гл. 24.] Услышати же имати брани. И слышания бранем, зрите да не смущаетеся, подобает бо всем сим быти. Но не тогда есть кончина.
Отвещаю второе. Писания апостольская выше реченная: Дети последняя есть година. И ПАКИ: егда прииде кончина летом, посла Бог Единароднаго Сына Своего.
Сия и тем подобная от Писаний Божественных свидетельства, аще по писмени и просторечию разсуждати будем, Яве увидим, яко кончина наста абие при первом Спасителя нашего в мир сей пришествии: тогда бо по глаголу Апостолову, посла Бог Сына Своего Единороднаго раждаемаго от жены, егда прииде кончина летом. Тогда и Апостол Святый Иоанн живущее на земли, писаше, учаше, и глаголаше: Дети последняя есть година.
И сами дние апостолстии последними днями нарицаются в Деяниях Апостольских в главе 2. Идеже Петр Святый глаголет: Се есть реченное пророком Иоилем: и будет в последняя дни [глаголет Господь] излию от Духа Моего на всяку плоть.
Видиши ли последняя времена откуду имут свое начало. Тем же убо егда услышиши или обрящеши в Писаниях о последнем времени настоящих лет, или о последней године свидетельства: не мни быти определенное некое время, кончину мира являющее, но разумей сицевая Писания, о времени неопределенном.
Ведати бо подобает, яко сугубо может бытии разумение о времени. Ино время есть определенное, его же предел ведом есть всем, тако всякое лето, всякий месяц, всякий день, определенна суть времена: всех бо сих вемы кончину определенну. Ино время есть неопределенное, его же кончины отнюдь не вемы. Тако егда видим человека состарившегося, глаголем, яко сему старцу последнее время есть, но неопределенное: не вемы бо известно, когда состаревшийся кончину воспримет. Сообразнее и зде разумети подобает.
От Рождества Христова, и от времен апостольских, абие наста кончина летом, и последняя година, якоже глаголют Апостоли: Но та кончина и последнее время есть весма неопределенно, предел бо его никому же сведом есть точию единому Богу, по неложному словеси Господню:
О дни же том и часе никтоже весть ни аггели, ниже Сын, токмо Отец Един. (Матф. Гл.13.)
Тем же сосуд избранный Павел Святый : видя Селунянов мятущихся и близко день Господень настояти непщующих, твердо увещает их глаголя: [ 2-е послание Солуняном: гл. 2.].
Молим вы братие не скоро подвизатися вам от ума ни ужасатися, ниже Духом, ниже словом, ни посланием, яко от нас посланным. Аки настоят день Христов, да никтоже вас прелстит, ни по единому же образу.
О последней же године и кончине летом Апостолами реченной, нецыи от благоразумных сице умствуют: Весь век мира сего наченше от Адама даже до ныне, изобразуется веком жития человеческаго. И якоже человек малый мир, гречески ΜΙΚΡΟΚΟΣΜΟΣ, имать три степени, юность, мужество, и старость. Сице и великий свет, гречески ΜΙΚΡΟΚΟΣΜΟΣ, имать своя три степени, яже суть три закона: первый закон естества, от Адама даже до Моисея, и се есть юность мира. Вторый закон моисейский, от Моисея даже до Христа, и се есть век мира мужеский, или новая Благодать. И се есть мира старость, и последняя година: о ней же глаголет Иоанн Святый: Дети, последняя година есть.
Еще нецыи инем образом разделяют сие мира великаго и малаго подобие:

Седмь степеней имать век человеческий, по совершеннейшему мудрых разделению:
Первое, младенчество и безглагольство:
Второе, детство:
Третие, возраст:
Четвертое, юность:
Пятое, век мужеск:
Шестое, подстарелость:
Седмое, старость:
Сим седмим степенем века человеческаго, согласует и век мира сего.
Первое, от Адама даже до потопа бяше мира младенчество, и безглагольство:
Второе, от потопа даже до столпотворения и разделения языков, бяше мира детство:
Третие, от разделения языков и от рождества Авраама, даже до Моисея, бяше мира возраст:
Четвертое, от Моисея все время судей Израилевых, даже до царей Израилевых, и до Самуила бяше мира юность:
Пятое, от Самуилавсе время царей Израилевых и Иудиных, даже до переселения Вавилонскаго, бяше мира век мужеский:
Шестое, от переселения Вавилонскаго, все время князей, и священников иудейских, даже до Христа бяше мира век подстарелый:
Седмое, от Христа даже до Страшнаго Суда, наста мира старость, и последняя година и кончина лета, якоже глаголют Писания.

Но рех уже яко сия кончина летом и последняя година, всячески есть неопределенна: и якоже человеческия старости время рекох быти неопределенно, никтоже бо весть, когда состаревшийся умрет: тако и старость мира сего есть весма неопределенна. Кто бо известно знати может о ея пределе; тайна сия от века сокровенна кому открыся; Сего ради истина Христос глаголет:
(Матфей гл. 13.) О дни же том и часе никтоже весть. Ни аггели небеснии, ниже Сын [по человечеству разумей] токмо Отец Мой Един. Яко же бо бысть во дни Ноевы, тако будет и пришествие Сына Человеческаго, яко же бо бяху во дни потопа ядуще и пиюще, женящеся и посягающе до негоже дне Ное вниде в ковчег, и не уведеша, дондеже прииде вода и взять вся. Тако будет и пришествие Сына Человеческаго. Бдите убо, яко не весте в кий час Господь ваш приидет. Сие же ведите, яко аще бы ведал дому владыка в кую стражу тать приидет, бдел убо бы. И не дал бы подкопати храма своего. Сего ради и вы будите готови, яко воньже час не мните Сын Человеческий приидет.
Видиши ля яко готовыми быти повелевает Христос, и бдящими на пришествие Свое, а не любопытными, ниже сокровенну тайну взыскателне истязующими. Мерзостен бо есть вояк пред Богом испытуяй неиспытныя Судьбы Божия. Ибо аще царей земных тайны со всяким опаством храними бывают, да от простонародных людей познани не будут, и в явление приидут. Якоже глаголет Аггел. Товии во главе 12: Тайну Цареву хранити Благо есть.
Кольми паче тайна Царя царствующих, и Господа господствующих хранение любит, испытания же ненавидит.
(Пс. 63.) Исчезоша испытающии испытания. Глаголет псаломник. Сего ради увещает нас Дух Святый в книгах Иисуса Сирахова, во главе 3:
Вышших себе не ищи. И креплщих себе не испытуй, яже ти повелена суть. Сия разумевай: несть бо ти потреба тайных. Во избытцех дел своих не распытуй, вящша бо разума человеческаго познана ти не суть. Многи бо прелести мнение их, и мнение лукаво погуби совесть их.
Сия и Павел великий глаголет к римляном, во главе 11: Не высокомудрствуй, но бойся. И ПАКИ: Не будите мудри о себе.
О любопытных же взыскателех кичением разума дмящихся глаголет [к римляном во главе 1:]
Утишася помышлении своими. И омрачися неразумное их сердце, глаголющия мудри быти, обкродеша.
Таже невежество их хотя посрамити глаголет: Аще кто мнится ведети что, не у что разуме. Якоже подобает разумети. (1-е послание Коринф. Гл. 1)
Внемли что и Христос к любопытным невеждам, Писания Божественныя не по правому разумению толкующым глаголет: (матф. Гл. 22.) Прелшаетеся не ведаше писания ни Силы Божия.
Коль добро, и коль красно есть имети разум, и стяжати мудрость, яже честнейше есть злата и сребра и камения многоценна, якоже глаголет Писание Святое. Но аще разум есть непокорив Церкви Святой, учению и догматом православным, несть се разум, но буйство, и юродство вселютейшее. Ясно о сем глаголет Иаков Святый Апостол во главе 3:
Аще зависть горьку имате, и рвение в сердцах ваших, не хвалитеся не лжите на Истину. Несть сия премудрость свыше низходящая, но земная, душевная, бесовская. А яже свыше премудрость перве убо чта есть, потом же мирна, кротка, благопокрлива, исполнь мати и плодов благих, несуменна и нелицемерна.
Темже Златоуст Святый кичение разума уподоблажает стремлению конску: Якоже бо конь свиреп жестоковыйный и неукротим, аще броздами и уздою крепко не востягнется и всаднику своему непокорив пребудет, велию воистинну наносит пагубу. Тако и разум правому Отцев Святых учению, и догматом Церкви Святыя православным непокорив, велия раждает бедства, рвения, раздоры, смятения, и вселютейшия пагубы.
Сицевыми разума кичением недуговаху древле и ныне люте болезнуют безбожнии иудее не покаряющиися речениям пророческим, ихже и обличает жестоко Стефан Святый Апостол, в Деяниях Апостольских, в главе седмой, глаголя:
Жестоковыйнии и необрезании сердцы и сушесы, вы верно Духу Святому противитеся якоже отцы ваши. Тако и вы.
Сицевыми бяху, и ныне суть еретики и отступники Церкви Святыя, иже кичением разума, аки конским невоспященым стремлением расторгшее пленницы закона Божия, и иго определений Церковных и Соборных отвергшее, самыми лукавыми делы исполняют псаломская словеса: Расторгнем узы их, и отвержем от нас иго их. (Пс. 2)
Но что последует; Живый на Небесех возмется им и Господь поругается им. Тогда возглаголет к ним гневом своим. И яростию своею смятет я.
Понеже убо сия тако суть, аще кто желает спасения вечнаго, аще кто мнится быти истинным сыном Церкве Православныя, и в ней аки в ковчезе Ноеве, вечнаго хощет угонзнути потопа, аще кого ужас обдержит страшнаго онаго анафемы грома, от Богоносных облаков, Соборов Святых гремящаго, душу же и тело непокорных поражающаго. Сицевому весма предлежит недуг свой врачевати, и жестоковыйное разума кичение, определением догматов церковных, аки игом сладчайшим Христовым обременяти. Зверообразное же непокорство, броздами законов православных укрочевати, и всячески Церкви Святой Православной Восточной аки приснолюбимому чаду Матери своей во всем повиноватися, по заповеди Господней: Чти Отца твоего, и матерь твою. И якоже глаголет Павел Святый: [1-е Послание Коринф: гл, 10.] Подобает пленити разум в послушание веры Христовы.
Аще же кто Церкви Святой Восточной непокорив есть, и презрев ея Божественное Духом Святым наставляемое правление, своему суемудрствию, и паучиному мнению последует, сицевый пренебрег твердаго камена полагает:
На песку свое здание. Ему же припаде река, и возвеяша ветри, и абие падеся. И бысть падение его велие.
Сицеваго сама Истина Христос нарицает диаволом между благопрорастителными правых учений Семены, плевелы всеявшим. Отцы же Святи таковаго нарицают волком пагубным, ризу невесты Христовыя Церкви Святой исткану от вышняго Богословия люте терзающым, и что более имам глаголати; мечь от уст Христовых исходящий сицеваго аки уд согнивший и смердящий, от тела Церкви Святыя отсецает.
Аще кто Церквоь преслушает, буди тебе яко язычник и мытарь. (Матф. Гл. 18.)
Тем же убо мужие братие, чада рода Авраамля по обетованию, отвергше любопытное суемудрие, от диавола коварства нам наносимое, потщимся всячески согласием и единомыслием Триипостасное прославляти Божество, ведущее яко Бог вселяет единомыленныя в дому Своем Небесном, о сем и повседневныя к Богу возсылаем мольбы, вопиюще:
И даждь нам единеми усты, и единем сердцем, славити и воспевати пречестное и великолепное Имя Твое.
Кая бо может бытии благоприятнейша Богу песнь, якоже десятострастная гусль согласием верных бряцающая, еяже аки своея любимыя мусикии требует от нас Дух Святый, у псаломника во псалме 150: Хвалите Его во псалтири и гуслех. Хвалити Его во струнах и органех.

Се есть в согласии сердец единомысленных. О сем молит нас и Павел Святый, зри с коликою ревностию.
(К Филиппиеиом, глава 2.) Аще кое утешение о Христе, или аще кая утеха любве, аще кое общенее Духа, аще кое милосердие и щедроты, исполните мою радость. Да тожде мудрствуете, тужде любовь имуще единодушни, единомудрени. Ничтоже по рвению или тщеславию, но смиреномудрием друг драга непщующе преимеюща себя.
Тожде и Коринфяном в первом Послании в главе первой глаголет:
Молю вы братие именем Господа нашего Иисуса Христа, да тожде глаголете вся. И да не суть в вас распри. Да есте же утверждении в том же разумении, и в той же мысли.
О сем единомыслии верных своих и Христос Спаситель молит Предвечнаго Отца Своего, глаголя:
(Иоанн гл. 17.) Отче Святый соблюди их во имя твое, их же дал еси мне да будут едино, яко же и мы.
Се бо есть воистину образ, и подобие Триипостаснаго Божества, егда верни в любви, и единомыслии пребывают, яко же бо Бога аще и в трех лицах веруем прославляется, обаче един есть Бог ради единаго существа, и хотения. Тако и верни Божии, аще и различни суть лицами, обаче аще соединяются волею единомыслием, и хотением во всех, иже ко спасении. От коль изрядный не себе носят образ и подобие Триипостнаго Единосущнаго Божества. Ему же да будет, Слава, Честь, и поклонение, от всякаго колена Небесных земных, и преисподних, в веки несочтенныя, аминь.

От печали многия и туги сердца. Написах вам многими слезами, не яко да оскорбитеся, но любовь да познаете. Юже имам изобильно к вам. (К коринфяном. 2. Глава 2.)

Сия вся Богомудрому Церкви Святыя Православнокафолическия Восточныя вручаю. Готов исправити аще в чесом прегреших.

Декабрь. 2013 год